Tisapanga Anango Pya Cidikhiro Cathu Ca Umambo
1 Nkati mwa ntsiku zino zakumalisa na zakugopswa, azinji n’dziko ali akuswa cidikhiro. (Aef. 2:12) Mwakusowa nzeru anango asaikha cinyindiro cawo ku mpfuma zakumanungo, mautongi a anthu, siyensiya ya cincino na pinango. Tiri akutsanzaya tani thangwi yakukhala na cidikhiro candimomwene ca kutsogolo, cidikhiro cakuti ndi ‘nangula ya umaso, yakukhulupirika pontho yakulikha’!—Aheb. 6:19.
2 Pantsi pa utongi wa Umambo wa Mulungu, dziko yapantsi inadzacinjwa mbikhala paradizu. Anyakufunika athu adafa anadzalamuswa muli akufa. (Mach. 24:15) Ucerengi, kusowa ulungami, kuduwala, kukalamba na kufa pinadzamala. (Sal. 9:18; Mat. 12:20, 21; Apok. 21:3, 4) Anewa ndi mangasi a mapikiro a Yahova akuti anakwanirisika cincino. Kodi ndi khundu ipi ya cidikhiro cathu yakuti musaifuna kakamwe kutsogolo?
3 Mwazani Mphangwa Zadidi: Ife tisafunika kupanga anango pya cidikhiro ca Umambo. Kufuna Mulungu na anyakuendekana athu kusaticitisa kusangizira Yezu na kumwaza ‘mphangwa zadidi kwa acerengi na kupangiza anyaprezu kupulumuka kwawo, aboliboli kuona na maso awo, kulekesa anyakukundwa, towera akhale a ufulu.’ (Luka 4:18) Mpostolo Paulu akhamwaza mphangwa zadidi mu nsika na konsene kwene kukhagumanika anthu. Basa yace ikulu ikhali utumiki. (Mach. 18:5) Kusangizira citsanzo cace ca kucita khundu mwaphinga mu utumiki kunadzacitisa kuti tikhonde siya cidikhiro cathu Cacikristu thangwi ya “kucherenga kwa pantsi pano na manyengerero a mpfuma yapezi.”—Marko 4:19.
4 Cidikhiro cathu ca Umambo nkhabe kumala tingagumana anthu akukhonda tsalakana pinalonga ife, akuti nkhabe pangiza maka cifuno ca mphangwa za Umambo, peno akuti asatipingiza. Ife tisafunika “kukoya na phinga” kutawira kwathu pakweca pya cidikhiro cathu mbatikhonda kubwerera nduli. (Aheb. 10:23) Ife ‘nkhabe pasika manyadzo na mphangwa zadidi.’ (Arom. 1:16) Panango cikhulupiro na kupirira kwathu pinacitisa anango kubvesera.
5 Maseze tilonge kuti makhaliro a dziko anafudzika awa asakwanirisa maprofesiya a Biblya, ife sife amwazi mphangwa a pidengwa pinacitika tayu. Mbuto mwa pyenepi, utumiki wathu usagomezera cidikhiro ca Umambo—mphangwa zadidi za Umambo wa Mulungu. Tendeni timwaze mphangwa zenezi zadidi na cikhulupiro na phinga ‘towera kukhulupira kukule mpaka kunkhomo.’—Aheb. 6:11.