Umambo Wa Mulungu Ninji? Tinauphedzera Tani?

KODI usadziwa phembero idapfundzisa Yezu anyakupfundzace?— Khala nee usaidziwa tende tiileri pabodzi m’Bhibhlya pa Mateu 6:9-13. Phembero ineyi anthu azinji asaicemera Phembero ya Mbuya, yakuti iri na mafala awa: “Umambo wanu mbudze.” Mphapo usadziwa kuti Umambo wa Mulungu ninji?—

M’madziko anango, munthu anatonga dziko asacemerwa prezidhenti, wakuti ndi munthu wakufunika kakamwe mu utongi. Mbwenye m’madziko anango munthu anatonga asacemerwa mambo. Khala iye ndi mambo, utongi wace ndi umambo. Mphapo munthu anatonga mu Umambo wa Mulungu asacemerwa tani?— Asacemerwa Mambo. Na thangwi ineyi, utongi wa Mulungu usacemerwambo Umambo.

Usadziwa mbani adasankhulwa na Yahova toera akhale Mambo wa Umambo wace?— Asankhula Mwanace Yezu Kristu. Thangwi yanji iye ndi wakuthema kupiringana atongi onsene anasankhulwa na anthu?— Thangwi Yezu asafuna kakamwe Babace, Yahova. Na thangwi ineyi, ndzidzi onsene asacita pinthu pyadidi.

Yezu mbadzati kubalwa ku Bhetelehemu, Bhibhlya ikhadalonga kale thangwi ya kubalwa kwace. Yalonga kuti iye mbadakhala Mambo wakusankhulwa na Mulungu. Ona pinalonga lemba ya Izaiya 9:6, 7. Lemba ineyi isalonga tenepa: “Thangwi ife tabalirwa mwana, ife tapaswa mwana wamamuna; pontho utongi unadzakhala m’manja mwace. Iye anadzacemerwa . . . Ntsogoleri wa Ntendere. Utongi wace unadzathimizirika, pontho ntendere unadzakhala kwenda na kwenda.”

Usadziwa kuti thangwi yanji Yezu asacemerwa “Ntsogoleri” mu Utongi wa Umambo wa Mulungu?— Iye asacemerwa tenepo thangwi ndi Mwana wa Mambo Wankulu, Yahova. Mbwenye Yahova asankhula Yezu toera kukhala Mambo wa Umambo wace toera atonge dziko yonsene mu pyaka 1.000. (Apokalipse 20:6) Pidamala iye kubatizwa, Yezu atoma “kumwaza mphangwa mbalonga: ‘Tcunyukani, thangwi Umambo wakudzulu uli cifupi.’”—Mateu 4:17.

Thangwi yanji Yezu alonga kuti Umambo ukhali cifupi?— Thangwi Mambo wakuti mbadadzatonga kubulukira kudzulu akhali pakati pawo. Na thangwi ineyi, Yezu aapanga kuti: “Umambo wa Mulungu uli pakati panu.” (Luka 17:21) Nee pinakhala pyakutsandzayisa kukhala dhuzi na Mambo wa Yahova?—

Mphapo, ndi basa ipi yakufunika kakamwe idabwera kudzacita Yezu pa dziko yapantsi?— Yezu atawira mbvundzo unoyu pidalonga iye kuti: “Ndisafunikambo kumwaza mphangwa zadidi za Umambo wa Mulungu m’mizinda inango, thangwi ine ndatumwa toera kucita pyenepi.” (Luka 4:43) Yezu akhadziwa kuti nee mbadakwanisa kumwaza mphangwa kuna anthu onsene ekhene. Mphapo iye acitanji?—

Yezu akwata anthu angasi mbaapfundzisa kuti anamwaza tani mphangwa. Anthu akutoma adapfundzisa iye kumwaza mphangwa adzakhala apostolo ace 12. (Mateu 10:5, 7) Mphapo Yezu apfundzisa basi ene apostolo ace basa ineyi yakumwaza mphangwa? Nkhabe. Bhibhlya isalonga kuti iye apfundzisambo anthu anango azinji. Mukupita kwa ndzidzi, Yezu atuma anthu anango 70 awiri-awiri. Kodi iwo akhapfundzisanji anthu?— Yezu alonga: “Apangeni kuti: ‘Umambo wa Mulungu uli cifupi na imwe.’” (Luka 10:9) Natenepa, pyenepi pyacitisa kuti anthu azinji apfundze thangwi ya Umambo wa Mulungu.

Kale, mu dziko ya Izraeli munthu angakhazikiswa toera akhale Mambo, akhakwira mwanaburu mbaenda mu nzinda toera anthu amuone. Ndi pyenepi pidacita Yezu pidaenda iye ku Yerusalemu paulendo wace wakumalisa. Pidacita iye pyenepi, Yezu apangiza kuti iye mbadakhala Mambo wa Umambo wa Mulungu. Kodi anthu akhafuna kuti Yezu akhale Mambo wawo?—

Pidafika iye dhuzi na nzinda, anthu azinji atoma kuthasika nguwo zawo mu nseu ukhafuna kupita na iye. Anango akhagwanda matsandzo a micindu mbaathasika n’njira. Kucita kwawo pyenepi, iwo akhapangiza kuti akhafuna Yezu toera akhale Mambo wawo. Natenepa iwo akhakhuwa mbalonga: “Mbapaswe nkhombo ule anabwera ninga Mambo mu dzina ya Yahova!” Mbwenye nee ndi anthu onsene adakomerwa na pyenepi. Ngakhale atsogoleri a mauphemberi anango afika pakupanga Yezu kuti: “Pangani anyakupfundza anu toera amatame.”—Luka 19:28-40.

Pidapita ntsiku zixanu, Yezu amangwa mbaendeswa kunyumba kwa Ponsyo Pilato. Anyamalwa a Yezu akhalonga kuti iye ndi mambo, pontho nee asabvera utongi Waciroma. Na thangwi ineyi, Pilato abvundza Yezu thangwi ya pinthu pyenepi pidabva iye. Natenepa, Yezu antawira kuti iye nee akuyesera kufudza utongi, pontho apanga Pilato kuti: “Umambo wanga nkhabe kucita khundu ya dziko.”—Juwau 18:36.

Natenepa, Pilato apanga mbumba kuti nee aona cinthu cakuipa kuna Yezu. Mbwenye mbumba nee ikhafunabve Yezu toera akhale Mambo wawo. Pontho iwo nee akhafuna kuti Pilato asudzule Yezu. (Juwau 18:37-40) Pilato pidamala iye kucedza pontho na Yezu, adzindikira kuti Yezu nee akhadacitadi cinthu cakuipa. Na thangwi ineyi, Pilato abulusa pontho Yezu kunja mbalonga: “Onani! Uyu ndi mambo wanu!” Mbwenye anthu akhuwa: “Mupheni! Mupheni! Mbamanikwe pamuti!”

Penepo Pilato aabvundza: “Ndisafunika kupha mambo wanu?” Akulu a anyantsembe atawira: “Ife nkhabe mambo unango, mambo wathu ndi Sezari basi.” Mwandimomwene Yezu athabuka kakamwe. Thangwi anyantsembe anewa akuipa acitisa anthu kusandukira Yezu!—Juwau 19:1-16.

Pyenepi pisacitikambo mu ntsiku zino. Anthu azinji nee asafuna kuti Yezu akhale Mambo wawo. Panango iwo asalonga kuti asakhulupira Mulungu, mbwenye nee asafuna kutsogolerwa na Mulungu peno Yezu. Iwo asafuna mautongi awo apitirize kutonga dziko.

Ndiye tanimbo ife? Pidapfundza ife thangwi ya Umambo wa Mulungu na pinthu pyonsene pinafuna kudzacita iwo ntsogolo, ndi mabvero api adakhala na ife?— Ife tatoma kunfuna. Mphapo tinapangiza tani kuti mwandimomwene ife tisafunadi Mulungu, pontho tisafuna kuphedzera Umambo wace?—

Tinakwanisa kupangiza mabvero athu kuna Mulungu tingatowezera citsandzo ca Yezu. Ndi pinthu pipi pikhacita Yezu toera kupangiza kuti akhafuna Yahova?— Iye alonga: “Ndzidzi onsene ndisacita pinthu pinakomerwa na iye.” (Juwau 8:29) Yezu abwera pa dziko yapantsi ‘toera kucita pinafuna Mulungu’ na ‘kumalisa basa yace.’ (Ahebheri 10:7; Juwau 4:34) Ona pidacita Yezu mbadzati kutoma na basa yace yakumwaza mphangwa.

Yezu aenda kaonana na Juwau M’batizi ku Nkulo wa Yordane. Buluka penepo, Juwau abiza manungo onsene a Yezu m’madzi mban’busa. Usadziwa kuti thangwi yanji Juwau abatiza Yezu?—

Thangwi Yezu ndiye adaphemba. Mphapo tisadziwa tani kuti Mulungu akhafuna kuti Yezu abatizwe?— Thangwi pikhabuluka iye kwene m’madzi, iye abva fala ya Mulungu buluka kudzulu mbilonga: “Iwe ndiwe Mwananga wakufunika; ine ndisakomerwa na iwe.” Mulungu atumiza nzimu wace wakucena ninga nkhangaiwa mbubwera kuna Yezu. Natenepa, pidabatizwa Yezu iye apangiza kuti akhafuna kutumikira Yahova mu umaso wace onsene.—Marko 1:9-11.

Cincino uciri mwana. Mphapo unacitanji ungakula?— Unabatizwambo ninga Yezu?— Ndi pyadidi kuntowezera, thangwi Bhibhlya isalonga kuti Yezu atipasa citsandzo toera ‘kutowezera manyalo ace mwakukhulupirika.’ (1 Pedhru 2:21) Ungabatizwa iwe unapangiza kuti mwandimomwene usafunadi kuphedzera Umambo wa Mulungu. Mbwenye nee pyakwana basi ene kubatizwa.

Tisafunika kubvera pinthu pyonsene pidatipfundzisa Yezu. Iye alonga kuti nee tisafunika “kucita khundu ya dziko.” Mphapo ndiye tani ale anacita khundu ya dziko? Kodi iwo asabvera pidalonga Yezu? Yezu na apostolo ace nee acita khundu ya dziko. (Juwau 17:14) Mphapo acitanji?— Iwo akhalonga na anango thangwi ya Umambo wa Mulungu. Ineyi ikhali basa yakufunika kakamwe mu umaso wawo. Tinakwanisambo kucita pibodzi pyene lero?— Inde, thangwi ale anaphemba Umambo wa Mulungu asafunikambo kulonga na anango pya Umambo unoyu.