Mpfuma Zingakwanise Kukhala Zanu!
1 Kodi imwe musafuna kukhala wakukomerwa pabodzi na maphindu mazinji mu umaso wanu? Kodi imwe musaona kuphedza anango kukhala kwakukomeresa na kwakutsanzayisa? Kodi imwe musafuna kuthimizira basa yanu kwa Yahova? Khala ntawiro wanu ndi inde kwa mibvunzo ineyi yonsene, buluka penepo imwe musafunika kudinga pya kucita upainiya. Ndimomwene kuti banja na mabasa anango akubverana na Malemba, pabodzi na kukhonda kwanisa kucita pizinji thangwi ya nyatwa ya ungumi, pingakwanise kuticimwanisa.
2 Pyakulembwa pyakupumirwa pya Salomoni pyalandanisa nkhombo za Yahova na mpfuma zakumanungo. (Mis. 10:22) Lero, nkhombo za Yahova zisabwera makamaka ku mpfuma zauzimu. Mpfuma zenezi ndi zizinji kakamwe kwa apainiya a ndzidzi onsene. Mwacitsanzo, iwo asakhala na citsanzayo cikulu ca kupasa anango ‘munabanza iwo ndzidzi’ wakuti mbadacita pinthu pyawo pyene. (Akol. 4:5; Mach. 20:35) Kuwangisira kwawo kwakufuna kusaoniwa na kusakomeresa Yahova. Kulemedzeka kweneku kwa “mpfuma ya kudzulu” nee kunadzapunguka tayu. (Mat. 6:20; Aheb. 6:10) Kusiyapo pyenepi, munapitiriza apainiya kukhala na “diso” yakuyang’ana kubodzi na kunyindira Yahova kuti aapase pyakufunika, uxamwali wawo na iye usakhala wakuwanga kakamwe.—Mat. 6:22, 25, 32; Aheb. 13:5, 6.
3 Kuwangisira towera kukhala na mpfuma zakumanungo kazinji kene kusatsogolera ku ‘pinthu pizinji pyakuipa na pyakupha.’ (1 Tim. 6:9, 10; Tgo. 5:1-3) Pyenepi nkhabe citika na nkhombo za Yahova tayu. Kubvunga ndzidzi uzinji ene mu utumiki kusaphedza apainiya a ndzidzi onsene kukhala na maonero auzimu akulinganira mbakwanisa kudzindikira pinthu pyakufunika kakamwe. (Afil. 1:10) M’bale m’bodzi asiya basa ya unjinyero yakuti ikhambvungira ndzidzi towera kukhala mpainiya. Iye alonga: “Basa yanga nee ikhandicitisa kukhala wakutsanzaya tayu. Mbwenye basa ya upainiya isacitisa. Cincino ndatoma kuphedza anthu na kuapfunzisa undimomwene. Pyenepi pyakhala pyakukomeresa kakamwe na pyakupasa citsanzayo.”
4 Nkhombo Kwa Anango: Lero, anthu onsene asathimbana na “midzidzi yakugopswa” na yakunensa. (2 Tim. 3:1) Konsene kwene anthu ali akusowa cidikhiro. Amwazi mphangwa a Umambo asakomerwa kakamwe angaphedza anthu akuti akhali akusowa cidikhiro kupfunza na kucita pinthu mwakubverana na pinapfunza iwo. Ndi pyakukomeresa tani kwa apainiya a ndzidzi onsene, akuti asabvunga midzidzi yakupiringana 800 caka na caka ku basa ineyi yakupulumusa umaso!—1 Tim. 4:16.
5 Kodi imwe mwatoma kale kunyerezera mwacidikhodikho towera kutumikira ninga mpainiya wa ndzidzi onsene? Towera kukwanisa musafunika ‘kubanza ndzidzi’ wakuti mbumudaubvunga na pinthu pyakukhonda funika maka. (Aef. 5:15, 16) Azinji acita pyenepi na acitisa kuti umaso wawo ukhale wakukhonda kufuna pizinji, mbapungula tenepa ndzidzi wakuti akhaubvunga na basa yadziko towera akhale na ndzidzi uzinji wakucita pifuniro pya Umambo. Kodi mungakwanise kusasanyira mabasa anu towera mucitembo upainiya?
6 Phembani udziwisi kwa Yahova towera mukwanise kukhala na ndandanda wakulinganira. (Tgo. 1:5) Kodi munadzakhala na nkhombo za ntundu wanji? Mpfuma zizinji kakamwe zauzimu! Pontho Yahova anadzakupasani nkhombo zakumanungo za pire pinafuna imwe. (Mat. 6:33) Ale anayesera Yahova ku khundu ineyi anadzatambira nkhombo peno ‘chidzo, mbapfumiratu kupita kale.’—Mal. 3:10.
[Study Questions]
1. Thangwi yanji tisafunika kudinga pya kucita upainiya wa ndzidzi onsene?
2. Longani mpfuma zingasi zauzimu zinakhala na apainiya a ndzidzi onsene.
3. Kodi ndi kusiyana kupi kunaoneka pakati pa kuwangisira towera kukhala wakupfuma mwauzimu na mwakumanungo?
4. Kodi apainiya a ndzidzi onsene asapaswa tani nkhombo nakuti iwo ndi nkhombo kwa anango?
5, 6. Kodi ndi ninji cinafuna kukucitisani kukhala mpainiya wa ndzidzi onsene?