Thangwi Yanji Nee Tisafunika Kulonga Uthambi?

NYEREZERA ntsikana m’bodzi mbapanga mai wace tenepa: “Mama ndingakotoka kuxikola nee ndinadembuka.” Mbwenye angakotoka iye asasendzeka na axamwali ace, angafika kunyumba asapanga mai wace: “Ndafika ndzidzi uno thangwi ndi mpfundzisi andidembukisa.” Kodi kulonga pyenepi ndi pyadidi?—

Panango m’phale anapanga pai wace: “Nkhabe, nee ndine adamenya bhola n’nyumba.” Mphapo khala ndiyedi adamenya bhola? Ndi pyakuipa kukhonda?—

Mpfundzisi Wankulu atipanga pinafunika ife kucita. Iye alonga: “Mbwenye imwe mungalonga Inde akhale Inde, mungalonga Nkhabe, akhale Nkhabe, thangwi mafala anango onsene akusiyana na anewa asabuluka kuna Dyabo.” (Mateu 5:37) Yezu akhafuna kulonganji na mafala anewa?— Iye akhafuna kulonga kuti tisafunika kucita pinthu mwakubverana na pinalonga ife.

M’Bhibhlya muli na citsandzo cibodzi cinapangiza kuti ndi pyakufunika kulonga undimomwene. Ndi citsandzo ca anthu awiri akhalonga kuti ndi anyakupfundza a Yezu. Tende tione pidacitika.

Mbidzati kumala miyezi miwiri pidamala Yezu kufa, anthu azinji a mbuto zakusiyana-siyana aenda ku Yerusalemu kacita phwando yakufunika ya Ayuda ikhacemerwa Pentekoste. Mpostolo Pedhru acita nkhani yadidi ikhalonga thangwi ya Yezu, wakuti akhadalamuswa muli akufa na Yahova. Kuna anthu azinji adaenda mu Yerusalemu, unoyu ukhali ulendo wakutoma kubva mphangwa zikhalonga pya Yezu. Na thangwi ineyi, iwo akhafuna kupfundza pizinji. Mphapo, acitanji?

Iwo adzakhala kweneko ndzidzi uzinji kupiringana ukhadanyerezera iwo. Mbwenye mukupita kwa ndzidzi anango a iwo, kobiri yawo yadzamala, na thangwi ineyi iwo akhafuna ciphedzo toera agule cakudya. Anyakupfundza akuti akakhala mu Yerusalemu akhafuna kuphedza alendo anewa. Natenepa, azinji a iwo agulisa pinthu pyawo pinango mbaendesa kobiri kuna apostolo a Yezu. Buluka penepo, apostolo apereka kobiri ineyi kuna ale akhafuna ciphedzo.

Ananiya na nkazace akhacemerwa Safira, akuti akhali Akristu a mu mpingo wa ku Yerusalemu, agulisa munda wawo. Nkhabe munthu adaapanga toera augulise. Iwo acita pyenepi na kufuna kwawo. Mbwenye iwo nee acita pyenepi thangwi yakufuna anyakupfundza apswa a Yezu. Mwandimomwene, Ananiya na Safira akhafuna kuti anthu anyerezere kuti iwo ndi anthu adidi kakamwe. Na thangwi ineyi, iwo abverana toera kulonga kuti anapereka kobiri yonsene toera kuphedza anango. Iwo nee apereka kobiri yonsene, mbwenye alonga kuti apereka yonsene. Usaona kuti iwo acita mwadidi?—

Ananiya aenda kuna apostolo mbaapasa kobiri. Mwakukhonda penula, Mulungu akhadziwa kuti iye nee apereka kobiri yonsene. Na thangwi ineyi, Mulungu apanga mpostolo Pedhru kuti Ananiya akulonga uthambi.

Buluka penepo Pedhru alonga: ‘Ananiya, thangwi yanji watawira kunyengererwa na Sathani toera kucita pyenepi? Munda ukhali wako. Iwe nee ukhafunika kuugulisa. Pidamala iwe kuugulisa, iwe mbudasankhula pikhafuna iwe kucita na kobiri ineyi. Thangwi yanji walonga uthambi kuti wapereka kobiri yonsene, m’mbuto mwace wapereka pang’ono? Pidacita iwe pyenepi, nee wanyengeza ife basi, mbwenye wanyengezambo Mulungu.’

Ineyi nee ikhali dzenda. Ananiya alonga uthambi! Pidapikira iye nee ndi pyenepi pidacita iye. Mbwenye Ananiya alonga na ntima onsene kuti acita pidapikira iye. Bhibhlya isalonga pidacitika. Iyo isalonga: ‘Pidabva iye mafala a Pedhru, Ananiya agwa pantsi mbafa.’ Ndi Mulungu adacitisa kuti Ananiya afe! Buluka penepo, manungo ace akwatwa mbaenda kafikirwa.

Pidapita midzidzi mitatu, Safira afikambo. Iye nee akhadziwa pidacitikira mamunace. Buluka penepo Pedhru ambvundza: ‘Iwe na mamunako mwagulisa munda na kobiri idatipasa imwe?’

Safira atawira: ‘Inde, taugulisa na kobiri ineyi.’ Unoyu ukhali uthambi! Thangwi iwo akhadabisa kobiri inango idagulisa iwo munda. Na thangwi ineyi, Mulungu acitisa kuti Safira afembo.—Mabasa 5:1-11.

Tisapfundzanji na pidacitikira Ananiya na Safira?— Tisapfundza kuti Mulungu nee asakomerwa na anthu analonga uthambi. Iye asafuna kuti tilonge undimomwene ndzidzi onsene. Anthu azinji asalonga kuti nee ndi pyakuipa kulonga uthambi. Usaona kuti manyerezero anewa ndi adidi?— Usadziwa kuti matenda onsene, kufa na pyonsene pinaoneka pa dziko yapantsi pisacitika thangwi ya uthambi?—

Kumbuka kuti ndi Dyabo adalonga uthambi kuna nkazi wakutoma, Eva. Iye alonga kuti angakhonda kubvera Yahova, mbadya nsapo udankhondesa Mulungu nee mbadafa. Eva akhulupira pidalonga Dyabo mbadya nsapo. Buluka penepo, Eva apasambo Adhamu toera adyembo. Na thangwi ineyi, iwo adzakhala anyakudawa, pontho anawo onsene adzabalwambo na madawo. Nakuti ana onsene a Adhamu asabalwa na madawo, iwo asathabuka mbafa. Nyatwa ineyi yonsene yatoma tani?— Yatoma na uthambi.

Nee ndi pyakudzumisa pidalonga Yezu kuti Dyabo “ndi nyauthambi, pontho ndi baba wa uthambi!” Iye ndiye adatoma kulonga uthambi. Munthu angalonga uthambi ali kutowezera Dyabo. Tisafunika kunyerezera pyenepi khala tisafuna kulonga uthambi.—Juwau 8:44.

Ndi mu ndzidzi upi wakuti panango unafuna kulonga uthambi?— Nee ndi mu ndzidzi unacita iwe cinthu cakuipa?— Panango unaswa cinthu mwakukhonda funa. Ungabvundziswa, unalonga kuti adacita pyenepi ndi m’bale wako? Peno unalonga kuti nkhabe kupidziwa?—

Ndiye tani ungapaswa tpc kuxikola mbukhonda kun’malisa? Unalonga kuti wancita onsene?— Kumbuka Ananiya na Safira. Iwo nee alonga undimomwene. Mulungu apangiza kuti nee akomerwa na pidacita iwo, na thangwi ineyi, iwo afa.

Mwakukhonda tsalakana pinacita ife, tingalonga uthambi tinatekeresa pinthu. Natenepa tisafunika kulonga pyonsene. Bhibhlya isalonga: ‘Longani undimomwene.’ Pontho isalongambo: “Lekani kulonga uthambi.” Yahova ndzidzi onsene asalonga undimomwene, pontho asadikhira kuti ticitembo pibodzi pyene.—Aefesi 4:25; Akolose 3:9.