Iwo Akhali Dzololo Toera Kutomesa Pfundziro Ya Bhibhlya​—Mphangwa zino zabuluswa mu Anuário das Testemunhas de Jeová de 2015

Amerika

Gabriel Aphedza Yavu Wace

Tsamba 55 ndima 1, mpaka tsamba 56

Mukhaenda iye kunyumba buluka ku nsonkhano ku Paraguai, Gabriel wa pyaka pitanthatu pyakubalwa, anyerezera mwacidikhodikho kufunika kwa kumwaza mphangwa za Umambo. Buluka penepo akumbuka kuti alipo munthu wakupambulika wakuti akhafuna kudzakhala na iye mu Paradizu​—yavu wace. Mbwenye yavu wace nee akhapangiza cifuno ku undimomwene, pontho akhatcinga nkazace na anace akuti akhali Mboni.

Ntsiku ibodzi ene, Gabriel aphemba anyakubalace kuti akhafuna kucedza na ayavu ace a ku Argentina mukuphatisira vidyu ya mu Interneti. Gabriel apangiza yavu wace kufunika kwa kupfundza Bhibhlya mbambvundza, “Yavu, musafuna kupfundza Bhibhlya na ine?” Yavu wace atawira pfundziro. Gabriel apereka maonero toera atome kupfundza bruxura Bverani Mulungu toera Mukhale Kwenda na Kwenda. Iwo apfundza pabodzi mu nthanda zakucepa. Nakuti uwiri wawo akhanentseka kuleri mwadidi, akhakhunganyika mwanyapantsi. Ntsiku zonsene za pfundziro, Gabriel akhakhunganyika khundu yace mbabvala kamiza na garavata.

Mukupita kwa ndzidzi, ayavu ace atonga kuenda kaona anyakubala a Gabriel kwa masumana akucepa. M’masumana anewa, yavu wace akhaenda kumisonkhano ya mpingo pabodzi na banja. Mudabwerera yavu wa Gabriel ku Argentina, apitiriza kupfundza Bhibhlya na abale a kweneku mbathambaruka mpaka kukhala m’mwazi mphangwa wakukhonda batizwa. Cincino ayavu ace asacita phembero pabodzi ntsiku zonsene. Gabriel akuthambarukambo. Cincino ndi m’mwazi mphangwa wakukhonda batizwa. Yavu wace alonga cifuno cace cakuperekeka kuna Yahova mu kubatizwa.