Zia Bê na Jéhovah Nzapa so Ayeke Dä Biani
Mo bâ le-nduzu awe na mbeni bï so mbinda akanga lê ti nduzu pëpe, na mo bâ atongoro ngbangbo mingi so ayeke dä? Tongana nyen mo yeke fa lege so ala bâ gigi?
TONGANA na bï ndo adë kpô, na lege ti fä, atongoro asala tënë na kongo na Gbia David ti Israël ti giriri, na ye so apusu lo ti sû na mbeti: “Ayayu asala tënë ti gloire ti Nzapa; le-nduzu afa na gigi kusala ti tïtî Lo.” (Psaume 19:2 [19:1, NW]) Biani, a yeke Wasalango ye, me pëpe ye so lo leke, si alingbi “ti wara gloire na yango-iri na ngangu.”— Apocalypse 4:11, NW; aRomain 1:25.
Bible atene: “Zo so aleke ye kue ayeke Nzapa.” (aHébreu 3:4, NW) Biani, tâ Nzapa, ‘so iri ti lo ayeke Jéhovah, gi lo oko ayeke Lo Ti Nduzu Ahon Kue na ndo sese kue.’ (Psaume 83:18, NW [83:19, Bible ti Sango]) Nga, lo yeke pëpe mbeni ye ti handa lê wala mirage. Jésus Christ atene na ndo Babâ ti lo ti yayu, Jéhovah: “Lo so ato Mbi, Lo yeke tâ Nzapa.”—Jean 7:28.
Jéhovah: Wasalango si Aye so Lo Leke Aga Tâ Tënë
Oko iri ti Nzapa, Jéhovah, asigigi ndulu na fani 7 000 gi na yâ Mbage ti Mbeti ti Nzapa so a sû na yanga ti Hébreu. Gi iri so mveni afa polele so lo yeke tâ Nzapa biani. Nda ti iri ti Nzapa aye mbilimbili ti tene: “Lo Sala si Ye Aga.” Na lege so, Jéhovah Nzapa afa tele ti lo mveni tongana Lo so asala si aye so lo leke ti sala aga tâ tënë. Tongana Moïse ahunda na Nzapa iri ti Lo, Jéhovah agboto yâ ti nda ti iri ti lo so tongaso: “Fade Mbi yeke ga ye so fade Mbi yeke ga.” (Exode 3:14, NW) Bible ti Rotherham atene na lege ni: “Mbi Yeke Ga Ye kue so anzere na Mbi ti Ga.” Jéhovah ayeke ga, wala ayeke soro ti ga, ye kue so a lingbi lo ga ti tene aye so lo leke na lege ti mbilimbili ti sala nga azendo ti lo aga tâ tënë. Na lege so, lo yeke na mbeni molongo ti akete iri tongana Wasalango ye, Babâ, Gbia Seigneur, Berger, Jéhovah ti aturugu, Lo so amä sambela, Juge, Kota Wafango ye, Lo ti ton zo.—aJuge 11:27; Psaume 23:1; 65:3 (65:2, NW); 73:28; 89:27 (89:26, NW); Esaïe 8:13; 30:20; 40:28; 41:14.
Gi tâ Nzapa oko si alingbi ti yô na lege ni iri Jéhovah, teti azo alingbi lâ oko pëpe ti hinga mbilimbili wala aye so ala leke ti sala ayeke ga ande nzoni. (Jacques 4:13, 14) Gi Jéhovah oko si alingbi ti tene: “Legeoko tongana ngu-nduzu na neige alondo na yayu apika, na a kiri kâ pëpe, me a sa ngu-nduzu na sese, na a sala si le-kobe asigigi na sese, na a mbumba, na a mû le-kobe na zo ti lu yaka, na a mû kobe na zo so ate kobe ni, fade tënë so asigigi na yanga ti Mbi ayeke legeoko tongaso; fade tënë ti Mbi akiri na Mbi senge pëpe, me a sala ye so Mbi ye, na fade tënë ni awu na kusala so Mbi to lo dä.”—Esaïe 55:10, 11.
Jéhovah ayeke sala lakue si ye so lo leke ti sala aga tâ tënë na mbeni lege so a sala si même ye so azo alingbi ti bâ tongana tâ ye pëpe ayeke duti tâ ye na bango ndo ti lo. Ngoi mingi na pekoni so Abraham, Isaac, na Jacob akui awe, Jésus asala tënë ti ala, na lo tene: “Lo [Jéhovah a] yeke Nzapa, pëpe ti akuâ, me ti ala so ayeke na fini, teti na lê ti lo ala kue ayeke na fini.” (Luc 20:37, 38) Ababâ ti sewa ota so akui lani awe, me ye so Nzapa aleke teti zingongo ala na popo ti awakinda ayeke ga ande tâ tënë biani, a sala si na lê ti lo, a lingbi ti tene so ala yeke na fini. Ti kiri na akinda be-ta-zo tongaso na fini ayeke ngangu pëpe na Jéhovah, legeoko tongana ti so lekengo kozo koli na pupu-sese ti sese ayeke lani ngangu pëpe na lo.—Genèse 2:7.
Bazengele Paul amû nga mbeni tapande nde so afa so Nzapa ayeke sala si aye so lo leke ti sala aga tâ tënë. Na yâ Mbeti ti Nzapa, a hiri Abraham “babâ ti amara mingi.” (aRomain 4:16, 17) Na ngoi so Abram ade ti wara molenge pëpe, Jéhovah agbian iri ti lo si aga Abraham, so ti tene “Babâ ti azo mingi mingi.” Jéhovah asala si nda ti iri so aga tâ tënë na zingongo na lege ti kpene angangu ti dungo ti mbakoro Abraham na ti wali ti lo Sara so ayeke nga mbakoro.—aHébreu 11:11, 12.
Teti so a mû na lo ngangu na komandema so ayeke kota mingi, Jésus Christ asala tënë ti ambeni tâ ye so ayeke si, na bango aye ni na mbeni lege so ahon bango ndo ti azo. Atâa so ndeko ti lo Lazare so lo ndoye mingi akui awe, Jésus atene na adisciple ti lo: “Ndeko ti e Lazare alango, me Mbi gue ti zingo lo.” (Jean 11:11) Ngbanga ti nyen Jésus asala tënë ti mbeni zo so akui awe tongana mbeni zo so ayeke lango gi senge?
Tongana Jésus asi na gbata ti Béthanie kodoro ti Lazare, lo gue na dukua ni na lo mû yanga ti tene a lungula tênë so akanga yanga ni. Na pekoni so lo sambela na kota go, lo tene: “Lazare, sigigi!” Tâ na gbele ti ala so ayeke bâ ndo na mbage ti dukua ni, “lo so akui awe, lo sigigi, na bongo ti kuâ akanga maboko ti lo na gere ti lo kue, na mouchoir akanga lê ti lo.” Na pekoni, Jésus atene: “I zi lo, i zia lo gue.” (Jean 11:43, 44) Jésus ayä Lazare na popo ti awakinda, lo kiri na fini mbeni koli so akui a sala alango osio! Christ agbian yâ ti tâ tënë kirikiri pëpe tongana lo tene so ndeko ti lo ayeke lango. Na bango ndo ti Jéhovah nga na ti Jésus, Lazare so akui awe ayeke tongana zo so alango gi senge. Biani, Jésus na Babâ ti lo ti yayu ayeke bi bê na aye so ayeke atâ ye biani.
Jéhovah Alingbi Gbian Abeku ti E ti Ga Tâ Ye Biani
So tâ kangbi si ayeke na popo ti ayanda so ayeke handa gi zo, na tâ Nzapa! Awavorongo ayanda atene na wataka so aye so ala yeke voro ayeke na angangu so ahon ti azo. Ye oko, kusala ti vorongo oko pëpe alingbi ti mû na ayanda so angangu ti sala aye ti kpene. Na mbeni mbage nde, Jéhovah Nzapa alingbi na lege ni ti sala tënë ti awakua ti lo so akui aninga awe tongana azo so ayeke na fini, teti so lo yeke na ngangu ti kiri ti mû fini na ala. “L’Eternel [“Jéhovah,” NW] ayeke tâ Nzapa,” na lo handa bê ti azo ti lo lâ oko pëpe.—Jérémie 10:10.
So tâ ye ti dengo bê ti hinga so, na ngoi so Jéhovah adiko, fade a yeke yä na popo ti awakinda azo so akui awe na so ayeke na yâ ti mongoli ti Jéhovah, ti kiri ti mû fini na ala! (Kusala 24:15) Biani, londongo ti awakinda andu nga ti kiri na zo na fini na asalango ye ti lo kue. Ti dabe na asalango ye kue ti azo so akui awe, na ti yâ ala na popo ti awakinda ayeke pëpe mbeni kpale teti Wasalango ye so ayeke na ndara nga na ngangu so nda ni ayeke pëpe. (Job 12:13; Esaïe 40:26) Teti so Jéhovah asi singo na ndoye, fade lo yeke sala kusala na ngangu ti dango bê ti lo so ayeke mbilimbili-kue ti kiri akinda na fini na ndo mbeni sese so aga paradis, na asalango ye so ala yeke lani na ni kozoni si ala kui.—1 Jean 4:8.
Na ngoi so nda ti sese ti Satan aga ndulu, gigi ti kekereke ayeke polele teti ala so azia bê na tâ Nzapa. (aProverbe 2:21, 22; Daniel 2:44; 1 Jean 5:19) Wasungo psaume adë bê ti e: “Na a ngbâ ngoi kete, na fade zo ti sioni ayeke mbeni pëpe; . . . Me fade azo ti tâ be-ti-molenge awara sese, na biani fade ala wara kota ngia na yâ siriri so asi singo.” (Psaume 37:10, 11, NW) Kengo ndia na salango ngangu ayeke duti ande aye so ahon awe. Fade mbilimbili ayeke mû ndo kue, na akpale ti konomi ayeke hunzi. (Psaume 37:6; 72:12, 13; Esaïe 65:21-23) Fade a yeke lungula biaku asioni ye so aga na lege ti salango kangbi na popo ti azo, ti nzoroko ti tele, ti amara na akete mara. (Kusala 10:34, 35) Fade abira na agbakuru ti bira ayeke duti mbeni pëpe. (Psaume 46:10 [46:9, NW]) Na lâ ni so, “fade mbeni wakodoro oko atene pëpe: ‘Tele ti mbi aso.’” (Isaïe 33:24, NW) Fade zo oko oko kue ayeke wara seni so ayeke mbilimbili-kue na so aza zango. (Apocalypse 21:3, 4) Paradis na ndo sese ayeke ndulu ti ga tâ ye biani. Jéhovah aleke awe na bê ti lo ti sala ni!
Biani, abeku kue so aluti na ndo Bible ayeke ndulu ti ga tâ tënë. Ngbanga ti nyen ti zia si aye so azo avoro na yâ sese so ahanda e, tongana e lingbi ti zia bê kue na Jéhovah? Ye so bê ti lo aye ayeke ti tene “mara ti azo nde nde kue alingbi sö kuâ na awara tâ hingango ye ti tâ tënë.” (1 Timothée 2:3, 4, NW) Ahon ti mû ngoi na mosoro ti e teti aye so ayeke tâ ye pëpe, wala aye so ahanda lê, so ayeke na yâ bungbi ti aye ti fadeso nga na anzapa ti lo, zia e kono hingango ye na ndo Nzapa so ayeke biani, na e zia bê ti e kue gi na lo.—aProverbe 3:1-6; Jean 17:3.
[Foto na lembeti 6]
Na bango ndo ti Jéhovah na Jésus, Lazare ayeke lango gi senge
[Afoto na lembeti 7]
Fade Paradis na ndo sese ayeke ga tâ ye na yâ ngoi kete