Kubwerezera Kwa Xikola Ya Utumiki Wa Mulungu
Mabvunzo a kubwerezera pidapfunzwa akutowerera awa anadzadingwa pa Xikola Ya Utumiki Wa Mulungu nkati mwa sumana 28 ya nthanda ya Bwinja ya 2008. Muyang’aniri wa xikola anadzatsogolera kubwerezera kweneku kwa mphindi 30 kudabuluswa m’mphangwa zidadingwa m’nkhani za sumana 3 ya nthanda ya Murope mpaka sumana 28 ya nthanda ya Bwinja ya 2008.
LUSO YAKULONGA
1. Thangwi yanji ndi pyakufunika kukamba nkhani zathu mwakubverana na mphangwa zidapaswa ife, na tinakwanisa tani kucita pyenepi? [be tsa. 234 ndima 1–tsa. 235 ndima 1] Kukamba nkhani zathu mwakubverana na mphangwa zidapaswa ife kusapangiza kuti tisalemedza “phoso” inapaswa ife na “mbandazi wakukhulupirika na wanzeru” pa ndzidzi wakuthema. (Mat. 24:45, Mphangwa Zadidi) Kuti tiphatisire mwadidi mphangwa zidapaswa ife, tisafunika kuzidinga mwacidikhodikho pabodzi na malemba anagumanika mwenemu. Buluka penepo tisafunika kusankhula ntsonga zikulu ziwiri peno zitatu zakuti zinaphindulisa kakamwe anyakubvesera athu na tisafunika kuwangisira towera kuzikulisa na kuzifokotoza mwadidi.
2. Thangwi yanji mabvunzo ndi akufunika kakamwe munapfunzisa ife? [be tsa. 236 ndima 1-5] Mabvunzo asacitisa anthu kulonga manyerezero awo. Iwo asaphedza anthu kunyerezera na kulonga maonero awo. Na pyenepi pingakwanise kucitisa kuti tikhale na mwai wa kufokotoza undimomwene wa Biblya. (Mach. 8:30, 31)
3. Kodi anakwanisa tani mabvunzo kuphedza anyakubvesera athu kunyerezera ntsonga inalonga ife? [be tsa. 237 ndima 3–tsa. 238 ndima 1] Mu kusangizira Yahova, tingakwanise kuphatisira mabvunzo towera kuphedza anthu kuona kulinganira kwa undimomwene unalonga ife. (Mal. 1:2-10) Mwacitsanzo, munacitisa ife pfunziro ya Biblya, tingakwanise kucita mabvunzo ninga awa: “Kodi pinadinga ife pisabverana tani na ntsonga inango iyi idapfunza ife? Thangwi yanji ntsonga ineyi ndi yakufunika? Kodi ntsonga ineyi isakhuya tani umaso wathu?” Mabvunzo ninga anewa asaphedza anyakupfunza athu towera aphatisire ‘mphambvu yawo ya kunyerezera.’ (Arom. 12:1, Tradução do Novo Mundo)
4. Munapfunzisa ife, thangwi yanji luso yakuphatisira mabvunzo towera kucitisa anyakubvesera kulonga piri na iwo mu ntima ndi yakufunika? (Mis. 20:5; Mat. 16:13-16; Jwau 11:26) [be tsa. 238 ndima 3-5] Munatawira anthu mabvunzo, iwo angakwanise kulonga kwene basi pinanyerezera iwo kuti tisafuna kupibva. Mbwenye towera kuphedza anthu azinji, tisafunika kusaka kudziwa mabvero awo andimomwene mukuphatisira mabvunzo ninga adaphatisira Yezu adalembwa pa Mateo 16:13-16 na Jwau 11:26.
5. Kodi kulandanisa ndi kwakufunika tani pa kupfunzisa? (Gen. 22:17; Yer. 13:11) [be tsa. 240 ndima 1-3] Na mafala pang’ono basi, tingakwanise kukhuya mitima ya anthu mbitiacitisa kucita pinthu, kusisimula manyerezero na mabvero awo. Biblya iri na kulandanisa kuzinji. Mwacitsanzo, munthu analeri mwakukhonda phonya Mafala a Mulungu ndi “ninga muti udatchekwa duzi na madzi,” na nyakucita pyakuipa ndi “ninga nkhalamu” yakuti isadikhira cinthu kuti idye. (Sal. 1:3; 10:9) M’midzidzi inango, pinakhala pyakuphindulisa kuphedzera kufunika kwa kulandanisa mu kuthimizira mafokotozero acigwagwa.
NKHANI N.° 1
6. Kodi ndi ipi midida mingasi ya citsogolero inagomezerwa m’bukhu ya Marko yakuti inadzatiphedza kugumana umaso pantsi pa Umambo wa Mulungu? [bsi08-1 tsa. 8 ndima 32] Evanjelyu ya Marko isagomezera kufunika kwa kukhala wakuzimana, mbiticita pinthu mwamphambvu pingakhala pyakufunika towera kucalira kugwegwedusa, na kukhala wakucepeseka na wakupfunzisika ninga mwana. (Mko. 8:35; 9:43-48; 10:13-15) Pontho isalonga kuti pinakhala pyakunensa tani kwa anyakupfuma ‘kupita n’dziko peno umambo wa Mulungu.’ (Mko. 10:23-25) Cakufunika kakamwe kupiringana ntsembe zakuinjipa ndi kukoya matongero mawiri makulu kakamwe. (Mko. 12:28-34)
7. Kodi nzimu wakucena usaphedza tani anzakazi a Mulungu lero? (Jwau 14:25, 26) [be tsa. 19 ndima 2-3] Nzimu wakucena nkhabe ikha m’manyerezero mwathu pinthu pyakuti cipo tapipfunza, mbwenye iwo usaphata basa ninga m’mphedzi, mbuticitisa kukumbuka pinthu pyakufunika pidapfunza ife kale.
8. Kodi ndi ipi phindu ikulu kakamwe inakhala na ife thangwi ya kuleri? [be tsa. 21 ndima 3] Kuleri kungakwanise kuticitisa kukhala na ‘nzeru peno cidziwiso candimomwene ca Mulungu.’ (Mis. 2:5) Kazinji kene, kukula kwathu mwauzimu kusanyindira kuleri Mafala a Mulungu. Njira zizinji za kutumikira kwathu Mulungu zisaphataniza kuleri. Ife tisaleri Biblya na mabukhu anafokotoza Biblya pa misonkhano yathu ya mpingo na mu utumiki wa m’munda.
9. Kodi kupfunza kusaphatanizanji? [be tsa. 27 ndima 3–tsa. 28 ndima 1] Kupfunza kusaphataniza pizinji kupiringana kuleri kwene basi. Kusaphataniza kudinga ntsonga mwacidikhodikho na mu njira yakufunika. Kusaphataniza kudinga pinaleri ife na kusaka kudziwa kuti thangwi yanji pyalembwa. Kusaphatanizambo kunyerezera mabvekero a pinaleri ife, kuona kuti pisabverana tani na Yahova na cifuniro cace, na pinatiphedza tani kudziwa cadidi na cakuipa, tinaphatisira tani pidapfunza ife kwa ife ene na towera kuphedza anango.
10. Kodi Evanjelyu ya Luka isawangisa tani cinyindiro ku kupumirwa kwaumulungu kwa Malemba Acihebere? [bsi08-1 tsa. 10 ndima 30-1] Evanjelyu ya Luka isapereka pitsanzo pizinji pya kukwanirisika kwakulinganira kwa Malemba Acihebere, ninga tingakwanise kuona mu kulandanisa Luka 4:17-19 na Izaiya 61:1, 2 na landanisani Luka 18:32, 33 na Masalmo 22:7; Izaiya 50:6; 53:5-7; na Yona 1:17. Mafala a Yezu adalembwa pa Luka 24:44, 45 asatawirambo kupumirwa kwaumulungu kwa Malemba Acihebere.
KULERI BIBLYA KWA SUMANA NA SUMANA
11. Thangwi yanji Yezu asandika mamuna unango thangwi ya kuncemera Iye “Mpfundisi wadidi”? (Mko. 10:17, 18) [w08 15/2 “A Palavra de Jeová É Viva — Destaques do livro de Marcos”] Mu kukhonda kutawira cidzo ceneci cakufuna kunkomeresa, Yezu apereka mbiri kwa Yahova na apangiza kuti Mulungu wandimomwene ndi phata ya pinthu pyonsene pyadidi. Pontho, Yezu apangiza undimomwene ukulu wakuti Nciti basi ndi adathema kuikha midida ya pinthu pyadidi na pyakuipa.
12. Kodi Yezu aphatisira nsambvu towera kupangizanji mu kulonga pya dzinza ya Israele? (Mko. 11:12-14, 20, 21) [w03 15/5 tsa. 26 ndima 2-3] Nakuti masambvu akutoma asabuluka pabodzi na masamba—na m’midzidzi inango ngakhale masamba mbasati kuphwetha—kukhala kwa muti na masamba mbukhonda khala na misapo kwapangiza kuti iwo ukhali wakukhonda thema. Ninga nsambvu wakukhonda kubala misapo wakuti ukhaoneka ninga wadidi, dzinza ya Ayuda ikhali na maonekero akunja akuti akhapeusa. Mbwenye iyo nee ikhabala nsapo waumulungu tayu, na pakumalisira yakhonda Mwana ene wa Mulungu. Yezu atemberera nsambvu wakukhonda kubala misapo, na mangwana mwace, anyakupfunza aona kuti iwo ukhadauma. Kuuma kwa muti unoyu mwandimomwene kukhapangiza kukhondwa kukhafuna kudza kwa Ayuda na Mulungu ninga mbumba yace yakusankhulwa.
13. Kodi akhapangizanji mafala adaphatisira anju Gabryele pidalonga iye kuti Mariya ‘anadzamita mimba’ thangwi yakutcitirwa na nzimu wakucena wa Mulungu na mphambvu ya Mulungu mbidamphamira? (Luka 1:30, 31, 34, 35) [w08 15/3 “A Palavra de Jeová É Viva — Destaques do livro de Lucas”; it-2 tsa. 538 ndima 1] Nakuti iye amitadi mimba, pisaoneka kuti Yahova Mulungu acitisa kuti Mariya akhale na mimba, mbakwanirisa pyenepi mu kucinja umaso wa Mwanace wautombo kubuluka kudzulu kubwera pa dziko yapantsi. (Agal. 4:4) Mu njira ineyi basi, mwana mbadakwanisa kukhala na cidzindikiro cace ninga munthu m’bodzi ene adakhala kudzulu ninga Fala, na ndi mu njira ineyi basi iye mbadakwanisa kukhala mwana wandimomwene wa Mariya mbakhala tenepa mbeu yandimomwene ya makholo ace Abrahamu, Isaaki, Yakobe, Yuda, Mambo Davide na nyakutambira pfuma wa mapikiro aumulungu adacitwa kwa iwo. (Gen. 22:15-18; 26:24; 28:10-14; 49:10; 2 Sam. 7:8, 11-16; Luka 3:23-34)
14. Kodi anyakupfunza a Yezu acitadi cinthu cakuti ‘cikhakhondeswa na mwambo wa Sabudu’? (Luka 6:1, 2) [gt 31] Nkhabe, iwo nee akhaswa mwambo wa Yahova wa Sabudu tayu. Afarisi alonga kuti kukhwedzula ngala na kuziikha m’manja towera kudya kukhali kubvuna na kububuda. Mbwenye kuwangisira kwawo kufokotoza kuti basa ndi ninji kwacitisa Sabudu kukhala yakunensa, mbuto mwa kuicitisa kukhala ntsiku ya citsanzayo na ndzidzi wakuwangisa kakamwe mwauzimu. Natenepa, Yezu apokanya pyenepi mukuphatisira pitsanzo pya m’Biblya towera kupangiza kuti Yahova Mulungu cipo akhafuna kuti mwambo Wace wa Sabudu uphatisirwe mu njira ineyi yakuipa. (Mat. 12:3-5)
15. Kodi tisapfunzanji kubulukira ku uphungu udapaswa Marta na Yezu? (Luka 10:40-42) [w99 1/9 tsa. 31] Ife tonsene tisafunika ‘kusankhula khundu yadidi’ mu kuikha pa mbuto yakutoma pinthu pyauzimu. Mu kudinga mwadidi pinthu pyakufunika kakamwe, ife tinadzakhala akutawirika kwa Yahova pabodzi na nkhombo zace. (Afil. 1:9-11)