Lekani Dembuka Toera Kubatizwa

1. Ndi maphindu api anafuna kukhala na imwe mungabatizwa?

KODI imwe musafuna Yahova, ule adakupasani pinthu pyonsene pyadidi piri na imwe, kuphatanizambo umaso? Musafuna kupangiza kuti musanfuna? Njira yadidi kakamwe yakucita pyenepi ndi kupereka umaso wanu kuna Yahova mbamubatizwa. Mungacita pyenepi munakhala ntumiki wa Yahova. Natenepa imwe munakhala xamwali wa Yahova, pontho iye anakutsogolerani mbakutsalakanani ninga Babanu na Xamwali wanu. (Mas. 73:24; Iza. 43:1, 2) Kusiyapo pyenepi, imwe munakhala na cidikhiro cakukhala m’maso kwenda na kwenda.—1 Ped. 3:21.

2. Tinaonanji mu nsolo uno?

² Pana cinthu cinakupingizani toera kubatizwa? Khala ciripo, imwe nee muli mwekhene. Azinji acinja njira inanyerezera iwo na inacita iwo pinthu toera akhale akuthema kubatizwa. Mbwenye cincino iwo asatumikira Yahova mwaphinga na mwakutsandzaya. Pyenepi pyacitikambo na anthu anango adabatizwa mu ndzidzi wa apostolo. Cincino tinaona pinentso pingasi pidakunda iwo, pontho tinaona kuti tinapfundzanji na pinthu pidacita iwo.

ASAMARIYA ASANKHULA KUBATIZWA

3. Asamariya anango akhafunika kuwangisira kucitanji toera abatizwe?

³ Mu ndzidzi wa Yezu, Asamariya akhali anthu a nsoka wa uphemberi ukhagumanika ku Yudeya dhuzi na nzinda wa Sikemu na Samariya. Mbadzati kubatizwa, iwo akhafunika kudziwa mwadidi Mafala a Mulungu. Iwo akhafunika kucita pyenepi thangwi akhanyerezera kuti mabukhu adalembwa mukutsogolerwa na Mulungu basi ene ndi maxanu: Genesi mpaka Dheuteronomyo, pontho panango bukhu ya Yoswa. Ngakhale tenepo, iwo akhadikhira kubwera kwa Mesiya mwakubverana na pikiro inagumanika pa Dheuteronomyo 18:18, 19. (Juw. 4:25) Toera kubatizwa, iwo akhafunika kutawira kuti Yezu ndi Mesiya adapikirwa, pontho “Asamariya azinji” acita pyenepi. (Juw. 4:39) Kusiyapo pyenepi, mu ndzidzi uzinji Asamariya na Ayuda akhasankhulana. Pontho, panango Asamariya anango akhafunika kuwangisira toera kukunda nsambo unoyu wakusankhulana.—Luka 9:52-54.

4. Asamariya azinji acitanji pidabva iwo mphangwa za Filipi? (Mabasa 8:5, 6, 14)

⁴ Ninji pidaphedza Asamariya toera abatizwe? Filipi pidamwaza iye ‘mphangwa thangwi ya Kristu, Asamariya anango atawira mafala a Mulungu.’ (Lerini Mabasa 8:5, 6, 14.) Filipi akhali Muyuda, mbwenye iwo nee anentseka na pyenepi. Panango iwo akumbuka makhundu anango a Pentateuko analonga kuti Mulungu ndi wakusowa tsankhulo. (Dheu. 10:17-19) Ngakhale tenepo, iwo ‘abvesera mwadidi pikhalonga Filipi,’ pontho adzindikira kuti iye atumwa na Mulungu. Filipi acita pirengo pizinji, kuphatanizambo kuwangisa atenda na kubulusa madimonyo.—Mabasa 8:7.

5. Tisapfundzanji na Asamariya?

⁵ Kusankhulana na kusowa udziwisi panango mbapidapingiza Asamariya toera kuthambaruka. Mbwenye iwo nee atawirisa kuti pyenepi picitike. Natenepa, pidakhala iwo na cinyindiro cakuti pidaapfundzisa Filipi ndi undimomwene, abatizwa mwakukhonda dembuka. Bhibhlya isalonga kuti “Filipi pidaamwazira iye mphangwa zadidi za Umambo wa Mulungu na za dzina ya Yezu Kristu, iwo an’khulupira mbabatizwa amuna na akazi ene.” (Mabasa 8:12) Ndiye tanimbo imwe? Muli na cinyindiro cakuti Mafala a Mulungu ndi undimomwene? Musatawira kuti Mboni za Yahova ndi zakusowa tsankhulo, pontho zisawangisira toera kupangiza ufuni ninga pidalonga Yezu kuti Akristu andimomwene mbadapicita? (Juw. 13:35) Natenepa, lekani kugopa kubatizwa. Imwe munakwanisa kukhala na cinyindiro cakuti Yahova anakupasani nkhombo.

6. Pidacitikira Ruben pinakuphedzani tani?

⁶ Ruben wa ku Alemanya akuzwa na anyakubala akuti ndi Mboni za Yahova. Mbwenye pikhali iye m’phale, nee akhanyindira kuti Mulungu alipo. Ninji pidamphedza? Iye adzindikira kuti akhafunika kupfundza pizinji, pontho acita pyenepi. Iye alonga: “Pa pfundziro yanga ya munthu paekha, ine ndasaka mitawiro ya mibvundzo ikhali na ine. Ine ndapfundza kazinji kene thangwi yakusanduka kwa pinthu.” Iye aleri bukhu yakuti Existe um Criador Que Se Importa com Você? Bukhu ineyi yawangisa cikhulupiro ca Ruben mbalonga: ‘Yahova alipodi!’ Kusiyapo pyenepi, Ruben aenda kaona ofesi ikulu ya Mboni za Yahova. Iye adzumatirwa kakamwe pidaona iye kuti abale na alongo athu pa dziko yonsene yapantsi asabverana kakamwe. Ruben abwerera ku Alemanya mbabatizwa pikhali iye na pyaka 17 pyakubalwa. Khala musapenula pidapfundza imwe thangwi ya Mulungu, Bhibhlya peno pinthu pinango, fufudzani m’mabukhu athu. Imwe munakwanisa kugumana mitawiro ya mibvundzo yanu mbamukhala na “cidziwiso candimomwene.” (Aef. 4:13, 14) Mukupita kwa ndzidzi, imwe munabva pinthu pizinji pidacitikira abale na alongo athu pa dziko yonsene yapantsi pinapangiza kuti ndi akubverana na aufuni, pontho munaonambo pyenepi mu mpingo mwanu. Pyenepi pinakuphedzani toera kufuna kakamwe abale na alongo pa dziko yonsene yapantsi.

SAULO WA KU TARSO ABATIZWA

7. Ndi macinjo api akhafunika kucita Saulo?

⁷ Onani pidacitikira Saulo wa ku Tarso. Iye akhadapfundziswa Mwambo Waciyuda, pontho akhadathambaruka mu uphemberi Waciyuda. (Agal. 1:13, 14; Afil. 3:5) Mu ndzidzi unoyu, Ayuda azinji akhakhulupira kuti Akristu asiya kubvera Mulungu. Na thangwi ineyi, Saulo akhaatsalakana mwakuipa mbanyerezera kuti akhacita pinafuna Mulungu. (Mabasa 8:3; 9:1, 2; 26:9-11) Saulo mbadafuna kupangiza kuti akhakhulupira Yezu na kubatizwa ninga Nkristu, iye akhafunika kutawira kutsalakanwa mwakuipa.

8. (a) Ninji pidaphedza Saulo toera kubatizwa? (b) Mwakubverana na Mabasa 22:12-16, Ananiya aphedza tani Saulo? (Onanimbo foto.)

⁸ Ninji pidaphedza Saulo toera kubatizwa? Mu ndzidzi ukhalonga Yezu na iye cabuluka ceza kudzulu mbacicitisa Saulo kukhala boliboli. (Mabasa 9:3-9) Saulo amala ntsiku zitatu nee kudya nee kumwa, pontho iye anyerezera pidancitikira. Iye akhali na cinyindiro cakuti Yezu ndi Mesiya, pontho kuti Akristu ali mu uphemberi wandimomwene. Saulo apasika mulando thangwi yakupha Estevau. (Mabasa 22:20) Pidapita ntsiku zitatu, nyakupfundza anacemerwa Ananiya alonga naye mwaufuni, afungula maso ace, pontho ampanga toera abatizwe mwakukhonda dembuka. (Lerini Mabasa 22:12-16.) Saulo acepeseka, atawira kuphedzwa na Ananiya, pontho acinja umaso wace mbabatizwa.—Mabasa 9:17, 18.

9. Tisapfundzanji na pidacita Saulo?

⁹ Tisapfundzanji na pidacita Saulo? Kudzikuza na kugopa anthu panango mbapidacitisa Saulo kukhonda kubatizwa. Mbwenye iye nee atawirisa kuti pyenepi picitike. Saulo acepeseka, pontho acinja umaso wace mbatowera Kristu. (Mabasa 26:14, 19) Maseze akhadziwa kuti mbadatsalakanwa mwakuipa, Saulo akhafuna kukhala Nkristu. (Mabasa 9:15, 16; 20:22, 23) Pidamala iye kubatizwa, Saulo apitiriza kunyindira kuti Yahova anamphedza m’midzidzi ya nyatwa. (2 Akor. 4:7-10) Panango imwe munatambambo nyatwa peno munayeserwa mungafuna kukhala Mboni wa Yahova. Mbwenye khalani na cinyindiro cakuti Yahova na Yezu anakuphedzani toera mupitirize kukhala wakukhulupirika.—Afil. 4:13.

10. Mwapfundzanji na pidacitikira mulongo Anna?

¹⁰ Anna akuzwa ku Europa. Pidamala kubatizwa mai wace, iye atoma kupfundza Bhibhlya pidatawiriswa iye na pai wace. Mu ndzidzi unoyu iye akhali na pyaka 9 pyakubalwa. Acibale ace anango akhali pa nyumba ibodzi ene, pontho iwo nee akomerwa pidadziwa iwo kuti mulongo Anna atoma kupfundza Bhibhlya. Iwo akhanyerezera kuti mulongo Anna angasiya uphemberi wawo mbapidaapasa manyadzo. Pikhali iye na pyaka 12, Anna alonga na pai wace toera abatizwe. Pai wace akhafuna dziwa khala ndiye adacita cisankhulo ceneci peno khala alipo adankakamiza. Anna apanga pai wace: “Ine ndisafuna Yahova.” Pai wace antawirisa toera abatizwe. Pakumala kubatizwa, iye akhasingirirwa, pontho akhatsalakanwa mwakuipa. M’bodzi wa acibale ace ampanga: “Mbapidakhala mwadidi kucita pyako ulukwali na kufumali, m’mbuto mwakukhala Mboni wa Yahova.” Ninji pidaphedza mulongo Anna toera kupirira? Iye alonga: “Yahova andiphedza toera kukhala na mphambvu, pontho mai wanga na pai wanga andiphedzambo kakamwe.” Mulongo Anna alemba pa tsamba nyatwa zidatamba iye zakuti Yahova amphedza. Midzidzi inango, iye asaleri tsamba ineyi toera akumbuke kuti Yahova amphedza tani. Khala imwe musagopa kutsalakanwa mwakuipa, kumbukani kuti Yahova anakuphedzanimbo.—Aheb. 13:6.

KORNELYO ABATIZWA

11. Ndi pinthu pipi pyakuti panango mbapidacitisa Kornelyo toera adembuke kubatizwa?

¹¹ Bhibhlya isalongambo thangwi ya Kornelyo. Iye akhali “nkulu wa anyankhondo” 100 Aciroma. (Mabasa 10:1) Natenepa, panango iye akhali wakudziwika kakamwe pacisa na mu nsoka wa anyankhondo. Iye “akhapereka miyoni mizinji kuna anyakutcerenga.” (Mabasa 10:2) Yahova atuma mpostolo Pedhru toera amwazire mphangwa Kornelyo. Kodi iye adembuka toera kubatizwa thangwi yakukhala nkulu wa anyankhondo?

12. Ninji pidaphedza Kornelyo toera kubatizwa?

¹² Ninji pidaphedza Kornelyo toera kubatizwa? Bhibhlya isalonga kuti “iye na anthu onsene a panyumba pace akhagopa Mulungu.” Ndzidzi onsene iye akhacita maphembero akudembetera kuna Mulungu. (Mabasa 10:2) Pidaamwazira Pedhru mphangwa zadidi, Kornelyo na anthu a panyumba pace atoma kukhulupira Yezu, pontho mwakukhonda dembuka abatizwa. (Mabasa 10:47, 48) Mwakukhonda penula, Kornelyo akhafuna kucinja makhaliro ace toera iye pabodzi na anthu a panyumba pace alambire Yahova.—Yos. 24:15; Mabasa 10:24, 33.

13. Tisapfundzanji na pidacitikira Kornelyo?

¹³ Ninga Saulo, kukhala wakudziwika kakamwe panango mbakudapingiza Kornelyo toera kukhala Nkristu. Mbwenye iye nee atawirisa kuti pyenepi picitike. Kodi imwe musafunikambo kucinja makhaliro anu toera mubatizwe? Khala ndi tenepo, Yahova anakuphedzani. Mungaphatisira pinalonga Bhibhlya toera kukomeresa Yahova, iye anakuphedzani.

14. Mwapfundzanji na pidacitikira Tsuyoshi?

¹⁴ M’bale m’bodzi anacemerwa Tsuyoshi wa ku Japau, akhafunika kucinja cinthu cibodzi m’basa yace toera abatizwe. Iye akhaphata basa ninga nyakuphedza wa Mesiri wa xikola ibodzi yakudziwika kakamwe inacemerwa Ikenobo. Pa xikola ineyi anthu asapfundza kusasanyira maluwa. Mesiri wace angakhonda kugumanika pa maliro akuti akhaphataniza misambo ya uphemberi wa Wacibhudha, Tsuyoshi akhaenda ndiye pa mbuto yace. Mbwenye pidapfundza iye undimomwene thangwi ya kufa, aona kuti angapitiriza kucita pyenepi nee anabatizwa. Natenepa iye asankhula kusiya kucita misambo ineyi ya uphemberi Wacibhudha. (2 Akor. 6:15, 16) Iye alonga pyenepi kuna mesiri wace. Pyenepi pyamphedza tani? Tsuyoshi apitiriza kuphata basa yace mbakhonda kugumanika m’misambo ineyi. Iye abatizwa pidapita caka cibodzi pidamala iye kutoma kupfundza Bhibhlya.a Khala imwe musafuna kucinja cinthu m’basa yanu toera mukomerese Mulungu, khalani na cinyindiro cakuti iye nee anasiya kutsalakana imwe pabodzi na anthu a pabanja panu.—Mas. 127:2; Mat. 6:33.

AKORINTO ABATIZWA

15. Thangwi yanji pyakhala pyakunentsa kuna Akorinto anango toera kubatizwa?

¹⁵ Anthu azinji mu nzinda wa Korinto akhacita pinthu pyakuti Mulungu nee akhakomerwa napyo. Iwo akhafuna kakamwe mpfuma, pontho akhacita ulukwali. Natenepa mbapidakhala pyakunentsa kuna anthu a mu nzinda unoyu toera kutoma kutumikira Yahova. Ngakhale tenepo, pidaenda mpostolo Paulu ku Korinto mbamwaza mphangwa thangwi ya Kristu, “anthu azinji a ku Korinto adabva mphangwa zadidi, atoma kukhulupira mbabatizwa.” (Mabasa 18:7-11) Buluka penepo, Yezu aonekera kuna Paulu m’masomphenya mbampanga: “Ine ndiri na anthu azinji mu nzinda uno.” Na thangwi ineyi, Paulu amwaza mphangwa ku Korinto caka cibodzi na miyezi mitanthatu.

16. Ninji pidaphedza anthu a ku Korinto toera abatizwe? (2 Akorinto 10:4, 5)

¹⁶ Ninji pidaphedza Akorinto toera abatizwe? (Lerini 2 Akorinto 10:4, 5.) Nzimu wakucena na Mafala a Mulungu pyaaphedza toera kucinja makhaliro awo. (Aheb. 4:12) Anthu a ku Korinto adakhala Akristu akwanisa kusiya misambo yakuipa, ninga kuledzera, kuba na kupita m’mabonde mamuna na mamuna peno nkazi na nkazi.—1 Akor. 6:9-11.b

17. Tisapfundzanji na pidacita anthu a ku Korinto?

¹⁷ Ninga pidaona ife, Akorinto anango akhafunika kusiya pinthu pyakuipa pikhacita iwo. Ngakhale tenepo, iwo nee anyerezera kuti nee mbadakwanisa kukhala Akristu. Iwo awangisira kakamwe toera kupita mu nseu ung’ono unatsogolera ku umaso wakukhonda mala. (Mat. 7:13, 14) Kodi imwe muli kuwangisira kusiya kucita pinthu pyakuipa toera mubatizwe? Khala ntawiro wanu ndi inde, pitirizani kuwangisira. Phembani Yahova toera akupaseni nzimu wace wakucena. Pyenepi pinakuphedzani toera kupirira mayesero akucita pinthu pyakuipa.

18. Mwapfundzanji na pinthu pidacita mulongo Monika?

¹⁸ Toera kubatizwa, Monika anakhala ku Georgia awangisira kakamwe. Iye asiya nsambo wakulonga mafala akuipa, kubvesera na kuona pinthu pyakuti Yahova nee asakomerwa napyo. Iye alonga: “Pikhali ine ntsikana, phembero yandiphedza toera kukhala na mphambvu yakucinja makhaliro anga. Yahova akhadziwa kuti ndikhafuna kucita pinthu pyadidi, pontho ndzidzi onsene iye akhandiphedza na kunditsogolera. Monika abatizwa na pyaka 16 pyakubalwa. Kodi imwe musafunambo kusiya kucita pinthu pyakuipa toera kutumikira Yahova munjira inafuna iye? Pitirizani kuphemba Yahova toera akupaseni mphambvu kuti mukwanise kucinja. Iye anakupasani nzimu wace wakucena.—Juw. 3:34.

CIKHULUPIRO CINAKUPHEDZANI TOERA KUKUNDA PINENTSO PYONSENE

19. Ninji pinafuna kukuphedzani toera kukunda pinentso pyakulandana na phiri? (Onanimbo foto.)

¹⁹ Mwakukhonda tsalakana pinentso pinafunika imwe kukunda toera mubatizwe, khalani na cinyindiro cakuti Yahova asakufunani, pontho asafuna kuti mukhale ntumiki wace. Yezu apanga anyakupfundzace: “Mungakhala na cikhulupiro ninga mbeu ya mostardha, munakwanisa kupanga phiri iyi: ‘Buluka pano uende kule,’ iyo inabulukadi. Nkhabe cinthu cinafuna kucimwanika kuna imwe.” (Mat. 17:20) Anthu adapangwa mafala anewa na Yezu akhali na iye mu pyaka pyakucepa, natenepa iwo akhafunika kuwangisa cikhulupiro cawo. Mbwenye iye aapasa cinyindiro cakuti angakhala na cikhulupiro cakuwanga, Yahova mbadaaphedza toera kukunda pinentso pikulu kakamwe ninga phiri.

20. Pinthu pidacita Akristu a mu ndzidzi wakale na a mu ntsiku zino pyakuphedzani tani?

²⁰ Mungaona kuti pali na cinthu cinakupingizani toera kubatizwa, citani pinthu mwakucimbiza toera kukunda mpingizo unoyu. Pinthu pidacitikira Akristu a mu ndzidzi wakale na a mu ntsiku zino, pinakubalangazani na kukupasani mphambvu. Tisadikhira kuti pinthu pidacita iwo pinakuphedzani toera muperekeke kuna Yahova mbamubatizwa. Ceneci cinakhala cisankhulo cadidi kakamwe cinafuna imwe kucita mu umaso wanu.