Pfundzani na “Mulungu Wacibalangazo Consene”

1. Thangwi yanji tisafunika kubalangaza anango?

MIDZIDZI inango tisakhala ‘akutsukwala thangwi ya pinentso pyakusiyana-siyana.’ Na thangwi ineyi, tisafuna kubalangazwa na kuwangiswa. (1 Ped. 1:6) Nakuti tisatsandzaya tingabalangazwa na anango, tisafunikambo kubalangaza ale anathimbana na nyatwa zakusiyana-siyana. (Mat. 7:12) Yahova, “Mulungu wacibalangazo consene,” asatipfundzisa toera “tikwanisembo kubalangaza ale anathimbana na ntundu onsene wa nyatwa.” (2 Akor. 1:3, 4; 1 Ates. 4:18) Nee tisacita pyenepi basi ene thangwi ndi pyakufunika, mbwenye thangwi tisafuna abale na alongo athu. Mu nsolo uno, tinapfundza kuti: (1) Cibalangazo cisabvekanji mwakubverana na Bhibhlya? (2) Tinabalangaza tani anango? Pontho (3) tisafunika kucitanji tingafuna cibalangazo?

MABVEKERO A CIBALANGAZO MWAKUBVERANA NA BHIBHLYA

2. M’Bhibhlya, fala yakuti “cibalangazo” iri na mabvekero api akusiyana?

² M’Bhibhlya, fala Yacigerego idathumburuzwa kuti “cibalangazo” iri na mabvekero mawiri akusiyana. Iyo inakwanisa kubveka ninga “kuwangisa” peno “kucenjeza.” (Aroma 12:8) Fala ineyi yakuti “cibalangazo” mwakuphipirisa isabvekambo “kucemera munthu mbakhala pakhundu toera kumphedza.” Natenepa, tinakwanisa kunyerezera munthu akubwera mwakucimbiza toera kuphedza xamwali wace wakuti ali kuthabuka. Munthu anakwanisa kuphedza xamwali wace munjira zizinji. Mbwenye ndzidzi onsene, iye asawangisira toera xamwali wace akhale mwadidi.

3. Bharnabhe abalangaza tani anango? (Onanimbo foto.)

³ Nyerezerani pidacitikira Zuze. Iye apangiza makhaliro adidi a kubalangaza na kuwangisa anango. Natenepa, apostolo ancemera Bharnabhe, dzina yakuti isabveka “Mwana wa Cibalangazo.” (Mabasa 4:36) Dzina ineyi ndi yakuthema kakamwe kuna iye, pontho m’Bhibhlya nee asacemerwabve na dzina yakuti Zuze. Bhibhlya isalonga kuti kazinji kene Bharnabhe akhaphedza abale na alongo mu ndzidzi ukhafuna iwo ciphedzo. Mwacitsandzo, pidamala Saulo kukhala Nkristu, iye aenda ku Yerusalemu toera kaonana na Akristu anango kweneko. Mbwenye Akristu akhan’gopa thangwi iwo akhadziwa kuti kale iye akhatcinga abale na alongo. Mbwenye Bharnabhe nee agopa Saulo, pontho iye ampangiza apostolo.—Mabasa 9:26-28.

TINABALANGAZA TANI ANANGO?

4. Ndi njira zipi zadidi za kubalangaza anango? (Aroma 1:11, 12)

⁴ Acedzereni pingakwanisika. Yahova asaphatisira atumiki ace toera kubalangaza anango. Mwacitsandzo, pikhadatsukwala mprofeta Eliya, Yahova atuma anju toera kumuwangisa. (1 Ama. 19:4-7) Mpostolo Paulu akhafuna kucedzera abale na alongo toera kuawangisa. (Lerini Aroma 1:11, 12.) Mungaenda kaona munthu, malani ndzidzi uzinji toera mukwanise kum’balangaza. (1 Akor. 16:7) Khala imwe nee munakwanisa kuenda kaaona, munakwanisambo kuabalangaza kakamwe mungaaligariri, kuatumizira tsamba peno kuatumizira mphangwa na telefoni. Yahova asafuna kukuphatisirani toera kubalangaza anango. Kodi imwe munatawira?

5. Thangwi yanji midzidzi inango pinakhala pyakunentsa kubalangaza abale na alongo athu?

⁵ Mu ntsiku zino zakumalisa umaso ndi wakunentsa kakamwe. Na thangwi ineyi, midzidzi inango panango pinakhala pyakunentsa kuna ife kuenda kaona abale na alongo athu toera kuabalangaza. Pikhali Paulu nkaidi ku Roma, Onesiforo ansaka maseze iye akhali pangozwi ya kuikhwambo nkaidi peno kuphiwa. (2 Tim. 1:16-18) Lero, Mboni za Yahova ku Rusya, zisacitambo pibodzi pyene. Mu ndzidzi wakuti m’bodzi wa iwo ali kutongwa, abale na alongo asaenda ku thando inatongerwa miseru toera kubalangaza xamwali wawo, ngakhale kuti pyenepi pinacitisa kuti iwo amangwembo. Ninji pinafunika imwe kucita toera kubalangaza abale na alongo anu? Panango imwe munakwanisa kupfundza kuti atumiki a Mulungu akale na a lero abalangazana tani unango na ndzace, pontho munakwanisambo kupfundza na pidacita iwo toera kupitiriza kukhala akutsandzaya maseze akhatcingwa.

6. Tinatowezera tani Yahova pakubalangaza anango? (Onanimbo foto.)

⁶ Bveserani pinalonga iwo. Mu ndzidzi wakuti mprofeta Eliya akhagopa kuphiwa, acita phembero kuna Yahova, pontho ampanga kuti akhapibva tani. Yahova akhadziwa nyatwa ikhathimbana na Eliya, pontho akhadziwa kuti akhali wakutsukwala kakamwe. Ngakhale tenepo, Yahova apitiriza kubvesera mwadidi Eliya, ngakhale pikhalonga iye pinthu pibodzi pyene mwakubwereza-bwereza. (1 Ama. 19:9, 10, 14) Mprofeta Abhakuki apanga Yahova kuti akhapibva tani mu ndzidzi ukhaona Iye nyatwa na uipi. Mwakupirira, Yahova abvesera pikhalonga Abhakuki, pontho nee aipirwa pikhalonga Abhakuki kuti thangwi yanji asatawirisa uipi. (Abha. 1:2, 3) Lero, Yahova asabveserambo maphembero athu ngakhale asadziwa pinafuna ife. Tinakwanisa kutowezera Yahova, tingabvesera mwadidi mu ndzidzi unalonga abale na alongo athu. Khalani “wakucimbiza kubva,” pontho calirani kuapingiza peno kuipirwa maseze alonge pinthu pibodzi pyene mwakubwereza-bwereza.—Tiya. 1:19; Ekle. 7:9.

7. Tinadzindikira tani pinadzudzumika na xamwali wathu?

⁷ Nyerezerani pinadzudzumika na munthu. Ife nee tinakwanisa kuona piri muntima mwa munthu ninga Yahova; basi ene tinakwanisa kudzindikira pinafuna iye tingambvesera mwadidi. Lekani kunyerezera kuti musadziwa cinafuna xamwali wanu, pontho kumbukani kuti cinafuna iye panango ndi cakusiyana na cinafuna imwe. Tonsene ndife akusiyana. Natenepa, malani ndzidzi uzinji mbamukabvesera pinalonga xamwali wanu, pontho citani mibvundzo toera mudzindikire pinafuna iye.—Mis. 20:5.

8. Yezu abalangaza tani Marta na Mariya pidafa Lazaro? (Onanimbo foto.)

⁸ Nyerezerani cibalangazo cidapereka Yezu kuna Mariya na Marta pakumala kufa kwa m’bale wawo Lazaro. Uwiri wawo atsukwala kakamwe pidafa m’bale wawo, mbwenye Yezu aabalangaza munjira zakusiyana. Pidamala Marta kulonga na Yezu, Yezu ampanga undimomwene thangwi ya kulamuswa muli akufa, pontho amphedza toera kuwangisa cikhulupiro cace. Mbwenye Bhibhlya nee isalonga kuti Yezu alonga thangwi ya kulamuswa muli akufa pikhalira Mariya. Mbwenye iye alira pabodzi na Mariya, pontho ambvundzisa kuti manungo a Lazaro akhadaikhwa kupi. (Juw. 11:20-35) Tapfundzanji? Mu ndzidzi unabalangaza ife ale anathimbana na pinentso, mphyadidi kubvesera mwadidi pinafuna iwo, m’mbuto mwa kubalangaza onsene munjira ibodzi ene.

9. Tinaphatisira tani Bhibhlya pakubalangaza anango? (Aroma 15:4, 5)

⁹ Phatisirani Bhibhlya. Mungaleri malemba pakubalangaza anango, imwe musaaphedza toera kuwangisa cikhulupiro cawo ku mapikiro a Yahova. (Lerini Aroma 15:4, 5.) Kukhala na cikhulupiro cakuwanga kusaabalangaza kakamwe thangwi kusaaphedza kunyindira kuti Yahova asaafuna, pontho asaatsalakana. (Iza. 40:31) Kodi imwe munakwanisa tani kugumana lemba m’Bhibhlya toera kubalangaza anango? Anango asakhala na ndandanda ya mavesi toera kuaphatisira angaafuna, ninga ale anagumanika m’bukhu yakuti Malemba Toera Kuaphatisira mu Umaso Wathu Wacikristu, pa nsolo wakuti “Cibalangazo.” Phembani kuti Yahova akuphedzeni kuphatisira mafalace toera kuphedza anango. Nzimu wakucena wa Yahova unakuphedzani toera kukumbuka malemba akuthema toera kuaphatisira mu ndzidzi unafuna imwe kubalangaza anango.—Juw. 14:26.

10. Mu ndzidzi unabalangaza ife anango, thangwi yanji ndi pyakufunika kulonga munjira yadidi?

¹⁰ Longani munjira yadidi. Midzidzi inango tinafuna kubalangaza axamwali athu toera kuaphedza kucinja njira inanyerezera iwo nyatwa zawo. Khala imwe musafuna kucita pyenepi, nyerezerani mwadidi mbamudzati kulonga toera mafala anu awangise tayu kutsukwalisa. (Mis. 12:18) Tinakwanisa kutowezera njira idaphatisira Yahova toera kuphedza Eliya. Iye akhanyerezera kuti ndiye basi akhatumikira Yahova mu ndzidzi unoyu, pontho akhanyerezera kuti basa yace nee ikhabweresa maphindu adidi. Natenepa, Yahova aphedza Eliya toera kucinja manyerezero ace mbakhonda kulonga madodo ace. (1 Ama. 19:15-18) Imwe munakwanisambo kuphedza abale na alongo anu munganyerezera mwadidi pinthu pinafuna kulonga imwe. Pontho munakwanisa kuawangisa pa misonkhano, mungacita nkhani zadidi na kupereka mitawiro yadidi.

11. Tisafunika kucitanji abale na alongo athu angatamba nyatwa? (1 Juwau 3:18)

¹¹ Kupasa axamwali anu pinthu pinafuna iwo. Mu ndzidzi wakuti axamwali athu ali kuthimbana na pinentso, ife tinakwanisa kucita pinthu toera kuaphedza, tayu basi ene kulonga mafala akuwangisa. (Lerini 1 Juwau 3:18.) Bharnabhe acita pyenepi; iye agulisa munda wace mbapereka kobiri ineyi kuna abale akuti akhafuna ciphedzo. (Mabasa 4:36, 37) Abale na alongo athu asapangizambo ufuni munjira ibodzi ene mbapereka pinthu pinafuna abale na alongo athu anatamba nyatwa. Gabriela anakhala ku Poloniya atsukwala kakamwe mu ndzidzi udabvumba madzi mbafudza nyumba yawo. Iye alonga: “Ine na anyakubalanga tadzudzumika kakamwe. Ine nee ndikhadziwa kuti mbatidasasanyira tani nyumba yathu. Mbwenye abale a mipingo ya dhuzi na ife abwera, pontho asasanyira nyumba yathu pa ntsiku ibodzi basi. Pinthu pyenepi pyawangisa cikhulupiro canga cakuti Yahova asaphatisira mbumba yace toera kuphedza ale anatamba nyatwa.”

12. Munawangisa tani abale na alongo anu mungapirira mayesero mwakukhulupirika?

¹² Pitirizani kukhala akukhulupirika kuna Yahova. Pidabva Paulu kuti Akristu a ku Tesalonika apitiriza kukhala akukhulupirika kuna Yahova mu ndzidzi ukhatcingwa iwo, iye awangiswa kakamwe. (1 Ates. 3:5-8) Paulu akhadziwa kuti mbadapitiriza kukhala wakukhulupirika maseze athimbane na mayesero, mbadaphedzambo abale na alongo kukhala akukhulupirika. (Akol. 2:1, 2) Munjira ibodzi ene, abale na alongo athu angaona kuti tirikupitiriza kukhala akukhulupirika kuna Yahova maseze tithimbane na mayesero, asawangiswambo kakamwe. Iwo ali na cinyindiro cakuti ninga munatiphedza Yahova, iye anaaphedzambo angathimbana na mayesero.

13. Ninji pinafunika ife kupitiriza kucita mu ndzidzi unabalangaza ife anango?

¹³ Khalani akupirira. Khala m’bale peno mulongo atsukwala kakamwe, panango nee anapibva mwadidi mu ndzidzi ubodzi ene unalonga ife. Mbwenye Bhibhlya isatikumbusa toera tipitirize ‘kubalangazana na kuwangisana unango na ndzace.’ (1 Ates. 5:11) Khalani akupirira mu ndzidzi unapitiriza imwe kubalangaza ale anafuna ciphedzo canu. (1 Ates. 5:14) Midzidzi inango, tinafunambo kubalangazwa. Mphapo tisafunika kucitanji tingafuna kubalangazwa?

PINAFUNIKA IFE KUCITA TINGAFUNA CIBALANGAZO.

14-15. Tisafunika kucitanji mu ndzidzi unakhala ife akutsukwala na akudzudzumika?

¹⁴ Citani phembero kuna Yahova. Phembani Yahova toera akubalangazeni mu ndzidzi unakhala imwe wakutsukwala na wakudzudzumika. (Mas. 94:19) Pangani Yahova piri muntima mwanu. (Mas. 62:8) Ndimomwene kuti Yahova asadziwa pinafuna imwe mbamudzati kucita phembero. Mu ndzidzi unapanga imwe Yahova pinthu piri muntima mwanu, musakhulupira kuti Yahova asakufunani, pontho asabvesera maphembero anu. Ndzidzi onsene, Yahova asaphedza munthu anankhulupira mbacita pinafuna iye ngakhale kuti midzidzi inango ciphedzo cinafuna kupereka iye nee ndico cinadikhira munthu. (Marko 11:24) Lemba ya Afilipi 4:6, 7 isalonga: “Dziwisani Mulungu maphembo anu pakucita phembero, kudembetera na kupereka takhuta; natenepa, ntendere wa Mulungu wakuti usapiringana kubvesesa konsene, unadzatsidzikiza mitima yanu.”

¹⁵ Phembani ciphedzo ca anango. Pangani xamwali wanu wakukola mwauzimu peno nkulu wa mpingo ananyindira imwe thangwi ya pinthu pinakudzudzumisani. Abale na alongo anakwanisa kukubalangazani. Mbwenye toera acite pyenepi, imwe musafunika kuapanga pinthu pinathimbana na imwe. (Mis. 14:10) Aphembeni kuti akubvesereni mwadidi mu ndzidzi unafokotoza imwe kuti musapibva tani. Kusiyapo pyenepi, aphembeni toera akupangeni malemba peno misolo yakuti inakubalangazani.

16. Musafunika kucitanji anango angayesera kukubalangazani, pontho musafunika kukumbukanji?

¹⁶ Khalani wakupirira na wakulekerera. Panango abale na alongo anacita madodo mu ndzidzi unayesera iwo kukubalangazani. Panango iwo analonga pinthu pyakuti pinakutsukwalisani m’mbuto mwa kukuwangisani. Pyenepi pingacitika khalani wakupirira. (1 Akor. 13:4, 7) Pontho kumbukani pinalonga lemba ya Tiyago 3:2: “Munthu anakhonda kudodoma pakulonga, ndi wakulungama.” Kumbukani kuti abale na alongo anu asafuna kukuphedzani, pontho kumbukani kuti: “Mwandimomwene ntima usafuna, mbwenye manungo mbakufewa.”—Mat. 26:41.

17. Cincino tisafunika kucitanji?

¹⁷ Ife tonsene tisafuna kubalangazwa thangwi tiri kukhala mu ntsiku zakumalisa. Ife tisadziwa kuti umaso unapitiriza kukhala wakunentsa kakamwe. Anyamalwa a Mulungu anapitiriza kukhala akuipirwa kakamwe. Na thangwi ineyi, tisafuna kubalangazwa. Tendeni tiwangisire toera kubalangazana unango na ndzace.