Gopani Yahova Ninga Pidacita Obhadhiya

Obhadhiya akhali muyang’aniri wa panyumba ya Mambo Akabu. Mambo unoyu wakuipa atawirisa kuti ulambiri wauthambi umwazike mu dziko yonsene ya Izraeli. Mbwenye Obhadhiya akhagopa Yahova ‘kutomera uwana wace.’ (1 Ama. 18:1-13) Mambo wankazi Yezabheli pikhafuna iye kuphesa aprofeta a Yahova, Obhadhiya akhadziwa kuti akhafunika kukhala wacipapo, pontho akhafunika kucita cinthu toera kuaphedza. Kubisa mprofeta m’bodzi basi pikhali pyakugopswa, mbwenye Obhadhiya abisa aprofeta akukwana 100, pontho aapasa cakudya, maseze mu dziko ineyi mukhali na njala ikulu kakamwe! Aprofeta anango akhatumikira Mambo na nkazace nee akhafunika kupidziwa. Natenepa kucita pyenepi kukhali kwakunentsa.—1 Ama. 18:19.

Tisapfundzanji na pidacita Obhadhiya? Ndimomwene kuti iye akhagopa Akabu. Mbwenye akhagopa kakamwe Yahova kupiringana anthu. Pyenepi pyancitisa kukhala wacipapo mbaikha umaso wace pangozwi toera kuntsidzikiza abale ace. Khala ife tiri kukhala mu dziko yakuti tisakhondeswa kulambira Yahova, tisafunika kugopa kakamwe Yahova kupiringana anthu. Nkhaliro unoyu unatipasa cipapo toera kuphedza abale na alongo athu anatamba nyatwa.