Ndi Pyakukwanisika Kukhala Pontho M’maso?

KODI tingafa, Mulungu anadzatilamusa toera tikhale pontho m’maso?— Yobe wakuti akhali mamuna wadidi akhakhulupira kuti Mulungu asafuna kulamusa anthu adafa. Na thangwi ineyi, Yobe pidadziwa iye kuti mbadafa, apanga Mulungu: “Imwe munandicemera, ine mbandikutawirani.” Yobe alonga kuti Yahova anadzantsuwa, pontho anadzafuna kakamwe kumulamusa muli akufa.—Yobe 14:14, 15.

Yezu ndi ninga Babace, Yahova Mulungu. Iye asafunambo kutiphedza. Pidapangwa iye na mamuna m’bodzi wakuti akhali na matanya kuti, “imwe mungafuna, munakwanisa kundiwangisa,” Yezu atawira: “Ine ndisafuna!” Buluka penepo Yezu awangisa mamuna unoyu.—Marko 1:40-42.

Yezu apfundza na Babace kufuna anapiana. Yahova aphatisira atumiki ace m’maulendo mawiri toera kulamusa anapiana akuti akhadafa. Nkazi m’bodzi adatsalakana mwadidi Eliya, pidaferwa iye na mwanace, Eliya aphemba Yahova toera alamuse mwana unoyu. Pontho Yahova atawira phembero ya Eliya. Kusiyapo pyenepi, Yahova aphatisirambo ntumiki wace, Elizeu toera kulamusa m’phale wakuti akhadafa.—1 Amambo 17:17-24; 2 Amambo 4:32-37.

Ndi pyakutsandzayisa kudziwa kuti Yahova asatifuna kakamwe. Iye nee asatikumbuka basi ene tingakhala m’maso. Maseze tingafa iye asapitiriza kutikumbuka. Yezu alonga kuti kuna Pai wace, anthu anafuna iye angafa asakhala ninga aciri m’maso! (Luka 20:38) Bhibhlya isalonga kuti: ‘Nee kufa, nee umaso, nee pinthu pya cincino, nee pinthu pyantsogolo, pinakwanisa kuticimwanisa kutambira ufuni wa Mulungu.’—Aroma 8:38, 39.

Pikhali Yezu pa dziko yapantsi, apangiza kuti Yahova asatsalakana anapiana. Panango usakumbuka kuti Yezu akhasaka ndzidzi toera kucedza na anapiana thangwi ya Mulungu. Kodi usadziwa kuti Mulungu apasa mphambvu Yezu toera kulamusa ana akuti akhadafa?— Tende tione pya ntsikana wa pyaka 12 pyakubalwa adalamuswa na Yezu muli akufa. Iye akhali mwana wa Jairo.

Jairo, nkazace na mwanawo m’bodzi basi akakhala dhuzi na Bara ya Galileya. Ntsiku inango mwana unoyu akhabva kupha kakamwe, pontho Jairo adzindikira kuti iye mbadafa. Natenepa Jairo akumbuka Yezu, mamuna wadidi adabva iye mbakalongwa kuti mbadakwanisa kuwangisa anthu. Jairo abuluka mbaenda kasaka Yezu. Iye an’gumana n’khundu-n’khundu mwa Bara ya Galileya mbakapfundzisa anthu.

Jairo apita na pakati pa mwinji wa anthu mpaka kuna Yezu. Iye agodama patsogolo pace mbalonga: ‘Mwananga wankazi ali kubva kupha kakamwe. Ndaphata miyendo, tendeni pabodzi toera mukamphedze. Ndisakudembeterani toera muende pabodzi na ine.’ Mu ndzidzi ubodzi ene Yezu aenda na Jairo. Anthu akuti akhadabwera kudzaona Mpfundzisi Wankulu aendambo kweneko. Pidafamba iwo nsindzo ungasi, agumanikana na amuna adabuluka kunyumba kwa Jairo, amuna anewa alonga: “Mwananu wankazi afa! Thangwi yanji muli kunentsa mpfundzisi?”

Yezu abva pidalonga amuna anewa. Iye akhadziwa kuti Jairo akhali wakutsukwala kakamwe thangwi ya kufa kwa mwanace m’bodzi basi. Na thangwi ineyi, Yezu ampanga: ‘Leka gopa, basi ene khulupira Mulungu, mwanako anadzakhala mwadidi.’ Iwo aenda mpaka kufika kunyumba kwa Jairo. Pidafika iwo agumana anthu akhali akutsukwala, pontho akhalira thangwi ya kufa kwa mwana unoyu. Mbwenye Yezu aapanga: “Lekani kulira, thangwi mwana hadafa tayu, mbwenye akugona.”

Pidalonga Yezu mafala anewa anthu atoma kuseka, thangwi iwo akhadziwa kuti mwana unoyu akhadafa. Mphapo thangwi yanji Yezu alonga kuti mwana unoyu akugona?— Iye akhafuna kuapfundzisa cinthu cakufunika kakamwe. Iye akhafuna kuti iwo adziwe kuti kufa ndi ninga kugona citulo cikulu. Pontho akhafuna kuapfundzisa kuti na mphambvu za Mulungu, nee ndi pyakunentsa kuna iye kulamusa munthu adafa, thangwi pisakhala ninga kulamusa munthu wakuti akugona.

Yezu apanga anthu onsene toera abuluke kunja, mbasala basi ene na mpostolo Pedhru, Tiyago, Juwau na anyakubala a ntsikana unoyu. Buluka penepo iye apita nkwartu mukhadagoneswa ntsikana, pontho aphata djanja yace mbalonga: “Ntsikana, lamuka!” Penepo pene ntsikana alamuka mbatoma kufamba! Natenepa anyakubalace akomerwa kakamwe.—Marko 5:21-24, 35-43; Luka 8:40-42, 49-56.

Nyerezera basi. Khala Yezu akwanisa kulamusa muli akufa ntsikana unoyu, kodi iye nee anakwanisambo kucita pibodzi pyene kuna anthu anango?— Kodi iye anacitadi pyenepi?— Inde. Yezu alonga: “Unadzafika ndzidzi wakuti onsene ali munthumbi zakukumbukirwa anadzabva fala [yanga] mbabuluka.”—Juwau 5:28, 29.

Yezu asafunadi kulamusa anthu muli akufa?— Citsandzo cinango ca m’Bhibhlya cinatiphedza kutawira mbvundzo unoyu. Ntsiku inango dhuzi na nzinda ukhacemerwa Naini, pacitika cinthu cinapangiza kuti Yezu asabvera anthu ntsisi angaferwa.

Nkazi unango wa mu nzinda wa Naini akhabuluka mu nzinda unoyu pabodzi na anthu azinji, iwo akhaenda kamperekera kumasiye toera kuikha mwanace. Mamunace akhadafa kale, natenepa mwanace m’bodzi basi afambo. Iye akhali wakutsukwala kakamwe! Anthu azinji a ku Naini akhaperekerambo mu ndzidzi ukhathukula amuna baulu toera kubuluka mu nzinda. Nkazi unoyu akhalira kakamwe, pontho nee munthu m’bodzi akhakwanisa kum’balangaza.

Ntsiku ineyi, Yezu na anyakupfundzace akhaenda mu nzinda unoyu wa Naini. Pikhali iye cifupi na nsuwo ukulu wa nzinda, aona anthu akhaenda kumasiye kaikha m’phale unoyu. Yezu pidaona iye nkazi unoyu mbakalira, ambvera ntsisi. Iye atsukwalambo kakamwe. Pontho akhafuna kum’phedza.

Na thangwi ineyi, Yezu ampanga mwaufuni na cinyindiro consene toera nkazi unoyu ambvesere kuti: “Leka kulira.” Mafala adalonga Yezu acitisa kuti anthu onsene amuyang’ane mwakudzumatirwa. Yezu pidafendedzera iye baulu, panango anthu onsene abvundzika kuti asafuna kucitanji. Natenepa Yezu alonga: “M’phale, ine ndiri kukupanga, lamuka!” Mu ndzidzi ubodzi ene m’phale unoyu akhala pantsi mbatoma kulonga.—Luka 7:11-17.

Mwandimomwene nkazi unoyu atsandzaya kakamwe! Ndiye tani munthu anafuna iwe mbalamuswa muli akufa unapibva tani?— Pyenepi nee pisapangiza kuti Yezu asafuna anthu, pontho asafuna kuaphedza?— Pinadzakhala pyakutsandzayisa kakamwe kutambira anthu anafuna kulamuswa muli akufa mu dziko ipswa ya Mulungu!—2 Pedhru 3:13; Apokalipse 21:3, 4.

Mu ndzidzi unoyu anthu anango anafuna kulamuswa muli akufa, ndi anthu akuti tikhaadziwa kale, kuphatanizambo anapiana. Ife tinaadziwa ninga pidacita Jairo pidadziwa iye mwanace pidalamuswa iye muli akufa na Yezu. Kusiyapo pyenepi, anango anafuna kulamuswa muli akufa ndi anthu akuti afa kale kakamwe. Mbwenye Mulungu nee anaaduwala maseze iwo afa kale kakamwe.

Nee ndi pyakutsandzayisa kudziwa kuti Yahova na Mwanace Yezu asatifuna kakamwe?— Iwo nee asafuna kuti tikhale m’maso mu ndzidzi wakucepa, mbwenye asafuna kuti tikhale m’maso kwenda na kwenda!