A yeke gi mbeni ye so azo asala lakue wala petengo goro?
A YÂ ambeni kota da-mbeti ti Pologne, awamandango mbeti ayeke bungbi ka nginza ti vo aye ti sala matabisi na awafango ye ti ala, na beku ti wara nzoni note na kizama ti ala. A yeke ye ti dongo bê pëpe so mbeni maseka Chrétien so iri ti lo ayeke Katarzyna aluti na gbele mbeni kpale. Lo hunda tele ti lo: “Mbi mû pata ni wala pëpe?” Akamarade ti lo atene na lo: “A yeke ye so e yeke sala ka lakue. Ye ti sioni alingbi ti si na mo pëpe. Ye oko, mo lingbi ti wara anzoni ye mingi, tongaso, ngbanga ti nyen mo yeke gi bê ti mo?”
Katarzyna atene: “Mbi yeda so na kozo ngu ti mandango mbeti ti mbi, mbi mû mbage lani na bungbingo nginza ni. Gi na pekoni, mbi bâ so, na lege so mbi yeke mû mbage na petengo goro so Bible ake.” Lo dabe lo na aversê so afa na gigi so Jéhovah ake na ngangu petengo goro (Deuteronome 10:17; 16:19; 2 Chronique 19:7). Katarzyna atene: “Mbi hinga tongana nyen a yeke tâ ngangu pëpe ti tï na gbe ti ngangu ti akamarade. Mbi kiri mbi bi bê na ndo ni, na tongaso, mbi kiri lâ oko pëpe ti mû mbage na mara ti ngobo ti salango ye tongaso.” Na yâ ti angu ota so ahon, atâa so ambeni wamandango mbeti ni ahe lo na ngia, lo lingbi ti tene na ala so lo yeke mû mbage ti lo pëpe na bungbingo pata ti mû “matabisi” so ndali ti atënë ti mabe ti lo so aluti na ndo Bible.
Ambeni atene so Katarzyna ayeke zo ti kion nga zo so aye ti duti nde na tanga ti azo. Katarzyna atene: “Mbi na ambeni mingi e ngbâ lakue ti mä tele pëpe. Na mbeni mbage, azo mingi ayekia bango ndo ti mbi, na ye so azia ngia na bê ti mbi.” A hinga lani Katarzyna tongana oko ti aTémoin ti Jéhovah so ayeke sala kusala na akpengba-ndia ti Bible na yâ fini ti ala ti lâ oko oko.