Tisafunika Kubvera Ani?

MIDZIDZI inango ndi pyakunentsa kudziwa anafunika ife kubvera. Panango pai wako peno mai wako anakupanga toera ucite cinthu. Mbwenye mpfundzisi wako peno mpolisiya anakupanga toera ucite cinthu cakusiyana na ceneci. Pyenepi pingacitika, usafunika kubvera ani?—

Mu Nsolo 7 wa bukhu ino, taleri lemba ya Aefesi 6:1-3. Lemba ineyi isalonga kuti ana asafunika kubvera anyakubalawo. Iyo isalonga: “Bverani anyakubala anu ninga munafunira Mbuya.” Mafala akuti “ninga munafunira Mbuya” asabvekanji?— Anyakubala anacita pinthu ninga munafunira Mbuya asapfundzisa anawo toera abvere mitemo ya Mulungu.

Mbwenye akulu anango nee asakhulupira Yahova. Mphapo unacitanji m’bodzi wa iwo angakupanga kuti nee ndi pyakuipa kukabhulari kuxikola peno kukwata cinthu muloja mbukhonda kucipagari? Usaona kuti kuba peno kukabhulari ndi pyadidi?—

Ndisadziwa kuti iwe usakumbuka ntsiku inango Mambo Nabhukodhonozore apanga anthu toera agodamire dzimunthu ya ouro idacita iye. Mbwenye Sadhrake, Mezaki na Abhedhinego akhonda kucita pyenepi. Usadziwa thangwi yanji?— Thangwi Bhibhlya isalonga kuti anthu asafunika kulambira basi ene Yahova.—Eksodho 20:3; Mateu 4:10.

Pidafa Yezu, apostolo akwatwa mbaendeswa ku Sinedhryo ku Thando Yakutonga Miseru ya uphemberi Waciyuda. Nyantsembe Wankulu Kaifa alonga: ‘Ife takupangani toera musiye kupfundzisa mu dzina ya [Yezu] mbwenye imwe mwadzadza Yerusalemu na pipfundziso pyanu.’ Thangwi yanji apostolo nee aabvera?— Pedhru atawira Kaifa: “Pakutoma tisafunika kubvera Mulungu ninga ntongi, tayu anthu.”—Mabasa 5:27-29.

Mu ndzidzi unoyu atsogoleri Aciyuda, akhali amphambvu kakamwe. Mbwenye iwo akhatongwa na Aroma. Ntongi Waciroma akhali Sezari. Utongi Waciroma ukhacita pinthu pizinji pyadidi kuna anthu, mbwenye Ayuda nee akhakomerwa kutongwa na Sezari. Lero mautongi asacitirambo anthu pinthu pyadidi. Iwo asacitanji?—

Mautongi asasasanya miseu toera tifambe mwadidi, asapagari mapolisya, pontho asapagarimbo anyakuthimisa moto toera kutitsidzikiza. Iwo asamanga maxikola toera anapiana apfundze, kusiyapo pyenepi asapereka ciphedzo kuna mankhalamba. Toera kucita pyenepi mautongi asafunika kukhala na kobiri. Usadziwa kuti kobiri ineyi isabuluka kupi?— Kuna anthu. Kobiri inapereka mbumba kuna mautongi isacemerwa misonkho.

Pikhali Mpfundzisi Wankulu pa dziko yapantsi, Ayuda azinji nee akhafuna kupereka misonkho kuna utongi Waciroma. Na thangwi ineyi, ntsiku inango anyantsembe apanga amuna anango toera acite mbvundzo uyu kuna Yezu toera kunsakira thangwi: ‘Tisafunika kulipa nsonkho kuna Sezari peno nkhabe?’ Iwo acita mbvundzo unoyu toera kuyesera Yezu. Yezu mbadatawira: ‘Inde, imwe musafunika kulipa misonkho,’ Ayuda azinji mbadaipirwa. Mbwenye Yezu nee mbadaapanga kuti: ‘Nkhabe, nee musafunika kulipa misonkho.’ Pyenepi mbapidakhala pyakuipa.

Mphapo Yezu acitanji? Iye aapanga: “Ndipangizeni kobiri ibodzi.” Pidapangizwa iye kobiri ineyi, Yezu aabvundza: “Nkhope na dzina iri penepa mphya ani?” Iwo antawira: “Mphya Sezari.” Natenepa Yezu aapanga: “Perekani kuna Sezari pinthu pya Sezari, mbwenye pya Mulungu perekani kuna Mulungu.”—Luka 20:19-26.

Mwandimomwene, nee m’bodzi wa iwo adapokanya mafala adalonga Yezu, thangwi kobiri ineyi yacitwa na Sezari. Nakuti Sezari akhacitira anthu pinthu pyadidi, pikhali pyakuthema kumulipa thangwi ya pinthu pyadidi pikhacita iye. Mafala anewa adalonga Yezu asapangiza kuti ndi pyadidi kulipa misonkho kuna mautongi thangwi ya pinthu pyadidi pinaticitira iwo.

Panango iwe udzati khala na thunga toera kulipa misonkho. Mbwenye pali na cinthu cakuti unakwanisa kucicita kuna mautongi. Ndi cinthu cipi?— Ndi kubvera mitemo inakhazikiswa na mautongi. Bhibhlya isalonga: ‘Musafunika kubvera mautongi.’ Mautongi anewa ndi ale ali na cidzo ca kutonga. Natenepa Mulungu asatipanga toera tibvere mautongi.—Aroma 13:1, 2.

Mbuto zinango mautongi asakhondesa kutaya pinthu mu nseu. Usafunika kubvera ntemo unoyu?— Inde, Mulungu asafuna kuti uubvere. Usafunikambo kubvera mapolisiya?— Mautongi asapagari mapolisiya toera atsidzikize anthu. Kubvera mapolisya ndi pibodzi pyene na kubvera mautongi.

Nyerezera kuti usafuna numpha nseu, mpolisiya m’bodzi mbakupanga: “Dikhira pan’gono!” Unacitanji?— Mphapo anango anganumpha nseu na kuthamanga, iwe unacitambo pibodzi pyene?— Usafunika kudikhira maseze andzako anumphe na kuthamanga. Mulungu asatipanga kuti tisafunika kubvera.

Panango pacisa panacitika uviyaviya, mapolisiya mbalonga: “Lekani kubuluka panyumba.” Panango unabva anthu mbakakhuwa mbukhala na cifuno ca kuenda kaona pinacitika kunja. Kodi ndi pyakuipa kubuluka toera kuenda kasuzumira?— Usaona kuti ungacita pyenepi ukubvera “mautongi”?—

Mbuto zizinji mautongi asamanga maxikola, pontho asapagari apfundzisi. Kodi Mulungu asafuna kuti ubvere apfundzisi?— Nyerezera basi: Mautongi asapagari apfundzisi toera kupfundzisa, ninga pinacita iwo kuna mapolisiya toera kutsidzikiza anthu. Natenepa tingabvera mapolisiya na apfundzisi tinapangiza kuti tisabvera mautongi.

Ndiye tani apfundzisi angakupanga toera kulambira madzimunthu? Unacitanji?— Ahebheri atatu akhonda kulambira dzimunthu maseze Mambo Nabhukodhonozore akhadaapanga toera kucita pyenepi. Usakumbuka kuti thangwi yanji iwo akhonda?— Thangwi iwo akhafuna kubvera Mulungu.

Nyakulemba pya mbiri m’bodzi akhacemerwa Will Durant, alemba tenepa thangwi ya Akristu a mu ndzidzi wa apostolo: ‘Iwo apangiza kuti akhali akukhulupirika kakamwe kuna Mulungu tayu kuna Sezari!’ Natenepa kumbuka kuti Mulungu ndiye anafunika kukhala pa mbuto yakutoma mu umaso wathu.

Ife tisabvera mautongi thangwi Mulungu asafuna kuti ticite pyenepi. Mphapo iwo angatipanga toera ticite pinthu pinakhondesa Mulungu, tinatawira tani?— Tinalonga ninga pidalonga apostolo kuna nyantsembe wankulu kuti: “Pakutoma tisafunika kubvera Mulungu ninga ntongi.”—Mabasa 5:29.