Mbani Anafuna Kulamuswa Muli Akufa, Pontho Anakhala Kupi?

MISOLO miwiri idamala tapfundza thangwi ya anthu anango adalamuswa muli akufa. Usakumbuka kuti ndi anthu angasi?— Akhali axanu. Anapiana akhali angasi?— Akhali atatu. Kusiyapo ana anewa, wacinai adalamuswa muli akufa akhali m’phale. Pyenepi pisatipfundzisanji?—

Pyenepi pisatipfundzisa kuti Mulungu asafuna anapiana, kuphatanizambo aphale na atsikana. Mbwenye iye anadzalamusambo anthu anango azinji. Kodi Mulungu anadzalamusa basi ene anthu adacita pinthu pyadidi?— Ndimomwene kuti iye anadzalamusa anthu adidi. Mbwenye anthu azinji nee apfundza thangwi ya Yahova Mulungu na Mwanace. Natenepa iwo akhacita pinthu pyakuipa, thangwi nee apfundziswa kucita pinthu pyadidi. Mphapo Yahova anadzalamusa anthu anewa?—

Bhibhlya isalonga kuti: “Kunadzaoneka kulamuswa muli akufa kwa anthu akulungama na akukhonda kulungama.” (Mabasa 24:15) Thangwi yanji anthu akukhonda kulungama peno ale akuti nee akhacita pinthu pyadidi anadzalamuswa muli akufa?— Thangwi nee akhala na mwai wakupfundza thangwi ya Yahova na pinthu pinafuna iye toera anthu acite.

Anthu anadzalamuswa lini muli akufa?— Kumbuka kuti pidafa Lazaro Yezu apanga Marta kuti: “M’bale wako anadzalamuka.” Marta atawira: “Ine ndisadziwa kuti iye anadzalamuka pakulamuswa kwa anyakufa pa ntsiku yakumalisa.” (Juwau 11:23, 24) Marta akhafuna kulonganji pidalonga iye kuti Lazaro anadzalamuka “pa ntsiku yakumalisa”?—

Marta akhadziwa pikiro idalonga Yezu kuti: ‘Onsene ali munthumbi zakukumbukirwa anadzabuluka.’ (Juwau 5:28, 29) Natenepa “ntsiku yakumalisa” ndi mu ndzidzi wakuti onsene ali m’manyerezero a Mulungu anadzalamuswa muli akufa. Ntsiku ineyi yakumalisa nee ndi ntsiku ya maora 24. Mbwenye unadzakhala ndzidzi wa pyaka 1.000. Thangwi ya ntsiku ineyi Bhibhlya isalonga: ‘Mulungu anadzatonga anthu pa dziko yapantsi.’ Anthu anewa anafuna kutongwa anadzaphatanizambo ale anafuna kudzalamuswa muli akufa.—Mabasa 17:31; 2 Pedhru 3:8.

Ntsiku ineyi inadzakhala yakutsandzayisa kakamwe. Ndzidzi unoyu wa pyaka 1.000, anthu azinji kakamwe adafa anadzakhala pontho m’maso. Yezu alonga kuti iwo anadzakhala m’Paraizu. Tende tione kuti Paraizu ineyi inadzakhala kupi, pontho pinthu pinadzakhala tani mwenemo.

Pidasala maora matatu toera Yezu afe pa muti wakusikimizira, iye alonga pya Paraizu kuna mamuna m’bodzi akhadakhomerwa pamuti dhuzi na iye. Mamuna unoyu akhadatongwa kuphiwa thangwi ya pinthu pyakuipa pidacita iye. Mbwenye pidayang’ana iye Yezu mbabva pinthu pikhalonga anthu thangwi ya Iye, phanga unoyu atoma kukhulupira Yezu. Na thangwi ineyi, iye alonga: ‘Ndikumbukirenimbo mungapita mu Umambo wanu.’ Yezu antawira: “Mwandimomwene ine ndiri kukupanga lero kuti, unadzakhala na ine m’Paraizu.”—Luka 23:42, 43.

Yezu akhafuna kulonganji na mafala anewa? Paraizu inadzakhala kupi?— Nyerezera basi: Paraizu yakutoma ikhali kupi?— Kumbuka kuti Mulungu aikha m’Paraizu pa dziko yapantsi mamuna wakutoma Adhamu na nkazace toera akhale mwenemo. Paraizu ineyi ikhacemerwa munda wa Edheni. Mwenemo mukhali na pinyama, mbwenye nee pikhaacita pyakuipa. Pontho mukhali na miti yakuti ikhabala misapo mizinji yadidi. Kusiyapo pyenepi mukhali na nkulo ukulu. Mwandimomwene ineyi ikhali mbuto yadidi kakamwe toera kukhala!—Genesi 2:8-10.

Tingaleri pya phanga unoyu kuti anadzakhala m’Paraizu, tisafunika kukumbuka kuti dziko yapantsi inadzakhala mbuto yadidi kakamwe. Pyenepi pisabveka kuti Yezu anadzakhala m’Paraizu pa dziko yapantsi pabodzi na mamuna unoyu wakuti akhali phanga?— Nkhabe. Usadziwa thangwi yanji?—

Ndi thangwi yakuti Yezu ninga Mambo, anadzatonga Paraizu pa dziko yapantsi kubulukira kudzulu. Natenepa Yezu anadzakhala na phanga unoyu, munjira yakuti anadzamulamusa muli akufa na kumpasa pyonsene pinafuna iye. Mphapo thangwi yanji Yezu anatawirisa mamuna unoyu wakuti akhali phanga kukhala m’paraizu?— Tende tione khala tinagumana ntawiro.

Phanga unoyu mbadzati kulonga na Yezu, kodi iye akhadziwa cifuniro ca Mulungu?— Nkhabe. Iye acita pinthu pyakuipa thangwi nee akhadziwa undimomwene unalonga pya Mulungu. Mbwenye m’Paraizu, iye anadzapfundziswa pinafuna Mulungu kuna anthu. Natenepa, iye anadzakhala na mwai wakupangiza kuti mwandimomwene asafuna Mulungu na kucita pinafuna iye.

Kodi anthu onsene anafuna kudzalamuswa muli akufa anadzakhala m’Paraizu pa dziko yapantsi?— Nkhabe. Usadziwa thangwi yanji?— Thangwi anthu anango anadzalamuswa muli akufa toera kuenda kakhala pabodzi na Yezu kudzulu. Iwo anadzatonga pabodzi na iye dziko yapantsi ninga amambo. Tende tione kuti tisadziwa tani pyenepi.

Namasiku Yezu mbadzati kufa, iye apanga apostolo ace: ‘N’nyumba mwa Babanga kudzulu muli na mbuto zizinji zakukhala, pontho ine ndiri kuenda kakukhunganyirani mbuto.’ Buluka penepo Yezu aapanga: ‘Ine ndinabwera pontho kudzakukwatani, toera imwe mukhalembo kule kunakhala ine.’—Juwau 14:2, 3.

Pidalamuswa Yezu muli akufa aenda kupi?— Ndimodi, iye abwerera kudzulu toera kakhala na Pai wace. (Juwau 17:4, 5) Ndi thangwi yace Yezu apikira apostolo ace na atowereri ace anango kuti mbadaalamusa muli akufa toera kuenda kakhala na iye pabodzi kudzulu. Kodi iwo anadzacitanji pabodzi na Yezu kudzulu?— Bhibhlya isalonga kuti anyakupfundza anewa, akuti asacita khundu ya ‘kulamuswa muli akufa kwakutoma’ anadzakhala kudzulu mbatonga dziko yapantsi ninga amambo “pabodzi na iye mu pyaka 1.000.”—Apokalipse 5:10; 20:6; 2 Timoti 2:12.

Ndi anthu angasi anafuna ‘kudzalamuswa muli akufa pakutoma’ mbakhala amambo pabodzi na Yezu?— Yezu apanga anyakupfundzace: “Lekani kugopa, imwe nkumbi ung’ono, thangwi Babanu akomerwa kukupasani Umambo.” (Luka 12:32) “Nkumbi ung’ono” unoyu wakuti unadzalamuswa toera kukhala pabodzi na Yezu kudzulu mu Umambo wace, numero yace isadziwika kale. Bhibhlya isalonga kuti ‘anthu akukwana 144.000’ anadzalamuswa muli akufa toera kuenda kakhala kudzulu.—Apokalipse 14:1, 3.

Ndi anthu angasi anafuna kudzakhala m’Paraizu pa dziko yapantsi?— Bhibhlya nkhabe longa. M’munda mwa Edheni, Mulungu apanga Adhamu na Eva toera abale ana kuti adzadze dziko yapantsi. Ndimomwene kuti iwo nee acita pyenepi. Mbwenye Mulungu anacitisa kuti cifuniro cace ca kudzadza dziko yapantsi na anthu adidi cikwanirisike.—Genesi 1:28; Izaiya 45:18; 55:11.

Mwandimomwene pinadzakhala pyakutsandzayisa kakamwe kukhala m’Paraizu! Thangwi dziko yonsene inadzakhala yakubalika, inadzakhala na mbalame zizinji, pinyama, miti yakubalika na maluwa akusiyana-siyana. Nkhabepo munthu anafuna kudzaduwala peno kufa. Onsene anadzakhala axamwali. Khala tisafuna kukhala m’maso m’Paraizu kwenda na kwenda, tisafunika kutoma cincino kukhunganyika.