SUMANA 30 YA MARÇO–5 YA ABRIL YA 2026
NYIMBO 76 Musapibva Tani?
Longani Undimomwene wa m’Bhibhlya Munjira Yadidi
“ Yahova, Mulungu analonga undimomwene.”—MAS. 31:5.
PINAFUNA IFE KUPFUNDZA
Tinapfundza kuti tinakwanisa tani kulonga undimomwene wa m’Bhibhlya, munjira yakuti inaphedza anthu azinji.
1. Tisafunika kucitanji toera kucita khundu ya atumiki a Yahova?
KAZINJI kene tingadziwana na m’bale peno mulongo paulendo wakutoma, tisancita mbvundzo uyu: “Mwadziwa tani undimomwene?” Anango asalonga kuti “abalwa mu undimomwene.” Anangombo panango asalonga kuti “nee ndiri na ndzidzi uzinji mu undimomwene.” Thangwi yanji taphatisira fala yakuti undimomwene m’makhundu anewa onsene? Thangwi undimomwene wa Mafala a Mulungu usatsogolera umaso wathu onsene. Pontho tisadziwa kuti toera kucita khundu ya atumiki a Yahova, tisafunika kufuna undimomwene na kucita pinthu pinapangiza kuti tiri mu undimomwene unoyu. Pyenepi pisaphataniza kukhala akukhulupirika mu pinthu pinalonga ife na pinacita ife.—Mas. 15:1-3.
2. (a) Anthu akhadziwanji thangwi ya Yezu? (b) Anthu akhacitanji pikhamwazirwa iwo mphangwa na Yezu?
2 Ndzidzi onsene, Yezu akhalonga undimomwene, maseze anthu anango nee akhakomerwa na pinthu pikhalonga iye. Pontho anyamalwa ace akhadziwambo pyenepi. (Mat. 22:16) Yezu apanga anyakupfundzace thangwi ya njira ikhafuna kutawira anthu undimomwene ukhapfundzisa iye. Iye alonga: “Ine ndabwera kudzamwaza anthu. Mwana wamamuna nkhabe kudzabverana na babace, mwana wankazi nkhabe kudzabverana na mai wace, pontho nkwenya nkhabe kudzabverana na mebzwalace.” (Mat. 10:35) Yezu nee akhafuna kuti anthu akhonde mphangwa zikhamwaza iye pabodzi na anyakupfundzace. Mbwenye iye akhadziwa kuti pyenepi mbapidacitika. (Mat. 23:37) Pontho akhadziwa kuti mphangwa zikhamwaza iye mbazidacitisa anthu kugawana. Anango mbadazitawira, mbwenye anango mbadazikhonda.—2 Ates. 2:9-11.
3. Tinapfundzanji mu nsolo uno?
3 Ndzidzi onsene tisawangisira toera kulonga undimomwene ninga pikhacita Yezu, maseze anthu anango nee asakomerwa na pyenepi. Kusiyapo pyenepi, tisamwaza mphangwa mbatipfundzisa undimomwene wa m’Bhibhlya, maseze nee ndi anthu onsene anakomerwa na mphangwa zenezi. Kodi pyenepi pisabveka kuti tinaenda kwene pyathu kamwaza mphangwa mbatikhonda kunyerezera kuti tinacita tani pyenepi? Nkhabe! Mu nsolo uno, pakutoma tinatawira mbvundzo uyu: Tinagumana kupi undimomwene? Buluka penepo, tinaona kuti thangwi yanji tisafunika kulonga undimomwene, tinaulonga tani, pontho ndi ndzidzi upi wakuti tisafunika kuulonga. Kudziwa pyenepi kunatiphedza toera kumwaza mphangwa munjira yadidi na mu ndzidzi wakuthema.
TINAGUMANA KUPI UNDIMOMWENE?
4. Thangwi yanji tinakwanisa kulonga kuti Yahova ndi Mwanaciro undimomwene?
4 Yahova ndi Mwanaciro undimomwene. Pyonsene pinalonga iye ndi pyandimomwene. Mwacitsandzo, angalonga kuti cinthu ici ndi cadidi peno ndi cakuipa, pyenepi ndi undimomwenedi. (Mas. 19:9; 119:142, 151) Pinthu pyonsene pidapikira iye thangwi ya ntsogolo pinadzakwanirisika. (Iza. 55:10, 11) Ndzidzi onsene angapikira pinthu asapicita. (Num. 23:19) Bhibhlya isalonga kuti nkhabe kwanisika kuti Yahova alonge uthambi! (Aheb. 6:18) Na thangwi ineyi, Yahova asadziwika ninga “Mulungu analonga undimomwene.”—Mas. 31:5.
5. Thangwi yanji nee ndi pyakunentsa kudziwa “Mulungu analonga undimomwene”? Fokotozani. (Mabasa 17:27)
5 Anango asalonga kuti ndi pyakunentsa kudziwa Yahova, “Mulungu analonga undimomwene.” Mbwenye manyerezero anewa ndi akuphonyeka. Pinthu pyonsene pidacita Mulungu, pisapangiza kuti alipo. (Aroma 1:20) Pikhali mpostolo Paulu ku Atena mbakacedza na anthu adapfundziswa mwadidi, iye alonga kuti Mulungu asafuna kuti ‘tinsake, mbatin’gumana,’ pontho iye “nee ali kutali na m’bodzi na m’bodzi wa ife.” (Lerini Mabasa 17:27.) Mwandimomwene Yahova asabweresa kuna iye, anthu akucepeseka akuti asasaka undimomwene.—Juw. 6:44.
6. Ndi undimomwene upi unango unagumana ife m’Bhibhlya, pontho thangwi yanji imwe musakomerwa nawo?
6 Njira ibodzi toera kudziwa Yahova ndi kupfundza Bhibhlya. Amuna adalemba Bhibhlya atsogolerwa na nzimu wakucena wa Mulungu. (2 Ped. 1:20, 21) Natenepa, tinakwanisa kunyindira kuti pinthu pyonsene piri m’Bhibhlya ndi pyandimomwene. Mwacitsandzo, tinakwanisa kunyindira pinalonga iyo kuti pakutoma Mulungu acita kudzulu na dziko yapantsi. (Gen. 1:1, 26) Pontho tinakwanisambo kunyindira pinalonga iyo thangwi yakutoma kwa madawo na kufa. (Aroma 5:12; 6:23) Tinakwanisa kukhulupira na ntima onsene, pinalonga Bhibhlya kuti Yahova anadzaphatisira Mwanace toera kumalisa nyatwa zonsene zidatomeswa na Dyabo “baba wauthambi.” (Juw. 8:44; Aroma 16:20) Pontho tinakwanisa kunyindira pinalonga iyo kuti Yezu anadzafudza anthu akuipa, anadzalamusa anthu adafa, anadzacitisa dziko yapantsi kukhala Paraizu na kutitsogolera toera tikhale aungwiro. (Juw. 11:25, 26; 1 Juw. 3:8) Yahova atipasa mwai ukulu kakamwe! Iye atipfundzisa undimomwene, pontho atipasa mwai wakupfundzisa anango thangwi ya Iye.—Mat. 28:19, 20.
THANGWI YANJI TISAFUNIKA KULONGA UNDIMOMWENE?
7-8. Ndi mathangwi api anaticitisa kulonga undimomwene? Perekani citsandzo. (Marko 3:11, 12) (Onanimbo mafoto.)
7 Ninga pidaona ife pa ndima yakutoma, toera kukhala ntumiki wa Yahova, tisafunika kulonga undimomwene. Mbwenye toera kuntsandzayisa, tisafunika kucita pizinji kupiringana kulonga undimomwene. Mathangwi anaticitisa kulonga undimomwene ndi akufunika kakamwe kuna Yahova. Onani pidacitika mu ndzidzi ukhamwaza Yezu mphangwa pa dziko yapantsi. (Lerini Marko 3:11, 12.) Pikhamwaza Yezu mphangwa dhuzi na bara ya Galileya, anthu azinji agumanyikana n’khundu mwace toera kumbvesera. Pa mwinji unoyu pakhalimbo na anthu akuti akhali na madimonyo, pontho akhagwa pantsi patsogolo pa Yezu, mbakhuwa: “Imwe ndimwe Mwana wa Mulungu.” Thangwi yanji madimonyo alonga undimomwene? Panango iwo akhafuna kuti anthu aanyindire, toera asiye kutumikira Yahova. Madimonyo anewa alonga undimomwene, mbwenye cifuniro cawo cikhali cakuipa. Pontho Yezu akhadziwa mwadidi pyenepi. Na thangwi ineyi, Yezu nee akomerwa na pidacita iwo, pontho aapanga toera akhonde kudziwisa anango thangwi ya iye.
8 Tisapfundzanji na pyenepi? Tisapfundza kuti mathangwi anaticitisa kulonga undimomwene ndi akufunika kakamwe kuna Yahova. Natenepa ndi pyakufunika kakamwe kupfundzisa anango undimomwene, thangwi tisafuna Yahova. Pontho anango angayesera kutipasa mbiri thangwi ya pinapfundzisa ife, tisafunika kupasa mbiri Yahova.—Mat. 5:16; onanimbo Mabasa 14:12-15.
Tingapfundzisa anango undimomwene wa m’Bhibhlya, mbani anafunika ife kupasa mbiri? (Onani ndima 7-8)
9. Ndi pinthu pipi pyakuti tisafunika kupicalira, pontho thangwi yanji?
9 Tendeni tione pinthu pinango pyakuti tisafunika kupicalira toera tikhonde kupasika mbiri. Nyerezerani kuti nkulu wa mpingo atipanga mphangwa za cibisobiso. Buluka penepo, mbatitomambo kupanga anthu anango. Anthu angadzindikira kuti mphangwa zidalonga ife ndi zandimomwene, panango iwo anadzumatirwa, mbanyerezera kuti tisadziwa mphangwa zizinji za cibisobiso. Panango pyenepi pinaticitisa kunyerezera kuti ndife akufunika kakamwe kuna anthu, tayu kuna Yahova. (Mis. 11:13) Thangwi yanji? Thangwi maseze mphangwa zenezi zikhale zandimomwene, mbwenye ife tazilonga na cifuniro cakuipa.
TINALONGA TANI UNDIMOMWENE?
10. Pisabvekanji kulonga “mafala adidi”? (Akolose 4:6)
10 Lerini Akolose 4:6. Mpostolo Paulu akumbusa Akristu a ku Kolose kuti mafala athu ndzidzi onsene asafunika “akhale adidi.” Mafala anewa asabvekanji? Mucigerego mafala anewa asabveka kuti tisafunika kulonga mafala adidi akuti anaphedza anthu anango.
11-12. Thangwi yanji tisafunika kupfundzisa undimomwene wa m’Bhibhlya munjira yadidi? Perekani citsandzo. (Onanimbo mafoto.)
11 Tisafunika kuphatisira uphungu wa Paulu wakulonga munjira yadidi tingapfundzisa anango undimomwene. Bhibhlya isalandanisa undimomwene unagumanika mwenemo na supada yakutwa kakamwe yakuti inakwanisa kusiyanisa piri kunja kwa munthu na piri nkati mwa munthu, peno iyo inakwanisa kupangiza manyerezero a munthu na pifuno pya muntima mwace. (Aheb. 4:12) Tingakhonda kuphatisira Bhibhlya munjira yadidi, tinakwanisa kutsukwalisa anthu anango peno kutomesa nthonga. Pyenepi pinacitika tani?
12 Nyerezerani kuti mu ndzidzi unamwaza ife mphangwa, tagumana munthu adapangiza cifuno, wakuti kazinji kene asacita maphembero kuna madzimunthu, pontho asakomerwa kucita phwando ya Natali na Paskwa pabodzi na banja yace. Ife mbatidakwanisa kuphatisira Bhibhlya toera kumpangiza kuti nee ndi pyadidi kucita phembero kuna madzimunthu, pontho kucita phwando ya Natali na ya Paskwa nee pisabverana na pinalonga Bhibhlya. (Iza. 44:14-20; 2 Akor. 6:14-17) Tingacita pyenepi paulendo wakutoma, tinapangiza kuti tiri kulonga undimomwene, mbwenye nee tiri kuphatisira Mafala a Mulungu munjira yadidi.
Tinapfundzisa tani undimomwene munjira yadidi? (Onani ndima 11-12)a
13. Thangwi yanji mafala athu asafunika adzipe ninga akuikhwa munyu?
13 Paulu alongambo kuti mafala athu asafunika adzipe ninga akuikhwa munyu. Pyenepi pisabvekanji? Paulu akhafuna kulonga kuti mafala athu asafunika, “adzipe” toera kulonga undimomwene munjira inakomeresa ale anamwazira ife mphangwa. (Yobe 12:11) Panango pyenepi pinakhala pyakunentsa. Nyerezerani kuti musafuna kuphikira anango cakudya. Kazinji kene tisanyerezera kuti cakudya cinakomerwa na ife, anango anakomerwa nacombo. Munjira ibodzi ene, panango tinanyerezera kuti njira inalonga ife, inakomeresa anthu onsene. Mbwenye manyerezero anewa ndi akuphonyeka. Madziko anango, anthu angalonga maonero awo asalonga mwakusudzuka ngakhale angalonga na akulu. Mbwenye m’madziko anango kulonga munjira ineyi, ndi pyakusowa cilemedzo. Paulu alonga kuti tisafunika kudziwa kuti ‘tinatawira tani m’bodzi na m’bodzi.’ Pyenepi pisapangiza kuti m’mbuto mwakulonga munjira inakomerwa na ife, peno munjira inalonga anthu mu dziko ino, tisafunika kulonga munjira inakomeresa ale anatibvesera.
NDI MU NDZIDZI UPI WAKUTI TISAFUNIKA KULONGA UNDIMOMWENE?
14. Kodi Yezu apfundzisa anyakupfundzace mu ndzidzi ubodzi ene pinthu pyonsene pikhadziwa iye? Fokotozani.
14 Yezu ndzidzi onsene akhalonga munjira yadidi kuna atowereri ace, pontho akhaapfundzisa pizinji. (Marko 6:34) Ngakhale tenepo, iwo akhafunika kupfundza pinthu pizinji. Yezu nee aapfundzisa pinthu pyonsene pikhadziwa iye. Mbwenye iye akhadziwa pinthu pinango pikhacimwana anyakupfundzace kubvesesa. Pontho akhadziwa kuti unoyu nee ukhali ndzidzi wakuthema toera anyakupfundzace adziwe pinthu pyonsene. Yezu alonga kuti iwo nee mbadakwanisa kubvesesa undimomwene unoyu. (Juw. 16:12) Pyenepi pisatipfundzisanji?
15. Kodi tisafunika kupfundzisa anyakupfundza athu pinthu pyonsene pinadziwa ife mu ndzidzi ubodzi ene? Fokotozani. (Misangani 25:11) (Onanimbo foto.)
15 Pidacita Yezu pisapangiza kuti nee tisafunika kupfundzisa undimomwene onsene unadziwa ife mu ndzidzi ubodzi ene. Tinatowezera tani pidacita Yezu? Tisafunika kudziwa mwadidi makhaliro a anthu. Nyerezerani pontho pya mamuna ule wakuti asakomerwa kucita phwando ya Natali na ya Paskwa pabodzi na banja yace. Ife tisadziwa matomero a maphwando anewa, pontho tisadziwambo kuti nee ndi akutawirika kuna Mulungu. Nyerezerani kuti mwatoma kupfundza Bhibhlya na munthu unoyu masumana mawiri peno ibodzi Natali mbidzati kufika. Khala imwe mwamala kumpanga pinalonga Bhibhlya thangwi ya maphwando anewa, pontho mwampanga kuti nee asafunika kucita phwando ya Natali. Kodi unoyu ukhali ndzidzi wakuthema toera kumpanga pyenepi? Ndimomwene kuti anyakupfundza anango asaphatisira mwakucimbiza pinapfundza iwo, mbwenye anango asakwata ndzidzi. Toera kuphedza anyakupfundza athu athambaruke, ife tisafunika kuapanga pinthu pinafunika iwo kudziwa pa ndzidzi wakuthema, peno khala iwo anakwanisa kubvesesa mu ndzidzi unoyu.—Lerini Misangani 25:11.
Pfundzisani undimomwene pa ndzidzi wakuthema, ninga pikhacita Yezu (Onani ndima 15)
16. Tinaphedza tani anyakupfundza athu toera ‘apitirize kufamba mu undimomwene’?
16 Cibodzi mwa pinthu pyakuti pisatitsandzayisa ndi kuphedza anthu toera adziwe undimomwene thangwi ya Yahova. Toera kuaphedza kuti ‘apitirize kufamba mu undimomwene’ tisafunika kupangiza citsandzo cadidi kuna iwo. (3 Juw. 3, 4) Pinthu pinacita ife mu umaso wathu, pisafunika kupangiza kuti tisakhulupira mapikiro analongwa m’Bhibhlya. Tisafunika kulonga undimomwene na cifuniro cadidi na munjira yadidi. Pontho tisafunika kuphatisira mafala adidi toera kupfundzisa undimomwene pa ndzidzi wakuthema. Tingasimbwa, mbiri yonsene tisafunika kuipasa Yahova. Tingacita pyenepi, tinapangiza kuti tiri kutumikira Yahova Mulungu wandimomwene.
NYIMBO 160 ‘Timwaze Mphangwa’!
a MAFALA ANAFOKOTOZA FOTO: Pa foto yakutoma, m’bale aona muti wa Natali pa nyumba ya munthu anamwazira iye mphangwa, pontho akupangiza nsolo unafokotoza kuti pyenepi nee pisabverana na pinalonga Bhibhlya. Pa foto yaciwiri, m’bale akupangiza mwanaciro nyumba nsolo ubodzi wakuti uli na uphungu wadidi kuna ababa. Njira zenezi ziwiri, ndi ipi yadidi yakuti inakwanisa kuphedza mwanaciro nyumba?