Thangwi Yanji Tinakwanisa Kukhala Akutsandzaya Maseze Titcingwe?

1. Ndi mafala api akudzumatirisa adalonga Yezu?

MU NKHANI ya Paphiri, Yezu alonga: “Anyakutsandzaya ndimwe ndzidzi onsene anthu angakuidani.” (Luka 6:22) Anthu adabva mafala anewa panango adzumatirwa, thangwi nkhabe anakomerwa na kuidiwa. Mphapo thangwi yanji Yezu alonga mafala anewa? Unoyu ndi mbvundzo wadidi. Thangwi atowereri a Yezu lero, asaidiwa na anthu azinji. Mu nsolo uno tinapfundza kuti thangwi yanji tisaidiwa, pontho thangwi yanji tinakwanisa kukhala akutsandzaya maseze tiidiwe.

THANGWI YANJI TISAIDIWA?

2-3. Thangwi yanji tisaidiwa, pontho thangwi yanji ndi pyakufunika kubvesesa pyenepi? (Juw. 16:2, 3)

² Ife tisaidiwa thangwi tisalambira Yahova. Yezu alonga tenepa thangwi ya ale akuti mbadatiida, ngakhale kupha atowereri ace: “[Iwo] nkhabe kudziwa Babanga, pontho iwo nkhabe kundidziwa.” (Lerini Juwau 16:2, 3.) Mbani anacitisa kuti atumiki a Mulungu aidiwe? Ndi Sathani. Iye ndi “mulungu wa dziko ino.” (2 Akor. 4:3, 4) Iye asapingiza anthu kudziwa Yahova, pontho asacitisa anthu anewa kutcinga ale anadziwa Mulungu na kunfuna. (Juw. 8:42-44) Thangwi yanji kudziwa pyenepi kunacinja maonero athu thangwi ya ale anatitcinga? Thangwi tingabvesesa kuti anthu anewa ali kunyengezwa na Sathani, pyenepi pinatiphedza toera tikhonde kuaida.

³ Onani pidacitikira m’bale Pavela anakhala mu dziko yakuti basa yathu isakhondeswa. Thangwi yakupitiriza kutumikira Yahova mwakukhulupirika, iye afungirwa nkaidi m’mbuto yakuti akhali ekhene mu miyezi mizinji, pontho akhamenywa. Pavel alonga: “Ndisakwanisa kuona kuti ndi Sathani na madimonyo anayesera kupingiza ulambiri wandimomwene. Mbwenye anthu azinji anaphata basa nkaidi nee asatiida. Iwo basi ene ali kucita basa yawo.” M’bale unango anakhala ku Croácia, wakuti apirira kutcingwa na anyakubalace, alonga: “Cincino ndisabvesesa kuti anandiida ndi Sathani, tayu anyakubalanga.”—Aef. 6:12.

4. Tisapfundzanji na pidacita Yezu, pontho na pidacita Estevau? (Onanimbo foto.)

⁴ Ife nee tisaida ale anatiida. Na thangwi ineyi, tisacita phembero thangwi ya iwo. (Mat. 5:44) Tisapfundzanji na pidacita Yezu, pontho na pidacita Estevau? Yezu akhadakhomerwa pamuti wakusikimizira na anyankhondo Aciroma. Ngakhale mu ndzidzi unoyu ukhabva iye kupha, iye alonga mu phembero kuti: “Baba, alekerereni pyawo.” (Luka 23:34) Yezu akhaphemba Yahova toera alekerere anyankhondo Aciroma adatumwa toera kumupha. Panango iye anyerezerambo mwinji wa anthu wakuti thangwi yakupangwa na atsogoleri a mauphemberi, akhakhuwa toera iye aphiwe. Yezu adzindikira kuti anthu anewa nee akhadziwa pikhacita iwo. Munjira ibodzi ene, Estevau aphemba Mulungu kuti alekerere ale akhamupha. (Mabasa 7:58-60) Kodi Yahova atawira maphembero a Yezu na a Estevau? Inde. Azinji adagumanika pa kutongwa na kuphiwa kwa Yezu, mukupita kwa ndzidzi atcunyuka, ankhulupira mbabatizwa. (Mabasa 2:36-41) Kusiyapo pyenepi, m’bodzi mwa anthu adacitisa Estevau kuphiwa, ndi Saulo wa ku Tarso. Iye adzakhala Nkristu, pontho atcunyuka thangwi ya pinthu pyakuipa pidacita iye.—1 Tim. 1:13.

5. Mwapfundzanji na pidacitikira César?

⁵ Yahova asapitiriza kutawira maphembero anacita ife thangwi ya ale anatitcinga. Onani pidacitikira César, anakhala ku Venezuela. Pai wace akhali nyakutcinga na wauphanga. César alonga: “Mai wanga akhali nkazi na mama wadidi. Iye akhaikha Umambo wa Mulungu pa mbuto yakutoma, pontho akhatsalakana mwadidi pai wanga. Iye apfundzisa ine na abale anga toera kubvera pai wathu ndzidzi onsene, khala pikhatipanga iye nee pikhali pyakuipa kuna Yahova.” Mukupita kwa pyaka, pai wace César asiya kukhala munthu wakunentsa. Iye alonga: “Ntsiku inango pidamala ine kucita phembero kuna Yahova, ine ndabvundza pai wanga khala akhafuna kupfundza Bhibhlya na ine. Ine ndatsandzaya kakamwe pidatawira iye kupfundza Bhibhlya.” Mukupita kwa ndzidzi, pai wace César abatizwa. Ndimomwene kuti pyenepi nee pisacitika na onsene anatitcinga. Mbwenye anango asacinja makhaliro awo thangwi ya kuona pinthu pyadidi pinacita ife na njira inalonga ife mwacilemedzo. Pontho tisatsandzaya kakamwe pyenepi pingacitika. Nakuti Yahova ndi “Ntongi wa dziko yonsene,” ife tisafuna kakamwe kuona kuti iye anaphedza tani anthu anewa kubwera kuna iye.—Gen. 18:25.

6. Mwakubverana na Marko 13:13, ndi ipi thangwi inango inaticitisa kuidiwa?

⁶ Ife tisaidiwa thangwi tisalemedza Yezu. Iye alonga kuti Akristu andimomwene mbadaidiwa na anthu onsene, “thangwi ya dzina [yace].” (Lerini Marko 13:13.) Mphapo “dzina” ya Yezu isapangizanji? Isapangiza kuti iye ali na ufulu wakukhala mambo wa Umambo wa Mulungu. Ife tisaidiwa na anthu ananyindira mautongi a dziko ino, m’mbuto mwakunyindira ule adasankhulwa na Yahova toera kutonga dziko yonsene. Yezu ali kutonga ninga mambo wa Umambo wa Mulungu kutomera caka ca 1914. Pontho thimize pano, iye anadzafudza mautongi akuti nee asaphedzera utongi wace.

7-8. Ndi ipi thangwi inango inacitisa atumiki a Yahova kuidiwa? (Juwau 15:18-20) (Onanimbo mafoto.)

⁷ Ife tisaidiwa thangwi tisakhonda kucita khundu ya dziko ino ya Sathani. Yezu alonga kuti atowereri ace mbadaidiwa thangwi ‘nee asacita khundu ya dziko.’ (Lerini Juwau 15:18-20.) Ninga Akristu a mu ndzidzi wa apostolo, ife tisakhonda kukhala na manyerezero mabodzi ene na anthu a dziko, kucita pinthu ninga iwo peno kulonga ninga iwo. Na thangwi ineyi, abale na alongo athu azinji asatsalakanwa mwakuipa kubasa peno kuxikola. (1 Ped. 4:3, 4) Mbwenye ife tisatsandzaya nyakutcinga m’bodzi angacinja makhaliro mbatoma kutilemedza.

⁸ Onani pidacitikira Ignacio wa ku Amerika Central. Mu pyaka pizinji, m’bodzi wa apfundzisi ace akuxikola akhansingirira thangwi yakutumikira Yahova. Mbwenye Ignacio mbadzati kumalisa kupfundza, mpfundzisi unoyu ambvundza kuti iye akhakwanisa tani kubvera pinalonga Bhibhlya. Ignacio afokotoza kuti mitemo ya Mulungu isatitsidzikiza. Buluka penepo, iye aphemba mpfundzisi wace toera aende ku misonkhano ya mpingo, pontho mwakukhonda dikhira, iye atawira. Mpfundzisi unoyu adzumatirwa kakamwe na njira idatsalakanwa iye mwaufuni, pontho apitiriza kugumanika pa misonkhano. Buluka penepo, mpfundzisi unoyu atoma kutcingwa thangwi yakupfundza Bhibhlya. Mbwenye apitiriza kuthambaruka mbabatizwa.

9-10. (a) Ndi cinthu cipi cinango cinacitisa Akristu kukhala akusiyana na anthu a dziko ya Sathani? (b) Tisapfundzanji na pidacita mpostolo Paulu?

⁹ Cinthu cinango cinapangiza kuti ndife akusiyana na anthu a dziko ino ya Sathani ndi cakuti ife nee tisaphedzera ndale za dziko peno nkhondo. (Juw. 18:36) Ndimomwene kuti tisabvera uphungu unagumanika pa Aroma 13:1, pontho tisawangisira toera kubvera mitemo ya mautongi. Mbwenye ninga Akristu, nee tisakhala na partidhu. Na thangwi ineyi, nee tisaperekeka toera kuvotariwi kuti tikhale na mpando wakutonga anango, pontho nee tisavotari anango. Thangwi yanji? Thangwi ndife akukhulupirika kuna Yahova na Umambo wace wakuti usatongwa na Yezu Kristu. Atumiki a Yahova azinji asafungirwa nkaidi thangwi ya cikhulupiro cawo. Ngakhale tenepo, iwo asapitiriza kumwaza mphangwa. Thangwi yakucita pyenepi, iwo asatowezera mpostolo Paulu wakuti akhala pyaka pizinji mbakhonda tawiriswa buluka panyumba, pontho afungirwa nkaidi. (Mabasa 24:27; 28:16, 30) Ngakhale tenepo, iye apitiriza kumwazira mphangwa ale akhafuna kumbvesera, kuphatanizambo anyakuonera kaidi, anyakuphata basa m’mathando akutongera miseru, atongi, amambo, pontho panango anyabasa a ntongi Waciroma akhacemerwa Nero.—Mabasa 9:15.

¹⁰ Abale na alongo athu anafungirwa nkaidi, asamwazirambo mphangwa ale anafuna kuabvesera, pontho anthu anewa asaphataniza anyakutonga miseru, anyabasa a mautongi na anyakuonera makaidi. M’bale m’bodzi akhala nkaidi mu pyaka pyakupiringana pitanthatu thangwi yakukhonda kuphedzera ndale. Iye alonga kuti nee akhaona ndzidzi unoyu ninga kutcunyuswa, mbwenye akhaona ninga basa idampasa Yahova toera kugumana anthu anafuna kuntumikira. Ndi pyakutsandzayisa kakamwe kuphatisirwa na Yahova toera kumwazira mphangwa anthu anewa! (Akol. 4:3) Cincino tendeni tione mathangwi anango anaticitisa kukhala akutsandzaya, maseze titcingwe thangwi yakutumikira Yahova.

THANGWI YANJI TINAKWANISA KUKHALA AKUTSANDZAYA MASEZE TIIDIWE?

11. Kutcingwa kunawangisa tani cikhulupiro cathu? Perekani citsandzo.

¹¹ Ife tisadziwa kuti kutitcinga kunaticita dziko kusakwanirisa profesiya ya Bhibhlya. Mu profesiya yakutoma idalembwa m’Bhibhlya, Yahova apangiza kuti Sathani na dzindza yace, peno ale anamphedzera mbadatcinga ale anatumikira Yahova na kunfuna. (Gen. 3:15) Mwakubwereza-bwereza, Yezu apangiza kuti profesiya ineyi mbidakwanirisika. Pontho mafalace alembwa m’bukhu ya Mateu, Marko, Luka na Juwau. (Mat. 10:22; Marko 13:9-12; Luka 6:22, 23; Juw. 15:20) Anyakulemba anango a Bhibhlya alongambo thangwi ya pyenepi. (2 Tim. 3:12; Tiya. 1:2; 1 Ped. 4:12-14; Yuda 3, 17-19) Natenepa, tingatcingwa nee tisadzumatirwa. Mbwenye tisatsandzaya thangwi yakuona kuti profesiya ya Bhibhlya iri kukwanirisika. Pyenepi pisatipasa cinyindiro cakuti tiri kutumikira Mulungu wandimomwene. Mulongo unango anakhala mu dziko yakuti basa yathu isakhondeswa, alonga: “Pidaperekeka ine kuna Yahova, ndikhadziwa kuti ndinatcingwa. Natenepa, pinthu pyenepi nee pyandidzumatirisa, pontho nee pyandicitisa kugopa.” Mwa anthu azinji adatcinga mulongo unoyu, m’bodzi wawo akhali mamunace. Iye akhantsalakana mwakuipa, pontho apisa Bhibhlya yace na mabukhu anango. M’mbuto mwakugopa, cikhulupiro cace cawangiswa. (Aheb. 10:39) Iye athimiza: “Bhibhlya ikhalonga kale kuti mbatidatcingwa, pontho ndikhadziwa kuti pyenepi mbapidacitika. Kutcingwa kweneku kwandipasa cinyindiro cakuti ndiri mu uphemberi wandimomwene.”

12. Ninji pidaphedza m’bale m’bodzi toera kupirira kutcingwa?

¹² Maseze tidziwe kuti tinatcingwa, panango pinanentsa kupirira. M’bale m’bodzi alonga tenepa thangwi ya ndzidzi udakhala iye nkaidi: “Midzidzi inango ndikhatsukwala, ndikhadzudzumika, pontho ndikhalira.” Ninji pidamphedza toera kupirira? Iye alonga: “Namacibese ndingalamuka, ine ndikhacita phembero. Ndingacitikirwa na cinthu cakuipa, ndikhacita pontho phembero. Pontho ndingacitikirwa na cinthu cakuti cikhandicitisa kuipirwa, ndikhapita mu casa de banho peno m’bhafa mbandicita phembero.” Kusiyapo pyenepi, m’bale wathu akhanyerezera pidacitikira anthu a nduli na a cincino akuti apirira mwakukhonda tsalakana kutcingwa. Pyenepi pyamphedza toera akhonde kubwerera nduli mbakhala na ntendere udapikira Yezu kuna atowereri ace.—Juw. 14:27; 16:33.

13. Ninji pinafuna kutiphedza toera kupirira kutiida kunacita anthu?

¹³ Ufuni wathu kuna Yahova ndi wakuwanga kupiringana kutiida kunaticita anthu. Yezu cipo asiya kufuna Babace wakudzulu na ntima onsene. Pontho iye afuna axamwali ace. (Juw. 13:1; 15:13) Tingakhala na ufuni ubodzi ene kuna Yahova na kuna abale na alongo athu, tinakwanisambo kupirira kutiida kunacita anthu. Munjira ipi? Toera kutawira mbvundzo unoyu, tendeni tione pidacitikira mpostolo Paulu.

14. Ninji pidaphedza Paulu toera apitirize kukhala wakukhulupirika maseze akhadziwa kuti mbadaphiwa?

¹⁴ Mbadzati kuphiwa, Paulu alembera xamwali wace Timoti kuti: “Mulungu nee atipasa nzimu wakugopa, mbwenye atipasa nzimu wamphambvu, [na] waufuni.” (2 Tim. 1:7) Kodi iye akhafuna kulonganji? Paulu akhafuna kulonga kuti ufuni wakuwanga kuna Yahova unakwanisa kuphedza Nkristu toera apirire pinentso. (2 Tim. 1:8) Pontho ndi ufuni unoyu ukhali na Paulu kuna Yahova, wakuti wamphedza toera apitirize kukhala wakukhulupirika na wacipapo maseze akhadziwa kuti mbadaphiwa.—Mabasa 20:22-24

15. Abale na alongo athu asapangiza tani ufuni wandimomwene kuna unango na ndzace lero? (Onanimbo foto.)

¹⁵ Mwakukhonda penula, ife tisafuna abale na alongo athu anapitiriza kukhala akukhulupirika, maseze atcingwe. Anango ali dzololo toera kuikha umaso wawo pangozwi toera kuphedza abale na alongo awo. Akila na Prisila acitambo pyenepi mu ndzidzi udaikha iwo umaso wawo pangozwi toera kuphedza Paulu. (Aroma 16:3, 4) Mwacitsandzo, ku Rusya, azinji asaenda m’mathando akutongera miseru toera kuwangisa abale na alongo anafungirwa nkaidi. Mulongo m’bodzi wakuti akhadafungirwa nkaidi, pidaona iye abale na alongo mu thando yakutongera miseru atsandzaya kakamwe, pontho nee akhakwanisa kulonga. Ufuni wandimomwene wa abale na alongo anewa wamuwangisa mu ndzidzi wakuti akhafuna kakamwe ciwangiso. Ife tisatsandzaya kakamwe thangwi yakudziwa kuti ufuni wathu ndi wakuwanga kupiringana kutiida kunacita anthu.

16. Thangwi yanji mpostolo Pedhru alonga kuti ale anatsalakanwa mwakuipa thangwi yakutumikira Mulungu ndi akutsandzaya? (1 Pedhru 4:14)

¹⁶ Ife tisadziwa kuti Yahova asatsandzaya tingapirira kutcingwa. (Lerini 1 Pedhru 4:14.) Mpostolo Pedhru alonga kuti ale anapirira, maseze atsalakanwe mwakuipa thangwi yakutumikira Mulungu, ali na mathangwi adidi toera kutsandzaya. Thangwi yanji? Thangwi pyenepi pisapangiza kuti “mphambvu yakucena ya Mulungu na mbiri yace piri na [ife].” Pedhru akhadziwa mwadidi kuti kupirira na kukhala wakukhulupirika kuna Mulungu pikhabvekanji. Pakumala mwezi wa Pentekoste mu caka ca 33, anyakuonera templo atumwa toera kufungira nkaidi Pedhru na apostolo anango thangwi akhamwaza mphangwa. Mbwenye Pedhru alonga pikhakhulupira iye na cipapo. (Mabasa 5:24-29) Ngakhale pakumala kumenywa, Pedhru na andzace nee asiya kumwaza mphangwa. Mbwenye atsandzaya thangwi “aoniwa kuti athema kuona nyatwa thangwi ya dzina ya Yezu.” Ife tinakhalambo akutsandzaya munjira ibodzi ene tingapirira kutcingwa.—Mabasa 5:40-42.

17. Yezu alonganji kuna anyakupfundzace mbadzati kufa?

¹⁷ Namasiku mbadzati kufa, Yezu apanga anyakupfundzace: “Munthu anandifuna anadzafuniwambo na Babanga, inembo ndinadzanfuna.” (Juw. 14:21) Ife tisadikhira mwakutsandzaya ntsiku yakuti anthu anadzatifuna, tayu kutiida thangwi yakutumikira Yahova! (2 Ates. 1:6-8) Mpaka ntsiku ineyi, tinakwanisa kubalangazwa na kupaswa mphambvu tinganyerezera mathangwi mazinji anaticitisa kutsandzaya maseze tiidiwe.