Pangizani Kutsalakana Kwanu Anango—M’kuyang’ana Mwadidi Ale Anaceza Na Imwe
1 Munapereka ife umboni m’mbuto zapakweca peno pa nyumba na nyumba, kazinji kene tisayang’ana munthu mbatisati toma kulonga. M’nzidzi unoyu wakucepa, tingakwanise kudziwa kubulukira ku maonekero a nkhope zawo kuti asapibva tani thangwi ya kufika kwathu na tingakwanisembo kuona khala ali akutsanzaya peno nkhabe. M’njira ibodzibodzi, iwo angakwanisembo kudziwa pizinji pya ife. Mudacezerwa nkazi unango na Mboni, iye alonga: “Cinthu cibodzi cinakumbukira ine m’kumwetula kwace ndi ntendere. Kufuna kwanga kudziwa kwagalamuswa.” Pyenepi pyafungula njira kuti nkazi unoyu abvesere mphangwa zadidi.
2 Kuyang’ana ale anaceza na ife ndi njira yadidi ya kutoma kupereka umboni munacita ife basa ya kumwaza mphangwa m’miseu peno m’mbuto zinango zapakweca. Mbale unango asayang’ana maso a ale ananfendedzera. Munaayang’ana iye, asamwetula na buluka penepo asapangiza marevista. Mukuphatisira njira ineyi, iye asatsanzaya m’kuceza na anthu azinji pabodzi na kugawira mabukhu mazinji.
3 Sakani Kudziwa Mabvero A Anango: Kuyang’ana ale anaceza na ife kunadzatiphedza kudziwa mabvero a anango. Mwacitsanzo, munthu unango anganenserwa kubvesesa pinalonga ife peno nkhabe tawira pinthu pinango pidalonga ife, kazinji kene pyenepi pinadzaoneka pa nkhope yace. Khala iye ali wakupingizika peno asacimwana kupirira, tinadzadziwa pyenepi bulukira ku maonekero a nkhope yace. Buluka penepo tingakwanise kucinja peno kubvirisa uperekero wathu umboni mwakubverana na pyenepi. Kusaka kudzindikira mabvero a anango ndi njira yadidi ya kupangiza kuatsalakana kwathu.
4 Kuona Ntima Na Cinyindiro: M’makhundu anango a dziko, kuyang’ana munthu m’maso kusaoniwa ninga cipangizo ca kuona ntima. Onani kuti Yezu atawira tani mudabvunza anyakupfunzace: “Apo mbani anakwanisa kupulumuka?” Biblya isalonga: “Yesu adaayang’ana mbalonga mbati, ‘Pyenepi mphyakuchimwanika kuna munthu, mbwenye kuna Mulungu pyonsene mphyakukwanisika.’” (Mat. 19:25, 26, CC) Mwakukhonda kupenula, cinyindiro cikhaoneka m’maso mwa Yezu cathimizira mphambvu ku mafala ace. M’njira ibodzibodzi, kuyang’ana anaceza na ife kunadzatiphedza kumwaza mphangwa za Umambo na kuona ntima pabodzi na cinyindiro.—2 Akor. 2:17; 1 Ates. 1:5.