Tinakwanisa Tani Kupitiriza Kukhala Aphinga
1 Phinga ikhali na Apolo pa kucita utumiki wace ingakwanise kutikumbusa Akristu anzathu a lero makamaka ale anacita basa ya kumwaza mphangwa mwaphinga. (Mach. 18:24-28) Natenepa, ife tonsene tisadembeterwa: “Phatani mabasa anu nee kupolola. Ntima wanu ukhale wacipapo.” (Arom. 12:11) Kodi ndi ninji cinafuna kutiphedza kugumana na kupitiriza kukhala aphinga m’utumiki Wacikristu?
2 Phinga Yakuthimizirwa Na Cidziwiso: Mudamala Yezu kuoneka kwa awiri a anyakupfunzace na “[kuachululira] mafala onsene a m’bukhu ya Mulungu akhalonga pya iye,” iwo alonga: “Simo tayu kuti ife tikhabva kupisa mu ntima mwathu, pikhalonga iye na ife mu njira?” (Luka 24:27, 32) M’njira ibodzibodzi, kodi mitima yathu hisapisirwa tayu na kukomerwa munathimizira ife kubvesesa Mafala a Mulungu? Inde, cikhulupiro cisathimizirwa na cidziwiso. Aroma 10:17, Chiverano Chachinchino, asalonga: “Chikhulupiro chimbadza munthu angava mphangwa.” Mitima yathu ingadzala na cinyindiro m’mapikiro a Yahova, ife nee tinasiya kulonga pinthu pidapfunza ife tayu!—Sal. 145:7; Mach. 4:20.
3 Ife nkhabe funika kunyindira basi cidziwiso cidagumana ife kubulukira pa pfunziro yakale ya Biblya towera kufuna kwathu Mulungu kupitirize kukhala kwakuwanga na phinga yathu m’basa yace ipitirize kukhala yakupisa. Tisafunika tipitirize kuthimizira cidziwiso cathu ca undimomwene na kukuza kufuna kwathu Yahova. Tingakhonda cita pyenepi, basa yathu kwa iye ingakwanise pang’ono na pang’ono kukhala yakukhonda bulukira m’ntima. (Apo. 2:4) Mafala a Mulungu asatidembetera ‘kuthimizira kudziwa Mulungu.’—Akol. 1:9, 10.
4 Nsambo Wathu Wa Kupfunza: Tisafunika kudinga nsambo wathu wa kupfunza. Mwacitsanzo, tingakwanise kulemba nthemba pantsi pa matawiro a pfunziro ya A Sentinela na kupereka matawiro adidi. Kodi tisadinga malemba akusowa mafala m’ndima na kunyerezera njira ya kuaphatisira m’umaso wathu? Pa kuleri Biblya kwa sumana na sumana, kodi pingakwanisika tisawangisira kudinga mphangwa zinango na kunyerezera pipfunziso pinagumanika mwenemo? (Sal. 77:11, 12; Mis. 2:1-5) Ndi pyakuphindulisa tani kunyerezera na kukumbukira Mafala a Mulungu! (1 Tim. 4:15, 16) Pfunziro ineyi yakufunika inadzakhutisa mitima yathu na kutipasa mphambvu towera kukhala ‘aphinga m’pyadidi pyonsene.’—Tit. 2:14.