Mo Yeke “Vo Ngoi so Alingbi”?
BAZENGELE Paul awa aChrétien so ayeke na Éphèse ti kozo siècle: “I bata nzoni si i tambela pepe tongana awabuba me tongana awandara, i vo ngoi so alingbi teti i mveni, teti angoi ni ayeke sioni.” (aÉphésien 5:15, 16, NW) Ngbanga ti nyen wango so ayeke kota ye mingi? Kiringo tene na hundango tene so ahunda ti duti na mbeni hingango ye na ndo aye so aChrétien ayeke luti la ni na gbele ni na yâ gbata ti giriri so.
A hinga la ni Éphèse teti kota mosoro ti lo, sioni salango pitan ti lo, kengo ndia ti lo so amu ndo kue, na akusala ti lo nde nde so andu ayingo sioni. Na ndo ni, a lingbi aChrétien ti ndo ni atiri ngangu na atene ti mabe ti senda-ndara so andu tene ti ngoi. Azo ti Grèce so ayeke aChrétien pepe na so alango na Éphèse amä na bê la ni pepe so ngoi ayeke gue gi na li ni. Senda-ndara ti Grèce afa na ala so fini ayeke gi mbeni molongo ti aye so ayeke hunzi ka pepe. Tongana mbeni zo so abuba ngoi ti lo na yâ mbeni molongo ti fini, lo lingbi ti wara ngoi ni kue na yâ mbeni molongo ti fini nde. Mara ti bango ndo tongaso alingbi la ni ti pusu aChrétien ti Éphèse ti duti na mbeni bango ndo so adë dengo na mbage ti kapa ti salango ye ti Jéhovah, so andu kapa ti lo ti fango ngbanga. Tongaso, wango ti Paul ti “vo ngoi so alingbi” ayeke na lege ni.
Paul ayeke sala la ni pepe tene ti ngoi so andu aye kue. Tene ti Grec so lo sala na kusala aye ti tene mbeni ngoi so a diko, mbeni ngoi so alingbi teti mbeni mbilimbili kusala. Paul ayeke wa la ni aChrétien ti kozo siècle ti sala kusala nzoni na ngoi so alingbi, wala ngoi ti salango nzobe, so ala ngbâ ti wara nzoni dä, kozoni si ngoi ni so ahunzi, na be-nzoni ti Nzapa nga na salut so lo mu asi na nda ni.—aRomain 13:11-13; 1 aThessalonicien 5:6-11.
E yeke na fini na yâ mbeni ngoi so alingbi na so akpa ti kozo siècle. A hon ti buba ngoi ti salango be-nzoni, so ayeke kiri mbeni pepe, na tombango peko ti angia ti kete ngoi so sese amu, aChrétien ayeke sala ye na ndara tongana ala sala kua na ngoi so ala yeke na ni ti sala “akusala ti dutingo ndulu na Nzapa” na tongaso ti kpengba songo ti ala na Wasalango ye, Jéhovah Nzapa.—2 Pierre 3:11, NW; Psaume 73:28; aPhilippien 1:10.