Tifambeni Ninga Anthu Anzeru
1 Pidaphemba Yezu asodzi a m’madzi anai kuti akhale atowereri ace, iwo hadanyinyirika tayu mbwenye ‘penepo pene asiya mwadiya wawo mbantowerera.’ (Mat. 4:18-22) Mu njira ibodzibodzi, Saulu wa ku Tarsu pidamala iye kutunduka na kuwangiswa maso ace, iye hadadembuka tayu mbwenye “atoma kupfundisa mu masinagoga anthu pya Yezu.” (Mach. 9:20) Mwakukhonda limira ndzidzi uli kwenda kutsogolo; ungamala, wamaliratu. Ndi thangwi yace ndi pyakufunika kwa ife kuti ‘tifambe ninga anthu anzeru’ mbitidziwa kuti tisaphatisira tani ndzidzi wathu.—Aef. 5:15, 16.
2 Ndzidzi Na Pinthu Pyakukhonda Dikhirika: Mwai wakutumikira Yahova uli na ife lero unakwanisa kukhonda kuoneka mangwana. (Tgo. 4:14) Nkhabepo munthu anakhonda kudzerwa na ‘ndzidzi na pinthu pyakukhonda dikhirika.’ (Koel. 9:11, Tradução do Novo Mundo) Kusiyapo pyenepi, ife tonsene tiri kukalamba, na “ntsiku zakuthabuka” zinatowerera kukalamba pabodzi na kucimwana kwathu kucita pizinji m’basa ya Yahova ndi pyakukhonda thawika m’makhaliro ano a pinthu. (Koel. 12:1) Natenepa, si pyanzeru tayu kukhonda kuperekeka kwa Mulungu peno kudikhira makhaliro akuthema mbatisati kuthimizira kakamwe utumiki wathu. (Luka 9:59-62) Abrahamu akhala na ntendere na cithondozo mu kupita kwa piaka, mbafa wakutsanzaya “pa unkhalamba” thangwi iye aphatisira umaso wace mwanzeru, aperekeka mwakukwana kwa Yahova.—Gen. 25:8.
3 Ndzidzi Ndi Wakucepa: Ifembo tisafunika kubvunga mwanzeru ndzidzi wathu thangwi ‘ndzidzi udasala ndi ung’ono.’ (1 Akor. 7:29-31) Cincino pano makhaliro ano a pinthu a kale anadzamala. Miyai yakucita khundu m’basa ikulu ya kugumanya anthu akulandana na mabira mu ndzidzi ‘wakubvuna pantsi pano’ inadzamala. (Apok. 14:15) Tisafunika kucita gaxugaxu towera tikhonde tawirisa kuti nyatwa na pidzudzumiso pya umaso pitikwatire ndzidzi wakuti mbipidakhala pyadidi kuuphatisira mu utumiki. (Luka 21:34, 35) Pinadzakhala pyakutsanzayisa tani kuyang’ana nduli mbitiona kuti tacita khundu mwakukwana m’basa ya kubvuna!
4 Ndzidzi onsene tisafunika kukhala akulindira towera tikhonde luza miyai ya basa yakuti tingakwanise kupaswa. Tendeni tikhale akuzitonga kucita pyonsene pinakwanisa ife towera titumikire Yahova “ndzidzi unathulwa ‘lero’” mbuciripo. (Aheb. 3:13) Tingacita tenepo, tinadzapangizika kukhala anzeru kakamwe, thangwi “munthu wakuchita pinafuna Mulungu, anakhala kwenda na kwenda.”—1 Jwau 2:17.