Kodi Tisafunika Kugaya?

USADZIWA kuti kugaya ninji?— Nyerezera tenepa. Wayesera kale kucita cinthu cakuti nee usakwanisa kucicita mwadidi? Panango wayesera kumenya bhola toera kugolesa, peno wayesera kunumpha nkhambala. Mu ndzidzi unoyu, alipo adakuseka mbakusingirira mbalonga kuti: “Ine ndisadziwa mwadidi kupiringana iwe”?— Mwandimomwene, munthu adacita pyenepi akugaya.

Usakomerwa anango angacita pyenepi?— Mphapo, iwe ungagaya anango anakuona tani?— Kodi ndi pyadidi kupanga anango kuti “ine ndisadziwa mwadidi kupiringana iwe”?— Usanyerezera kuti Yahova asakomerwa na munthu anacita pyenepi?—

Mpfundzisi Wankulu akhadziwa anthu akuti akhaoneka ninga ndi akufunika kakamwe kupiringana anango. Iwo akhagaya, pontho akhapwaza anango. Na thangwi ineyi, ntsiku inango Yezu aapanga nsangani unapangiza kuti kugaya ndi kwakuipa. Nsangani unoyu ndi uyu:

Nsangani udalonga Yezu ukhali wa Nfarisi na nyakulipisa misonkho. Afarisi akhali apfundzisi auphemberi, akuti akhaoneka ninga akulungama kakamwe kupiringana anango. Nfarisi adalonga Yezu mu nsangani wace akhadaenda ku templo ya Mulungu ku Yerusalemu toera kacita phembero.

Pontho Yezu alonga kuti nyakulipisa misonkho akhadaendambo mu templo toera kucita phembero. Anthu azinji nee akhakomerwa na anyakulipisa misonkho. Iwo akhalonga kuti anyakulipisa misonkho akhabera anthu. Ndimomwene kuti anyakulipisa misonkho azinji nee akhali akunyindirika kazinji kene.

Mu templo, Nfarisi atoma kucita phembero kuna Mulungu mbalonga: ‘Mulungu wanga, ndisapereka takhuta kuna imwe thangwi nee ndine nyakudawa ninga anthu anango. Nee ndisanyengeza anthu, peno kucita pinthu pinango pyakuipa. Ine ndasiyana kakamwe na nyakulipisa misonkho ule. Ine ndine wakulungama, ndisakhala kawiri pa sumana nee kudya toera ndikhale na ndzidzi uzinji wakunyerezera thangwi ya imwe. Ine ndisapereka mu templo cacikhumi ca pinthu pyonsene pinawina ine.’ Nfarisi akhaoneka ekhene kuti ndi munthu wadidi kakamwe kupiringana anthu anango, simomwene tayu?— Iye alonga pyenepi kuna Mulungu.

Mbwenye nyakulipisa misonkho acita pinthu munjira yakusiyana. Iye nee akhayang’ana kudzulu pikhacita iye phembero. Iye alimira kutali mbakotamisa nsolo wace. Nyakulipisa misonkho unoyu akhali wakutsukwala kakamwe thangwi ya madawo ace, mbamenya paditi pace. Iye nee apanga Mulungu kuti nee akhacita pinthu pyakuipa. M’mbuto mwace, iye acita phembero tenepa: “Mulungu wanga, ndibverenimbo ntsisi ine nyakudawa.”

Mwa amuna anewa awiri mbani adakomeresa Mulungu? Kodi ndi Nfarisi wakuti akhaoneka ninga munthu wadidi kakamwe? Peno ndi nyakulipisa misonkho wakuti atsukwala thangwi ya madawo ace?—

Yezu alonga kuti adakomeresa Mulungu ndi nyakulipisa misonkho. Thangwi yanji? Iye afokotoza: ‘Thangwi munthu onsene anaoneka ninga munthu wakufunika kakamwe kupiringana anango anadzacepeswa. Mbwenye ule anacepeseka anadzakuzwa.’—Luka 18:9-14.

Yezu akhafuna kupfundzisanji na nsangani unoyu?— Iye akhapfundzisa kuti ndi pyakuipa kunyerezera kuti tisacita pinthu munjira yadidi kakamwe kupiringana anango. Panango tinanyerezera kuti ine nee ndisacita pyenepi, mbwenye njira inacita ife pinthu inakwanisa kucitisa anango kunyerezera pyenepi. Kodi iwe wacita kale pyenepi?— Tende tione pinthu pidacita mpostolo Pedhru.

Pidalonga Yezu kuti apostolo ace onsene mbadanthawa mu ndzidzi ukhafuna iye kumangwa, Pedhru agaya mbalonga: “Ngakhale kuti onsene akuthaweni, ine cipo ndinadzakuthawani!” Pedhru aphonyeka pidalonga iye mafala anewa. Iye akhanyerezera kuti ndi wakukhulupirika kakamwe. Mbwenye iye adzathawa Yezu. Mu Nsolo 30 wa bukhu ino, tinadzapfundza kuti Pedhru atcunyuka.—Mateu 26:31-33.

Tende ticedze pinthu pyakuti pisacitika cincino. Nyerezera kuti mpfundzisi wako kuxikola asacita mibvundzo mingasi kuna iwe na kuna nyakupfundza ndzako. Unacitanji khala iwe usakwanisa kutawira mwakucimbiza, mbwenye ndzako nkhabe? Ndimomwene kuti usakomerwa khala ntawiro usaudziwa kale. Mphapo usafunika kulandanisika na nyakupfundza unoyu wakuti asadembuka kutawira?— Kodi usafunika kupwaza munthu unango basi ene toera uoneke kuti ndiwe wadidi kakamwe kupiringana iye?—

Ndi pyenepi pidacita Nfarisi. Iye agaya kuti akhali wakufunika kakamwe kupiringana nyakulipisa misonkho. Mbwenye Mpfundzisi Wankulu alonga kuti Nfarisi akhadaphonyeka. Ndimomwene kuti anthu anango asakwanisa kucita mwadidi pinthu kupiringana anango. Mbwenye pyenepi nee pisabveka kuti iwo ndi akufunika kakamwe kupiringana anango.

Mphapo khala tisadziwa pinthu pizinji kakamwe kupiringana anango, tisafunika kugaya?— Nyerezera basi. Kodi ongo wathu ndife adaucita?— Nkhabe, ndi Mulungu adatipasa ongo. Pontho pinthu pizinji pinadziwa ife, tacita kupipfundza na anthu anango. Panango tacita kupileri m’bukhu peno ndi munthu unango adatipfundzisa. Maseze tadzindikira pinthu tekhene, ninji pidatiphedza toera kudzindikira pinthu pyenepi?— Taphatisira ongo udatipasa Mulungu.

Khala munthu akuwangisira kakamwe toera kucita cinthu cadidi, ndi pyadidi kumuwangisa toera apitirize kucita pyenepi. Mpange kuti wakomerwa na pidacita iye. Panango unakwanisa kumphedza toera apitirize kucita mwadidi. Nee usafuna kuti munthu unango acitembo pinthu pyenepi kuna iwe?—

Anthu anango ali na mphambvu kupiringana anango. Unacitanji khala iwe uli na mphambvu kakamwe kupiringana m’bale wako? Usafunika kugaya thangwi ya pyenepi?— Nkhabe. Ndi cakudya cinadya ife cinaticitisa kukhala na mphambvu. Mbani anatipasa dzuwa, madzi na pinthu pyonsene pinafunika toera pyakudya pikule? Nee ndi Mulungu asatipasa pinthu pyenepi?— Natenepa, khala tiri kukula mbatikhala na mphambvu, tisafunika kupereka takhuta kuna Mulungu.—Mabasa 14:16, 17.

Mwandimomwene, ife tonsene nee tisakomerwa tingaona munthu mbagaya. Kumbuka mafala adalonga Yezu: ‘Pinafuna imwe kuti anango akucitireni, imwe musafunikambo kuacitira pibodzi pyene.’ Tingacita pyenepi, ife nee tinagaya ninga pidacita Nfarisi adalonga Mpfundzisi Wankulu mu nsangani wace.—Luka 6:31.

Ntsiku inango mamuna m’bodzi alonga kuti Yezu ndi wadidi. Kodi Mpfundzisi Wankulu alonga kuti: ‘Ndimodi, ine ndine wadidi’?— Nkhabe, iye nee alonga pyenepi. Mbwenye iye alonga: “Nkhabepo unango wadidi kusiyapo Mulungu.” (Marko 10:18) Mpfundzisi Wankulu akhali waungwiro, mbwenye iye nee akhagaya. Ndzidzi onsene iye akhapasa mbiri Babace, Yahova.

Natenepa, m’mbuto mwakugaya mbani anafunika ife kupasa mbiri?— Ndimomwene ndi Yahova Mulungu. Tingaona kubalika kwa kubira kwa dzuwa peno tingaona pinthu pinango pidacita Mulungu, tinakwanisa kulonga: ‘Ndi Mulungu wathu wakudzumisa Yahova adacita pyenepi!’ Ndzidzi onsene tisafunika kukhala dzololo toera kulonga pinthu pyakudzumisa pidacita Yahova na pire pinafuna iye kucita ntsogolo.