Munapereka Tani Takhuta Thangwi ya Ciomboli?

1-2. Ntsembe ya Yezu isatikulumiza toera kucitanji, pontho thangwi yanji? (2 Akorinto 5:14, 15) (Onanimbo foto.)

KHALA mwagwerwa na nyumba mbamufungirika na mabhuloko, munthu mbakupulumusani, nee munapereka takhuta kuna munthu unoyu? Maseze anango apulumuswembo, imwe mbamudakulumizika toera kupangiza kuti musapereka takhuta kakamwe thangwi ya pinthu pidacita munthu adakupulumusani.

² Mu nsolo udamala, tapfundza kuti nee tinakwanisa kupulumusika tekha ku madawo adathapula ife. Mbwenye ntsembe ya ciomboli inakwanisa kutipulumusa, thangwi iyo isatiphedza toera (1) kulekererwa madawo athu, (2) kutipasa cidikhiro ca ntsogolo na (3) kukhala pontho axamwali a Mulungu. Natenepa, tinakwanisa kukhala na cidikhiro cakukhala m’maso kwenda na kwenda mu dziko ipswa. Ciomboli ndi cipangizo ca ufuni uli na Yezu kuna anthu. Iye asafuna anthu kutomera kale kakamwe, mbadzati kubwera pa dziko yapantsi. (Mis. 8:30, 31) Mpostolo Paulu alemba: “Ufuni wa Kristu usatikulumiza.” (Lerini 2 Akorinto 5:14, 15.) Pyenepi pisabveka kuti ufuni wa Yezu usafunika kutikulumiza toera kucita pinthu pinapangiza kuti tisapereka takhuta kakamwe, pontho nee tinaduwala ntsembe idapereka iye kuna ife.

3. Thangwi yanji m’bodzi na m’bodzi panango anapereka takhuta munjira yakusiyana thangwi ya ciomboli?

³ Imwe munacitanji toera kupangiza kuti musapereka takhuta thangwi ya ciomboli? Panango ntawiro wanu unasiyana na mitawiro ya anango. Nyerezerani kuti anthu atatu ali kucita ulendo, pontho ali kuenda ku mbuto ibodzi ene. Mbwenye m’bodzi na m’bodzi ali kubuluka m’mbuto yakusiyana. Njira zinafuna kuphatisira iwo zinakhalambo zakusiyana. Mphapo imwembo, ndi kupi kunaenda imwe? Mbuto inaenda imwe, peno cifuniro canu ndi kupereka takhuta thangwi ya ciomboli. Na thangwi ineyi, mu nsolo uno tinapfundza thangwi ya misoka mitatu ya anthu: (1) Anyakupfundza Bhibhlya, (2) Akristu akubatizwa na (3) anthu adasiya kusonkhana na kumwaza mphangwa.

ANYAKUPFUNDZA BHIBHLYA

4. Yahova asaona tani anyakupfundza Bhibhlya?

⁴ Khala ndimwe nyakupfundza Bhibhlya, dziwani kuti kufuna kwanu kupfundza thangwi ya Yahova na Bhibhlya kusapangiza kuti Yahova ali kukukwewerani kuna iye. (Juw. 6:44; Mabasa 13:48) “Yahova ndiye anaona piri m’mitima ya anthu.” Pyenepi pisabveka kuti iye asaona kuwangisira kunacita imwe toera kupfundza thangwi ya iye, pontho asakhala wakutsandzaya kakamwe thangwi yakuthambaruka kwanu na macinjo anacita imwe toera kukhala xamwali wace. (Mis. 17:3; 27:11) Uxamwali unoyu usakwanisika basi ene thangwi ya ciomboli. (Aroma 5:10, 11) Lekani kuduwala pyenepi.

5. Anyakupfundza Bhibhlya, anabvera tani uphungu unagumanika pa Afilipi 3:16?

⁵ Imwe nyakupfundza Bhibhlya, munapangiza tani kuti musapereka takhuta thangwi ya ciomboli? Njira ibodzi yakucita pyenepi ndi kubvera uphungu udapereka mpostolo Paulu kuna abale na alongo a ku Afilipi: “Mwakukhonda tsalakana kuti tathambaruka mpaka papi, tendeni tipitirize kufamba munjira ibodzi ene.” (Afil. 3:16) Bhibhlya inango isalonga tenepa thangwi ya vesi ineyi: “Tendeni tipitirize na ulendo wathu mukuphatisira njira ibodzi ene.” Natenepa, bverani uphungu unoyu, pontho lekani kutawirisa kuti munthu akupingizeni kufamba munjira ya umaso.—Mat. 7:14; Luka 9:62.

6. Anyakupfundza Bhibhlya anacitanji khala nee ali kubvesesa pinapfundza iwo peno khala ali kuthimbana na pinentso pinango? (Dheuteronomyo 30:11-14) (Onanimbo foto.)

⁶ Ndiye tani khala pisakunentsani kukhulupira pidamala imwe kupfundza m’Bhibhlya? Fufudzani, pontho citani phembero kuna Yahova toera akuphedzeni kubvesesa. (Mas. 86:11) Khala pakumala kucita pyenepi musapitiriza kukhonda kubvesesa, lekani kubwerera nduli. Pitirizani kupfundza Bhibhlya, panango mukupita kwa ndzidzi munabvesesa pinapfundza imwe. Khala pisakunentsani kusiya kucita pinthu pinakhondesa Bhibhlya, munacitanji? Kumbukani kuti Yahova nee asatiphemba pinthu ‘pyakunentsa kakamwe.’ Imwe munakwanisa kucita pinthu pyakuti pinantsandzayisa. (Lerini Dheuteronomyo 30:11-14.) Yahova apikira kuti anakuphedzani. (Iza. 41:10, 13; 1 Akor. 10:13) Natenepa, pitirizani kuwangisira toera kubvera Yahova. M’mbuto mwakudzudzumika kakamwe na nyatwa zinatamba imwe, nyerezerani kupereka takhuta kunacita imwe kuna Yahova thangwi ya pyonsene pidacita iye kuna imwe, kuphatanizambo ciomboli. Mu ndzidzi unakula ufuni wanu kuna Yahova, munabvesesa mwadidi kakamwe kuti “matongero ace nee ndi akulemera.”—1 Juw. 5:3.a

7. Ndi pinthu pipi pyakuti aphale na atsikana anakuzwa mu undimomwene asafunika kupinyerezera?

⁷ Mphapo ndiye tani imwe m’phale, peno ntsikana wakuti muli kukuzwa mu undimomwene? Imwembo ndimwe nyakupfundza Bhibhlya. Imwe ndimwe nyakupfundza wa Bhibhlya wakufunika kakamwe wa anyakubalanu. Bhibhlya isalonga: “Fendedzerani Mulungu, iye anakufendedzeranimbo.” (Tiya. 4:8; 1 Kro. 28:9) Imwe mungacita thanyo yakutoma toera kufendedzera Yahova, iye anakufendedzeranimbo. Kuna Yahova, ndimwe wakufunika kakamwe. Iye nee akukweyani thangwi ya anyakubalanu peno acibale anakhala na imwe. Yahova asakwewera kuna iye munthu m’bodzi na m’bodzi, kuphatanizambo ale anakuzwa mu undimomwene. Mphapo Yahova acitanji toera mukhale na uxamwali wakuwanga na iye? Iye apereka Mwanace. Kumbukani kuti unoyu ndi muoni wakufunika kakamwe udakupasani Yahova. (Aroma 5:1, 2) Mphapo, mbamudzati kugumanika pa Cikumbuso ca caka cino, musaona tani musake ndzidzi toera kunyerezera pinthu pidakucitirani Yahova na Mwanace? Buluka penepo, tawirisani kuti pinthu pyenepi pikhuye umaso wanu na pifuno pyanu toera mukwanise kupangiza kupereka kwanu takhuta thangwi ya ciomboli.b

AKRISTU AKUBATIZWA

8. M’bale peno mulongo wakubatizwa apangiza tani kupereka takhuta thangwi ya ciomboli?

⁸ Khala imwe mwabatizwa, mwapangiza kupereka takhuta thangwi ya ciomboli munjira zizinji. Mwacitsandzo, imwe mwacita pinthu pizinji toera kufendedzera Yahova na kukhala m’maso munjira yakuti inantsandzayisa. Imwe mwabvera Yezu mbamumwaza mphangwa na kucita anyakupfundza. Imwe mwaperekeka kuna Yahova mbamubatizwa. Imwe panango mwatcingwa thangwi yakusankhula kutumikira Yahova. (2 Tim. 3:12) Mbwenye imwe mwapirira, pontho mwapitiriza kutumikira Yahova mwakukhulupirika. Pyenepi pisapangiza kuti imwe musafuna kakamwe Yahova, pontho musapereka takhuta thangwi ya Ciomboli.—Aheb. 12:2, 3.

9. Nkristu wakubatizwa asafunika kucita mphole-mphole nanji?

⁹ Nakuti ndife Akristu akubatizwa, tisafunika kucita mphole-mphole gopa tinatoma kusiya kupereka takhuta thangwi ya ciomboli. Pyenepi pinacitika tani? Nyerezerani pidacitikira Akristu a ku Efeso. Pidamala Yezu kulamuswa muli akufa, iye aasimba thangwi yakupirira kwawo. Mbwenye iye alongambo kuti: “Pana cinthu cinakhonda kukomerwa na ine thangwi ya iwe: Wasiya ufuni ukhali na iwe pakutoma.” (Apok. 2:3, 4) Mafala a Yezu asapangiza kuti mwapang’ono na pang’ono, Nkristu anakwanisa kufewa. Nkristu unoyu panango anapitiriza kucita phembero, kuenda kumisonkhano na kumwaza mphangwa. Iye anacita pyenepi basi ene thangwi adzolowera, tayu thangwi ya ufuni. Munacitanji mungaona kuti ufuni wanu kuna Yahova nee ndi wakuwanga ninga kale?

10. Kodi imwe ‘munanyerezera tani mwadidi,’ pontho ‘mbamuikha manyerezero anu onsene’ m’mabasa Acikristu? (1 Timoti 4:13, 15)

¹⁰ Mpostolo Paulu apanga Timoti toera ‘anyerezere mwadidi,’ pontho ‘aikhe manyerezero ace onsene’ m’mabasa ace Acikristu. (Lerini 1 Timoti 4:13, 15.) Mwakubverana na uphungu unoyu, yeserani kunyerezera pinthu pinafunika imwe kucita toera kulambira kwanu Yahova kupitirize ‘kutsogolerwa na nzimu wakucena.’ (Aroma 12:11; onani nota de estudo “Sejam fervorosos no espírito.”) Mwacitsandzo, imwe panango munafunika kukhunganyika misonkhano toera mubvesese mwadidi pinapfundza imwe pa misonkhano ineyi. Peno pa pfundziro yanu ya munthu paekha, munafunika kusaka mbuto yakuti munakhala mwekha mbamunyerezera mwadidi pinthu pinapfundza imwe. Munjira ineyi, imwe munaphindula mwadidi kakamwe na pfundziro yanu ya munthu paekha. Ninga moto usafunika uikhwe nkhuni toera upitirize kugaka, imwe musafunikambo kupitiriza kucita pyenepi toera kupereka takhuta thangwi ya ciomboli na pyonsene pidakupasani Yahova. Kusiyapo pyenepi, Cikumbuso mbacidzati, imwe munakwanisa kunyerezera pinthu pyadidi pinakucitikirani mu umaso thangwi yakukhala Mboni wa Yahova. Mwakukhonda penula, pyenepi pinathimizira kupereka kwanu takhuta thangwi ya ciomboli cakuti cakucitisani kukhala na uxamwali wakuwanga na Yahova.

11-12. Khala m’midzidzi inango musaona kuti nee ndimwebve waphinga ninga kale, pyenepi pisabveka kuti mwaluza nzimu wakucena wa Mulungu? Fokotozani. (Onanimbo foto.)

¹¹ Khala midzidzi inango musaona kuti nee musalambirabve Yahova mwaphinga ninga kale, lekani kutsukwala, pontho lekani kunyerezera kuti mwaluza nzimu wakucena wa Mulungu. Kumbukani pidalonga Paulu thangwi ya mabasace Acikristu kuna Akristu a ku Korinto: “Maseze ndicite pyenepi mwakukakamizika, ndisafunika kupitiriza kupicita, thangwi ndasankhulwa toera kucita pyenepi.” (1 Akor. 9:17) Paulu akhafuna kulonganji?

¹² Midzidzi inango, Paulu nee akhali na cifuno cakumwaza mphangwa. Mbwenye iye akhali dzololo toera kupirira na kumwaza mphangwa mwakukhonda tsalakana khala akhafuna peno nkhabe. Imwe munakwanisambo kucita pinthu pibodzi pyene. Khalani dzololo toera kucita pinthu pyadidi ngakhale nee mukufuna kucita pyenepi. Natenepa, phembani Yahova toera akupaseni “cifuno na mphambvu toera mucite pinafuna iye.” (Afil. 2:13) Pitirizani kucita pinthu pinawangisa uxamwali wanu na Yahova ndzidzi onsene. Khalani na cinyindiro cakuti mukupita kwa ndzidzi, pinthu pyenepi pinakuphedzani kukhala na mabvero adidi akukulisa ufuni wanu kuna Mulungu.

13. Tinapitiriza tani ‘kudingika toera kuona khala tiri na ‘cikhulupiro cakuwanga’?

¹³ Bukhu ya 2 Akorinto 13:5, isalonga kuti: “Pitirizani kuonesesa khala muciri akuwanga mu cikhulupiro; pitirizani kudingika mwekhene toera mudziwe kuti ndimwe anthu a ntundu wanji.” Ife tinakwanisa kubvundzika: ‘Kodi ine ndisaikha Umambo wa Mulungu pa mbuto yakutoma?’ (Mat. 6:33) ‘Ubalangazi unasankhula ine usapangiza kuti ndisaida pinthu pyakuipa?’ (Mas. 97:10) ‘Pinthu pinalonga ine na pinacita ine pisaphedzera toera abale na alongo apitirize kukhala akuphatana mu mpingo?’ (Aef. 4:2, 3) Ndzidzi wa Cikumbuso, ndi ndzidzi wakunyerezera muoni wa ciomboli udatipasa Yahova. Cikumbuso cisatipasa mwai wa kudingika tekhene na kukhala na cinyindiro cakuti tiri kukhala m’maso tayu toera kucita pinafuna ife, mbwenye ticite pinafuna ule adatifera.c

ANTHU ADASIYA KUSONKHANA NA KUMWAZA MPHANGWA

14. Ndi pinthu pipi pinacitisa abale na alongo anango kusiya kusonkhana na mpingo?

¹⁴ Abale na alongo anango asasiya kusonkhana na mpingo. Midzidzi inango, anango asacita pyenepi pakumala pyaka pizinji mbakatumikira Yahova mwakukhulupirika. Thangwi yanji? Anango asadzudzumika na ‘pinthu pinafuna iwo mu umaso.’ (Luka 21:34) Anango asasiya kusonkhana thangwi ya pinthu pidalonga peno pidacita m’bale peno mulongo unango. (Tiya. 3:2) Anangombo ndi thangwi acita madawo makulu, pontho thangwi ya manyadzo peno pinthu pinango, iwo nee aphemba ciphedzo. Khala cibodzi mwa pinthu pyenepi pyakucitikirani, pontho mwasiya kusonkhana na mpingo musafunika kucitanji? Muoni wa ciomboli unakukulumizani toera kucitanji?

15. Yahova asapangiza tani kuti asatsalakana anthu adasiya kusonkhana na mpingo? (Ezekiyeli 34:11, 12, 16)

¹⁵ Yahova asapibva tani thangwi ya anthu adasiya kusonkhana na mpingo? Iye nee aapindira peno kuaduwala. M’mbuto mwace, iye asasaka mabira ace akutayika. Yahova asaasaka na kuadyesa toera abwerere kuna iye. (Lerini Ezekiyeli 34:11, 12, 16.) Yahova ali kucitambo pibodzi pyene kuna imwe. Nakuti imwe muli kuleri nsolo uno, pyenepi pisapangiza kuti imwe musafuna kubwerera kuna iye. Yahova aona makhaliro anu adidi mu ndzidzi udakuphedzani iye toera kundziwa na kukhala mu gulu yace. Iye ali kupitiriza kuona makhaliro anu adidi, pontho asafuna kuti mubwerere mu mpingo.

16. Ninji pinafuna kuphedza ale adasiya kusonkhana na mpingo toera kubwerera kuna Yahova? (Onanimbo foto.)

¹⁶ M’bhruxura yakuti Bwererani Kuna Yahova muli na mafala awa: “Khalani na cinyindiro cakuti Yahova anadzakhala na imwe mungabwerera kuna iye. Yahova anadzakuphedzani toera kuthimbana na kupswipa ntima, kukunda mabvero akutsalakanwa mwakuipa, na kugumana ntendere wa manyerezero na wa muntima thangwi yakukhala na cikumbuntima cakucena. Natenepa, munadzakulumizika toera kutumikira pontho Yahova pabodzi na Akristu andzanu.” Kumbukani kuti akulu a mpingo asafunambo kakamwe kukuphedzani. Iwo anakwanisa kukhala “ninga mbuto yakuthawira mphepo, mbuto yakubisalira mu ndzidzi wa condzi.” (Iza. 32:2) Toera kupangiza kuti musapereka takhuta thangwi ya ciomboli, bvundzikani: ‘Ndinacitanji cincino toera ndimalise nseru wanga na Yahova?’ (Iza. 1:18; 1 Ped. 2:25) Imwe munakwanisa kugumanika pa misonkhano mu Nyumba ya Umambo. Musaona tani mulonge na m’bodzi wa akulu a mpingo toera akuphedzeni kubwerera kuna Yahova? Panango iwo anacita masasanyiro toera mupfundze pontho Bhibhlya. Khalani na cinyindiro cakuti mungacita phembero kuna Yahova mbamulonga thangwi ya pyenepi, pontho mungawangisira toera kupangiza kupereka takhuta thangwi ya ciomboli, Yahova anakupasani nkhombo.

MUNACITANJI?

17-18. Tinaphatisira tani mwadidi ndzidzi wathu Cikumbuso ca caka cino mbacidzati kufika?

¹⁷ Yezu alonga kuti atumwa na Yahova “toera munthu anankhulupira akhonde kufudzwa, mbwenye agumane umaso wakukhonda mala.” (Juw. 3:16) Yahova asaphatisira ciomboli toera kutisudzula ku madawo na kufa. Natenepa, nee tisafunika kuduwala kupereka takhuta thangwi ya ciomboli. (Aroma 3:23, 24; 2 Akor. 6:1) Cikumbuso mbacidzati, tisakhala na mwai wakunyerezera ufuni udapangiza Yahova na Mwanace, Yezu Kristu. Ufuni unoyu usatikulumiza toera kucita pinthu pinapangiza kuti tisapereka takhuta thangwi ya pinthu pidacita iwo.

¹⁸ Imwe munapangiza tani kupereka takhuta thangwi ya ciomboli? Ntawiro wanu unakwanisa kukhala wakusiyana na mitawiro ya anthu anango. Mbwenye khalani na cinyindiro cakuti Yahova anapasa nkhombo kuwangisira kwanu, pontho kuti abale na alongo azinji ‘nee ali kukhala m’maso toera kucita pinafuna iwo basi, mbwenye toera acite pinafuna ule adaafera.’—2 Akor. 5:15.