Thangwi Yanji Tisafunika Kuphata Basa?

KUSENDZEKA na kuphata basa ndi cinthu cipi cinakomerwa na iwe kakamwe?— Kulonga undimomwene, kusendzeka nee ndi kwakuipa. Bhibhlya isalonga kuti mu Yerusalemu ‘aphale na atsikana azinji akhasendzeka m’mbuto zikhagumanyikana anthu mu nzinda.’—Zakariya 8:5.

Mpfundzisi Wankulu akhakomerwa kakamwe pikhaona iye anapiana mbakasendzeka. Mbwenye mbadzati kubwera pa dziko yapantsi iye alonga: ‘Ine ndikhali dhuzi na Mulungu ninga nyabasa waluso, ndzidzi onsene ine ndikhatsandzaya pamaso pace.’ Mafala anewa asapangiza kuti iye akhaphata basa pabodzi na Yahova kudzulu. Yezu pikhali iye kudzulu alonga: ‘Ine ndikhakomerwa kakamwe na ana a anthu.’ Ninga pidapfundza ife, Mpfundzisi Wankulu akhakomerwa kakamwe na anthu kuphatanizambo anang’ono.—Misangani 8:30, 31.

Yezu pikhali iye mwana akhasendzekambo?— Pisaoneka kuti akhasendzeka. Mbwenye nakuti akhaphata basa pikhali iye kudzulu, kodi iye aphatambo basa pikhali iye pa dziko yapantsi?— Yezu midzidzi inango akhacemerwa “mwana wa mesiri wakupala matabwa,” mbwenye midzidzi inango anthu akhancemera “mesiri wakupala matabwa.” Pyenepi pisapangizanji?— Pisapangiza kuti Zuze adakuza Yezu ninga mwanace, ampfundzisa basa yakupala matabwa. Natenepa, Yezu adzakhalambo mesiri wakupala matabwa.—Mateu 13:55; Marko 6:3.

Yezu akhaphata tani basa yace yakupala matabwa?— Nakuti Yezu akhacemerwa nyabasa waluso kudzulu, pyenepi pisapangiza kuti iye akhacita pinthu munjira yadidi kakamwe. Kodi pikhali iye pa dziko yapantsi akhacitambo mwadidi basa yace yakupala matabwa?— Mu ndzidzi unoyu basa yakupala matabwa ikhali yakunentsa. Pisaoneka kuti Yezu akhafunika kugwisa miti mbaigwanda-gwanda, mbaikwata mbaenda nayo kunyumba, buluka penepo, mbacita meza, mabhanko na pinthu pinango.

Usanyerezera kuti Yezu akhatsandzaya na basa ineyi?— Kodi iwe mbudatsandzayambo khala usakwanisa kusasanya meza yakubalika, makadera na pinthu pinango toera anthu apiphatisire?— Bhibhlya isalonga kuti mphyadidi ‘kutsandzaya na basa inaphata ife.’ Kutsandzaya kunakhala na ife thangwi yakuphata basa ndi kwakusiyana na kutsandzaya kunakhala na ife tingasendzeka.—Ekleziaste 3:22.

Kuphata basa kusaphedza toera kunyerezera mwadidi na kukhala na ungumi wadidi. Anapiana azinji asakomerwa kakamwe na kusendzeka, pontho na kucedza na axamwali awo. Pyenepi pisaacitisa kukhala akupolola, mbakhonda kuphata basa, pontho nee asakhala akutsandzaya. Mphapo tisafunika kucitanji toera tikhale akutsandzaya?—

Mu Nsolo 17 wa bukhu ino, tapfundza kuti kupasa na kucita pinthu toera kuphedza anango kusatsandzayisa. (Mabasa 20:35) Bhibhlya isalonga kuti Yahova ndi “Mulungu wakutsandzaya.” (1 Timoti 1:11) Ninga pidaleri ife mu bukhu ya Misangani, Yezu ‘ndzidzi onsene akhatsandzaya pamaso pa Mulungu.’ Thangwi yanji Yezu akhali wakutsandzaya?— Thangwi ibodzi idalonga iye ndi yakuti: “Babanga asapitiriza kuphata basa mpaka lero, inembo ndisapitiriza kuphata basa.”—Juwau 5:17.

Pikhali iye pa dziko yapantsi, Yezu nee aphata basa yakupala matabwa mu umaso wace onsene. Yahova Mulungu ampasa basa yakufunika toera aicite pa dziko yapantsi. Usaidziwa kuti ikhali basa ipi?— Yezu alonga: “Ndisafunikambo kumwaza mphangwa zadidi za Umambo wa Mulungu . . . thangwi ine ndatumwa toera kucita pyenepi.” (Luka 4:43) Midzidzi inango Yezu pikhamwaza iye mphangwa kuna anthu, iwo akhankhulupira, pontho akhapangambo anango pidabva iwo ninga pidacita nkazi uyu wa ku Samariya anaona iwe pa foto.—Juwau 4:7-15, 27-30.

Yezu akhaona tani basa ineyi? Kodi iye akhakomerwa nayo?— Iye alonga: “Cakudya canga ndi kucita pinafuna ule adandituma, mbandimalisa basa yace.” (Juwau 4:34) Kodi iwe usatsandzaya kudya cakudya cinakomerwa na iwe kakamwe?— Pyenepi pisapangiza kuti Yezu akhakomerwa kakamwe na basa idampasa Mulungu toera aicite.

Tingapfundza kuphata basa tisakhala akutsandzaya. Yahova aticita tenepo. Iye alonga kuti muoni Udapereka iye kuna anthu ndi toera ‘atsandzaye na basa yawo yakuwanga.’ Natenepa, ungapfundza kuphata basa kutomera uwana wako unakhala wakutsandzaya mu umaso wako onsene.— Ekleziaste 5:19.

Ndimomwene kuti mwana nee asakwanisa kuphata basa ninga inaphata nkulu. Mbwenye pali na mabasa anango akuti tonsene tinakwanisa kuacita. Panango anyakubala ako asaphata basa ntsiku zonsene toera agumane kobiri yakugula cakudya na kupagari nyumba inakhala imwe. Pontho toera kucenesa panyumba na kupaka mwadidi pinthu ndi basa ikulu.

Ndi mabasa api akuti unakwanisa kuacita toera kuphedza anthu onsene a panyumba panu?— Iwe unakwanisa kupukuta meza, kutsuka maparato, kutaya lixo, kucenesa mbuto inagona iwe na kukoya pa mbuto yadidi pinthu pinasendzeka na iwe. Panango mabasa anewa usaacita kale. Mwandimomwene, mabasa anewa asaphedza kakamwe anthu a panyumba panu.

Tende tione kuti basa inacita iwe isaphedza tani anyakubala ako na abale ako. Ungamala kusendzeka na mabhoneka ako usafunika kuakoya pa mbuto yadidi. Thangwi yanji kucita pyenepi ndi pyakufunika?— Thangwi pinaphedza toera n’nyumba mukhonde kukhala na pinthu balala, pontho toera pikhonde kuphekesa anango. Ungakhonda kukoya pa mbuto yadidi pinthu pinasendzeka na iwe, ntsiku inango panango mai wako anapita n’nyumba na pinthu m’manja mbaponda cibodzi, panango pyenepi pinan’gwegwedusa mbagwa, mbaphekeka. Panango anaphekeka mpaka kuenda kuxipitari. Usaona tani, pinthu pyenepi ndi pyadidi?— Natenepa ungamala kusendzeka na mabhoneka ako, mbuakoya pa mbuto yadidi, pyenepi pinaphedza anthu onsene.

Anapiana ali na mabasa anango akuti asaacita. Mwacitsandzo, iwo asapaswa mabasa kuxikola toera kuenda kacita kunyumba. Kuxikola iwo asapfundza kuleri. Anapiana anango asakomerwa na kuleri, mbwenye anango asaona kuti ndi pyakunentsa. Maseze pikhale pyakunentsa pakutoma, mbwenye unatsandzaya ungapfundza kuleri mwadidi. Ungadziwa kuleri, iwe unakwanisa kupfundza pinthu pizinji pyadidi. Pontho iwe unakwanisa kuleri wekhene bukhu ya Mulungu, Bhibhlya. Natenepa ungacita mwadidi basa inapaswa iwe kuxikola toera kuicita panyumba, nee ndi pyadidi?—

Pali na anthu anango akuti nee asakomerwa kuphata basa. Panango alipo anadziwa iwe. Nakuti Mulungu aticita toera tiphate basa, tisafunika kukomerwa na basa. Kodi Mpfundzisi Wankulu akhakomerwa na basa ikhacita iye?— Basa ikhacita iye ikhali ninga cakudya cace cakufunika kakamwe. Ndi basa ipi ikhacita iye?— Kulonga na anango thangwi ya Yahova Mulungu, pontho mbadakwanisa tani kugumana umaso wakukhonda kumala.

Mphapo ninji pinafuna kutiphedza toera tikomerwe na kuphata basa? Bvundzikani: ‘Thangwi yanji ndisafunika kucita basa ineyi?’ Tingadziwa kuti cinthu cinafuna ife kucita ndi cakufunika, pisakhala pyakukhonda nentsa kucicita. Natenepa, mwakukhonda tsalakana khala basa inafuna iwe kucita ndi ikulu peno ndi ing’ono, icite mwadidi. Ungacita pyenepi, unatsandzaya na kuphata basa ninga pidacita Mpfundzisi Wankulu.