Anapiana Akuti Atsandzayisa Mulungu

MAONERO ako, ndi mwana upi adatsandzayisa kakamwe Yahova?— Ndi Yezu. Tende tidinge pinthu pingasi pidacita Yezu pyakuti pyatsandzayisa kakamwe Babace wakudzulu.

Anyakubala a Yezu akhamala ntsiku zitatu toera kufika ku Yerusalemu, nzinda ukhagumanika templo ya Yahova. Yezu acemera templo ineyi ‘nyumba ya Babanga.’ Iye na anyakubalace pyaka pyonsene akhaenda ku Yerusalemu toera kugumanika pa phwando ya Paskwa.

Mu ndzidzi ukhali Yezu na pyaka 12 pyakubalwa, iye na anyakubalace akhafunika kubwerera kunyumba thangwi phwando ya Paskwa ikhadamala. Pikhabwerera iwo, alimira pa mbuto inango toera agone, penepo anyakubalace adzindikira kuti Yezu nee akhali pabodzi na iwo, nee na axamwali ace. Na thangwi ineyi, Mariya na Zuze abwerera ku Yerusalemu mwakucimbiza toera kusaka Yezu. Usanyerezera kuti iye akhali kupi?—

Iwo adzan’gumana mu templo, mbakabvesera apfundzisi na kuacita mibvundzo. Mu ndzidzi ukhacitwa iye mibvundzo, akhakwanisa kutawira. Onsene akhadzumatirwa na mitawiro yadidi ikhapereka iye. Wakwanisa kuona kuti thangwi yanji Mulungu atsandzaya na Mwanace?—

Ndimomwene kuti Mariya na Zuze pidagumana iwo Yezu atsandzaya kakamwe. Mbwenye Yezu nee akhadzudzumika na pyenepi. Iye akhadziwa mwadidi kuti templo ikhali mbuto yadidi toera kukhalamo. Na thangwi ineyi, iye aabvundza: “Imwe nkhabe dziwa kuti ndisafunika kukhala n’nyumba mwa Babanga?” Iye akhadziwa kuti templo ikhali nyumba ya Mulungu, pontho akhakomerwa kukhala mwenemo.

Buluka penepo, Mariya na Zuze akwata Yezu mbabwerera naye kunyumba kwawo ku Nazareti. Usaona kuti Yezu akhatsalakana tani anyakubalace?— Bhibhlya isalonga kuti iye ‘apitiriza kuabvera.’ M’maonero ako pyenepi pisabvekanji?— Pisabveka kuti iye akhali wakubvera. Iye akhacita pyonsene pikhapangwa iye na anyakubalace, ngakhale kuenda katunga madzi ku ncera.—Luka 2:41-52.

Nyerezera basi: Yezu akhali waungwiro, ngakhale tenepo iye akhabvera anyakubalace akuti akhali akusowa ungwiro. Kodi Mulungu atsandzaya na pyenepi?— Inde, thangwi Bhibhlya isalonga tenepa kuna ana: “Bverani anyakubala anu.” (Aefesi 6:1) Mulungu anatsandzaya kakamwe ungabvera anyakubala ako, ninga pidacita Yezu.

Njira inango yakutsandzayisa Mulungu ndi kulonga na anango thangwi ya iye. Anango asalonga kuti anapiana nee asafunika kucita pyenepi. Anthu anango pidayesera iwo kukhondesa anapiana kulonga thangwi ya Mulungu, Yezu alonga tenepa: ‘Kodi imwe nee mwaleri m’Malemba kuti: “Imwe mwacitisa kuti nkanwa mwa anangʼono na mwa akhombwani mubuluke mafala akukusimbani”?’ (Mateu 21:16) Natenepa tonsene tinakwanisa kulonga na anango thangwi ya Yahova, na kuapanga kuti ndi Mulungu wadidi kakamwe. Pyenepi pinantsandzayisa kakamwe.

Tinapfundza kupi thangwi ya Mulungu toera kupanga anango?— Tinapfundza panyumba tingaleri Bhibhlya. Pontho tinakwanisa kupfundza pinthu pizinji mbuto inagumanyikana mbumba ya Mulungu toera kupfundza. Mphapo tinadzindikira tani mbumba ya Mulungu?—

Kodi anthu asacitanji m’magereja mwawo? Kodi iwo asapfundzisa undimomwene unagumanika m’Bhibhlya? Kodi iwo asaleri Mafala a Mulungu mbacedza mwakubverana na pidaleri iwo? Usaona kuti ndi munjira ineyi inapfundza ife thangwi ya Mulungu?— Pa misonkhano yathu Yacikristu, nee usaona kuti anthu asafunika kulonga thangwi ya Mulungu?— Mphapo munthu angakupanga kuti nee usafunika kubvera pinalonga Bhibhlya, usaona kuti munthu unoyu ndi ntumiki wa Mulungu?—

Pali na cinthu cinango cakuti usafunika kucinyerezera. Bhibhlya isalonga kuti mbumba ya Mulungu ‘mbidacemerwa na dzina yace.’ (Mabasa 15:14) Nakuti dzina ya Mulungu ndi Yahova, natenepa ife tinakwanisa kubvundzisa anthu khala Yahova ndi Mulungu wawombo. Angalonga kuti nkhabe, tinadziwa kuti iwo nee ndi atumiki ace. Atumiki a Mulungu asafunika kupanga anango thangwi ya Umambo wa Mulungu. Pontho iwo asapangiza kuti asafuna Mulungu thangwi asabvera matongero ace.—1 Juwau 5:3.

Khala usadziwa anthu anacita pyenepi, ndoko ku misonkhano yawo toera ukalambire Mulungu. Bvesera mwadidi pinthu pinalongwa pa misonkhano ineyi, pontho tawira mibvundzo inacitwa pa misonkhano ineyi. Ndi pyenepi pidacita Yezu mu ndzidzi ukhali iye n’nyumba ya Mulungu. Ungacita pyenepi, unatsandzayisambo Mulungu ninga pidacita Yezu.

Usakumbuka anapiana anango analongwa m’Bhibhlya akuti atsandzayisa Mulungu?— Timoti akhali citsandzo cadidi. Pai wace nee akhatumikira Yahova. Mbwenye mai wace, Eunise, na yavu wace Loidhi ndiwo basi akhatumikira Yahova. Timoti akhabvesera pikhapfundziswa iye na iwo, pontho apfundza thangwi ya Yahova.

Timoti akhali nkulu pidaenda mpostolo Paulu kaona nzinda ukakhala iye. Iye aona kuti Timoti akhafuna kakamwe kutumikira Yahova. Na thangwi ineyi, iye aphemba Timoti kuti aende naye pabodzi toera kucita pizinji m’basa ya Mulungu. Natenepa iwo aenda mbuto zakusiyana-siyana, mbapanga anthu thangwi ya Umambo wa Mulungu, pontho thangwi ya Yezu.—Mabasa 16:1-5; 2 Timoti 1:5; 3:14, 15.

Kodi Bhibhlya isalonga basi ene pya anang’ono aamuna akuti atsandzayisa Mulungu?— Nkhabe. Mwacitsandzo Bhibhlya isalongambo thangwi ya ntsikana wang’ono wa ku Izraeli wakuti atsandzayisambo Mulungu. Mu ndzidzi ukhali iye m’maso, Asirya nee akhabverana na Aizraeli. Ntsiku inango Asirya amenyana na Aizraeli, mbakwata ntsikana unoyu ninga bitcu. Iye atumizwa kunyumba kwa nkulu wa anyankhondo akhacemerwa Namani. Ntsikana unoyu, adzakhala bitcu wa nkazi wa Namani.

Namani akhali na utenda wa matanya. Nee dotoro m’bodzi akhakwanisa kuwangisa utenda wace. Mbwenye ntsikana unoyu wa ku Izraeli akhanyindira kuti mprofeta wa Mulungu mbadawangisa Namani. Ndimomwene kuti Namani na nkazace nee akhalambira Yahova. Kodi ntsikana unoyu akhafunika kuapanga pinthu pikhadziwa iye? Khala ndiwe mbudacitanji?—

Ntsikana unoyu alonga tenepa: ‘Namani angaenda kaonana na mprofeta wa Yahova ku Izraeli, iye anawangiswa matanya ace.’ Namani abvera pidalonga ntsikana unoyu mbaenda kaonana na mprofeta wa Yahova. Iye acita pidampanga mprofeta, natenepa awanga. Buluka penepo, Namani atoma kulambira Mulungu wandimomwene.—2 Amambo 5:1-15.

Usafuna kutowezera ntsikana unoyu wa ku Izraeli mbuphedza munthu kupfundza thangwi ya Yahova na pinthu pyakuti iye anakwanisa kupicita?— Mbani anafuna iwe kuphedza?— Ndimomwene kuti pakutoma, anthu panango anapangiza kuti nee asafuna ciphedzo cako. Mbwenye iwe unakwanisa kuapanga pinthu pyadidi pinacita Yahova. Panango anthu anango anabvesera. Khala na cinyindiro cakuti Mulungu anatsandzaya na pyenepi.