Mbeni Bungbi na ndo Sese Kue Abi Bê na Mba
NA YONGORO ndo kâ, a lingbi ti ba azo. Mingi ti ala ayeke ambakoro, so na popo ni tele ti ambeni azin si ala lingbi tambela nzoni pepe. A wara awali so ayeke na ngo nga na akoli na awali ti ala so ade pendere na so afa lege na akete molenge ti ala. Ala kue ayeke azo so akpe kodoro ti ala; akoli, awali na amolenge, so bira ti yâ ti kodoro, aye ti ngangu ti ndagigi, wala ambeni ye nde asala si ala kpe ada ti ala ti bata fini na yâ ti mbeni kodoro so ayeke ndulu na ala. Fani mingi, ye agbu ambeni na ngangu ti zia ada ti ala. Tongana ala ba so mbeni wuluwulu na yâ ti kodoro wala mbeni ye ti ngangu ti ndagigi alingbi ti si ande, ala kamata akete gbakuru ti da ti ala, ala bungbi amolenge ti ala, na ala kpe na mbeni ndo so a lingbi ti bata fini dä. Na pekoni, tongana aye akiri aga nzoni, azo mingi so akpe akiri na kodoro ti ala ti leke ada ti ala na ti kiri ti to nda ti mbeni fini.
Na yâ angu so ahon, République Centrafricaine azi ayanga da ti lo na azo ti kodoro mingi so akpe ndo ti ala. A ninga pepe, azo saki mingi, so na popo ni a wara aTémoin ti Jéhovah mingi, akpe na ngangu République Démocratique ti Congo, kodoro so ayeke na bira, ti bata tele na République Centrafricaine, kodoro so ayeke na mbeni dutingo ti siriri.
Aita Amu Maboko
A-Témoin ti Jéhovah ti République Centrafricaine aba ni tongana mbeni matabisi ti leke ye ti mu maboko na azo. A sala kue ti wara aye teti aita Chrétien so aga. Kozoni kue, a wara ando ti lango na yâ da ti aita, me tongana wungo ti azo so akpe ayeke kono, a ga polele so a lingbi a leke ambeni ye na ndo ni. A gbian ambeni Da ti Royaume ti ga ando ti lango. Atémoin ti kodoro ni asala kusala ngangu ti zia ambeni wâ na ndo ti so ayeke dä awe, a-tuyau ti ngu, na ti leke sese ti da ni na ciment teti nzoni ti ala so ayeke lango dä. Azo so akpe kodoro ti ala asala kusala maboko na maboko na aita ti kodoro ni ti leke ando ti lango so gi teti kete ngoi. A leke mbeni programme kue ti abungbi ti aChrétien na yanga ti Lingala si azo so aga alingbi wara kobe ti yingo so abata fini. Salango kusala maboko na maboko na popo ti aTémoin ti kodoro ni na agene ti ala afa so bungbi ti aita na ndo sese kue ayeke mbeni tâ ye.
Azo ti asewa so akpe kodoro ti ala aga lakue legeoko pepe. Ngoi na ngoi, azo ti sewa so akangbi tele akiri awara tele na kodoro so ala kpe dä. A bata na yâ Da ti Royaume oko oko mbeni mbeti so a wara na yâ ni molongo ti a-iri ti azo so asi nzoni. A leke aye ti wara ala so ayeke pepe na yâ mbeti ni. Filiale so afa lege na kusala ti aTémoin ti Jéhovah na yâ ti kodoro ni atokua akutukutu ota lâ oko oko ti mu maboko na aTémoin so angbâ na lege na ti gi zo kue so peut-être aglisa. A hinga akutukutu so na lege ti mbeni kota mbeti, so a diko “WATCH TOWER—Les Témoins de Jéhovah.”
Tara ti ba ngia so mbeni bungbi ti amolenge mbasambala so akpe bira na so akangbi na ababâ na mama ti ala awara na bango mbeni kutukutu ti aTémoin ti Jéhovah. Hio, ala kpe na mbage ti kutukutu ni na ala fa tele ti ala tongana aTémoin. Aita amu maboko na ala ti ma na yâ kutukutu ni na a gue na ala na mbeni Da ti Royaume, ndo so na nda ni a bungbi ala na asewa ti ala.
Ye nyen amu lege na aChrétien ti be-ti-mbilimbili so ti luti na gbele aye tongaso, gi fani oko pepe, me lege mingi? Ala hinga na bê ti ala biani so e yeke na lâ ti nda ni tongana ti so Mbeti ti Nzoni-kue atene kozoni.—2 Timothée 3:1-5; Apocalypse 6:3-8.
Tongaso, ala hinga so na yâ ngoi kete Jéhovah Nzapa ayeke hunzi ande abira, kengo tele, ye ti ngangu na tiri. Fade kpale ti azo so akpe kodoro ti ala ayeke hon. Ti ku na ngoi so, a lingbi na gbotongo mê ti Paul na 1 aCorinthien 12:14-26, aTémoin ti Jéhovah ayeke sala ngangu ti bata tele na popo ti ala. Atä abale, ama, ayanga ti kodoro, na yongoro ndo akangbi popo ti ala, ala bi bê na ndo mba, tongaso ala yeke ndulu ti sala ye tongana ye atia mbeni zo.—Jacques 1:22-27.
[Tableau na lembeti 30]
(Ti ba tene ni mbilimbili, ba périodique ni)
AFRIKA
République Centrafricaine
République Démocratique ti Congo
[Lingu ti foto]
Mountain High Maps® Copyright © 1997 Digital Wisdom, Inc.
[Afoto na lembeti 30]
Ada ti Royaume ota aga ando so a yamba azo dä
[Foto na lembeti 31]
A leke hio ambeni ndo ti tongo kobe
[Foto na lembeti 31]
Azo mingi mingi asi
[Foto na lembeti 31]
A dü ala gi fadeso na ala ga awe azo so akpe kodoro ti ala