Mungo Gloire na Nzapa na yâ Ahoto ti Philippines

Tongana mo bi bê so kodoro ti Philippines ayeke mbeni bungbi ti azoa, lege ni la. Me a yeke nga mbeni kodoro ti ahoto so apika bê. Ti aTémoin ti Jéhovah, fango tënë na yâ agbata nga ando so ayeke na gere ti ahoto ni ayeke ngangu pëpe nga alë lengo. Me ti ando so ayeke na tele ti ahoto ni, a yeke nde mingi.

APENDERE hoto ti kodoro ni ayeke nde mingi na ayanga ti ngu so asi singo na mbutu, ambamba ti ngu ti ingo, akete kodoro ti awagbungo susu, nga agbata ti apopo-hoto ti zoa ni so akusala ayeke dä mingi. Ahoto ni aduti nga mbeni ngangu kpale teti fango “tene-nzoni” ti Royaume ti Nzapa.​—Matthieu 24:14.

Azoa ti Philippines ayeke na mbeni ndo so ahoto ti wâ ayeke dä mingi, na so sese ni ayeke yengi. Sese ni aba bango na a sala si ayongoro hoto amû yâ ti azoa so akono. Azoa ahon 7 100, so ayeke na Philippines, ayeke na do ti Ceinture de feu ti Pacifique. Tongaso, ahoto ti wâ amû ndo ni, ye so asala nga si ahoto mingi aduti dä. Mara ti sioni ndo tongaso asala si a yeke ngangu ti tingbi na azo so alango kâ. A yeke ngangu ti si na ala teti alege so akutukutu alingbi ti hon dä ayeke mingi pëpe.

Atâa so kue, aTémoin ti Jéhovah abâ nene ni ti ndu “azo kue.” (1 Timothée 2:4) Ni la, aTémoin ti Philippines ayeke sala ye alingbi na tënë ti Esaïe 42:11, 12: “Zia ala dekongo na li ti ahoto. Zia ala mû gloire na L’Eternel, na zia ala sepela Lo kâ na yâ azoa.”

A to nda ti sala ngangu ti fa tënë na azo ti ahoto ni a sala angu 50 na ndo ni awe. Na peko ti Use Bira so Amû Sese Kue, amissionnaire amû wâ na kusala ni. Azo ti ndo ni mingi ayeda na tâ tënë ti Bible, nga ala kiri akangbi tâ tënë so na akete kodoro yongoro na li ti ahoto ni. Aye ti nzoni aga na pekoni. Na tapande, na yâ ahoto ti Cordillère centrale na mbage ti banga ti Luçon, a yeke wara awafango nzo tënë ahon 6 000. Mingi ti ala ayeke azo ti kodoro ni, tongana a-Ibaloi, a-Ifugao, nga aKalinga.

Me, ando so a yeke ngangu ti si dä angbâ lakue na yâ ahoto ni. A glisa pëpe azo ni kâ. A si na ambeni tongana nyen, nga ala sala nyen?

Tâ Mabe Amû Place ti Tënë ti Akotara

Na zoa ti Luçon, so ayeke na mbage ti banga, aTinggian alango na yâ ahoto ti kete kodoro ti Abra. Peut-être iri ti ala aga na lege ti tënë tinggi na yanga ti Malais, so aye ti tene “hoto.” A lingbi na ni biani! Azo ni atene nga so iri ti ala na yanga ti kodoro ti ala ayeke Itneg. Ala mä na bê na mbeni nzapa so iri ti lo ayeke Kabunian. Atënë ti toro andu fini ti ala mingi. Na tapande, tongana mbeni zo aye ti gue na mbeni ndo si lo ngasi, hange sioni ayeke ga! A lingbi lo ku ngbonga use si sioni so ahon.

Na ngu 1572, azo ti Espagne aga na vorongo ti aCatholique, me ala fa pëpe tâ vorongo ti aChrétien na aTinggian. Ala so aga aCatholique angbâ lakue ti mä na bê na Kabunian nga ti mû peko ti atënë ti akotara ti ala. A yeke gi na yâ angu so ato nda ni na 1930, tongana aTémoin ti Jéhovah ato nda ti ga na tënë ti Royaume na yâ ahoto kâ, si tâ tënë ti Bible asi na azo so. Ngbele ye kâ, aTinggian mingi ti bê ti mbilimbili ato nda ti mû gloire na Jéhovah “na li ti ahoto.”

Bâ tapande ti Lingbaoan so ayeke giriri mbeni mokonzi ti mbeni kete mara na ndo ni, na a yekia lo mingi. Ngobo ti salango ye ti aTinggian alï lo ngangu. “Mbi mû lani peko ti asalango ye ti aTinggian na bê ti mbi kue. Tongana a fâ mbeni zo, e yeke dodo na peko ti lungo kuâ ni, nga e pika ambeni lê ti wen so atoto ngangu. E mû nga asandaga ti nyama. E mä na bê na Kabunian, na mbi hinga lani pëpe Nzapa ti Bible.” So kue, atâa so lo yeke Catholique ti yanga.

A-Témoin ti Jéhovah aga afa tënë na ndo ni. Ala tingbi na Lingbaoan na ala wa lo ti diko Bible. Lo dabe lo: “A yeke lani Bible si afa na mbi biani so Jéhovah ayeke tâ Nzapa.” Na pekoni, mbeni Témoin amanda na lo Bible, na lo mû desizion ti sala na tâ Nzapa. Lo zia angbele salango ye ti lo, nga na kua ti lo ti mokonzi ti kete mara. Ye so azia ngonzo na bê ti prêtre ti kodoro ni nga na angbele fon lo. Me Lingbaoan aleke lani na bê ti lo ti mû peko ti atâ tënë so lo wara na yâ ti Bible. Fadeso lo yeke ancien.

Alango Mbasambala na Abï Omene

Atâa so a yeke fa tënë lakue na ambeni mbage ti Abra fadeso, a yeke tongaso pëpe teti ambeni ndo so ayo. A ninga kete awe, a sala ngangu ti si na mbeni oko ni. A-Témoin 35 ato nda ti gue ti fa tënë na mbeni territoire so ayeke ti ala pëpe na Tineg, Abra. A fa tënë na ndo so pëpe teti angu 27.

A-Témoin so ague kâ na gere ti fa tënë teti alango mbasambala. Tara ti bâ mo mveni na hongo na ndo ti agbagbara so a sala na kamba, na angu so alï mingi, nga na tambelango na akungba na ndo go ti mo na li ti ahoto teti ngbonga mingi. So kue gi ti fa nzo tënë na azo so ayeke mä ni lakue pëpe! Voyage so ahunda ala ti lango fani osio na gigi.

Tongana akpengba Témoin so ague na tambela, ala gue nga na kobe ti ala, me ala lingbi pëpe ti gue na kobe teti voyage ni kue. Me so ayeke kpale pëpe, teti so azo ni kâ ayeke na ngia mingi ti mû kobe na place ti ambeti so akangbi na ala. A-Témoin ni awara gbâ ti kobe ti yaka, susu, nga na nyama ti lekpa. Atâa so akpale ayeke dä kete, aita ni atene: “Kota ngia so e wara akanga ndo ti akpale ni.”

Teti alango mbasambala, awakua so afa tënë na akete kodoro baleoko, ala kangbi abuku 60, apériodique 186, abrochure 50, nga na atract mingi. Ala fa tongana nyen a yeke manda Bible na abungbi ti azo 74. Na gbata ti Tineg, akota zo ti kodoro ni ahunda ti tene a sala mbeni bungbi ti kongregation. Azo 78 aga, so na popo ni a wara mingi ni amaître na aturugu ti lapolisi. E sambela ti tene ambeni Tinggian mingi ahon abungbi ande ti “dekongo” na ti sepela Jéhovah na li ti ahoto.

Mbeni Ye So Ayeke Nzoni Ahon Lor

Yongoro kâ na mbage ti mbongo ti Philippines, a yeke bâ ambeni zoa so azo ti Espagne awara lani lor dä. Ni la a di iri ni Mindoro, ndulu tënë teti mina de oro na Espagnol, wala “ndo ti gbotongo lor.” Me fadeso a yeke wara mbeni ye ti nzoni ahon lor na yâ azoa so: azo so aye ti voro tâ Nzapa, Jéhovah.

Ndulu na azo 125 000 ti kodoro ni, aMangyan, alango na Mindoro na yâ gbako so a yeke ngangu ti si dä. Ala yeke na bezoin ti ye mingi pëpe, ala tingbi na ambeni zo nde gi ngoi na ngoi, nga ala yeke na yanga ti kodoro ti ala mveni. Mingi ti ala avoro anzapa ndenge na ndenge, nga ala mä na bê na ayingo ti ndagigi.

Tongana kobe wala ambeni ye nde atia ala, ngoi na ngoi ambeni Mangyan oko oko ague na yanga ti ngu ti gi kua. A yeke lani tongaso teti Pailing, so ayeke ti kete mara ti Batangan na popo ti aMangyan. Lo kono lani na popo ti mara ti lo na yâ agbako ti hoto, na lo yeda na atënë ti mabe nga na asalango ye ti aBatangan. Mingi ni, ala yeke yü gi andulu mapia. Ti wara nzoni kongo le-kobe, lege ti vorongo ti aBatangan ahunda ti tene azo ni afâ mbeni kondo, ala zia mênë ni ayuru na yâ ngu na ngoi so ala yeke sambela.

Pailing ayeke sala ye so mbeni pëpe. Ngbanga ti nyen? Tongana lo ga lani na yâ akodoro so ayeke na gbe ni, lo wara kua na yâ asewa ti aTémoin ti Jéhovah. Mbeni oko ti asewa so afa tâ tënë ti Bible na lo. Lo yeda na ni nga lo bâ ngele ti mandango ye na ndo ye so Jéhovah aleke ti sala teti azo nga teti sese. Ala leke ti tene lo gue na ekole, na lo manda Bible. Na ngu 24, Pailing awara batême tongana Témoin ti Jéhovah. Na ngu 30, lo yeke na da use ti kota da-mbeti, na lo sala si ekole ni aga territoire ti lo. Fadeso ala hiri lo Rolando (oko ti a-iri ti azo ti kodoro ni).

Tongana mo tingbi na Rolando, mo yeke bâ mbeni wakua so ayü bongo nzoni, na ngia na yanga. Lo sala kusala tongana wakua ti ngoi kue nga serviteur ti mungo maboko na yâ oko ti akongregation ti Mindoro. Ade ti ninga pëpe, Rolando akiri na yâ ahoto, pëpe ti mû mbage na aye ti akotara ti aBatangan, me ti kangbi na ala atâ tënë ti Bible so amû fini.

Ala Ye ti Wara Da ti Royaume

Kete kodoro ti Bukidnon, so nda ti iri ni na yanga ti Cebuano aye ti tene “Azo ti Ahoto”, ayeke na ndo Mindanao, mbeni zoa na mbongo. Ahoto, apopo-hoto so ngu asua dä, nga ando so ayeke kpangbala ayeke dä mingi. Nzoni sese ni ayeke lë ananas, nzö, kawa, loso, nga na bule. Akete mara tongana aTalaandig nga na aHigaonon ayeke lango kâ. A lingbi azo so nga ahinga Jéhovah. Ade ti ninga pëpe, ndulu na gbata ti Talakag, mbeni pendere lege azi ti sala tongaso.

A-Témoin so ague kâ awara dê, me nga azo so ayamba ala nzoni. Azo ti kodoro ni atene ala mä na bê na Nzapa ti ngangu ahon kue, Babâ ni, me ala hinga iri ti lo pëpe. Teti so mingi ni ala yeke na yâ gbako, a yeke lani ti fani oko ni ti tene ala tingbi na aTémoin ti Jéhovah. A fa na ala iri ti Nzapa, nga pendere ye so lo leke ti sala na lege ti Royaume ti lo. Tele ti azo ni anzere, na tongaso a leke ti kiri ti sala avizite na kete kodoro ti ala.

Na peko ti avizite mingi so a sala, azo ti kodoro ni amû mbeni ndo teti “da” ti aTémoin ti Jéhovah. Aita ayeda na ni na ngia. Ndo ni ayeke lani na li ti kete hoto so ayo ahon atanga ni kue na mbage kâ, na lege ayeke na gbe ni. A leke da ni na keke, bambu, nga na akugbe ti mburu. A hunzi ti leke ni na yâ anze ota na alango baleoko. A zia mbeti “Da ti Royaume ti aTémoin ti Jéhovah” dandara na gbele da ni. Bi bê kete si, a leke Da ti Royaume kozoni si kongregation abâ gigi!

Ngbele ye kâ, mbeni ancien so ayeke wakua ti ngoi kue ague asala kodoro kâ legeoko na mbeni serviteur ti mungo maboko. Ala na aTémoin so ayeke ndulu na kodoro ni asala kue ti leke mbeni kongregation. Ye so aga lani tâ tënë na août 1998. Mbeni kete kongregation ayeke sala fadeso kusala nzoni na Da ti Royaume so ti mû maboko na azo so alango na yâ ahoto ti manda atâ tënë ti Bible.

Biani, na kota ngangu, Jéhovah amû azo ti lo so asala kusala na bê kue na Philippines ti kangbi tâ tënë ti Royaume même na yâ ahoto so a yeke ngangu ti si dä. So adabe e na Esaïe 52:7: “Gere ti zo so aga na tene-nzoni ayeke pendere mingi na ndo ahoto!”

[Acarte na lembeti 11]

(Ti ba tene ni mbilimbili, ba buku ni)

ABRA

MINDORO

BUKIDNON

[Lingu ti foto]

Sese: Mountain High Maps® Copyright © 1997 Digital Wisdom, Inc.

[Afoto na lembeti 10]

Fango tënë na yâ ahoto andu tambelango na gere teti angbonga mingi na yâ ando so ayeke sioni

[Foto na lembeti 10]

Batême na yâ ngu ti hoto