Tinadzindikira Tani Kuti Armajedhoni Iri Dhuzi?

USADZIWA kuti cidzindikiro ninji?— Mu Nsolo 46 ife taona cidzindikiro cidapereka Mulungu toera kupangiza kuti iye cipo mbadaphatisira pontho madzi makulu toera kufudza dziko. Munjira ibodzi ene, apostolo a Yezu aphembambo cidzindikiro cakuti mbicidaaphedza kudziwa thangwi ya kubwera kwa Yezu na kumala kwa makhaliro a dziko ino.—Mateu 24:3.

Nakuti Yezu nkhabe kuoneka, pontho ali kudzulu, mwandimomwene pakhafunikadi cidzindikiro toera anthu adziwe kuti Yezu atoma kutonga. Na thangwi ineyi, Yezu alonga kuti anyakupfundzace akhafunika kuonesesa mwadidi pinthu pyakuti mbapidacitika pa dziko yapantsi. Kucitika kwa pinthu pyenepi, mbapidapangiza kuti Yezu abwerera, pontho atoma kutonga kudzulu ninga Mambo.

Toera kupfundzisa anyakupfundzace kufunika kwa kukhala akuyang’anira, Yezu aapanga: “Nyerezerani pinacitika na muti wa nsambvu na miti inango yonsene. Mungaona kuti miti ikutoma kubulusa masamba mapswa, imwe musadziwa kuti malimwe ali cifupi.” Ndi pyakukhonda nentsa kudziwa kuti ndzidzi wa malimwe wafika. Munjira ibodzi ene, tinakwanisambo kudzindikira kuti Armajedhoni iri dhuzi tingaonesesa mwadidi pinthu pidalonga Yezu pyakuti pinacitika.—Luka 21:29, 30.

Mu tsamba ino na inatowera tinaona mafoto anapangiza pinthu pidalonga Yezu pyakuti ndi pidzindikiro pinapangiza kuti Umambo wa Mulungu uli cifupi. Pinthu pyenepi pyonsene pingamala kucitika, Yezu Kristu wakuti ndi Mambo wa Umambo wa Mulungu anadzafudza mautongi onsene a dziko ino ninga pidaona ife mu Nsolo 46.

Tende ticedze thangwi ya mafoto anagumanika pa matsamba mawiri adamala ife kuona. Mafoto anewa asabverana na pinalonga lemba ya Mateu 24:6-14 na Luka 21:9-11, pontho pa foto ibodzi na ibodzi pasagumanika numero. Numero zibodzi zene zisagumanikambo pa khundu yakutoma ya ndima inafokotoza mafoto anewa. Cincino tende tione pidzindikiro pyonsene pidalonga Yezu khala piri kukwanirisika peno nkhabe.

(1) Yezu alonga: “Imwe munadzabva pya nkhondo na mabvabva a nkhondo; . . . mbumba inadzamenyana na mbumba indzace, umambo unadzamenyana na umambo undzace.” Ukhadabva kale mphangwa zinalonga pya nkhondo?— Nkhondo Yakutoma ya pa dziko yonsene yapantsi yatoma mu caka ca 1914 mbimala mu caka ca 1918, pontho Nkhondo Yaciwiri yatoma mu caka 1939 mbimala mu caka ca 1945. Cipo pakhadacitika kale nkhondo ninga zenezi! Lero pa dziko yonsene yapantsi pasacitika nkhondo. Kusiyapo pyenepi, ntsiku zonsene tisabva m’maradhyo, tisaona m’matelevizau, pontho tisaleri m’majornali mphangwa zinalonga pya nkhondo.

(2) Yezu alongambo: “Kunadzaoneka njala . . . m’mbuto zakusiyana-siyana.” Iwe usadziwa kuti nee ndi onsene lero asakwanisa kugumana cakudya. Ntsiku zonsene anthu azinji asafa thangwi yakusowa cakudya.

(3) Yezu alongambo cinthu cinango: ‘Kunadzaonekambo mautenda akugopswa m’mbuto zakusiyana-siyana.’ Mautenda anewa ndi api?— Ndi ale anapha anthu azinji. Ubodzi mwa mautenda anewa ukhali nyampwanda wacixipanyola, utenda unoyu ukhali wakugopswa thangwi mu caka cibodzi basi wapha anthu mamiliyau 20. Mu ntsiku zino anthu azinji asafa na Sida. Kusiyapo pyenepi, pyaka pyonsene utenda wa kankro, utenda wa ntima na mautenda anango asapha anthu azinji kakamwe.

(4) Yezu alonga thangwi ya cidzindikiro cinango: “Kunadzaoneka . . . piteketeke m’mbuto zakusiyana-siyana.” Kodi citeketeke usacidziwa?— Citeketeke cisacitisa mataka kutekenyeka. Ico cingacitika nyumba zisagwa, pontho kazinji kene anthu asafa. Kutomera mu caka ca 1914 kusacitika piteketeke pizinji pyaka pyonsene. Ukhadabva kale munthu mbalonga pya citeketeke?—

(5) Yezu alonga thangwi ya cidzindikiro cinango cakuti ndi ‘kuthimizirika kwa uipi.’ Ndi thangwi yace lero umbava na uphanga pikutekera kakamwe. Mbuto zonsene anthu asagopa kuti mapanga anabwera m’mamidzi mwawo. Lero pinthu pyakuipa na uphanga pikutekera kakamwe kupiringana kale.

(6) Yezu alonga khundu inango yakufunika kakamwe ya cidzindikiro pidalonga iye kuti: “Mphangwa zadidi za Umambo zinadzamwazwa pa dziko yonsene yapantsi toera zikhale umboni kuna anthu a madzindza onsene, buluka penepo kumala kunadzafika.” (Mateu 24:14) Khala iwe usatawira “mphangwa zadidi” usafunika kupanga anango mphangwa zenezi. Ungacita pyenepi unaphedzera kukwanirisika kwa khundu ineyi ya cidzindikiro.

Anthu anango asalonga kuti pinthu pyonsene pikhadalonga Yezu pisacitika kutomera kale. Mbwenye pinthu pyenepi cipo pyacitika mu ndzidzi ubodzi ene, pontho mu mbuto zizinji. Wakwanisa kubvesesa kuti cidzindikiro cisabvekanji?— Cisabveka kuti tingaona pinthu pyenepi pyonsene mbapikacitika, tisadziwa kuti cincino pano dziko yakuipa inapitirwa mbuto na dziko ipswa ya Mulungu.

Pidalonga Yezu cidzindikiro ceneci, iye alongambo pya ndzidzi wakupambulika wa pacaka. Iye alonga: “Pitirizani kucita phembero toera kuthawa kwanu kukhonde kucitika mu ndzidzi wa khoni.” (Mateu 24:20) Mafala anewa adalonga Yezu asabvekanji?—

Mbuto zinango midzidzi inango ndi pyakunentsa peno pyakugopswa kucita ulendo mu ndzidzi wa khoni, mphapo ndiye tani khala munthu akuthawa cidengwa mu ndzidzi unoyu, ninji pinafuna kucitika?— Panango iye anakwanisa kuthawa, mbwenye anathabuka kakamwe. Nee pinakhala pyakutsukwalisa munthu angafa mu dzidzi unoyu wa khoni basi ene thangwi akhali wakuphatika na pinthu pinango, pontho nee akwanisa kubuluka pinthu mbapidzati kutekera?—

Usabvesesa kuti Yezu akhafuna kupfundzisanji pidalonga iye kuti munthu nee asafunika kudikhira ndzidzi wa khoni toera kuthawa?— Iye akhapangiza kuti, nakuti tisadziwa kuti Armajedhoni iri dhuzi, nee tisafunika kudembuka kutumikira Mulungu na kupangiza kuti tisanfuna. Thangwi tingadembuka nee tinapulumuka. Tinakhala ninga anthu ale adafa na Madzi Makulu akuti akhabva pikhalonga Nowa mbwenye nee apita mu arka.

Mu nsolo unatowera, tinaona kuti umaso unakhala tani nkhondo ikulu ya Armajedhoni ingamala, pontho tinaonambo pinthu pyadidi pinafuna kucita Mulungu kuna ale ananfuna na kumbvera.