Bokosi Ya Mibvunzo

◼ Kodi ndi pyakuthema kwa anyakubvesera kuimba manja pakumala nkhani ibodzi na ibodzi ya Xikola Ya Utumiki Wa Mulungu na Nsonkhano Wa Basa?

Mu ndzidzi wakuti Nciti, Yahova, acita dziko yapantsi, ‘nyenyezi za machibese zikhakhuwa, atumiki peno ana onsene a Mulungu akhasekera na kuimba manja.’ (Yobe 38:⁠7) Ana anewa auzimu a Mulungu akhafuna kusimba Yahova thangwi ya mabasa ace akudzumisa a pyakucitwa, akuti akhali cipangizo cipswa ca udziwisi wace, udidi wace na mphambvu zace.

Ndi pyadidi kwa ife kupangiza kupereka kwathu takhuta thangwi ya kuwangisira kwa abale athu na thangwi ya nkhani peno citsanzo cidacita iwo. Mwacitsanzo, kazinji kene ife tisaimba manja nkhani na pitsanzo pingamala pa kugumanyikana kwakupambulika, ninga misonkhano ya cisa, yakupambulika na ya gawo. Nkhani zinakambwa pa mbuto zenezi zisaphemba ndzidzi wakuthimizirika na kuwangisira towera kuzikhunganya. Kuimba kwathu manja nee kusapangiza kupereka takhuta kwa nyakukamba nkhani basi tayu mbwenyembo kwa Yahova na pipfunziso pidatipasa iye kubulukira ku Mafalace na gulu yace.​​—⁠Iza. 48:​17; Mat. 24:​45-​47.

Kodi ndiye tani pya kuimbira manja nkhani zinacitwa pa Xikola Ya Utumiki Wa Mulungu na Nsonkhano Wa Basa? Nkhabepo ntemo unakhondesa kuimba manja khala kuimba kweneku ndi cipangizo cacibaliro cakupangiza kupereka takhuta, tenepa ninga nyakupfunza angamala kukamba nkhani yace yakutoma. Mbwenye, kuimba manja mwakukhonda nensa kungakwanise kukhala nsambo mbukuluza maphindu ace. Natenepa, kazinji kene ife nkhabe kuimba manja pakumala nkhani ibodzi na ibodzi.

Maseze tingakwanise kukhonda kuimbira manja nkhani zizinji za Xikola Ya Utumiki Wa Mulungu na Nsonkhano Wa Basa, pana njira zinango zakuti ife tonsene tingakwanise kupangiza kupereka kwathu takhuta thangwi ya cipfunziso na kuwangisira kwa ale adakamba nkhani. Ife tingakwanise kucita pyenepi tingakhonda kuwadzira na kubvesera mwacidikhodikho anyakukamba nkhani. Na misonkhano ingamala, kazinji kene mphyakukwanisika kufendedzera m’bale peno mulongo akhali na nkhani mbitipangiza kupereka kwathu takhuta thangwi ya kuwangisira kwawo.​​—⁠Aef. 1:​15, 16.