Balangazani Anyakuferwa
1 Kuluza nyakufunika wathu mu kufa ndi pyakutsukwalisa kakamwe, makamaka kwa ale akuti nkhabe cidikhiro ca Umambo. (1 Ates. 4:13) Kazinji kene anthu azinji asabvunza: ‘Thangwi yanji anthu asafa? Kodi iwo asaenda kupi? Kodi ndinadzaona pontho nyakufunika wanga?’ Pantsi apa pana njira zingasi zakupangiza kuti tinabalangaza tani anthu anagumana ife m’basa ya m’munda akuti aferwa peno ali akutsukwala thangwi ya kufa kwa wacibale peno xamwali.—Iza. 61:2.
2 Ku Nyumba Na Nyumba: Mwanaciro nyumba angakwanise kutipanga kuti aferwa pa banja yace. Kodi nkhope yace ikupangiza kuti aferwa cincino? Kodi nyumba yadzala na acibale akutsukwala? M’makhaliro anewa, ndi pyadidi kubuluka mwakucimbiza pa nyumba ineyi mbamukhonda kupereka umboni wakuthimizirika. (Koel. 3:1, 7) Panango tingakwanise kulonga kuti tiri akutsukwala kakamwe thangwi ya pidacitika, buluka penepo mbitisiya katsamba, revista, peno bruxura yakuthema na kupangana mu njira yadidi. Ntsiku inango tingakwanise kubwerera mu ndzidzi wakuthema towera kuapasa cibalangazo cinango cakubuluka m’Biblya.
3 M’midzidzi inango, tingakwanise kulonga pizinji pa ulendo wakutoma. Ngakhale kuti unoyu si ndzidzi wakupokanya maonero akuipa, ife tingakwanise kuleri na iwo mapikiro a Biblya akulonga pya kulamuka muli akufa. (Jwau 5:28, 29) Peno tingakwanise kuapangiza pinalonga Biblya thangwi ya makhaliro a anyakufa. (Koel. 9:5, 10) Pinalonga Biblya thangwi ya kulamuka muli akufa pingakwanisembo kupereka cibalangazo. (Jwau 11:39-44) Njira inango ndi ya kudinga mafala acidikhiro kwa Yahova adalongwa na Yobe wakukhulupirika. (Yobe 14:14, 15) Mbatisati kubuluka, tingakwanise kusiya bruxura yakuti Que Acontece Conosco Quando Morremos?, Angafa Munthu Anafuna Imwe, peno bruxura inango yakuthema peno katsamba. Peno tingakwanise kusiya bukhu yakuti Biblya Isapfunzisanji, mbitipangiza mphangwa zinagumanika mu nsolo 6, na kucita masasanyiro akuti tidzadinge pontho ntsonga ineyi pa ulendo wakubwereza.
4 M’midzidzi Inango: Khala kuikha nyakufa peno basa inango yakubverana na kufa kweneku inacitwa pa Nyumba ya Umambo, kodi anyakukhonda kukhulupira anadzakhalambo penepo? Mabukhu akuti asapereka cibalangazo angakwanise kupaswa kwa anthu anewa. Nyumba zinango zakucitira mabasa a kuikha nyakufa zisakomerwa kukhala na mabukhu mangasi akuthema towera kupasa mabanja akutsukwala. M’midzidzi inango, pidziwiso pya kuikha nyakufa pinacitwa mu tsamba ya mphangwa pisapereka mwai wa kulembera piwalo pya banja yakuferwa karta yakukhala na mafala akucepa a cibalangazo. Ntsiku inango, pakumala kutambira karta yakuti ikhali na pimatsamba pingasi, mamuna unango wa nzice na mwanace wa nkazi aenda ku nyumba ya m’mwazi mphangwa mbabvunza: “Kodi ndimwe adatumiza karta iyi? Mphapo, ndisafuna kudziwa pizinji pya Biblya!” Mamuna unoyu na mwanace wa nkazi atawira pfunziro ya Biblya mbatoma kuenda ku misonkhano ya mpingo.
5 Koelete 7:2 isalonga: “Mphyadidi kuenda pana chiriro kupita kuenda pana phwando.” Kazinji kene anyakuferwa ali na n’khaliro wadidi wa manyerezero towera kubvesera Mafala a Mulungu kupiringana ale akuti asafuna kukhala na ndzidzi wakupuma basi. Ife tonsene tisafunika kudzindikira midzidzi yadidi towera kubalangaza akutsukwala thangwi ya kuferwa na nyakufunika wawo.
[Study Questions]
1. Thangwi yanji anthu akuferwa asafuna cibalangazo?
2. Khala mwanaciro nyumba atipanga kuti aferwa, kodi ndzidzi onsene tisafunika kuwangisa kupereka umboni wakuthimizirika?
3. Khala makhaliro asatawirisa, kodi tingakwanise kuleri malemba api kwa mwanaciro nyumba wakutsukwala?
4. Kodi ndi ipi midzidzi inango inafunika ife pereka cibalangazo?
5. Thangwi yanji tisafunika kusaka miyai ya kubalangaza anthu akutsukwala?