Kodi Dziko Inadzafudzwa Pontho Na Madzi?

WABVA kale munthu mbalonga pya kumala kwa dziko?— Lero anthu azinji asalonga thangwi ya pyenepi. Anthu anango asanyerezera kuti dziko inadzamala pa nkhondo yakuti anthu anadzaponya mabhomba makulu. Usaona kuti Mulungu anadzatawirisa anthu toera afudze dziko yathu yakubalika?—

Ninga pidapfundza ife, Bhibhlya isalonga pya kumala kwa dziko. Iyo isalonga kuti: “Dziko iri kupita.” (1 Juwau 2:17) Kodi kumala kwa dziko kusabveka kufudzwa kwa dziko ino yapantsi?— Nkhabe. Bhibhlya isalonga kuti Mulungu acita dziko yapantsi “toera anthu akhalemo” mwakutsandzaya. (Izaiya 45:18) Lemba ya Masalmo 37:29 isalonga: “Anthu akulungama anadzapaswa dziko yapantsi, pontho iwo anadzakhala mwenemu kwenda na kwenda.” Ndi thangwi yace Bhibhlya isalonga kuti dziko yapantsi inadzakhala kwenda na kwenda.—Masalmo 104:5; Ekleziaste 1:4.

Khala kumala kwa dziko nee kusabveka kufudzwa kwa dziko yapantsi, mphapo kusabvekanji?— Tende tione pinthu pidacitika mu ndzidzi wa Nowa toera tigumane ntawiro. Bhibhlya isalonga: “Dziko ya mu ndzidzi unoyu yafudzwa pidadzala iyo na madzi.”—2 Pedhru 3:6.

Kodi alipo adapulumuka pidafudzwa dziko na Madzi Makulu mu ntsiku za Nowa?— Bhibhlya isalonga kuti Mulungu “pidabweresa iye madzi makulu pa dziko ya anthu akuipa, iye apulumusa Nowa wakuti akhamwaza mphangwa za ulungami, pabodzi na anthu anango anomwe.”—2 Pedhru 2:5.

Mphapo ndi dziko ipi idafudzwa? Kodi ndi dziko yapantsi peno ndi anthu akuipa?— Bhibhlya isalonga kuti ikhali “dziko ya anthu akuipa.” Bhibhlya isalongambo kuti Nowa “akhamwaza mphangwa.” Mphapo ndi mphangwa zipi zikhamwaza iye?— Nowa akhacenjeza anthu thangwi yakufudzwa kwa “dziko ya mu ndzidzi unoyu.”

Pidalonga Yezu pya Madzi Makulu, iye afokotozera anyakupfundzace pinthu pikhacita anthu a mu ndzidzi wa Nowa mbadzati kufudzwa. Iye alonga tenepa: “Mu ntsiku zenezi madzi makulu mbadzati kufika, anthu akhadya, akhamwa, amuna akhasemba, akazi akhasembwa, mpaka ntsiku idapita Nowa mu arka, iwo nee adzindikira cinthu mpaka mudabwera madzi makulu mbafudza anthu onsene.” Buluka penepo, Yezu alonga kuti kumala mbakudzati kufika anthu mbadacitambo pinthu pibodzi pyene ninga pikhacitika mu ntsiku za Nowa.—Mateu 24:37-39.

Mafala adalonga Yezu asapangiza kuti ife tinakwanisa kupfundza pinthu pyakufunika thangwi ya pinthu pikhacita anthu a mu ntsiku za Nowa Madzi Makulu mbadzati kufika. Usakumbuka pinthu pikhacita anthu a mu ndzidzi wa Nowa ninga pidapfundza ife mu Nsolo 10 wa bukhu ino?— Iwo akhali amphambvu na auphanga. Mulungu pidatuma iye Nowa toera kuamwazira mphangwa, azinji a iwo nee abvera.

Natenepa, yadzafika ntsiku idalonga Yahova kuna Nowa kuti mbadafudza anthu akuipa na madzi makulu. Madzi mbadadzala pa dziko yonsene mpaka kubiza mapiri. Yahova apanga Nowa toera amange arka ikulu. Arka ineyi ikhali ninga kaxa peno bokosi ikulu ninga pinapangizwa pa foto iri pa tsamba 238.

Mulungu apanga Nowa toera amange arka ikulu toera iye, banja yace na pinyama pizinji apulumukire mwenemo. Nowa na banja yace aphata basa kakamwe. Agwanda miti mikulu, pontho aphatisira matabwa a miti ineyi toera kucita arka. Iwo amala pyaka pizinji kakamwe mbakamanga arka ineyi. Thangwi iyo ikhali ikulu kakamwe.

Kusiyapo kumanga arka, usakumbuka kuti ndi basa ipi inango ikhacita Nowa?— Iye akhamwaza mphangwa toera kucenjeza anthu thangwi ya Madzi Makulu. Kodi alipo adabvera? Nkhabe, nee m’bodzi. Basi ene adabvera ndi banja ya Nowa. Anthu anango nee akhali na ndzidzi thangwi ya pinthu pinango pikhacita iwo. Usakumbuka pidalonga Yezu kuti anthu anewa akhacitanji?— Iwo akhamala ndzidzi wawo na kudya, kumwa na kusembana. Iwo akhanyerezera kuti ndi anthu adidi, pontho nee akhali na ndzidzi wakubvesera pikhalonga Nowa. Natenepa tende tione pidaacitikira.

Nowa na banja yace pidamala iwo kupita mu arka, Yahova afunga nsuwo wa arka. Anthu akuti akhali kunja kwa arka nee akhatawira kuti Madzi Makulu mbadabwera. Mbwenye mwakukhonda dikhira, madzi atoma kubvumba. Kubvumba kweneko kukhali kwakusiyana kakamwe, thangwi madzi akhabvumba mwamphambvu. Mu ndzidzi ubodzi ene, madzi atoma kudzala mbaphola mikulo, pontho akhacita baruya. Madzi anewa agwisa miti mikulu, pontho abulumundisa miyala mikulu ninga miyala ming’ono. Mphapo ninji pidacitikira anthu akhali kunja kwa arka?— Yezu alonga: ‘Madzi makulu abwera mbafudza anthu onsene.’ Anthu onsene akhali kunja kwa arka afa. Thangwi yanji?— Ninga pidalonga Yezu “iwo nee adzindikira cinthu” peno nee abvera cenjezo idapangwa iwo!—Mateu 24:39; Genesi 6:5-7.

Kumbuka pidalonga Yezu kuti pinthu pidacitikira anthu anewa ndi citsandzo kuna ife lero. Pinthu pyenepi pisatipfundzisanji?— Mwandimomwene anthu anewa nee afudzwa basi ene thangwi akhali akuipa. Mbwenye azinji a iwo afudzwa thangwi nee akhali na ndzidzi wakupfundza thangwi ya Mulungu, pontho nee akhadziwa pikhafuna kucita iye. Natenepa, ife tisafunikambo kucita mphole-mphole toera tikhonde kukhala ninga iwo.

Mphapo Mulungu anaphatisira pontho madzi makulu toera kufudza dziko?— Nkhabe, Mulungu apikira kuti nee anacitabve pyenepi. Iye alonga: “Ndiri kuikha utawaleza wanga pa makole, iwo unadzakhala cidzindikiro.” Yahova alonga kuti utawaleza mbudakhala cidzindikiro cakuti ‘cipo mbadaphatisira pontho madzi makulu toera kufudza anthu na pinyama.’—Genesi 9:11-17.

Natenepa, tinakwanisa kukhala na cinyindiro cakuti Mulungu cipo anafudza pontho dziko yapantsi na madzi makulu. Ninga taona, Bhibhlya isalonga thangwi ya kufudzwa kwa dziko. Mulungu angadzafudza dziko ino, mbani anafuna kudzapulumusa iye?— Kodi iye anapulumusa anthu akuti akhamala ndzidzi uzinji na kucita pikhafuna iwo mbakhonda kupfundza thangwi ya Mulungu? Peno anapulumusa anthu ale akuti akhaphatisira ndzidzi uzinji toera kupfundza Bhibhlya? Ndi api maonero ako?—

Mwandimomwene ife tisafunambo kupulumuswa na Mulungu.— Nee pinakhala pyakutsandzayisa anthu onsene a pa banja yathu angapulumuswa na Mulungu ninga pidapulumuswa banja ya Nowa?— Natenepa, khala tisafuna kupulumuka pakufudzwa kwa dziko ino, tisafunika kubvesesa kuti Mulungu anaifudza tani, pontho anabweresa tani dziko ipswa. Tende tione kuti iye anacita tani pyenepi.

Bhibhlya isalonga thangwi ya pyenepi pa Dhanyeli kapitulu 2, vesi 44. Lemba ineyi isalonga tenepa thangwi ya ntsiku zino: “Mu ntsiku za amambo anewa, Mulungu wakudzulu anadzakhazikisa umambo [peno utongi] wakuti nkhabe kudzafudzwa. Pontho umambo unoyu nee unadzaperekwa kuna mbumba inango. Iwo unadzanyedza, mbufudza maumambo anewa onsene, pontho iwo basi unadzakhala kwenda na kwenda.”

Usadziwa kuti mafala anewa asabvekanji?— Bhibhlya isalonga kuti utongi wa Mulungu unadzafudza mautongi onsene a pa dziko yapantsi. Thangwi yanji?— Thangwi iwo nee asabvera Ule adasankhulwa na Mulungu toera kukhala Mambo. Kodi Mambo unoyu mbani?— Ndi Yezu Kristu!

Yahova Mulungu ali na ufulu wakusankhula munthu wakuthema toera kutonga. Pontho iye asankhula Mwanace, Yezu Kristu toera kukhala Mambo. Yezu Kristu wakuti asankhulwa na Mulungu toera kutonga, thimize pano anadzafudza mautongi onsene pa dziko. Pa Apokalipse kapitulu 19, vesi 11 mpaka 16, isapangiza Yezu mbakacita pyenepi ninga pinaona ife pa foto. M’Bhibhlya, nkhondo inafuna kuphatisira Mulungu toera kufudza mautongi a dziko isacemerwa Armajedhoni.

Mulungu alonga kuti utongi wace unadzafudza mautongi onsene a anthu. Kodi iye atipangambo kuti tisafunika kucita pyenepi?— Nkhabe, Bhibhlya isalonga kuti Armajedhoni ndi “nkhondo inafuna kucitika pa ntsiku ikulu ya Mulungu Wamphambvu Zonsene.” (Apokalipse 16:14, 16) Inde, Armajedhoni ndi nkhondo ya Mulungu, pontho iye anaphatisira Yezu Kristu toera kutsogolera anyankhondo akudzulu pa nkhondo ineyi. Kodi nkhondo ya Armajedhoni iri dhuzi? Tende tione khala tinagumana ntawiro.