SUMANA 16-22 YA MARÇO YA 2026
NYIMBO 20 Mwapereka Mwananu Wapantima
Thangwi Yanji Tisafuna Ciomboli?
“Mbani anafuna kundiombola ku manungo awa ananditsogolera toera kufa?”—AROMA 7:24.
PINAFUNA IFE KUPFUNDZA
Tinapfundza kuti thangwi ya ciomboli, Yahova anakwanisa kutilekerera madawo athu, tinakwanisa kukhala na cidikhiro candimomwene, pontho tinakwanisa kukhala axamwali ace.
1-2. Thangwi yanji tisafuna munthu toera atiombole? (Aroma 7:22-24) (Onanimbo foto.)
NYEREZERANI kuti nyumba yagwa, pontho mwenemo muli na munthu wakuti afungirika na mabhuloko. Iye ali m’maso, pontho nee asakwanisa kubuluka ekhene. Basi ene asakwanisa kukhuwa toera aphedzwe.
2 Ife tonsene tiri ninga munthu unoyu. Thangwi yanji? Thangwi pidakhonda Adhamu na Eva kubvera Nciti wawo, iwo akhala anyakudawa. Nakuti ndife ana a Adhamu, ifembo ndife anyakudawa. Na thangwi ineyi, tonsene nee tinakwanisa kumalisa nyatwa zinabwera thangwi ya madawo anewa. Mu tsamba idalembera iye Aroma, mpostolo Paulu alonga kuti thangwi yakukhala anyakudawa, ife tonsene ndife ‘mabitcu’ a madawo. (Lerini Aroma 7:22-24.) Paulu akhali bitcu wa madawo, adathapuliswa ife, akuti mbadantsogolera toera kufa. (Aroma 6:23) Ndi pyenepi pinacitikambo na ife. Tiri pa ngozwi, pontho tisafunikambo kuombolwa.
Ninga mamuna wakuti ali nkati mwa nyumba yakugwa asafuna kuphedzwa toera abuluke, ife tiri m’madawo, pontho tisafunika kuombolwa (Onani ndima 1-2)
3. Ciomboli cisatipulumusa tani?
3 Pyakutsandzayisa ndi pyakuti, pidamala Paulu kulonga nyatwa zace, iye atipasa cidikhiro. Pidamala Paulu kubvundza: “Mbani anafuna kundiombola ku manungo awa ananditsogolera toera kufa,” iye atawira na cinyindiro consene: “Ndisapereka takhuta kuna Mulungu kubulukira kuna Mbuyathu Yezu Kristu!” (Aroma 7:25) Paulu akhalonga pya ntsembe ya ciomboli idapereka Yezu.a Thangwi ciomboli cisatiphedza toera (1) kulekererwa madawo athu, (2) kukhala na cidikhiro ca ntsogolo na (3) kukhala na uxamwali wakuwanga na Nciti wathu. Mu nsolo uno tinapfundza pinthu pyenepi, pyakuti pinathimizira ufuni wathu kuna Yahova, “Mulungu wakuti asapasa anthu cidikhiro.” (Aroma 15:13) Pontho pinatiphedza toera kupereka takhuta kakamwe kuna Yezu “wakuti mwa iye, ife tasudzulwa kubulukira mu ciomboli.”—Akol. 1:14.
YAHOVA ASATILEKERERA MADAWO ATHU THANGWI YA CIOMBOLI
4-5. Thangwi yanji ciomboli ndi cakufunika kuna ife tonsene? (Ekleziaste 7:20)
4 Ife tisafuna ciomboli toera tilekererwe madawo athu. Ife tonsene tisacita madawo, pakulonga peno pakucita pinthu. (Lerini Ekleziaste 7:20.) Madawo anango, ndi makulu kakamwe. Mwacitsandzo, mwakubverana na Mwambo wa Mose, munthu angacita ulukwali peno kupha munthu akhafunika kuphiwa. (Lev. 20:10; Num. 35:30, 31) Ndimomwene kuti madawo anango nee ndi makulu ninga anewa. Ngakhale tenepo, ndi madawo. Mwacitsandzo, Dhavidhi alonga: “Ndinaonera njira zanga toera ndikhonde kudawa na lirimi yanga.” (Mas. 39:1) Pyenepi pisapangiza kuti pinthu pinango pinalonga ife pinakwanisa kukhala madawo.—Tiya. 3:2.
5 Kodi imwe mwalonga kale pinthu pyakuti nee mukhafunika kupilonga? Mwacita kale cinthu, buluka penepo mbamutsumbikika? Mwakukhonda penula, mwatawira kuti “inde” mibvundzo ineyi miwiri. Bhibhlya isalonga: “Tingalonga kuti: ‘Ife nkhabe madawo,’ tikunyengezeka tekhene, pontho undimomwene nee uli muna ife.”—1 Juw. 1:8.
6-7. Yahova acitanji toera kutilekerera madawo athu? (Onanimbo foto.)
6 Toera kutilekerera, Yahova apereka Mwanace ninga ntsembe. (Aef. 1:7) Maseze Yahova asatilekerera kubulukira ku ciomboli, pyenepi nee pisabveka kuti iye ali kutitawirisa kucita madawo. Yahova nee asafuna kuti ticite madawo. (Iza. 59:2) Mbwenye thangwi ya ulungami wace, iye acita pinthu toera akwanise kutilekerera.
7 Mwakubverana na Mwambo wa Mose, Aizraeli akhafunika kupereka ntsembe za pinyama toera acenese madawo awo. (Lev. 4:27-31; 17:11) Ntsembe zenezi zikhapangiza kuti anthu akhafunika ntsembe ikulu kakamwe. Ndi ntsembe ya Yezu yakuti mbidabweresa nkhombo zizinji kuna anthu. Mafala adalemba Paulu kuna Akristu a ku Akorinto asapangiza kuti iye akhadabvesesa mwadidi kakamwe kufunika kwa ntsembe ya Yezu Kristu. Pidamala kulonga Paulu pinthu pyakuipa pikhadacita iye nduli, iye alonga: “Mbwenye imwe mwamala kutsukwa; imwe mwamala kuceneswa; imwe mwamala kulungamiswa mu dzina ya Mbuyathu Yezu Kristu, pontho na nzimu wa Mulungu wathu.”—1 Akor. 6:9-11.
Ntsembe za pinyama zikhaperekwa toera kucenesa madawo zikhaimirira ntsembe ya ciomboli ya Yezu Kristu na nkhombo zinafuna kukhala na ife thangwi ya ntsembe ineyi (Onani ndima 6-7)
8. Musafunika kunyerezeranji mu ndzidzi unakhunganyika imwe Cikumbuso ca caka cino?
8 Mu ndzidzi unakhunganyika imwe Cikumbuso ca caka cino, nyerezerani kuti kulekerera kwa Yahova kusabvekanji. Mwacitsandzo, imwe nee musafunikabve kupasika mulando thangwi ya madawo adacita imwe nduli, akuti mwamala kuatcunyuka. Kodi musaona kuti pyenepi ndi pyakunentsa? Panango munalonga: ‘Ine ndisadziwa kuti Yahova anakwanisa kundilekerera, mbwenye nee ndisakwanisa kulekerereka ndekha.’ Khala musanyerezera tenepo, kumbukani kuti ndi Yahova analekerera. Yahova apasa Mwanace mphambvu toera kutonga. Yahova nee apasa imwe peno munthu unango basa yakusankhula kuti mbani adathema kulekererwa madawo. Bhibhlya isalonga: “Khala ife tiri kufamba mu ceza ninga iye wakuti ali mu ceza . . . ciropa ca Yezu wakuti ndi Mwanace, cisaticenesa m’madawo onsene.” (1 Juw. 1:6, 7) Tinakwanisa kunyindira na ntima onsene pyenepi, ninga munanyindira ife pinthu pinango pinalonga Bhibhlya. Yahova asatilekerera kubulukira ku ciomboli. Bhibhlya isalonga: “Muli dzololo toera kulekerera.”—Mas. 86:5.
CIOMBOLI CISATIPASA CIDIKHIRO CAKUKHALA AKUSOWA MADAWO
9. Kukhala a madawo kusaphatanizanji? (Masalmo 51:5 na cidzindikiro capantsi)
9 M’Bhibhlya fala yakuti “madawo” nee isabveka basi ene pinthu pyakuipa pinacita ife, mbwenye isabvekambo madawo adathapuliswa ife na Adhamu. (Lerini Masalmo 51:5 na cidzindikiro capantsi.) Kusiyapo kuticitisa kucita pinthu pyakuipa, manungo athu nee asaphatabve basa ninga mukhafuna Yahova mu ndzidzi udaticita iye. Ife tisaduwala, tisakalamba, pontho tisafa. Na thangwi ineyi, mwana adabalwa kwene wakuti adzati kucita madawo, asafa. Pontho anthu adidi na akuipa ene asathabuka mbafa. Natenepa, thangwi ya madawo adacita Adhamu, ife tonsene tisatamba nyatwa.
10. Ndi mabvero api adakhala na Adhamu na Eva pidamala iwo kudawa?
10 Nyerezerani kuti Adhamu na Eva apibva tani pidamala iwo kudawa. Madawo aacitisa kunyerezera pinthu pyakuipa. Pidamala iwo kucita madawo, mwakucimbiza cikumbuntima cawo catoma kuaapasa mulando. (Aroma 2:15) Mwakucimbiza adzindikira kuti akhali akusiyana na kale. Iwo aona kuti akhafunika kuphimbira manungo awo, pontho akhafunika kubisala toera ule adaacita akhonde kuaona. (Gen. 3:7, 8) Adhamu na Eva atoma kukhala na mabvero akupasika mulando, akudzudzumika, akusowa citsidzikizo, akhabva kupha, pontho akhali amanyadzo. Kutomera ntsiku ineyi, iwo akhathimbana na mabvero anewa mpaka kufa kwawo.—Gen. 3:16-19.
11. Madawo asatikhuya tani?
11 Ninga pidacitikira Adhamu na Eva, madawo asaticitisa kupasika mulando, tisakhala amanyadzo, akudzudzumika, pontho tisabva kupha. Maseze tiwangisire kakamwe nee tinakwanisa kumalisa pyenepi. Thangwi yanji? Thangwi Bhibhlya isalonga kuti ‘tadzakhala akusowa basa.’ (Aroma 8:20) Pyenepi pisacitika kuna anthu onsene. Mwacitsandzo, mautongi asawangisira toera kutsidzikiza dziko, kumalisa uphanga, kuphedza anthu toera akhale na pinthu pinafuna iwo, peno toera kumalisa nkhondo. Maseze pinango pisakhala mwadidi, mbwenye kuwangisira kwawo ndi kwapezi thangwi nee asakwanisa kumalisa nyatwa. Thangwi ya ciomboli, ife tiri na cidikhiro cakuwanga. Cidikhiro cipi?
12. Ciomboli cisatipasa cidikhiro cipi?
12 Ciomboli cisatipasa cinyindiro cakuti ‘pinthu pidacita Mulungu pinadzasudzulwa ku ubitcu wa madawo na kufa.’ (Aroma 8:21) Pyenepi pisabveka kuti mu dziko ipswa nyatwa zinadzamala. Nee tinakhalabve na mabvero akuphonyeka ninga kupasika mulando, kudzudzumika, akusowa citsidzikizo, kubva kupha na kukhala amanyadzo. Kusiyapo pyenepi, kuwangisira kwathu toera kutsalakana dziko na kukhala mu ntendere na anango nee kunadzakhala kwakusowa basa, mbwenye kunatiphedza, thangwi ya kutongwa na ule adatiombola wakuti ndi “ntsogoleri wa ntendere,” Yezu Kristu.—Iza. 9:6, 7.
13. Ndi pinthu pipi pinango pinafunika imwe kunyerezera mu ndzidzi unakhunganyika imwe Cikumbuso ca caka cino?
13 Nyerezerani umaso unafuna kukhala na imwe mungadzakhala akusowa madawo. Nyerezerani kukhala na ungumi wadidi ntsiku zonsene. Anthu anafuna imwe nee anadzabva kupha peno kufa. Ngakhale cincino, ife tinakwanisa kukhala na ntendere unoyu, ‘tingaphatisisa na manja mawiri cidikhiro ninga nangula ya umaso wathu cakuti ndi cakunyindirika na cakuwanga.’ (Aheb. 6:18, 19) Ninga nangula yakuti isaphedza bote toera ikhonde kwatika na mabimbi, cidikhiro cinakuphedzani toera kupirira mayesero. Imwe munakwanisa kukhala na cinyindiro consene cakuti Yahova “asapasa nkhombo ale anansaka na ntima onsene.” (Aheb. 11:6) Thangwi ya ciomboli, ife tisabalangazwa, pontho tiri na cidikhiro ca ntsogolo.
CIOMBOLI CINATIPHEDZA KUKHALA PONTHO NA UXAMWALI WAKUWANGA NA YAHOVA
14. Madawo adodomesa tani uxamwali wathu na Yahova, pontho thangwi yanji?
14 Pidamala kudawa Adhamu na Eva, anthu nee mbadakwanisabve kukhala na uxamwali wakuwanga na Yahova. Bhibhlya isalonga kuti tonsene ndife anyamalwa a Mulungu. (Aroma 8:7, 8; Akol. 1:21) Thangwi yanji? Nakuti Yahova ndi waungwiro, iye nee asatawirisa pinthu pyakuipa. Bhibhlya isalonga tenepa thangwi ya Yahova: “Maso anu ndi akucena kakamwe toera kuona pinthu pyakuipa, pontho nee musatawirisa uipi.” (Abha. 1:13) Kutomera pidadawa Adhamu na Eva, nee m’bodzi wa ife mbadakwanisa kukhala na uxamwali na Yahova. Mbwenye ntsembe ya ciomboli isatiphedza toera tikwanise kukhala na uxamwali wakuwanga na Mulungu.
15. Ciomboli cacitisa tani kuti Yahova akhale pontho na uxamwali wakuwanga na anthu?
15 Bhibhlya isalonga kuti Yezu ndi “ntsembe yakuphimbira madawo athu.” (1 Juw. 2:2) Fala Yacigerego yakuti “ntsembe yakuphimbira madawo” inakwanisa kubveka kuti “kukhazikisa ntendere.” Ciomboli cakwanisa tani kukhazikisa ntendere? Nee tisafunika kunyerezera kuti Yahova akomerwa na kufa kwa Mwanace. Mbwenye kufa kwa Yezu kwacitisa Yahova kukhala pontho na uxamwali wakuwanga na anthu. (Aroma 3:23-26) Yahova mbadakwanisa ‘kuona’ ale akhantumikira mwakukhulupirika ninga akulungama, Yezu mbadzati kufa. (Gen. 15:1, 6) Mbadacita tani pyenepi? Kubulukira mu ciomboli cikhafuna iye kupereka. Yahova akhali na cinyindiro consene cakuti Yezu mbadalipa ciomboli. (Iza. 46:10) Ciomboli cacitisa kuti anthu akwanise kukhala pontho na uxamwali na Mulungu.
16. Ndi pinthu pipi pyakuti munakwanisa kupinyerezera mu ndzidzi unakhunganyika imwe Cikumbuso ca caka cino? (Onanimbo foto.)
16 Kukhala pontho na uxamwali wakuwanga na Yahova, kusatiphedza kakamwe. Mwacitsandzo, panango musaona Yahova ninga “Pai” wanu, ninga pidatipfundzisa Yezu. (Mat. 6:9) Midzidzi inango, panango musaonambo Yahova ninga “Xamwali” wanu. Mbwenye pakuphatisira mafala ninga “Pai” peno “Xamwali,” tisafunika kucita pyenepi mwacilemedzo na mwakucepeseka. Thangwi yanji? Thangwi ndife akudawa. Maseze tiri na uxamwali na Yahova, nee tisakwanisa uxamwali unoyu thangwi ya mphambvu zathu, basi ene ndi thangwi ya ciomboli. Kubulukira mwa Yezu Kristu, Yahova acitisa kuti ‘pinthu pyonsene kudzulu na pa dziko yapantsi pikhale pontho pyakuphatana na iye, mbakhazikisa ntendere kubulukira mu ciropa cace cidacololeka pa muti wakusikimizira.’ (Akol. 1:19, 20) Na thangwi ineyi, ife tinakwanisa kukhala akutsandzaya thangwi yakukhala na uxamwali wakuwanga na Yahova cincino, maseze tikhale anthu akudawa.
Basi ene kufa kwa Yezu, kwacitisa anthu kukhala pontho na uxamwali wakuwanga na Yahova (Onani ndima 16)
CIOMBOLI CISAPANGIZA KUTI YAHOVA NDI WANTSISI KAKAMWE
17. Ciomboli cisapangiza tani kuti Yahova ndi wantsisi kakamwe? (Aefesi 2:4, 5)
17 Ciomboli cisapangiza kuti Yahova ndi “wantsisi kakamwe.” Iye “atipasa umaso . . . maseze ife tikhadafa thangwi ya madodo athu.” (Lerini Aefesi 2:4, 5.) Ninga munthu wakuti ali n’nyumba yakugwa, pontho wakuti afungirika na mabhuloko, anthu akucepeseka asadziwa kuti ali nkaidi ya madawo, pontho asafunika kubuluswa. Na thangwi ineyi, iwo asakhuwa toera kuphemba ciphedzo. (Mabasa 13:48) Yahova asaphedza anthu anewa toera kupfundza mphangwa zadidi za Umambo na kudziwa iye na Mwanace, Yezu Kristu. (Juw. 17:3) Sathani aphonyeka pidanyerezera iye kuti madawo adacita Adhamu na Eva mbadacimwanisa Yahova kukwanirisa cifuno cace.
18. Tinganyerezera thangwi ya ciomboli, ninji pinafunika ife kukumbuka?
18 Ife tonsene tisafunika kukumbuka thangwi inango yakufunika kakamwe idacitisa Yahova kupereka ntsembe ya ciomboli. Iye apereka ciomboli, tayu basi toera kutipulumusa, mbwenye toera kucita cinthu cakufunika kakamwe. Yahova aphatisira ciomboli toera kutawira mbvundzo udacita Sathani m’munda wa Edheni. (Gen. 3:1-5, 15) Yahova aphatisirambo ciomboli toera kucenesa dzina yace na kumalisa uthambi onsene udalonga Sathani thangwi ya iye. Ineyi ndi njira ibodzi idaphatisira Yahova toera kupangiza kuti iye ndi Mulungu waufuni. Maseze nee tathema thangwi ndife anthu akudawa, Yahova na kukoma kwace ntima, atitawirisa kumphedza kupangiza kuti Sathani ndi nyauthambi. (Mis. 27:11) Mphapo munapangiza tani kupereka takhuta thangwi ya ciomboli? Tinaona ntawiro wa mbvundzo unoyu mu nsolo unatowera.
NYIMBO 19 Cakudya Cancidodo ca Mbuya
a MABVEKERO A MAFALA ANANGO: Ciomboli ndi ntengo unaperekwa toera munthu asudzulwe, ninga ntengo unalipwa toera munthu abuluswe nkaidi peno mu ubitcu. Kufa kwa Yezu ndi Ciomboli thangwi kuasudzula anthu akubvera akuti ali nkaidi peno mu ubitcu wa madawo na kufa.