Axamwali Athu Asafunika Kukhala Ale Anafuna Mulungu

AXAMWALI athu ndi ale anacedza na ife ndzidzi uzinji. Mbwenye tisafunika kucita uxamwali na anthu adidi. Ndi xamwali upi wadidi kakamwe wakuti tinakwanisa kukhala naye?— Ndi Yahova Mulungu.

Tinakwanisadi kukhala axamwali a Mulungu?— Bhibhlya isalonga kuti Abhrahamu mamuna adakhala m’maso mu dzidzi wakale akhali “xamwali wa Yahova.” (Tiyago 2:23) Usadziwa thangwi yanji?— Thangwi Bhibhlya isalonga kuti Abhrahamu akhabvera Mulungu. Iye akhabvera, maseze midzidzi inango Yahova akham’phemba toera kucita pinthu pyakunentsa. Natenepa toera tikhale axamwali a Yahova, tisafunika kucita pinthu pinakomerwa na iye ninga pidacita Abhrahamu na pinacita Mpfundzisi wathu Wankulu.—Genesi 22:1-14; Juwau 8:28, 29; Ahebheri 11:8, 17-19.

Yezu apanga apostolo ace: “Mungacita pidakupangani ine, imwe munadzakhala axamwali anga.” (Juwau 15:14) Pyonsene pikhapfundzisa Yezu pikhabuluka kuna Yahova, ndi thangwi yace Yezu alonga kuti axamwali ace ndi ale akhacita pinafuna Mulungu. Axamwali ace akhali basi ene ale akhafuna Mulungu.

Axamwali a ponda ndipondembo a Mpfundzisi Wankulu akhali apostolo ace. Mafoto a apostolo anewa unakwanisa kuagumana pa tsamba 75 ya bukhu ino. Iwo akhacita ulendo pabodzi, akhamwaza mphangwa pabodzi, pontho Yezu akhamala ndzidzi uzinji pabodzi na iwo. Iwo akhadya pabodzi, pontho akhacedza pabodzi thangwi ya Mulungu. Kusiyapo pyenepi, iwo akhacita pinthu pinango pabodzi. Mbwenye Yezu akhalimbo na axamwali anango azinji, pontho akhacedzambo nawo.

Yezu akhakomerwa kukhala pabodzi na Banja ibodzi ikakhala mu nzinda ung’ono ukhacemerwa Bhetanya, pontho nzinda unoyu ukhali dhuzi na nzinda ukulu wa Yerusalemu. Kodi usakumbuka kuti akhali ani?— Iwo akhali Mariya, Marta na m’bale wawo Lazaro. Yezu alonga kuti Lazaro akhali xamwali wace. (Juwau 11:1, 5, 11) Yezu akhaafuna kakamwe, pontho akhakomerwa kukhala pabodzi na iwo thangwi akhafuna Yahova, pontho akhantumikira.

Pyenepi nee pisabveka kuti Yezu akhatsalakana mwakuipa anthu akuti nee akhatumikira Mulungu. Iye akhalimbo wakukoma ntima kuna anthu anewa. Ntsiku zinango akhaenda kunyumba kwawo, pontho akhadyambo pabodzi na iwo. Na thangwi ineyi, anthu anango atoma kulonga kuti Yezu akhali “xamwali wa anyakulipisa misonkho na wa anyakudawa.” (Mateu 11:19) Yezu nee akhaenda m’mamidzi mwa anthu anewa thangwi yakukomerwa na makhaliro awo, mbwenye iye akhaenda m’mamidzi mwawo toera kuapfundzisa pya Yahova. Iye akhayesera kuaphedza toera acinje makhaliro awo akuipa mbatumikirambo Mulungu.

Ndi pyenepi pidacitika mu nzinda wa Yeriko. Ntsiku inango Yezu apita na ku Yeriko pikhaenda iye ku Yerusalemu. Kweneko iye agumana anthu azinji, pontho m’bodzi wa iwo akhali Zakeu. Iye akhafuna kakamwe kuona Yezu. Nakuti Zakeu akhali wakubvira, iye nee akhakwanisa kuona Yezu thangwi penepo pakhali na anthu azinji. Natenepa, iye athamanga kuenda kutsogolo mbakwira m’muti toera akwanise kuona mwadidi Yezu angapita na penepo.

Pidafika Yezu dhuzi na muti unoyu, iye ayang’ana n’dzulu mbampanga: ‘Tcita m’muti mwakucimbiza, thangwi lero ndinakhala mulendo kunyumba kwako.’ Mbwenye Zakeu akhali munthu wakupfuma, pontho akhacita pinthu pyakuipa. Thangwi yanji Yezu akhafuna kuenda kunyumba kwa mamuna unoyu?—

Yezu nee akhafuna kuenda kweneko thangwi yakukomerwa na makhaliro a mamuna unoyu. Iye aenda kweneko thangwi akhafuna kupanga Zakeu pya Mulungu. Yezu adzindikira kuti Zakeu awangisira kakamwe toera kumuona. Na thangwi ineyi, akhadziwa kuti panango Zakeu mbadam’bvesera. Unoyu ukhali ndzidzi wakuthema toera Yezu alonge na Zakeu thangwi ya makhaliro anakomeresa Mulungu.

Mphapo ninji pidacitika mwakubverana na pinaona iwe pa foto?— Zakeu akomerwa kakamwe na mphangwa zikhapfundzisa Yezu. Mbwenye iye atsukwala kakamwe thangwi ya pinthu pyonsene pyakuipa pikhacita iye, pontho apikira kubwezera dinyero ikhabera iye anthu. Buluka penepo, iye adzakhalambo nyakupfundza wa Yezu. Natenepa, Yezu na Zakeu adzakhala axamwali.—Luka 19:1-10.

Tingakumbuka citsandzo ca Mpfundzisi wathu Wankulu, kodi tinaenda kaona anthu akuti nee ndi axamwali athu?— Inde. Mbwenye nee tinacita pyenepi thangwi yakukomerwa na makhaliro awo. Pontho nee tinacitambo pinthu pyakuipa ninga pinacita iwo. Mbwenye tinaenda kaaona toera kuapanga mphangwa za Mulungu.

Cinthu cinakomerwa na ife kakamwe ndi kukhala pabodzi na axamwali athu. Mbwenye toera iwo akhale axamwali adidi, asafunika kufuna Mulungu. Ndimomwene kuti anthu anango nee asadziwa Yahova. Mbwenye iwo angafuna kudziwa pya iye, ife tinakwanisa kuaphedza. Natenepa iwo angafuna Yahova ninga ife, penepo iwo anadzakhalambo axamwali athu a pantima.

Pana njira inango yakudzindikira xamwali wadidi. Onesesa mwadidi pinthu pinacita iye. Kodi iye asakomerwa kusingirira anango angamala mbaseka? Mwandimomwene pyenepi nee ndi pyadidi. Kodi ndzidzi onsene iye asacita pinthu pyakuti pisabweresa nyatwa? Mwandimomwene ife nee tinacitambo pinthu ninga pyenepi pabodzi na iye, thangwi tisadziwa kuti pinatibweresera nyatwa. Kodi iye asacita pinthu pyakuipa nakufuna mbanyerezera kuti ndi wakucenjera kakamwe thangwi nee aphatika? Maseze akhonde phatika, Mulungu aona pinthu pidacita iye. Usaona kuti anthu anewa athema toera akhale axamwali athu?—

Tende tione pabodzi pinalonga Bhibhlya kuti axamwali asakhuya tani umaso wathu. Pa lemba ya 1 Akorinto kapitulu 15, vesi 33. Khala waigumana isalonga tenepa: “Lekani kunyengezwa. Kucita uxamwali na anthu akuipa kusafudza makhaliro adidi.” Pyenepi pisabveka kuti tingafamba na anthu anacita pinthu pyakuipa, ife tinacitambo pibodzi pyene. Mbwenye axamwali adidi anatiphedza toera kucita pinthu pyadidi.

Leka kuduwala kuti Munthu wakufunika kakamwe kuna ife ndi Yahova. Mwandimomwene ife nee tisafuna kuluza uxamwali wathu na Yahova. Natenepa, tisafunika kucita uxamwali basi ene na ale anafuna Mulungu.