Ninji Pinacitika Munthu Angafa?

IWE usadziwa kuti ntsiku zino anthu asakalamba, asaduwala, pontho asafa. Na anang’ono ene asafambo. Kodi iwe usafunika kugopa kufa peno anthu adafa?— Mphapo ninji pinacitika munthu angafa?—

Ndimomwene kuti nkhabepo munthu adafa ntsiku zino mbalamuswa muli akufa toera kutipanga pinthu pinacitikira munthu angafa. Mbwenye mu ndzidzi ukhali Yezu pa dziko yapantsi wakuti ndi Mpfundzisi Wankulu, mamuna m’bodzi akhadafa mbalamuswa muli akufa. Tingaleri mphangwa zinalonga pya mamuna unoyu tinakwanisa kudziwa pinthu pinacitika munthu angafa. Mamuna unoyu akhali xamwali wa Yezu, pontho akhali ku Bhetanya, nzinda ung’ono dhuzi na Yerusalemu. Iye akhacemerwa Lazaro, pontho akhali na abale ace awiri akhacemerwa Marta na Mariya. Tende tione pidacitika mwakubverana na pinalonga Bhibhlya.

Ntsiku inango Lazaro akhabva kupha kakamwe. Pontho Yezu nee akhali kweneko. Na thangwi ineyi, Marta na Mariya atuma munthu toera kuenda kapanga Yezu kuti m’bale wawo akuduwala. Iwo acita pyenepi thangwi akhadziwa kuti Yezu angabwera mbadawangisa m’bale wawo. Ndimomwene kuti Yezu nee akhali dotoro, mbwenye iye akhadapaswa mphambvu na Mulungu toera kuwangisa matenda onsene.—Mateu 15:30, 31.

Yezu mbadzati kufika kweneko utenda wa Lazaro wadzatekera kakamwe mbafa. Natenepa Yezu apanga anyakupfundzace kuti Lazaro ali kugona, pontho ali kuenda kamulamusa. Mbwenye anyakupfundza nee abvesesa pidalonga Yezu. Na thangwi ineyi Yezu aapanga kuti: “Lazaro afa.” Pyenepi pisatipfundzisanji thangwi ya kufa?— Pisatipfundzisa kuti kufa ndi ninga kugona citulo cikulu. Citulo ceneci ndi cikulu kakamwe cakuti munthu nkhabe kulota.

Buluka penepo Yezu adzaenda kuna Marta na Mariya. Axamwali awo azinji akhadafika kale kweneko toera kubalangaza Marta na Mariya thangwi ya kufa kwa Lazaro. Marta pidabva iye kuti Yezu akubwera, aenda kaonana naye. Pontho Mariya aendambo kaonana na Yezu. Iye akhali wakutsukwala kakamwe, pontho akhalira. Mariya pidafika iye pana Yezu agodama mbakotamisa nkhope yace mpaka pantsi cifupi na miyendo ya Yezu. Natenepa axamwali ace anango akuti akhantowera atomambo kulira.

Mpfundzisi Wankulu abvundzisa kukhadaikhwa Lazaro. Natenepa iwo aenda kapangiza Yezu nthumbi ikhadaikhwa Lazaro. Yezu pidaona iye anthu onsene mbakalira, iye atomambo kulira. Iye akhadziwa kuti pisapha kakamwe kuferwa na munthu anafuna ife.

Nthumbi ikhadaikhwa Lazaro ikhadafungwa na mwala, natenepa Yezu alonga: “Bulusani mwala.” Kodi iwo akhafunikadi kubulusa mwala unoyu?— Marta aona kuti mwala unoyu nee ukhafunika kubuluswa. Iye alonga: ‘Mbuya, panango akununkha, thangwi papita ntsiku zinai mbadamala kufa.’

Yezu antawira: “Kodi ine nee ndakupanga kuti ungakhulupira mbudaona mbiri ya Mulungu?” Yezu pidalonga iye mafala anewa, iye akhapangiza kuti Marta mbadaona cinthu cakuti mbacidapasa mbiri Mulungu. Yezu akhafuna kucitanji? Pidabuluswa mwala pa nthumbi, Yezu acita phembero kuna Yahova mwakugaluza. Pidamala iye kucita phembero ancemera mwakugaluza: “Lazaro, buluka panja!” Kodi iye mbadakwanisadi kubuluka?—

Kodi iwe unakwanisa kulamusa munthu wakuti ali kugona?— Inde, ungancemera mwakugaluza iye analamuka. Mphapo munthu adafa unakwanisa kumulamusa?— Nkhabe. Maseze tilonge mwakugaluza kakamwe, munthu adafa nkhabe kubva cinthu. Lero, pa dziko ino yapantsi nkhabepo munthu wakuti anakwanisa kulamusa munthu adafa.

Yezu ndi wakusiyana na ife. Iye akhadapaswa mphambvu zakupambulika na Mulungu. Na thangwi ineyi, Yezu pidacemera iye Lazaro, pacitika cinthu cakudzumatirisa. Mamuna wakuti akhadafa mu ntsiku zinai abuluka munthumbi! Iye akhala pontho m’maso. Iye akwanisa pontho kupuma, kufamba na kulonga. Yezu alamusa Lazaro muli akufa.—Juwau 11:1-44.

Mphapo nyerezera basi: Ninji pidacitika kuna Lazaro pidafa iye? Pana cinthu cidabuluka m’manungo mwace mbacienda kakhala ku mbuto inango? Kodi Lazaro aenda kudzulu? Kodi iye akhala kudzulu ntsiku zinai pabodzi na Mulungu na aanju?—

Pyenepi nee pyacitika. Kumbuka kuti Yezu alonga kuti Lazaro ali kugona. Ninji pinacitika kuna iwe ungagona? Iwe ungagona citulo cikulu nee usakwanisa kudziwa pinacitika n’khundu mwako. Ungalamuka mbukhonda kuyang’ana rorojo nee unakwanisa kudziwa kuti wagona ndzidzi ungasi.

Ndi pyenepi pinacitika kuna anthu adafa. Iwo nkhabe dziwa cinthu, nee kubva cinthu. Pontho nee asakwanisa kucita cinthu. Ndi pyenepi pidacitika kuna Lazaro mu ndzidzi udafa iye. Munthu angafa asakhala ninga agona citulo cikulu cakuti nee asakwanisa kukumbuka cinthu. Bhibhlya isalonga kuti: “Anyakufa nkhabe cinthu cinadziwa iwo.”—Ekleziaste 9:5, 10.

Nyerezera basi: Mbidakhala kuti Lazaro amala ntsiku zinai mbali kudzulu, kodi iye nee mbadalonga kuti kudzulu kwakhala tani?— Pontho mbidakhala kuti Lazaro akhali kudzulu, Yezu mbadam’bulusa mbuto ineyi yadidi mbam’bweresa pontho pa dziko yapantsi?— Mwandimomwene nkhabe!

Anthu azinji asalonga kuti tiri na nzimu wakuti usapitiriza kukhala m’maso tingafa. Iwo asalonga kuti nzimu wa Lazaro, ukhali m’maso ku mbuto inango. Mbwenye nee ndi pyenepi pinalonga Bhibhlya. Iyo isalonga kuti Mulungu acita mamuna wakutoma Adhamu mbakhala “munthu waumaso.” Bhibhlya isalongambo kuti pidadawa Adhamu, afa, pontho nee cinthu cibodzi cikhadziwa iye. Natenepa, iye abwerera pontho ku pfumbi ikhadacitwa na iye. Kusiyapo pyenepi, Bhibhlya isalonga kuti ana onsene a Adhamu asabalwa na madawo, pontho asafa.—Genesi 2:7; 3:17-19; Numero 6:6; Aroma 5:12.

Pyenepi pisapangiza pakweca kuti ife nkhabe nzimu wakuti usapitiriza kukhala m’maso tingafa. Nakuti ife tisabalwa na madawo thangwi ya mamuna wakutoma Adhamu, Bhibhlya isalonga: “Ule anadawa, ndiye anafuna kufa.”—Ezekiyeli 18:4.

Anango asagopa anthu akufa. Iwo asagopa kupita dhuzi na masiye thangwi asanyerezera kuti anthu akufa ali na mizimu yakuti isabuluka mbithabusa anthu ali m’maso. Kodi munthu wakufa anakwanisa kuthabusa munthu ali m’maso?— Mwandimomwene nkhabe.

Anthu anango asakhulupira kuti anthu akufa asasanduka kudza mizimu, mbabwera kudzaaona. Na thangwi ineyi asaakhunganyira cakudya. Anthu anacita pyenepi nee asakhulupira na ntima onsene pinalonga Mulungu thangwi ya anyakufa. Tingakhulupira pinalonga Mulungu thangwi ya anyakufa, nee tinagopa anyakufa. Mwandimomwene tingapereka takhuta thangwi ya umaso udatipasa Mulungu, tinacita pinthu pinakomerwa na iye.

Mbwenye panango unabvundzika: ‘Kodi Mulungu analamusa ana adamala kufa? Kodi iye asafunadi kucita pyenepi?’ Tinaona mitawiro ya mibvundzo ineyi mu nsolo unatowera.