Kodi Mulungu Asakomerwa Na Maphwando Onsene?

KODI usakomerwa na maphwando?— Maphwando anango ndi akutsandzayisa. Mphapo Mpfundzisi Wankulu asafuna kuti tiende ku maphwando?— Mwandimomwene Yezu pabodzi na anyakupfundzace anango aenda ku phwando yakumanga banja. Yahova ndi “Mulungu wakutsandzaya” na thangwi ineyi, iye asakomerwa tingaenda ku maphwando akuti nee ndi akuipa.—1 Timoti 1:11; Juwau 2:1-11.

Pa tsamba 29 ya bukhu ino, ife tapfundza pinthu pidacita Yahova pa Bara Yakufuira toera Aizraeli awambuke. Usakumbuka pinthu pyenepi?— Buluka penepo mbumba yatoma kuimba, kubvina, pontho yapereka takhuta kuna Yahova. Ineyi ikhali ninga phwando. Natenepa iwo atsandzaya kakamwe, pontho tiri na cinyindiro cakuti Mulungu atsandzayambo.—Eksodho 15:1, 20, 21.

Pidapita pyaka cifupi na 40, Aizraeli aenda ku phwando inango. Mbwenye anthu adaacemera ku phwando ineyi nee akhalambira Yahova. Iwo akhalambira alungu authambi, pontho akhapita m’mabonde na anthu akuti nee amanga nawo banja. Usaona tani, Aizraeli acita mwadidi kuenda ku phwando ineyi?— Yahova nee akomerwa na pidacita Aizraeli, na thangwi ineyi, iye aatcunyusa.—Numero 25:1-9; 1 Akorinto 10:8.

Bhibhlya isalongambo pya maphwando anango mawiri akukumbuka ntsiku yakubalwa. Kodi ibodzi mwa maphwando anewa ikhali kukumbuka ntsiku yakubalwa kwa Mpfundzisi Wankulu?— Nkhabe. Thangwi maphwando anewa acitwa na anthu akuti nee akhalambira Yahova. Ibodzi mwa maphwando anewa ikhali kukumbuka ntsiku idabalwa Mambo Herodhi Antipa. Iye akhali ntongi wa ku Galileya pikhali Yezu kweneko.

Mambo Herodhi acita pinthu pizinji pyakuipa. Iye akwata Herodhiya nkazi wa m’bale wace mbakhala nkazace. Buluka penepo, Juwau M’batizi wakuti akhali ntumiki wa Mulungu apanga Herodhi kuti pidacita iye pikhali pyakuipa. Natenepa Herodhi pidabva iye pyenepi aipirwa napyo. Na thangwi ineyi, iye aikhisa Juwau nkaidi.—Luka 3:19, 20.

Mu ndzidzi ukhali Juwau nkaidi, yafika ntsiku yakukumbuka kubalwa kwa Herodhi. Iye acita phwando ikulu, pontho acemera akulu-akulu azinji. Iwo adya, amwa, pontho atsandzaya kakamwe. Buluka penepo, mwana wankazi wa Herodhiya atoma kubvina kakamwe kuna anthu onsene. Iwo akomerwa na kubvina kudacita iye, mpaka Mambo Herodhi kufuna kumpasa muoni. Iye ampanga: “Consene cinafuna iwe kundiphemba ine ndinakupasa, ngakhale phindi ya umambo wanga.”

Kodi iye mbadamphembanji? Mbadamphemba dinyero? Nguwo zakubalika? Peno nyumba yadidi? Nakuti ntsikana unoyu nee akhadziwa pikhafunika iye kuphemba, iye aenda kabvundza mai wace akhacemerwa Herodhiya kuti: “Ndiphembenji?”

Nakuti Herodhiya akhaida kakamwe Juwau M’batizi, iye apanga mwanace toera aende kaphemba nsolo wa Juwau M’batizi. Ntsikana aenda kuna mambo mbampanga: ‘Ndisafuna kuti mundipase cincino pano nsolo wa Juwau Mʼbatizi mparato.’

Mambo Herodhi nee akhafuna kupha Juwau thangwi akhadziwa kuti Juwau akhali munthu wadidi. Nakuti Herodhi akhadacita pikiro, iye akhagopa kuti anthu akhali penepo mbadamuona tani angakhonda kucita pidapikira iye. Natenepa, iye atuma munthu toera aende nkaidi kagwande nsolo wa Juwau. Buluka penepo mamuna unoyu abweresa nsolo wa Juwau M’batizi mparato mbaupereka kuna ntsikana, pontho ntsikana unoyu auperekambo kuna mai wace.—Marko 6:17-29.

Phwando inango yakukumbuka ntsiku yakubalwa yakuti nee isalongwa mwadidi m’Bhibhlya ikhali ya mambo wa ku Ejitu. Mu ndzidzi ukhacitika phwando ineyi, mambo agwandisambo nsolo wa munthu. Buluka penepo, mambo acitisa kuti mamuna unoyu amanikwe pamuti toera mbalame zidye manungo ace! (Genesi 40:19-22) Kodi Mulungu akomerwa na maphwando anewa?— Kodi iwe mbudakomerwa kugumanikambo pa maphwando anewa?—

Ife tisadziwa kuti pinthu pyonsene pidalembwa m’Bhibhlya pyalembwa na mathangwi adidi. Basi ene iyo isatipanga pya maphwando mawiri akukumbuka ntsiku yakubalwa. M’maphwando anewa mwacitika pinthu pyakuipa kakamwe. Mphapo, Mulungu asafuna kutipfundzisanji thangwi ya maphwando a kukumbuka ntsiku yakubalwa? Mulungu asakomerwa tingakumbuka ntsiku yakubalwa?—

Ndimomwene kuti ntsiku zino, m’maphwando akukumbuka ntsiku yakubalwa nkhabe kugwandwa munthu nsolo. Mphapo, mbani adatoma kucita maphwando anewa akukumbuka ntsiku yakubalwa? Ndi anthu akuti nee akhalambira Mulungu wandimomwene. Bukhu inango isalonga tenepa thangwi ya maphwando akukumbuka ntsiku yakubalwa analongwa m’Bhibhlya: “Basi ene ndi anyakudawa . . . anacita maphwando anewa.” (The Catholic Encyclopedia) Usafunambo kucita pinthu ninga iwo?—

Ndiye tanimbo Mpfundzisi Wankulu? Kodi iye akhacitambo phwando yakukumbuka ntsiku yakubalwa?— Nkhabe, Bhibhlya nee isalonga kuti Yezu acita phwando yakukumbuka ntsiku idabalwa iye. Na thangwi ineyi, anyakupfundzace nee akhakumbukira ntsiku yakubalwa kwa Yezu. Mphapo thangwi yanji mukupita kwa ndzidzi anthu asankhula kucita phwando pa ntsiku 25 ya Dezembro ninga ntsiku idabalwa Yezu?—

Iwo asankhula ntsiku ineyi thangwi “mbumba ya ku Roma ikhacita Phwando ya Saturno, phwando ineyi ikhali yakukumbuka kubalwa kwa dzuwa.” (The World Book Encyclopedia) Kutomera penepo, anthu aphatisirambo ntsiku ibodzi ene toera kukumbuka kubalwa kwa Yezu!

Ninji pinapangiza kuti Yezu nee abalwa mwezi wa Dezembro?— Thangwi Bhibhlya isalonga kuti mu ndzidzi udabalwa Yezu, akumbizi akhali kunja mbakaonera mikumbi yawo namasiku. (Luka 2:8-12) Cisa cidabalwa Yezu, mwezi wa Dezembro usacita mphepo, pontho madzi asabvumba. Pyenepi pisapangiza kuti mu ndzidzi unoyu, akumbizi nee mbadakhala kunja kwa nzinda.

Anthu azinji asadziwa kuti Yezu nee abalwa pa ntsiku ya Natali. Panango iwo asadziwambo kuti pa ntsiku ineyi, anthu akuti nee akhalambira Yahova akhacita phwando yakuti Mulungu nee akhakomerwa nayo. Ngakhale tenepo, anthu azinji asapitiriza basi kucita phwando ya Natali. Thangwi pinafuna iwo ndi kucita phwando, m’mbuto mwakusaka kudziwa khala Mulungu asakomerwa nayo peno nkhabe. Mbwenye ife tisafuna kakamwe kucita pinthu pinakomeresa Yahova.

Natenepa tingacita maphwando, tisafunika kukhala na cinyindiro cakuti Yahova anakomerwa nawo. Ife tinakwanisa kusankhula ntsiku inafuna ife pa caka toera kucita phwando tayu kudikhira ntsiku inacita anthu azinji. Tinakwanisa kudya cakudya cakusiyana, pontho mbatisendzeka munjira zakusiyana-siyana. Khala usafuna kucita pyenepi cedza na anyakubalako toera iwo akuphedze kucita phwando ninga ineyi. Pyenepi pinakhala pyakutsandzayisa kakamwe. Mbwenye mbudzati kucita phwando, kumbuka kuti usafunika kucita pyonsene toera phwando ineyi ikomerese Mulungu.