Mbani Mulungu Wako?

THANGWI yanji mbvundzo wakuti Mbani Mulungu wako ndi wakufunika?— Thangwi anthu asalambira alungu azinji. (1 Akorinto 8:5) Mpostolo Paulu pidapaswa iye mphambvu na Yahova toera kuwangisa mamuna m’bodzi wakuti akhadalamala miyendo, anthu alonga: “Alungu asanduka kudza anthu, mbatcita kudza kuna ife.” Iwo akhafuna kulambira Paulu na xamwali wace Bharnabhe. Natenepa iwo apasa Paulu dzina yakuti Herme na Bharnabhe dzina yakuti Zeu. Madzina anewa akhali a alungu authambi.

Paulu na Bharnabhe nee atawirisa anthu toera aalambire. Natenepa iwo apita pakati pa anthu mbalonga: ‘Siyani pinthu pyenepi pyakusowa basa, mbamulambira Mulungu wa m’maso.’ (Mabasa 14:8-15) Mphapo mbani “Mulungu wa m’maso” adacita pinthu pyonsene?— Ndimodi ndi Yahova. Iye ndi “Wankulu Kakamwe pa dziko yonsene yapantsi.” Yezu alonga kuti Yahova ndi “Mulungu m’bodzi basi wandimomwene.” Natenepa mbani adathema kulambirwa?— Basi ene ndi Yahova!—Masalmo 83:18; Juwau 17:3; Apokalipse 4:11.

Anthu azinji asalambira alungu authambi m’mbuto mwakulambira “Mulungu m’bodzi basi wandimomwene.” Kazinji kene iwo asalambira pinthu pyakucitwa na miti, miyala peno pyakucitwa na mafero. (Eksodho 32:4-7; Levitiko 26:1; Izaiya 44:14-17) Ngakhale amuna na akazi akubvekera midzidzi inango asacemerwa alungu peno asalemedzwa kakamwe. Kodi ndi pyadidi kuapasa mbiri ineyi?—

Saulo pidakhala iye mpostolo mbacemerwa Paulu, alemba: “Mulungu wa dziko ino afunga manyerezero a anyakukhonda kukhulupira.” (2 Akorinto 4:4) Mulungu unoyu mbani?— Inde, ndi Sathani Dyabo! Iye asacitisa anthu azinji toera alambire anthu anango peno pinthu pinango pizinji.

Sathani pidapanga iye Yezu toera amulambire, Yezu atawira tani?— Iye antawira kuti “ndi Yahova Mulungu wako anafunika iwe kulambira, pontho ndiye basi anafunika iwe kutumikira.” (Mateu 4:10) Yezu apangiza pakweca kuti basi ene adathema kulambirwa ndi Yahova. Tende tione mphangwa zinalonga pya aphale angasi akuti akhadziwa mwadidi pyenepi. Aphale anewa akhacemerwa Sadhrake, Mezaki na Abhedhinego.

Aphale anewa Acihebheri akuti akhali a dzindza ya Izraeli idasankhulwa na Mulungu, akwatwa mbaendeswa ku ubitcu ku Bhabhilonya. Mambo wa dziko ineyi akhacemerwa Nabhukodhonozore acita dzimunthu ikulu ya ouro. Ntsiku inango iye apanga anthu onsene toera agodamire dzimunthu ineyi angabva kuimbwa kwa nyimbo. Iye alonga kuti: “Ule anakhonda kugodama mbalambira dzimunthu ineyi, penepo pene anadzaponywa mu forno yakugaka moto.” Khala ndiwe adapangwa pyenepi mbudacitanji?—

Kazinji kene, Sadhrake, Mezaki na Abhedhinego akhacita pinthu pyonsene pikhapangwa iwo na mambo. Mbwenye pidapangwa iwo toera alambire dzimunthu akhonda. Thangwi yanji?— Thangwi mwambo wa Mulungu ukhalonga: ‘Usafunika kulambira ine basi, leka kulambira alungu anango. Leka kucita dzimunthu peno kuilambira.’ (Eksodho 20:3-5) Natenepa, Sadhrake, Mezaki na Abhedhinego abvera mwambo wa Yahova tayu pidalonga mambo.

Mambo pidabva iye pyenepi aipirwa kakamwe. Natenepa iye acemeresa aphale anewa atatu Acihebheri mwakucimbiza. Iye aabvundza: ‘Ndimomwene kuti imwe mwakhonda kulambira alungu anga? Ndinakupasani pontho mwai unango. Cincino mungabva kulira kwa nyimbo musafunika kugodama mbamulambira dzimunthu idacita ine. Mbwenye mungakhonda kuilambira, munadzaponywa mu forno yakugaka moto. Ndi mulungu upi wakuti anakwanisa kukupulumusani m’manja mwanga?’

Aphale anewa mbadacitanji? Khala ndiwe mbudacitanji?— Iwo apanga mambo: ‘Mulungu wathu anatumikira ife anatipulumusa. Maseze iye akhonde kutipulumusa, dziwani mambo kuti ife nee tinalambira alungu anu peno kulambira dzimunthu ya ouro idatcimika imwe.’

Mambo aipirwa kakamwe mbalonga: ‘Gasani moto kanomwe mu forno kupiringana ntsiku zonsene.’ Buluka penepo apanga amuna amphambvu toera amange Sadhrake, Mezaki na Abhedhinego mbaaponya mu forno yakugaka moto. Forno ineyi ikhapisa kakamwe mpaka amuna anewa adatumwa na mambo kufa thangwi yakupisa! Mphapo ninji pidacitika na Ahebheri anewa atatu?

Sadhrake, Mezaki na Abhedhinego aponywa pa moto. Pidaponywa iwo alamuka mbalimira, iwo nee aphekeka, nee apya, pontho pinthu pikhadamangwa na iwo pyasudzuka. Pyenepi pyakwanisika tani?— Mambo pidayang’ana iye mu forno yakugaka moto agopa kakamwe pinthu pidaona iye mwenemo. Mambo abvundza: ‘Nee taponya amuna atatu mu forno ya moto?’ Atumiki ace antawira: “Inde mambo.”

Buluka penepo mambo alonga: ‘Mbwenye ine ndiri kuona amuna anai ali kufamba pa moto, pontho nee m’bodzi wa iwo anapya.’ Usadziwa munthu wacinai akhali ani?— Akhali anju wa Yahova. Iye atsidzikiza Ahebheri anewa atatu toera akhonde kupya.

Mambo pidaona iye pyenepi, aenda dhuzi na nsuwo wa forno yakugaka moto mbakhuwa: “Sadhrake, Mezaki na Abhedhinego imwe atumiki a Mulungu Wankulu Kakamwe bulukani mwenemo mbamubwera kuno!” Pidabuluka iwo, anthu onsene aona kuti iwo nee apya, pontho nguwo zawo nee zikhanunkha utci. Buluka penepo mambo alonga: ‘Mbasimbwe Mulungu wa Sadhrake, Mezaki na Abhedhinego ule adatuma anju wace mbapulumusa atumiki ace! Thangwi iwo akhonda kulambira mulungu unango kusiyapo Mulungu wawo.’—Dhanyeli, kapitulu 3.

Tinakwanisa kupfundza cinthu cakufunika kakamwe na pinthu pyenepi pidacitika. Ngakhale mu ntsiku zino anthu asacita madzimunthu peno cinthu cinango toera kucilambira. Bukhu inango ya Encyclopedia yalonga tenepa: “Bandera na kuruju ndi pinthu pyakucena peno pyakupambulika.” (The Encyclopedia Americana) Madzimunthu anango asacitwa na miti, miyala, mafero peno nguwo. Anyakupfundza akutoma a Yezu nee akhalambira utongi Waciroma. Mwakubverana na nyakulemba pya mphangwa za kale Daniel P. Mannix, kukhonda kulambira ntongi Waciroma ndi sawasawa na “kukhonda kulambira bandera peno kupikira kucita pyonsene pinafuna utongi.”

Kuna Mulungu madzimunthu onsene ndi sawasawa mwakukhonda tsalakana khala acitwa na nguwo, miti, miyala peno mafero. Usaona kuti ndi pyadidi kuna atumiki a Yahova kulambira madzimunthu anewa?— Sadhrake, Mezaki na Abhedhinego nee acita pyenepi, pontho Yahova akomerwa kakamwe na pidacita iwo. Unatowezera tani pidacita iwo?—