Gulu Yakucita Cifuno Ca Yahova,

tsamba 83-91

NSOLO 8

Atumiki a Mphangwa Zadidi

LIPOTI YA KUENDA KUTSOGOLO KWA UTUMIKI

Malipoti a kuenda kutsogolo kwa ulambiri wakucena wa dziko yonsene yapantsi asapasa ciwangiso candimomwene kwa mbumba ya Yahova m’piaka pizinji. Kutomera pa nzidzi udapanga Yezu anyakupfunzace kuti mphangwa zadidi zinamwazwa pa dziko yonsene yapantsi, Akristu andimomwene afuna kakamwe kudziwa kuti pyenepi pinakwaniriswa tani.—Mat. 28:19, 20, MZ; Mko. 13:10; Mach. 1:8.

Atowereri akutoma a Yezu Kristu akhakomerwa kudziwa malipoti a kuenda kutsogolo kwa basa ya kumwaza mphangwa. (Mko 6:30) Bukhu ya Biblya ya Machitiro isatipanga kuti mudakhutulwa nzimu wakucena kwa anyakupfunza pa Pentekoste, pakhagumanika anthu cifupi na 120. Mwakukhonda dembuka numero ya anyakupfunza yakula mpaka 3.000 na buluka penepo 5.000. Lipoti yakuwangisa yacitwa kuti “Mulungu ainjipisa ntsiku zonsene anthu akhatoweza njira ya chipulumuso” na kuti “mwinji wa anthu akutawira wakulirathu.” (Mach. 1:15; 2:5-11, 41, 47; 4:4; 6:7) Ndi ciwangiso cadidi tani cidatambira anyakupfunza na mphangwa zenezi za kuenda kutsogolo kwa basa! Akwanisa kuawangisa tani na malipoti akukomeresa anewa towera kuenda kutsogolo na basa yawo yaumulungu, mwakukhonda tsalakana kutcingwa kukulu kwakutsogolerwa na atsogoleri amauphemberi Aciyuda!

Cifupi na caka 60-61  E.C., mpostolo Paulu alemba mutsamba yace kwa Akolose kuti mphangwa zadidi ‘zikhabala misapo, mbazikula pantsi ponsene’ na “[zikhafokotozwa] kuli pinthu pyonsene pidachitwa pantsi pa thambo.” (Akol. 1:5, 6, 23) Akristu akutoma abvera Mafala, na nzimu wakucena waapasa mphambvu towera kucita basa ya kumwaza mphangwa pa dziko yonsene yapantsi kumala kwa makhaliro apinthu Aciyuda mbukusati kufika mu 70  E.C. Iwo akwanisa kucita basa ikhaoneka ninga yakucimwanika. Pikhali pyakuwangisa tani kwa Akristu akukhulupirika akhaphata basa kubva malipoti a pikhacitika!

Munjira ibodzibodzi, gulu ya Yahova ya ntsiku zathu isawangisira kukoya pyakulembwa pyakundendemera pya basa inacitwa mukukwanirisa Mateo 24:14, inalonga kuti: “Penepo mphangwa zadidi za dziko [“umambo,” NM] ya kudzulu zinadzapangwa pantsi ponsene, towera mukhale amboni anga pakati pa anthu a mitundu yonsene. Pingamala ipi, inadzabwera nthawi ya kumalisirathu pyonsene.” Ninga anzakazi akuperekeka a Mulungu, tiri na basa yakucimbiza towera kucita. M’bodzi na m’bodzi wa ife asafunika kudzudzumika mukucita pinakwanisa iye towera utumiki ucitiwe mwakukwana kumala mbukusati kufika. Yahova anadzaona kuti basa ineyi yakwaniriswa, na khala tacita khundu, tinadzatambira kutawirika kwa Yahova.

LIPOTI YANU YA UTUMIKI WA MMUNDA

Kodi tisafunika kulembanji makamaka? Formulariu ya Lipoti Ya Utumiki Wa Mmunda inaperekwa na gulu isapangiza pinafunika ife kulemba. Mbwenye panango pinthu pyakutowerera ipi na mifokotozo yakudziwika inaperekwa nzidzi na nzidzi mu Utumiki Wathu Wa Umambo, pinakhala pyakuphedza.

Pa mizera ya “Mabukhu,” “Pimabukhu Na Mabruxura,” na “Marevista,” lembani numero ya mabukhu anewa adagawira imwe anthu akuti si Mboni zakuperekeka na zakubatizwa tayu.

Pakulemba “Maulendo Akubwerezera,” lengesani maulendo onsene adacita imwe na cifuno ca kusisimula kufuna kudapangizwa pa ulendo wakutoma na munthu wakuti si Mboni wakuperekeka na wakubatizwa tayu. Kuti mulengese ulendo wakubwerezera, musafunika kupita n’cibverano na munthu adapangiza kufuna pa ulendo wakutoma. Munacita imwe pfunziro ya Biblya yapanyumba na m’bale peno mulongo wakulimira kumwaza mphangwa m’kutawiriswa na ciwalo ca Nsoka Wakuyanganira Basa m’Mpingo, musafunika kulemba ulendo wakubwerezera. Mungakwanisembo kulemba maulendo akubwerezera a mapfunziro anacitisa imwe munthu wakumala kwene kubatizwa anafuna ciphedzo m’nzidzi wakucepa. Ulendo wakubwerezera nee usacitwa mukuenda kaona munthu panyumba basi, mbwenye usacitwambo mukulemba tsamba, kumenya ntokodzi, peno kuenda kapasa munthu mabukhu, ninga marevista mapswa. Ulendo ubodzi na ubodzi unacitisa imwe pfunziro ya panyumba, mungakwanise kulemba ninga ulendo wakubwerezera.

Maseze mapfunziro a Biblya kazinji kene asacitwa pa sumana ibodzi na ibodzi, iwo asalembwa kabodzi basi pa nthanda. M’madziko akuti asaphatisira basa formulariu ya Lipoti Ya Pfunziro, amwazi mphangwa asafunika kulemba pfunziro ibodzi na ibodzi idacitisa iwo pa nthanda na anthu akuti si Mboni zakuperekeka na zakubatizwa tayu, peno anango anafokotozwa mu ndima yakutowerera iyi. Mungamala kulemba mwadidi na mwakundendemera, lembani numero ya mapfunziro a Biblya onsene akusiyana-siyana pa kabokosi kali pa nkhomo ku nkono wa madyo pa formulariu yanu ya Lipoti Ya Utumiki Wa M’munda. Numero idalemba imwe pa Lipoti Ya Utumiki Wa M’munda na numero idalemba imwe pa Lipoti Ya Pfunziro isafunika kukhala ibodzi ene.

Mphyakufunika kupereka lipoti yandimomwene ya “Midzidzi Ya Utumiki Wa Mmunda.” Ineyi ndi midzidzi idabvunga imwe m’kucita khundu m’utumiki wa nyumba na nyumba, basa ya mu nseu, kucita maulendo akubwerezera, kucitisa mapfunziro a Biblya, peno kupereka umboni mwantsusukano peno wapakweca kwa anthu akuti si Mboni zakuperekeka na zakubatizwa tayu. Mungakwanisembo kulemba ninga pfunziro ya Biblya inacitisa imwe m’bale peno mulongo wakulimira kumwaza mphangwa mukutawiriswa na ciwalo ca Nsoka Wakuyanganira Basa m’Mpingo. Kusiyapo pyenepi, mungakwanise kupitiriza kulemba nzidzi udaphatisira imwe mukucitisa pfunziro munthu adamala kwene kubatizwa anafuna ciphedzo cauzimu m’nzidzi wakucepa. Khala pana thangwi inacitisa amwazi mphangwa awiri kupereka umboni pabodzi, uwiri wawo analemba nzidzi khala onsene acita khundu mukupereka umboni. Pana mabasa anango akufunika akuti nzidzi wawo nee usalembwa, ninga kukhunganyikira utumiki wa mmunda, kugumanika pa nsonkhano wa utumiki wa mmunda, na kuenda na kubwera ku cisa.

Nzidzi wanu wa utumiki wa m’munda usafunika kutoma munatoma imwe basa yanu ya kupereka umboni na kumala munamalisa imwe kucedza na munthu wakumalisa mu nzidzi onsene wakupereka umboni. Nzidzi unaphatisirwa towera kupuma peno kudya m’utumiki wa mmunda nkhabe lembwa. Apainiya akuphedza, a nzidzi onsene na akupambulika pabodzi na amisionario ali na midzidzi inaphembwa iwo kukwanirisa. Amwazi mphangwa a pa mpingo asawangiswambo kuikha Umambo pa mbuto yakutoma na kuwangisira towera kucita pyonsene pinakwanisa iwo mmunda mwakubverana na makhaliro a munthu. Anzakazi onsene akuperekeka a Yahova asawangisira na ntima onsene m’utumiki. (Akol. 3:23) Ale anacita nkhani zapakweca angakwanise kulemba nzidzi unabvunga iwo mukucita nkhani, na nyakubala angakwanise kulemba nzidzi ubodzi pa sumana angapfunza na ana ace akukhonda perekeka.

Nzidzi unabvungwa m’utumiki wa m’munda usafunika kulembwa m’midzidzi yamumphu. Pyenepi ndi pyakusiyana khala m’mwazi mphangwa asacimwana kakamwe kucita pinthu na thangwi ya kukalamba, nkhabe kwanisa kubuluka panyumba na thangwi ya utenda, asakhala ku nyumba za anyakukalamba, peno nyatwa inango inacimwanisa kucita pinthu pizinji. Amwazi mphangwa anewa angakwanise kulemba mphindi 15 mbuto mwa midzidzi yamumphu. Ngakhale apereke umboni mphindi 15 basi pa nthanda, iye asafunika kulemba mphindi zenezi towera apitirize kulengeswa ninga m’mwazi mphangwa wa Umambo wakukhonda phonya. Masasanyiro anewa asaphatisirwambo kwa amwazi mphangwa akucimwana kucita pinthu mu nzidzi wakucepa, panango acimwana kufamba nkati mwa nthanda ibodzi peno zingasi na thangwi ya utenda ukulu peno kuphekeka. Mbwenye, masasanyiro anewa acitirwa basi ene ale anacimwana kakamwe kucita pinthu. Nsoka Wakuyanganira Basa m’Mpingo unadzatonga khala m’mwazi mphangwa athema masasanyiro anewa.

KHADI YA MPINGO YA KULEMBERA BASA YA M’MWAZI MPHANGWA

Lipoti yanu ya utumiki wa m’munda ya nthanda ibodzi na ibodzi isalembwa pa Khadi Ya Mpingo Yakulembera Basa Ya M’mwazi Mphangwa, inakoyiwa m’markivo a mpingo. Makhadi anewa si a munthu ene tayu. Mungafulukira ku mpingo unango, onesesani kuti mwadziwisa akulu a mpingo. Mulembi wa mpingo wanu upswa anadzaphemba kuti khadi peno makhadi a Mpingo A Kulembera Basa Ya M’mwazi Mphangwa atumizwe ku mpingo wanu upswa. Khala mulembi wa mpingo wanu asadziwa dzina ya mpingo udafulukira imwe, iye anakwanisa kutumiza khadi peno makhadi pabodzi na tsamba inalonga pya imwe. Natenepa, akulu a mpingo wanu upswa anadzakwanisa mwadidi kupitiriza kukupasani ciphedzo cakufunika cauzimu. Khala musafuna kubuluka pa mpingo wanu mu nzidzi wakukhonda piringana nthanda zitatu, taphata miyendo pitirizani kutumiza ku mpingo wanu lipoti yanu ya utumiki wa mmunda mwakukhonda phonya.

THANGWI YANJI TISAPEREKA LIPOTI YANTHU YA M’MUNDA

Kodi m’midzidzi inango musaduwala kupereka lipoti yanu ya mmunda? Mwakukhonda penula ife tonsene m’midzidzi inango tisafunika kukumbuswa. Mbwenye tingasakulira maonero adidi a kutumiza lipoti yathu ya utumiki wa mmunda na khala tisabvesesa thangwi yanji ndi pyadidi kucita pyenepi, kunadzakhala kwakukhonda nensa kwa ife kukumbukira kupereka mwakuthema lipoti yathu ya utumiki wa mmunda.

Anango abvunza: “Thangwi yanji ndisafunika kupereka lipoti ku mpingo, nakuti Yahova asadziwa pinacita ine m’basa yace?” Mwandimomwene, Yahova asadziwa pinacita ife, na iye asakwanisa kuona khala tikucita basa yathu na ntima onsene peno khala nee tikucita pyonsene pyakuti tingakwanise kucita. Mbwenye kumbukani kuti Yahova akoya numero ya ntsiku zidakhala Noa n’cimwadiya na numero ya piaka pidafamba Aisraele m’thando. Mulungu akoya numero ya ale akhali akukhulupirika pabodzi na ale akukhonda bvera. Iye akoyambo pinthu pya kukundwa kwa pang’ono-pang’ono kwa dziko ya Kanani na basa ya anyakutonga miseru akukhulupirika a Israele. Inde, iye akoya unyomonyomo uzinji wa mabasa a anzakazi ace na pyakucita pyawo. Iye apumira pinthu pyakulembwa pyenepi pidacitika, mbasiya pakweca kwa ife maonero ace a kukoya pyakulemba pyakundendemera.

Pyakucitika pya mbiri pidalembwa m’Biblya pisapangiza undendemeri wa malipoti na pyakulembwa pikhakoiwa na mbumba ikhakwata dzina ya Yahova. Munjira zizinji, kubveka kukulu kwa pyakulembwa pya Biblya mbipidadziwika tayu mwakukhonda kupereka numero zakuthonyeka. Onani pitsanzo pyakutowerera ipi: Genesi 46:27; Eksodo 12:37; Atongi 7:7; 2 Amambo 19:35; 2 Pya dziko ya Israele 14:9-13; Jwau 6:10; 21:11 na Machitiro 2:41; 19:19.

Pana mathangwi mazinji anaticitisa kupereka lipoti yathu ya utumiki wa mmunda mu ntsiku zathu zino. Maseze malipoti anewa nkhabe phataniza pinthu pyonsene pinacita ife m’basa ya Yahova, pinalemba ife ndi pyakufunika kakamwe towera kuphedza anthu onsene ali mu gulu ya Yahova, kuphataniza akulu a mpingo.

M’midzidzi inango, malipoti angapangize kuti makhundu anango a utumiki wathu asafunika citsalakano cakupambulika. Numero zingapangize kuti tiri kuenda kutsogolo m’mabasa anango mbwenye kuti amwazi mphangwa akuthimizirika peno m’makhundu anango tikubwerera nduli. Pyenepi panango pingapangize kuti pasafunika ciwangiso peno pana nyatwa zinafunika kumaliswa. Ayang’aniri a kupitawirira anadzaona malipoti na kuwangisira kusasanyira pinthu pyonsene pyakuti pingacimwanise anthu anango peno mpingo onsene kuenda kutsogolo.

Malipoti asaphindulisambo gulu kuona kuti ndi khundu ipi ya munda inafunika kakamwe anyabasa. Kodi ndi mphimba zipi zinafamba basa mwadidi kakamwe? Kodi ndi kupi kunakhonda kuenda kutsogolo? Kodi ndi mabukhu api anafunika towera kuphedza anthu kupfunza undimomwene? Malipoti asaphedza gulu kuona mabukhu anafunika m’makhundu akusiyana-siyana a dziko yapantsi na kusasanyira pyakufunika pyenepi towera pakhonde kusoweka Mabiblya peno mabukhu akubuluswa m’Biblya akuphatisirwa m’basa ya kumwaza mphangwa.

Kwa azinji a ife, malipoti asatiwangisa kakamwe. Kodi tisakomerwa tayu kubva pinacita abale anzathu m’basa ya kumwaza mphangwa zadidi mu dziko yonsene yapantsi? Malipoti a kukula kwa numero ya amwazi mphangwa asatiphedza kuona kukula kwa gulu ya Yahova. Pyakugumana napyo pya anthu anango pisatiwangisa na kutidzadza na mphinga, na kutikulumiza kucita khundu mwakukwana m’basa ya kumwaza mphangwa. (Mach. 15:3) Natenepa kubverana kwathu na mpingo pa kupereka malipoti a utumiki wa mmunda ndi kwakufunika na kusapangiza kudzudzumika kwathu na abale athu a konsene kwene. Munjira ineyi yakucepa, tisapangiza kuti tisangonjera masasanyiro a gulu ya Yahova.—Mat. 24:45-47, MZ.

KUIKHA PIFUNO PYA MUNTHU PA EKHA

Nkhabepo thangwi ya kulandanisa utumiki wathu wa mmunda na wa munthu unango. (Agal. 5:26; 6:4, Chiverano Chachinchino) Makhaliro a munthu asasiyana pikulu pene, kwakuti kulandanisa pinacita ife na pinacita anango ndi kusowa nzeru. Ku khundu inango, tinatambira nkhombo zizinji mukuikha pifuno pyathu pyene pyakuti tinakwanisa kupifikira. Pifuno pyenepi pinakwanisa kutipasa pfuli yakufunika towera kupima kuenda kwathu kutsogolo m’utumiki. Pontho, khala taikha pifuno pyathu mwakubverana na makhaliro a munthu pa ekha, kufikira pifuno pyenepi kunakwanisa kutikomeresa.

KUCITA KHUNDU M’LIPOTI YAKUMALISA

Mwakubverana na basa yakuphipirisa yakuti ikhali yaciprofesiya ya kumwaza mphangwa inacita ife lero, tisadziwiswa kuti pakumalisira pace yacitwa lipoti. M’masomphenya a profesiya, Ezekyele aona amuna atanthatu na pida pyakupha napyo m’manja mwawo mbabwera kudzatonga Yerusalemu wakupanduka. Mbwenye iye aonambo mamuna wacinomwe mbadza. Unoyu akhali na cakulemba naco ca mulembi, na iye apangwa: “Pakasa ndzinda wamumphu wa Yerusalemu mbulemba chidzindikiro pa nkhope ya munthu anakhonda mbatsukwala na pinthu pyakuipa pire pinachitika mwenemo.” Pakumalisa basa yace ya kulemba cidzindikiro anthu akhafunika kupulumuswa pa kutonga miseru kukhafuna kucitwa na amuna akukwata pida pyakupha napyo, mamuna akhali na cakulemba ca mulembi acita lipoti, mbati: “Pidanditonga imwe ndapichita.”—Ezek. 9:1-11.

Ife nkhabe dziwa lipoti yakumalisa inafuna kudzaphemba Yahova ya basa ikulu ya kumwaza mphangwa inacitwa mukukwanirisa Mateo 24:14. Mbwenye, tinakwanisa kupereka takhuta ku khundu yakucepa inatawiriswa ife kucita utumiki mukupereka mwakundendemera lipoti yathu ya utumiki wa mmunda mwakukhonda phonya pa nthanda ibodzi na ibodzi. Amwazi onsene a mphangwa zadidi asafunika kupereka mwakucimbiza lipoti yawo ya utumiki wa mmunda pakumala kwa nthanda ibodzi na ibodzi. Pyenepi pinadzatsanzayisa abale ale adaikhwa towera kugumanya malipoti a utumiki wa mmunda na kutumiza ku ofesi ya filiali.

Pisaoneka pakweca kuti Yahova akucimbizisa cincino basa ya kugumanyisa anthu anafuna iye kutsidzikiza kuti agwande pa “nyatwa zikulu.” Tisakhala m’nzidzi wa kukwaniriswa kwa profesiya ya Izaiya pa pinthu ipi: “Na ntupombo ungono-ngono kakamwe wa mbumba yako unadzakhala ukulu na wa mphambvu. Pyonsenepi pinadzaoneka pa ndzidzi wakufunika, thangwi ndine Mbuya anafuna kudzapichitisa na kuchimbiza.” (Apok. 7:9, 14; Iza. 60:22) Ninga khundu ya gulu ya dziko yonsene yapantsi idanyindirwa utumiki, tisafunika kupereka lipoti, ninga mudacitira mamuna wa pa masomphenya wakukhala na cakulemba ca mulembi: “Pidanditonga imwe ndapichita.”