Gulu Yakucita Cifuno Ca Yahova,

tsamba 127-134

NSOLO 12

KUPHEDZA BASA YA UMAMBO YA DZIKO YATHU NA YA DZIKO YONSENE YAPANTSI

MUKUKWANIRISA profesiya ya Yezu yakulonga pya ntsiku zakumalisa, Mboni za Yahova zikupitiriza kumwaza mphangwa zadidi mpaka ‘kunkhomo kwa dziko yonsene.’ (Mach. 1:8; Mat. 24:14) Mukucita pyenepi, mwakufuna izo zisabvunga ndzidzi na mphambvu zawo mu kugawana na anthu pinthu pyauzimu. Na cinyindiro cakuti Yahova asaphedza anyabasa anzace, iwo nee asapswipa ntima na pinthu pyakumanungo mbwenye asaikha Umambo wa Mulungu pa mbuto yakutoma mu umaso wawo. (Mat. 6:25-34; 1 Akor. 3:5-9) Pyakubwereswa pyace pisapangiza mwapakweca kuti Yahova asaatawira na asaapasa nkhombo.

KUTSALAKANA PYAKUFUNA PYA UMAMBO PYA DZIKO YONSENE YAPANTSI

Pakuona njira zinaphatisira Mboni za Yahova towera kumwaza mphangwa zadidi lero na kuinjipa kwa mabukhu anafokotoza Biblya akusowa ntengo anagawira iwo, anthu anango asabvunza: “Kodi pyenepi pyonsene pisakwanisika tani?” Ndimomwene kuti kudindwa kwa Mabiblya mazinji kakamwe na mabukhu akufokotoza Biblya kusafuna kobiri. Pontho pasafunikambo kobiri towera kumanga na kusasanyira Maofesi a Filiali a atumiki anacita basa ya kudinda mabukhu, anayang’anira basa ya kumwaza mphangwa, na anango akuti asaphata basa ninga atumiki a ndzidzi onsene towera kuendesa kutsogolo basa ya kumwaza mphangwa zadidi. Mwakuthimizira, amisionaryo asapfunziswa na kutumizwa ku madziko mazinji. Anzakazi anango asaikhwa ninga apainiya akupambulika, akuti asabvunga ndzidzi wawo towera kuphata basa mu pisa pyakusowa amwazi mphangwa peno m’mipingo ing’ono. Ayang’aniri akufamba-famba, anatumikira mipingo, asapaswambo kangacepe towera kuaphedza kuti apitirize mu basa yawo. Mwandimomwene, basa yakuphedza utumiki mu ntsiku zathu zino, mu dziko yathu peno mu dziko yonsene yapantsi, isabvunga kobiri izinji kakamwe. Kodi kobiri ineyi yonsene isabuluka kupi?

Maseze mabukhu athu asagawirwa anthu mwakusowa ntengo, anthu azinji asakomerwa na basa inacita Mboni za Yahova na asapereka mwakufuna kangacepe towera kuphedza basa ya dziko yonsene yapantsi. Kusiyapo kobiri ineyi, Mboni zene zisatumiza pyakupereka pyawo ku ofesi ya filiali ya Mboni za Yahova ya dziko yawo. Mukudziwa kufunika kwa kucita cakupereka, mwakufuna izo zisapangiza nzimu wakulandana na ule ukhali na anzakazi akale a Mulungu akuti mwakudzala manja aphedza kumangwa kwa mbuto yakulambira Yahova. (Eks. 35:20-29; 1 Pya dziko. 29:9) Ngakhale kuti miyoni inango ndi mpfuma zakusiyiwa na anyakufa, pyakupereka pyakubuluka kwa anthu, mipingo, na pisa kazinji kene ndi pyakucepa. Mbwenye pingagumanywa pisakwanisa kuphedza utumiki.

Natenepa, munacita iwo khundu mu utumiki wa mphangwa zadidi, Mboni za Yahova zisaonambo kukhala mwai kuphatisira kobiri yawo na pinthu pinango pyakumanungo towera kuendesa kutsogolo basa ineyi. Yezu na anyakupfunzace akhali na bokosi ikhakoyera iwo kobiri towera kuphedza acerengi na kutsalakana pyakufuna pinango. (Jwau 12:6; 13:28, 29) Biblya isatipanga pya akazi anango adapereka upfumi wawo wakumanungo towera kuphedza utumiki wa Yezu na anyakupfunzace. (Mko. 15:40, 41; Luka 8:3) Mpostolo Paulu atambira mwakukomerwa ciphedzo cadidi cakumanungo cidapaswa iye na ale akhali na cifuno ca kuendesa kutsogolo basa ya kumwaza mphangwa zadidi na akuti akhafuna kuphedza utumiki wace. (Afil. 4:14-16; 1 Ates. 2:9) Mboni za Yahova zikupitiriza kutoweza pitsanzo pyenepi pyakale pya basa ya phinga na kupasa mwakudzala manja. Natenepa, pisakwanisika kuti anthu akuona ntima a konsene kwene apaswe “pezi pene madzi a moyo.”—Apok. 22:17.

KUTSALAKANA PYAKUFUNA PYA MPINGO WANU

Kobiri yakugula nayo pinthu pya mpingo isabulukambo ku pyakupereka pyaufulu. Nkhabe citwa nsonkho-nsonkho, nee kuikhwa ntengo wa kobiri unafuna munthu kupereka peno kuphembwa kobiri; mbwenye m’mbuto za misonkhano musagumanika mabokosi a pyakupereka akuti anthu onsene angakwanise kucita khundu mu kupasa ‘ninga mudapifunira iwo m’mitima yawo.’—2 Akor. 9:7.

Kobiri inaperekwa isaphatisirwa makamaka towera kusasanyira na kugula pinafunika pa Nyumba ya Umambo. Nsoka wa akulu a mpingo ungakwanise kubverana towera kutumiza kobiri inango ku ofesi ya filiali ya Mboni za Yahova ya dziko ineyi towera iphatisirwe mu kuendesa kutsogolo basa ya Umambo ya dziko yonsene yapantsi. Khala ndi tenepo, mpingo usafunika kuti utawirembo cibverano ceneci. Mu njira ineyi, mipingo mizinji isatumiza mwakukhonda phonya pyakupereka towera kuphedza basa ya dziko yonsene yapantsi. M’midzidzi inango pangakwanise kuoneka pinthu pinango pyakufunika, mbwenye khala onsene asadziwa pinthu pyenepi, nkhabe funika kucita pidziwiso mwakubwereza-bwereza towera abale acite pyakupereka tayu.

KUTSALAKANA PYAKUPEREKA

Kunkhomo kwa nsonkhano ubodzi na ubodzi, akulu a mpingo peno atumiki akutumikira awiri akusankhulwa na nsoka wa akulu asabulusa kobiri yonsene idaikhwa m’mabokosi a pyakupereka na kuilemba. (2 Akor. 8:20) Nsoka wa akulu a mpingo unadzacita masasanyiro akuthema a kukoya kobiri ineyi mpaka ntsiku inafunika iyo kuperekwa ku ofesi ya filiali peno kuphatisirwa ku pyakufuna pya mpingo. Towera kukoya kobiri ineyi panango mpingo unafunika kufungula konta yawo ku banco. Mbale anatsalakana kobiri ya mpingo asakhunganya lipoti ya kobiri ya mpingo ya nthanda ibodzi na ibodzi towera kudziwisa mpingo, na pakupita nthanda zitatu nyakuyang’anira wakutsogolera asacita masasanyiro akudinga matsamba a kobiri. Ndzidzi onsene cikumbuso ca pyenepi cisagumanika mu Utumiki Wathu Wa Umambo.

KOBIRI YAKUPHEDZA MISONKHANO YA CISA NA NTSIKU ZA MISONKHANO YAKUPAMBULIKA

Kobiri inaphatisirwa towera kucita misonkhano ya cisa na yakupambulika isabuluswa na Mboni zinacita khundu ya cisa ceneci. Mabokosi a pyakupereka asagumanikambo pa misonkhano ineyi, tenepa ninga pa misonkhano ya mpingo. Mu njira ineyi, pyakupereka pyaufulu pya cisa pingakwaniswe kucitwa. M’bale adasankhulwa na muyang’aniri wa cisa asatsalakana kobiri ya cisa, mbalipa pinthu pyakutawiriswa na muyang’aniri wa cisa.

Mphyadidi kuti nsonkhano ubodzi na ubodzi wa cisa ulipe pyakufuna pyawo pyene na kobiri yakusala isafunika kuikhwa mu konta ya cisa. Khala pakumala nsonkhano paoneka mangawa na kobiri iri mu konta ya cisa inakwana kulipa mangawa anewa, nkhabe funika kulembera mipingo towera kuidziwisa mangawa anewa. Mbwenye, khala nkhabe kobiri yakukwana mu konta ya cisa towera kulipa mangawa a nsonkhano udamala peno towera kulipa nsonkhano unafuna kudza, ninga kobiri yakulugari mbuto yakucitira nsonkhano, muyang’aniri wa cisa anadzadziwisa mipingo kufunika kwa kucita cakupereka. Nsoka ubodzi na ubodzi wa akulu unadzaceza pya nkhani ineyi na kuona kuti ndi ntengo upi wa cakupereka mpingo wawo unakwanisa kucita ku kobiri ya cisa. Buluka penepo iwo anadzabvunza mpingo wawo towera aone khala unatawira cisankhulo ceneci.

Akulu a mpingo a cisa angagumanyikana mu ndzidzi wa nsonkhano wa cisa peno wakupambulika, iwo asatonga pinafuna citwa na kobiri iri mu konta ya cisa. Iwo asabverana towera kudziwa kuti ndi kobiri ingasi inafunika towera iphatisirwe pa nsonkhano, kugula pinthu pinafunika, na kobiri inafuna kuphatisirwa na ayang’aniri akufamba-famba munatumikira iwo pa cisa ceneci. Asafunikambo kunyerezera pya kucita pyakupereka towera kuphedza basa ya dziko yonsene yapantsi, Kobiri ya Nyumba ya Umambo, Nyumba ya Misonkhano, peno pinthu pinango pyakufunika.

Angatonga kuphatisira kobiri ku pinthu pinango kusiyapo pya mafambiro a nsonkhano pisafunika kulembwa ninga mudatongerwa ipyo na akulu a mpingo. Pyakulembwa pyenepi pisafunika kulonga kuinjipa kwa kobiri na ndzidzi onsene nkhabe funika kuphatisira kobiri ya cisa mbisati kutawiriswa. Si pyakuthema tayu kuphatisira pyakulemba pyakale peno pyakukhonda kulonga kuinjipa kwa kobiri idabvungwa. Kobiri ya cisa ingakwanise kukoyiwa ku ofesi ya filiali mpaka mu ndzidzi unaifuna cisa.

Muyang’aniri wa cisa anadzacita masasanyiro a kudinga matsamba a kobiri ya cisa kunkhomo kwa nsonkhano ubodzi na ubodzi wa cisa na wa ntsiku yakupambulika.

KUTSALAKANA ACERENGI

Cinthu cibodzi cidacitisa Yezu na anyakupfunzace kukhala na bokosi yakuikhira kobiri ndi cakuphedza acerengi. (Mko. 14:3-5; Jwau 13:29) Kupitawirira kweneku Kwacikristu kukupitiriza lero, thangwi Yezu alonga: “Anyakucherenga munawo ntsiku zonsene.” (Mko. 14:7) Kodi Mboni za Yahova zisakwanirisa tani kupitawirira kwawo ku khundu ineyi lero?

M’midzidzi inango, anthu akukhulupirika m’mpingo angakwanise kukhala na kusowa kwa pinthu pyakumanungo thangwi ya kukalamba, utenda, peno nyatwa zinango zakuti nkhabe kwanisika kuzikunda. M’bodzi na m’bodzi m’mpingo anadziwa pyenepi angakwanise kucita pinthu mwakubverana na mafala a mpostolo Jwau: “Kufuna kwa Mulungu kunakwanisa tani kukhala mwa munthu ana upfumi wa pantsi pano, mbaumirwa mu ntima mwache pa kuona mbale wache wakucherenga? Ana anga a pa ntima, tifunane, si na mafala okha tayu, si na lirimi yokha tayu; mbwenye na mabasa a udidi.” (1 Jwau 3:17, 18; 2 Ates. 3:6-12) Kulambira kwandimomwene kusaphataniza kutsalakana anthu akukhulupirika na akuona ntima akuti asafuna ciphedzo cakumanungo.—Tgo. 1:27; 2:14-17.

Mu tsamba yace yakutoma kwa Timoti, mpostolo Paulu afokotoza njira zakupasa ciphedzo cakumanungo kwa anthu akuthema. Imwe munakwanisa kuleri uphungu unoyu pa 1 Timoti 5:3-21. Kupitawirira kwakutoma kuli na Nkristu m’bodzi na m’bodzi towera atsalakane anthu a pabanja yace ene. Anyakukalamba peno anyakuduwala asafunika kuphedzwa na anawo, adzukulu awo, peno acibale anango. M’midzidzi inango, ciphedzo cakumanungo cisaperekwa na mautongi peno pigawiko pyakuphedza anthu, natenepa acibale peno anthu anango angakwanise kukhala akukoma ntima mukuphedza anyakusowa anewa kucita phembo yakuthema. Midzidzi inango pisakhala pyakufunika kwa mpingo onsene kuti unyerezere pya kupereka ciphedzo ca ntundu unango kwa abale peno alongo akuti ali na mbiri yadidi ya basa yakukhulupirika. Khala nkhabepo piwalo pya banja peno acibale anango towera kuaphedza na nkhabepo ciphedzo cadidi cinaperekwa na mautongi peno pigawiko pyakuphedza anthu, nsoka wa akulu a mpingo ungakwanise kucita masasanyiro akuthema towera kuphedza anthu anewa. Akristu akukhulupirika asaona unoyu kukhala mwai wa kugawana upfumi wawo wakumanungo na anthu anewa akusowa.

Abale athu azinji angakwanise kukhala akusowa thangwi ya mitcingo, nkhondo, piteketeke, kudzala kwa madzi, njala, peno pidengwa pinango pyakuti pisagumanika konsene kwene m’midzidzi ino ya nyatwa. (Mat. 24:7-9) M’midzidzi ineyi, mipingo ya dziko ineyi ingakwanise kusowa pinthu pyakuti iphedze anango, natenepa Mathubo Akutonga asacita masasanyiro towera abale a madziko anango apereke ciphedzo cakufunika. Pyenepi ndi sawasawa ninga pidacita Akristu a ku Azya Menori adapereka cakudya kuli abale a ku Yudeya mu ndzidzi wa njala. (1 Akor. 16:1-4; 2 Akor. 9:1-5) Mukutowerera citsanzo cawo, tisapangiza kufuna kwathu abale athu na tisapangizika kukhala anyakupfunza andimomwene a Yezu Kristu.—Jwau 13:35.

KUGAWIRWA KWA MABUKHU

Kugawirwa kwa Mabiblya na mabukhu akufokotoza Biblya ndi basa yakufunika kakamwe mu kumwaza mphangwa za Umambo. Kazinji kene nsoka wa akulu a mpingo usasankhula ntumiki wakutumikira m’bodzi towera atsalakane mabukhu, mabukhu mag’ono, mabruxura na pinthu pinango, na unango asasankhulwa towera atsalakane marevista. Mabukhu anewa onsene asaphembwa towera amwazi mphangwa aakwate towera akagawire anthu ale anapangiza cifuno.

Abale adasankhulwa kuti atsalakane mabukhu asadziwa kuti basa yawo si yadzenda tayu. Iwo asalemba mabukhu onsene adatambira iwo na asadziwa mabukhu adabuluka. Mukukhala akudziwa mabukhu anagumanika na anagawirwa m’munda, iwo anakwanisa kucita masasanyiro akuti paoneke mabukhu akukwana towera kutsalakana pyakufuna pya mpingo. Nakuti mabukhu akufokotoza Biblya asacitwa towera kuphedza basa ya kumwaza mphangwa zadidi, amwazi mphangwa asawangiswa kuagawira mu utumiki wawo. Utumiki Wathu Wa Umambo usadziwisa mabukhu anafuna kugawirwa mu nthanda ibodzi na ibodzi towera umboni uperekwe mwakulinganira mu cisa consene.

Ninga Akristu akuperekeka, tisadziwa kuti ndzidzi wathu, manyerezero na pinthu pyathu, maluso athu, mpfuma zathu zakumanungo, ngakhale umaso wathu ene ndi muoni wakubuluka kwa Mulungu na cifuno ca kuuphatisira m’basa yace. (Luka 17:10; 1 Akor. 4:7) Mukuphatisira mwadidi mpfuma yathu yonsene, tisapangiza kuperekeka na kufuna kwathu kukulu Yahova. Cifuno cathu ndi kulemedza Yahova na pinthu pyathu pyakufunika, mbitidziwa kuti iye asakomerwa na muoni onsene unapaswa iye na ntima onsene. (Mis. 3:9; Mko. 14:3-9; Luka 21:1-4; Akol. 3:23, 24) Mukukhala na maonero adidi a pinthu pyakumanungo na nzimu wakupasa mwakudzala manja, tisakwanirisa mafala a Yezu akuti: “Mwatambira pezi, pasanimbo pezi.” Tingacita tenepo tisakhala akutsanzaya kakamwe.—Mat. 10:8b; Mach. 20:35.