Hongo na Ngangu na Gbele Cour Constitutionnelle Fédérale
ATÉMOIN TI JÉHOVAH na Zamani ahon na ngangu na mbeni lege so alingbi ti glisa ni pepe na gbele Cour Constitutionnelle Fédérale na Karlsruhe. Na lege so, ala hon mbeni kota kapa so andu ziango kusala ti ala na yâ mbeti ti ndia.
A-Témoin ti Jéhovah ayeke sala kusala na Zamani ahon angu 100 awe. Ala sö fini na yâ kpengba salango ngangu na ngoi ti asioni ngorogbia use ti siècle 20: yanga-ti-komande ti aNazi na ti aCommuniste. Ngbele ye na ngu 1990, aTémoin agi lege ti tene ndia ayeda na kusala ti ala tongana mbeni bungbi so Letäa ayeda na ni na gbele azo. Na peko ti adesizion use ti da-ngbanga so aduti nzoni teti ala, nga na mbeni oko so ala gbian ni, aTémoin ahunda ti gue na gbele Cour Constitutionnelle Fédérale ti Zamani, so afa na gigi desizion ti lo ti fango ngbanga na lango 19 ti nze ti décembre ngu 2000.
Ala Kue Amu Desizion Teti A-Témoin ti Jéhovah
Awafango ngbanga mbasambala kue ti da-ngbanga ni amu raison na aTémoin ti Jéhovah. Awafango ngbanga ni ake mbeni fango ngbanga so Cour Administrative Fédérale amu na ngu 1997, na ala hunda na da-ngbanga so ti kiri ti ba desizion ni so a mu na ndo hundango ye ti aTémoin.
Cour Constitutionelle Fédérale agbu ngoi ni ti sala tene na ndo mbilimbili kamba so ayeke na popo ti Letäa na abungbi ti vorongo. Ti ba ni nzoni, a yeke ba dutingo ti mbeni lege ti vorongo na gbele Letäa “pepe na lege ti atene ti mabe ni, me na lege ti salango ye ti azo ni.”
Da-ngbanga ni atene nga so tongana aTémoin ayeke bata “dutingo ti ala nde ti Chrétien,” ala yeke “doro pepe kpengba-ndia ti démocratie,” na ala “ye pepe ti lungula démocratie ti zia na place ni mbeni yanga-ti-komande nde.” Tongaso, a lingbi mungo mbage pepe na votengo azo ti poroso aduti pepe mbeni ye ti sala na kusala ti ke hundango ndo ti aTémoin ti tene a sû kusala ti ala na yâ mbeti ti ndia.—Jean 18:36; aRomain 13:1.
Da-ngbanga ni atene nga so na mbeni ngoi, a lingbi ti si na mbeni wamabe, atä a yeke mbeni Témoin wala mbeni zo ti lege ti vorongo nde, ti ba so aye so Letäa ahunda na lo ti sala ague nde na aye so mabe ti lo ahunda na lo ti sala. Tongana zo ni amu peko ti yingo-ti-hinga ti lo na “salango ye alingbi gi na atene ti mabe ti lo ahon ndia ti Letäa,” a lingbi Letäa aba ni tongana ye so ayeke na lege ni, na so ayeke na yâ ti akatikati so a zia teti liberté ti lege ti vorongo.—Kusala 5:29.
Desizion so da-ngbanga ni amu aduti kota li ti tene ti ambeti-sango mingi. A yeke la ni ngangu ti wara mbeni mbeti-sango na Zamani so asala pepe tene ti ye so. Akota da ti televizion na da-singa kue amu atondo wala afa ahundango tene na ndo ni. A fa kozoni lâ oko pepe tongaso iri ti Jéhovah na gbele azo ti Zamani.
[Lingu ti foto na lembeti 8]
AP Photo/Daniel Maurer