Tisafunika Kucitanji Toera Tikhale —Mu Dziko Ipswa Ya Mulungu?

MULUNGU aikha Adhamu na Eva m’munda wa Edheni. Ndimomwene kuti Adhamu na Eva afa thangwi yakukhonda kubvera, mbwenye Mulungu atawirisa kuti anapiana awo kuphatanizambo ife lero tikhale na umaso wakukhonda kumala. Bhibhlya isapikira: “Anthu akulungama anadzapaswa dziko yapantsi, pontho iwo anadzakhala mwenemu kwenda na kwenda.”—Masalmo 37:29.

Bhibhlya isalonga pya “kudzulu kupswa” na “dziko yapantsi ipswa.” (Izaiya 65:17; 2 Pedhru 3:13) Lero, “kudzulu” kusaimirira mautongi a anthu, mbwenye Yezu Kristu na ale anadzafuna kutonga na iye kudzulu anadzacita “kudzulu kupswa.” Pinadzakhala pyakutsandzayisa kakamwe kuona kudzulu kupswa peno utongi wa ulungami wa Mulungu na wa ntendere mbutonga dziko yonsene yapantsi!

Mphapo “dziko yapantsi ipswa” isabvekanji?— Mu dziko yapantsi ipswa munadzakhala anthu adidi akuti asafuna Yahova. Ndi pyakufunika kudziwa kuti midzidzi inango Bhibhlya ingalonga pya dziko nee isafuna kulonga pya “dziko” yapantsi, mbwenye pya anthu anadzafuna kukhala mwenemo. (Genesi 11:1; Masalmo 66:4; 96:1) Natenepa, anthu anafuna kucita khundu mu dziko yapantsi ipswa anadzakhala pa dziko ino yapantsi.

Anthu akuipa anakhala pa dziko yapantsi anadzafudzwa. Kumbuka kuti mu ntsiku za Nowa basi ene ndi anthu akuipa adafudzwa na Madzi Makulu. Pontho ninga tapfundza, dziko ino ya anthu akuipa inadzafudzwa pa Armajedhoni. Cincino tende tione kuti umaso mu dziko ipswa unadzakhala tani nkhondo ya Armajedhoni ingamala.

Usafuna kukhala kwenda na kwenda m’Paraizu mu dziko yantendere ya Mulungu?— Pa dziko yapantsi nkhabepo dotoro peno ntombwe unafuna kuticitisa kukhala na umaso wa kwenda na kwenda. Mbwenye toera tikwanise kukhala na umaso wa kwenda na kwenda tisafunika kukhala na uxamwali wakuwanga na Mulungu. Pontho Mpfundzisi Wankulu alonga kuti tinacita tani pyenepi.

Tende tione pinalonga Bhibhlya pa lemba ya Juwau kapitulu 17, vesi 3. Penepo tisagumana mafala awa adalonga Mpfundzisi Wankulu: “Umaso wakukhonda mala ndi uyu: Anthu akudziweni imwe Mulungu mʼbodzi basi wandimomwene, pontho adziwembo Yezu Kristu, ule adatuma imwe.”

Kodi pa lemba ineyi Yezu alonga kuti tisafunika kucitanji toera tikhale na umaso wa kwenda na kwenda?— Pakutoma, tisafunika kudziwa Babathu wakudzulu, Yahova na Mwanace, ule adapereka umaso wace thangwi ya ife. Pyenepi pisabveka kuti tisafunika kupfundza Bhibhlya. Bukhu ino ya Pfundzani na Mpfundzisi Wankulu, inatiphedza kucita pyenepi.

Mphapo kupfundza thangwi ya Yahova kunatiphedza tani toera tikhale na umaso wa kwenda na kwenda?— Nakuti tisafunika kudya ntsiku zonsene, natenepa tisafunikambo kupfundza pya Yahova ntsiku zonsene. Bhibhlya isalonga: “Munthu nee asakhala m’maso thangwi ya cakudya basi, mbwenye na mafala onsene anabuluka pamulomo wa Yahova.”—Mateu 4:4.

Tisafunikambo kudziwa Yezu Kristu, ule adatumwa na Mulungu toera kumalisa madawo athu. Bhibhlya isalonga: “Dziwani kuti nkhabe munthu unango anafuna kupulumusa anthu.” Pontho isalonga: “Ule anakhulupira Mwana ali na umaso wakukhonda mala.” (Mabasa 4:12; Juwau 3:36) Mphapo kukhulupira Yezu kusabvekanji?— Kusabveka kuti mwandimomwene tisan’nyindira, pontho tisadziwa kuti nee tinakwanisa kukhala na umaso wa kwenda na kwenda tingasowa ciphedzo cace. Usakhulupira pyenepi?— Khala usakhulupira, pitiriza kupfundza pya Mpfundzisi Wankulu ntsiku zonsene, pontho na kucita pinalonga iye.

Njira yadidi toera kupfundza pya Mpfundzisi Wankulu ndi kuleri kazinji kene bukhu ino, kuona mwadidi mafoto na kunyerezera mwadidi kuti tinapfundzanji. Yesera kutawira mibvundzo inagumanika pantsi pa mafoto. Pontho leri bukhu ino pabodzi na m’bodzi wa anyakubala ako. Khala nee ndi pyakukwanisika kuleri pabodzi na anyakubala ako, leri pabodzi na munthu unango wankulu peno na anapiana andzako. Nee pinakhala pyakutsandzayisa kupfundzisa anango pinthu pidalonga Mpfundzisi Wankulu pyakuti iwo asafunika kupicita khala asafunambo kukhala na umaso wa kwenda na kwenda mu dziko ipswa ya Mulungu?—

Bhibhlya isatipanga: “Dziko iri kupita.” Mbwenye iyo isatipangambo pinthu pinafunika ife kucita toera tikhale na umaso wa kwenda na kwenda mu dziko ipswa. Iyo isalonga: “Munthu anacita pinafuna Mulungu anapitiriza kukhala kwenda na kwenda.” (1 Juwau 2:17) Mphapo tisafunika kucitanji toera tikhale na umaso wa kwenda na kwenda mu dziko ipswa ya Mulungu?— Tisafunika kudziwa Yahova na Mwanace wakufunika, Yezu Kristu. Mbwenye tisafunikambo kuphatisira pinapfundza ife. Natenepa, bukhu ino inakuphedza kucita pyenepi.