Thangwi Yanji Anthu Asabva Kupha?

ALIPO anadziwa iwe wakuti ali kubva kupha?— Panango midzidzi inango iwe usaferukambo, usakhala na nyampwanda peno kubva kupha m’mimba. Anthu anango asabva kupha kakamwe. Iwo nee asakwanisa kulamuka okhene. Pyenepi pisacitika kazinji kene thangwi yakukalamba.

Tonsene tisabva kupha midzidzi inango. Usadziwa thangwi yanji anthu asabva kupha, asakalamba peno kufa?— Ntsiku inango anthu akwata mamuna m’bodzi wakuti nee akhakwanisa famba mbaenda naye kuna Yezu. Penepo Yezu afokotoza kuti thangwi yanji anthu asabva kupha mbafa. Dikhira ndikupange pidacitika.

Yezu akhali panyumba inango dhuzi na Bara ya Galileya. Natenepa anthu azinji aenda kweneko toera kumuona. N’nyumba ineyi nee mukhalibve na mbuto thangwi anthu akhadadzala kakamwe mpaka pa nsuwo. Ngakhale tenepo, anthu akhapitiriza basi kufika. Penepo pafika anthu angasi na mamuna m’bodzi wakuti nee akhakwanisa famba. Akhafunika amuna anai toera kunthukula pa makha.

Usadziwa thangwi yanji iwo akhafuna kuendesa mamuna unoyu kuna Yezu?— Iwo akhanyindira kuti Yezu mbadamuwangisa. Pontho akhanyindira kuti Yezu mbadakwanisa kuwangisa utenda wa mamuna unoyu. Nakuti n’nyumba mukhadadzala na anthu, usadziwa kuti iwo aendesa tani muna unoyu kuna Yezu?—

Foto inaona iwe iyi isapangiza kuti iwo acita tani pyenepi. Pakutoma, athukula mamuna unoyu mbamuendesa pantsoi. Buluka penepo, iwo afungula benga ikulu pantsoi. Pidamala iwo, atcitisa mamuna unoyu na pa benga ineyi mpaka pakhali Yezu. Mwandimomwene iwo akhali na cikhulupiro cakuwanga kakamwe!

Anthu onsene akhali n’nyumba adzumatirwa kakamwe pidaona iwo pyenepi. Mamuna unoyu akhali pa makha atcitiswa pakati pawo. Kodi Yezu aipirwa na pidacita amuna anewa?— Nkhabe, nee pang’ono pene! Yezu atsandzaya pidaona iye kuti amuna anewa akhali na cikhulupiro. Iye apanga mamuna wakukhonda famba: “Madawo ako alekererwa.”

Anthu anango akhanyerezera kuti Yezu nee akhafunika kulonga pyenepi. Iwo akhanyerezera kuti Yezu nee mbadakwanisa kulekerera madawo. Natenepa, toera kupangiza kuti iye mbadakwanisa kucita pyenepi, Yezu apanga mamuna unoyu: “Lamuka, kwata makha ako, ndoko kunyumba kwako.”

Pidalonga Yezu mafala anewa, mamuna awanga! Iye nee anentsekabve toera kufamba. Alamuka ekhene mbatoma kufamba. Anthu adaona pyenepi adzumatirwa thangwi iwo cipo akhadaona kale pyenepi! Iwo apereka takhuta kuna Yahova thangwi yakuapasa Mpfundzisi Wankulu, wakuti akhakwanisa kuwangisa atenda.—Marko 2:1-12.

Tisapfundzanji na cirengo ceneci?— Tisapfundza kuti Yezu ali na mphambvu yakulekerera madawo na kuwangisa atenda. Pontho tisapfundzambo cinthu cinango cakufunika kakamwe. Tisapfundza kuti anthu asabva kupha thangwi ya madawo.

Midzidzi inango, ife tonsene tisabva kupha. Pyenepi pisabveka kuti tonsene ndife anyakudawa?— Inde, Bhibhlya isalonga kuti tonsene tabalwa na madawo. Usadziwa kuti kubalwa na madawo pisabvekanji?— Pisabveka kuti ife tabalwa akusowa ungwiro. Midzidzi inango tisacita pinthu pyakuipa, maseze nee ndi pyenepi pikhafuna ife kucita. Usadziwa kuti thangwi yanji tonsene tiri na madawo?—

Thangwi mamuna wakutoma, Adhamu nee abvera Mulungu. Pidakhonda iye kubvera ntemo udampasa Mulungu, iye adawa. Ife tonsene tiri na madawo thangwi ya Adhamu. Usadziwa kuti thangwi yanji pyenepi pyacitika? Dikhira ndikupange mwadidi toera ubvesese.

Panango waona kale munthu mbakacita mapau. Usadziwa kuti ninji pinacitika forma ingabofoka?— Mapau onsene anafuna kucitwa mwenemo anabuluka akubofokambo.

Adhamu ndi ninga forma ineyi yakubofoka, ife ndife ninga mapau. Iye adzakhala wakusowa ungwiro thangwi yakukhonda kubvera ntemo wa Mulungu. Pikhali ninga Adhamu abofoka. Ana adabala iwo akhali tani?— Onsene akhali akusowa ungwiro.

Anapiana azinji nee asabalwa na madawo makulu akuti tinakwanisa kuaona. Mwacitsandzo iwo asabalwa na mikono na miyendo. Mbwenye thangwi yakusowa ungwiro asabvambo kupha ngakhale kufa.

Ndimomwene kuti anthu anango asabva kupha kazinji kene kupiringana anango. Thangwi yanji pyenepi pisacitika? Kodi iwo abalwa na madawo mazinji kupiringana anango?— Nkhabe, tonsene tabalwa na madawo mabodzi ene. Pontho tonsene tabalwa akusowa ungwiro. Ndi thangwi yace mukupita kwa ndzidzi tisakhala na matenda. Ngakhale ale anabvera na ntima onsene mitemo ya Mulungu mbakhonda kucita madawo makulu asabvambo kupha.

Mphapo thangwi yanji anango asaduwala kazinji kene kupiringana anango?— Pali na mathangwi mazinji, panango thangwi yakukhonda kukhala na cakudya cakukwana peno nee asadya ntundu unango wa cakudya, panango iwo asadya kakamwe madosi peno mabholo. Anango asadembuka kuphatwa na citulo namasiku mbacimwana kugona mwakukwana. Anango nee asabvala madjeka peno madjuzi ndzidzi wakuthondola. Anthu anango manungo awo nkhabe nentsa kuphatwa na matenda maseze acite pizinji toera atsidzikizike.

Unadzafika ndzidzi wakuti nee tinaduwalabve? Kodi madawo anadzamala?— Yezu acitanji kuna mamuna wakulamala?— Amulekerera madawo ace mbamuwangisa. Pidacita iye pyenepi, Yezu apangiza pinthu pinafuna kucita iye kuna ale anawangisira toera kucita pinthu pyadidi.

Tingacita pinthu pinapangiza kuti nee tisafuna kucita madawo, pontho mbatiida pinthu pyakuipa, Yezu anatiwangisa. Ntsogolo, Yezu anamalisa kusowa ungwiro kuli na ife. Anadzacita pyenepi angadzatonga pa dziko yapantsi mu Umambo wa Mulungu. Iye nee anadzamalisa madawo athu mu ndzidzi ubodzi ene. Mbwenye anadzacita pyenepi mwapang’ono-pang’ono. Natenepa, madawo athu angamala nee tinaduwalabve. Tonsene tinakhala na ungumi wadidi. Pinadzakhala pyakutsandzayisa kakamwe kukhala mu ndzidzi unoyu!