Khalani Acipapo na Akukhulupirika Ninga Bhenaya

Bhenaya akhali m’bodzi wa anyankhondo acipapo a Mambo Dhavidhi, pontho mukupita kwa ndzidzi adzakhala nyankhondo wa Salomoni. Bhenaya akhali mwana wa nyantsembe. Maseze anyantsembe na Alevi kazinji kene nee akhaenda kunkhondo, pontho nee akhaphatisira pida pya nkhondo, Bhenaya apangiza cipapo mbaenda kunkhondo. Mwacitsandzo, iye apita mu djenje mbapha nkhalamu, pontho iye amenyana na nyankhondo wamphambvu. Dhavidhi akhanyindira kakamwe Bhenaya mbansankhula toera akhale nkulu wa anyankhondo akhamuonera.—2 Sam. 23:20-23.

Abhisaloni na Adhoniya pidasandukira iwo Dhavidhi, Bhenaya apitiriza kukhala wakukhulupirika kuna Dhavidhi. (2 Sam. 8:18; 15:18; 1 Ama. 1:8) Mu ndzidzi udakalamba Dhavidhi, Bhenaya aphedzambo Salomoni toera akhale mambo. (1 Ama. 1:32-40) Bhenaya akhala wakukhulupirika kuna Yahova na kuna anyakudzodzwa Ace maseze anango nee akhali akukhulupirika.

Ife tisafunikambo kukhala acipapo toera tikwanise kuthimbana na nyamalwa wathu wamphambvu Sathani na ale anam’phedzera, pontho ndzidzi onsene tisafunika kubvera Yahova. (Aef. 6:11; 1 Ped. 5:8, 9) Maseze anango asiye kutumikira Yahova, ife tinapitiriza kukhala akhulupirika mbatinyindira kuti Iye anatipasa nkhombo.—2 Sam. 22:26.