Nyerezerani Kuti Muli Kuona Pinthu Pinaleri Imwe m’Bhibhlya

M’Bhibhlya muli na mphangwa zizinji zakuti zisatipfundzisa pinthu pyakufunika. Toera kubvesesa mwadidi pinaleri ife m’Bhibhlya, tisafunika kunyerezera ninga pinthu pyenepi piri kucitika. Onani pinthu pinafuna kukuphedzani toera kubvesesa mwadidi pinaleri imwe m’Bhibhlya.

• Lerini mwakugaluza. Kuleri Bhibhlya mwakugaluza kunakuphedzani toera kuona pinthu ninga piri kucitika. Pakuleri Bhibhlya ninga banja, makhundu anango a Bhibhlya asalongwa na anthu akusiyana, natenepa toera kuona ninga pinthu pyenepi piri kucitika, phembani kuti khundu ibodzi na ibodzi ilerwi na munthu wakusiyana.

• Nyerezerani pinthu pinacitika. Yeserani kubvesesa mabvero na manyerezero ali na anthu analongwa. Mwacitsandzo, bvundzikani: ‘Thangwi yanji iye alonga peno acita pinthu munjira ineyi? Khala ndine adacitikirwa na pinthu pyenepi mbandidanyerezeranji, pontho mandidakhala na mabvero api?’

• Dhezenyarini. Kudhezenyari kunakuphedzani toera kunyerezera mwadidi pinthu pidaleri imwe mbamukhonda kupiduwala, mwakukhonda tsalakana khala musadhezenyari mwadidi peno nkhabe.