Iwo Akhali Dzololo Toera Kutomesa Pfundziro Ya Bhibhlya
Europa
Pfundziro ya Bhibhlya “Munsitu”
Tsamba 69 ndima 2-5
Ntsiku zonsene namacibese, Margret wa ku Alemanya, akhafamba na mwanambwace munsitu. Iye alonga: “Ndisayesera kucedza na anthu anapita na njira. Angakhala na ndzidzi, ndisacedza nawo pya Bhibhlya.”
Ntsiku inango agumanikana na nkazi wa pyaka makumanomwe wakuti akhafambambo na mwanambwace. Margret atoma kucedza na nkazi unoyu. Nkazi akomerwa kakamwe na kucedza kwawo mbapanga Margret kuti asaphembera kuna Mulungu na kuleri Bhibhlya ntsiku zonsene. Bulukira ntsiku ineyi, iwo akhagumanikana ntsiku zonsene toera kucedza pya Bhibhlya. Ntsiku inango nkazi abvundza Margret: “Mwakwanisa tani kudziwa kakamwe Bhibhlya?” Margret atawira kuti ndi m’bodzi wa Mboni za Yahova.
Mwakubwereza-bwereza Margret aphemba nkazi unoyu toera kucita naye pfundziro ya Bhibhlya yapanyumba, mbwenye iye akhakhonda. Ngakhale tenepo, akhapitiriza kucedza. Mukupita kwa nthanda zingasi, Margret amphemba pontho toera kucita naye pfundziro ya Bhibhlya yapanyumba. Ulendo unoyu nkazi alonga kuti asagopa kupfundza thangwi mamunace nee asafuna Mboni za Yahova.
Ntsiku inango Margret aenda pontho munsitu, mbakwata Bhibhlya na bukhu Biblya Isapfunzisanji. Mudaona iye nkazi ule, mwacipapo Margret alonga: “Ulendo uno nee ndisafuna kukuphembani pfundziro ya Bhibhlya yapanyumba, mbwenye pfundziro ya Bhibhlya ya “munsitu.” Nkazi atawira mbakagwisa misozi. Iwo asacita pfundziro ya Bhibhlya ya “munsitu” ntsiku zitanthatu pasumana. Mwakunyindira makhaliro akudambo peno ndzidzi, Margret midzidzi inango asacitisa pfundziro ya Bhibhlya na sumbulero, pontho toci.