Ndi Api Abale Athu?

NTSIKU inango Mpfundzisi Wankulu acita mbvundzo: “Mbani mai wanga, pontho mbani abale anga?” (Mateu 12:48) Usadziwa ntawiro wa mbvundzo unoyu?— Panango usakumbuka kuti mai wace Yezu akhacemerwa Mariya. Mphapo usadziwa kuti abale ace Yezu akhacemerwa tani?— Kodi iye akhalimbo na abale aakazi?—

Bhibhlya isalonga kuti abale ace Yezu akhali: “Tiyago, Zuze, Simau na Yuda.” Bhibhlya isalongambo kuti Yezu akhali na abale ace aakazi mu ndzidzi ukhamwaza iye mphangwa. Yezu akhali nkulu kupiringana abale ace onsene.—Mateu 13:55, 56; Luka 1:34, 35.

Kodi abale ace Yezu akhalimbo anyakupfundzace?— Bhibhlya isalonga kuti pakutoma abale ace “nee akhanʼkhulupira.” (Juwau 7:5) Mukupita kwa ndzidzi, Tiyago na Yuda adzakhala anyakupfundzace, pontho iwo alemba mabukhu anango a m’Bhibhlya. Usadziwa kuti ndi mabukhu api?— Ndi bukhu ya Juwau na ya Yuda.

Maseze Bhibhlya nee isalonga madzina a abale ace Yezu aakazi, mbwenye tisadziwa kuti akhali nawo, awiri. Panango akhalimbo na abale ace anango aakazi. Kodi iwo adzakhala atowereri ace?— Nee tisapidziwa, thangwi Bhibhlya nee isalonga pyenepi. Mphapo usadziwa kuti thangwi yanji Yezu acita mbvundzo wakuti: “Mbani mai wanga, pontho mbani abale anga?”— Tende tione.

Mu ndzidzi ukhapfundzisa Yezu anyakupfundzace, pafika munthu m’bodzi mbampanga: “Mai wanu na abale anu ali kunja, asafuna kulonga na imwe.” Yezu abandza mwai unoyu toera kuapfundzisa cinthu cakufunika kakamwe. Na thangwi ineyi, iye acita mbvundzo uyu wakufunika: “Mbani mai wanga, pontho mbani abale anga?” Iye athonya anyakupfundzace mbalonga: “Ona, mai wanga na abale anga ndi awa!”

Buluka penepo, Yezu abvekesa mwadidi mafala anewa mbalonga: “Thangwi ule anacita pinafuna Babanga wakudzulu, unoyu ndiye mʼbale wanga wamamuna, wankazi na mai wanga.” (Mateu 12:47-50) Pyenepi pisapangiza kuti Yezu akhafuna kakamwe anyakupfundzace. Kuna iye, anyakupfundzace akhali ninga abale ace aamuna, aakazi na mai wace.

Mu ndzidzi unoyu, abale ace Yezu akuti ndi Tiyago, Zuze, Simau na Yuda nee akhakhulupira kuti Yezu ndi Mwana wa Mulungu. Pisaoneka kuti iwo nee akhakhulupira mafala adalonga anju Gabhriyeli kuna mai wawo. (Luka 1:30-33) Na thangwi ineyi, panango iwo atsalakana Yezu mwakuipa. Munthu anacita pinthu ninga pyenepi nee ndi m’bale wandimomwene. Alipo munthu anadziwa iwe wakuti atsakalana mwakuipa m’bale wace?—

Bhibhlya isalonga pinthu pidacitika kuna Izau na Yakobe. Ntsiku inango Izau aipirwa kakamwe mbalonga: “Ndinadzapha mʼbale wanga Yakobe.” Mai wawo Rabheka agopa, na thangwi ineyi, apanga Yakobe kuti athawe toera akhonde kuphiwa na Izau. (Genesi 27:41-46) Mbwenye pidapita pyaka pizinji, Izau acinja makhaliro ace. Iye akhumbatira Yakobe mbampswompswona.— Genesi 33:4.

Mukupita kwa ndzidzi, Yakobe adzakhala na ana 12. Ana adatoma kubalwa nee akhafuna ngʼono wawo Zuze, iwo akhancitira bibvu, thangwi Zuze akhafuniwa kakamwe na pai wawo. Na thangwi ineyi, iwo agulisa Zuze kuna anthu akhagula mabitcu mbaenda naye ku Ejitu. Buluka penepo, iwo aenda kapanga pai wawo kuti Zuze aphiwa na cinyama ca ntsanga. (Genesi 37:23-36) Kodi pinthu pidacita iwo pikhali pyadidi?—

Mukupita kwa ndzidzi, abale ace Zuze atcunyuka pinthu pidacita iwo. Na thangwi ineyi, Zuze aalekerera. Pidacita iye pyenepi, Zuze acita pinthu ninga pidacita Yezu. Mphapo Yezu acitanji?— Pikhali iye pangozwi, anyakupfundzace anthawa, pontho Pedhru afika mpaka pakulonga kuti nee asandziwa. Mbwenye ninga Zuze, Yezu aalekerera.

Tinakwanisambo kupfundza thangwi ya Kaini na Abheli akuti akhali ubale wawo. Mulungu aona kuti Kaini nee akhafuna m’bale wace. Na thangwi ineyi, Mulungu apanga Kaini kuti akhafunika kucinja makhaliro ace. Khala Kaini mwandimomwene akhafunadi Mulungu, mbadatawira uphungu udapaswa iye. Mbwenye Kaini nee akhafuna Mulungu. Ndi thangwi yace, ntsiku inango iye apanga Abheli: “Tende kumunda.” Abheli atawira kuenda naye. Pikhali iwo m’munda, Kaini amenya m’bale wace mbamupha.—Genesi 4:2-8.

Bhibhlya isalonga kuti tisafunika kupfundza pinthu pyakufunika kakamwe thangwi ya pinthu pyenepi pidacitika. Ndi pinthu pipi?— “Mphangwa zidabva imwe kubulukira pakutoma ndi izi: Tisafunika kufunana unango na ndzace; nee tisafunika kukhala ninga Kaini, mwana wa Nyakuipa wakuti apha mʼbale wace.” Natenepa, abale asafunika kufunana. Iwo nee asafunika kukhala ninga Kaini.—1 Juwau 3:11, 12.

Thangwi yanji nee tisafunika kukhala ninga Kaini?— Thangwi Bhibhlya isalonga kuti iye ndi “mwana wa Nyakuipa,” Sathani, Dyabo. Nakuti Kaini acita pinthu ninga Dyabo, natenepa, Dyabo adzakhala ninga pai wace.

Wabvesesa kuti thangwi yanji usafunika kufuna abale ako?— Ungakhonda kuafuna ukutowezera ana api?— Ukutowezera ana a Dyabo. Iwe usafuna kukhala mwana wa Sathani?— Mphapo, unapangiza tani kuti usafuna kukhala mwana wa Mulungu?— Unapangiza pyenepi ungafuna abale ako.

Mphapo ufuni ninji?— Ufuni ndi mabvero a muntima akuti asaticitisa toera kucitira anango pinthu pyadidi. Tinapangiza kuti tisafuna anango tingakomerwa nawo, pontho tingaacitira pinthu pyadidi. Ndi abale api akuti tisafunika kuafuna?— Mwakubvera na pidapfundzisa Yezu, ndi anthu ale akuti asacita khundu ya ubale wathu Wacikristu.

Kodi ndi pyakufunikadi kufuna abale na alongo anewa Acikristu?— Bhibhlya isalonga: “Ule anakhonda kufuna mʼbale wace anaona iye, anacimwana kufuna Mulungu, wakuti iye nkhabe kumuona.” (1 Juwau 4:20) Na thangwi ineyi, nee tisafunika kusankhulana mu mpingo. Mbwenye tisafunika kufuna onsene. Yezu alonga: “Imwe mungafunana unango na ndzace, anthu onsene anadzindikira kuti ndimwe anyakupfundza anga.” (Juwau 13:35) Iwe usafuna abale na alongo onsene?— Kumbuka kuti ungakhonda kucita pyenepi, nee unakwanisa kufuna Mulungu.

Tinapangiza tani kuti mwandimomwene tisafuna abale na alongo athu?— Khala tisaafuna nee tinacalira kucedza nawo. Tingacita pyenepi, tinadzakhala na uxamwali na abale na alongo onsene. Ndzidzi onsene tinaatsalakana, pontho tinaapasambo pire piri na ife. Pontho angathimbana na nyatwa ife tinaaphedza thangwi ndi abale athu.

Tingafuna abale na alongo athu na ntima onsene, pinapangizanji?— Pinapangiza kuti ndife anyakupfundza a Yezu, Mpfundzisi Wankulu. Kodi nee ndi pyenepi pinafuna ife?—