Atënë so azo ahunda
Satan Zabolo ayeke na ngangu ti diko ye so ayeke na yâ li ti zo?
Atâa so e lingbi pëpe ti fa tâ biani wala Satan ayeke na ngangu ti sala tongaso wala pëpe, aye atara ti fa na e so atâa Satan ni mveni wala ayingo sioni ti lo ayeke na ngangu pëpe ti diko ye so ayeke na yâ li ti e.
Bâ gi a-iri so a mû ni ti fa peko ti aye so Satan ayeke sala. A hiri lo Satan (Wakengo tënë), Zabolo (Zo ti dikongo sioni tënë na ndo zo), Ngbo (so ti tene nga Wahanda), na Wamvene (Job 1:6; Matthieu 4:3; Jean 8:44; 2 aCorinthien 11:3; Apocalypse 12:9). Mbeni iri ni oko pëpe afa so Satan ayeke na ngangu ti diko ye so ayeke na yâ li ti zo.
Me nde na Satan, Bible afa Jéhovah Nzapa tongana Zo so “atara bê ti azo.” (aProverbe 17:3; 1 Samuel 16:7; 1 Chronique 29:17). Mbeti ti aHébreu 4:13 atene: “Ye oko so Nzapa aleke alingbi honde tele ti lo na lê ti Lo pëpe; me ye kue ayeke na gigi senge na a honde pëpe na lê ti Lo so tënë ti e ayeke na tïtî Lo.” Ni la, a yeke ye ti dongo bê pëpe tongana Jéhovah amû na Molenge ti lo Jésus ngangu ti diko ye so ayeke na bê ti zo. Jésus so a zingo lo na popo ti akuâ atene: “Mbi yeke Lo so agi bê na bibe ti azo; na fade Mbi futa i oko oko kue alingbi na kusala ti i.”—Apocalypse 2:23.
Bible atene pëpe so Satan alingbi ti gi bê na bibe ti azo. Ye so ayeke kota tënë mingi teti so bazengele Paul adë bê ti e so aChrétien ‘ahinga mayele ti Satan’. (2 aCorinthien 2:11). Ni la, a lingbi e sala mbito pëpe ti pensé so Satan ayeke na mbeni kota ngangu mingi so e hinga ye oko dä pëpe.
Ye oko, ye so aye pëpe ti tene so Wato ti e alingbi pëpe ti hinga awokongo ti e. Satan asala kusala teti angu mingi mingi awe ti manda ye na ndo salango ye ti azo. Tongana lo ye ti hinga amara ti salango ye wa e yeke na ni, ti bâ mara ti ngia wa e yeke tomba pekoni, wala ti mä aye wa e yeke sala tënë na ndo ni, na ambeni ye tongaso, a hunda pëpe ti tene lo hinga kozoni kue ti diko ye so ayeke na yâ li ti zo. Na nga, gi na bango lê ti e na salango ye ti tele ti e, lo lingbi ti hinga ye so e yeke pensé na ndo ni wala abibe so e yeke na ni.
Me mingi ni, Satan ayeke sala kusala na a-oko ye so lo sala na kusala giriri na yâ yaka ti Eden, so ti tene mvene, handa, na atënë so gunda ni ayeke tâ ye pëpe (Genèse 3:1-5). Atâa so a hunda pëpe na aChrétien ti sala mbito ti tene Satan ahinga ye so ayeke hon na yâ li ti ala, ala yeke biani na nda ti tënë ti gi bê ti ala na ndo abibe so Satan alingbi ti tara ti yôro na yâ li ti ala. Lo ye si ‘bibe ti aChrétien afuti, na tâ tënë aduti pëpe na yâ ala’. (1 Timothée 6:5). Ni la, bê ti e ayeke dö pëpe ti bâ so sese ti Satan ayeke tuku gbâ ti asango na aye ti ngia so ayeke ti futi bibe ti zo. Ti luti na gbele ye ti ngangu so, a lingbi aChrétien abata bibe ti ala na yungo “casque ti salut”. (aEphésien 6:17). Ala yeke sala tongaso na yorongo na yâ li ti ala atâ tënë ti Bible nga ti kpe ti ga ndulu gi senge senge tongaso na aye ti bubango zo, so a yeke wara na yâ sese ti Satan.
Satan ayeke tâ mbeni ngangu wato biani. Ye oko, a hunda pëpe na mbage ti e ti sala kota mbito ti lo wala ti ayingo sioni ti lo. Jacques 4:7 adë bê ti e tongaso: “I ke zabolo, na fade lo kpe i.” Tongana e bata wango so, fade e yeke wara lege ti tene so Satan ayeke na ngangu na ndo ti e pëpe, legeoko tongana ti so Jésus atene ni giriri.—Jean 14:30.