Tinatsandzayisa Tani Mulungu?

TISAFUNIKA kucitanji toera kutsandzayisa Mulungu? Pana cinthu cinafunika ife kumpasa?— Yahova alonga: “Pinyama pyonsene pya ntsanga ndi pyanga.” Iye alonga pontho: “Parata ndi yanga, pontho ouro ndi yanga.” (Masalmo 24:1; 50:10; Ajeu 2:8) Ngakhale tenepo, pali na cinthu cakuti tinakwanisa kupasa Mulungu. Ndi cinthu cipi?—

Yahova atipasa mwai wakusankhula khala tisafuna kuntumikira peno nkhabe. Iye nee asatikakamiza toera kucita pinafuna iye. Cincino tende tione kuti thangwi yanji Mulungu aticita munjira yakuti tinakwanisa kusankhula kuntumikira peno nkhabe.

Usadziwa kuti robhoti ninji? Ndi makina adasasanywa toera kucita pinthu pinango pinacita anthu. Makina anewa nkhabe sankhula kucita pinthu okhene. Iwo asacita pinthu pinafuna munthu. Yahova mbadafuna, mbadakwanisa kucita ife tonsene ninga makina anewa. Natenepa ife mbatidacita pinthu pinafuna iye basi. Mbwenye iye nee aticita tenepo. Usadziwa thangwi yanji?— Pali na mabhoneka anango ninga marobhoti. Ungapfinya butau, iwo asacita pinthu mwakubverana na njira idasasanywa iwo. Kodi iwe waona kale bhoneka ninga ineyi?— Mukupita kwa ndzidzi bhoneka ineyi isanetesa. Mulungu nee asafuna kuti tim’bvere ninga marobhoti akuti acitwa tenepo toera tintumikire. Yahova asafuna kuti anthu antumikire thangwi yakunfuna na kum’bvera.

Tingabvera Babathu wakudzulu thangwi yakufuna kwathu, iye asapibva tani?— Anyakubala ako asapibva tani thangwi ya pinthu pinacita iwe?— Bhibhlya isalonga kuti: Mwana wadidi “asatsandzayisa pai wace” mbwenye mwana wakuipa “asatsukwalisa mai wace.” (Misangani 10:1) Usakwanisa kuona kuti anyakubala ako asakhala akutsandzaya ungacita pinakupanga iwo?— Mphapo asapibva tani ungakhonda kuabvera?—

Cincino nyerezera pya Babathu wakudzulu, Yahova. Iye asalonga kuti tisafunika kucitanji toera kuntsandzayisa. Fungula Bhibhlya yako pa Misangani 27:11. Pa Lemba ineyi, Mulungu asalonga: “Mwananga, khala wandzeru, pontho komeresa ntima wanga, toera ndikwanise kutawira ule anandixola.” Usadziwa kuti pisabvekanji kuxola?— Kuxola munthu pisaphataniza kunseka na kum’panga kuti nee anakwanisa kucita pire pidalonga iye kuti anakwanisa kupicita. Sathani asaxola tani Yahova?— Tende tione.

Usakumbuka kuti mu Nsolo 8 wa bukhu ino, tapfundza kuti Sathani asafuna kukhala Wakufunika Kakamwe kupiringana onsene, pontho asafuna kuti anthu am’bvere? Sathani alonga kuti anthu asalambira Yahova basi ene thangwi iye anaapasa umaso wakukhonda mala. Sathani pidamala iye kucitisa Adhamu na Eva kukhonda kubvera Yahova, iye apanga Mulungu kuti: ‘Anthu asakutumikirani basi ene thangwi musaapasa pinthu. Munganditawirisa ine ndinacitisa kuti anthu onsene akhonde kukutumikirani.’

Ndimomwene kuti mafala anewa nee asagumanika m’Bhibhlya. Mbwenye tingaleri thangwi ya Yobe pisapangiza kuti Sathani akhafuna kulonga pyenepi kuna Mulungu. Pikhali pyakufunika kakamwe kuna Sathani na Yahova toera kuona khala Yobe mbadakhala wakukhulupirika kuna Mulungu peno nkhabe. Tende tileri m’Bhibhlya pa Yobe kapitulu 1 na 2 toera tione pidacitika.

Waona kuti pa Yobe kapitulu 1, Sathani akhali kudzulu pidafika aanju kuna Yahova. Na thangwi ineyi, Yahova abvundza Sathani: “Wabuluka kupi?” Sathani atawira kuti ndikhadaenda kaona dziko yapantsi. Natenepa Yahova am’bvundza pontho: ‘Waona Yobe wakuti asanditumikira, pontho nee asacita pinthu pyakuipa?’—Yobe 1:6-8.

Sathani atawira Yahova: ‘Yobe asakutumikirani basi ene thangwi nee asatamba nyatwa. Mungan’kwatira pyonsene piri na iye mbamusiya kumpasa nkhombo, iye anakuxolani.’ Natenepa Yahova antawira: ‘Nkhabe pinthu, cita pinafuna iwe kuna Yobe, mbwenye leka kunthabusa.’—Yobe 1:9-12.

Mphapo Sathani acitanji?— Iye acitisa kuti ng’ombe na maburu a Yobe, pibiwe, pontho anyabasace aphiwe. Buluka penepo acitisa moto buluka kudzulu mbupisa mabira a Yobe na akumbizi ene. Pontho mambava aba makamelo a Yobe, mbapha anthu akhatsalakana pinyama pyenepi. Buluka penepo, Sathani acitisa mphepo ikulu mbigwisa nyumba mbipha ana 10 a Yobe akhali mwenemo. Mwakukhonda tsalakana pyenepi, Yobe apitiriza kutumikira Yahova.—Yobe 1:13-22.

Sathani na Yahova pidaonana iwo pontho, Yahova alonga kuti Yobe akupitiriza kukhala wakukhulupirika. Sathani asaka thangwi inango mbapanga Mulungu: ‘Munganditawirisa kuti ndin’thabuse, iye anakuxolani mu ndzidzi ubodzi ene.’ Natenepa Yahova atawirisa Sathani kucitisa Yobe kukhala na utenda, mbwenye ampanga kuti akhonde kumupha.

Sathani acitisa Yobe kukhala na pironda manungo ace onsene. Ipyo pikhanunkha kakamwe, pontho nkhabepo munthu akhafuna kukhala dhuzi na iye. Natenepa nkazace ampanga: “Xola Mulungu ufe pyako!” Axamwali ace abwera mbampanga kuti iye akuthabuka thangwi acita pinthu pyakuipa. Mwandimomwene mafala anewa atsukwalisa pontho Yobe. Mwakukhonda tsalakana nyatwa zenezi zikhacitisa Sathani, Yobe apitiriza kutumikira Yahova mwakukhulupirika.—Yobe 2:1-13; 7:5; 19:13-20.

Yahova apibva tani thangwi yakukhulupirika kwa Yobe?— Mwandimomwene Yahova atsandzaya, pontho mbadakwanisa kutawira Sathani kuti: ‘Waona, Yobe asanditumikira thangwi asafuna.’ Usafunambo kukhala ninga Yobe, toera Yahova apangize kuti Sathani ndi nyauthambi?— Ndi mwai ukulu kakamwe kuphedzera Yahova toera kupangiza kuti Sathani akhalonga uthambi pidalonga iye kuti anakwanisa kucitisa anthu onsene toera asiye kutumikira Yahova. Mwakukhonda penula, Yezu akhaonambo kuti unoyu ndi mwai ukulu kakamwe kupangiza kuti Sathani ndi nyauthambi.

Mpfundzisi Wankulu nee atawirisa kuti Sathani ancitise kucita pinthu pyakuipa. Mwakukhonda penula, Pai wace atsandzaya kakamwe thangwi ya pyenepi. Yahova mbadakwanisa kuyang’ana Yezu mbapanga Sathani: ‘Yang’ana Mwananga, iye apitiriza kukhala wakukhulupirika kuna ine thangwi asandifuna.’ Yezu Atsandzayambo thangwi yakutsandzayisa Babace. Pyenepi pyancitisa kupirira mpaka kufa pa muti wakusikimizira.—Ahebheri 12:2.

Usafuna kukhala ninga Mpfundzisi Wathu Wankulu mbutsandzayisa Yahova?— Pitiriza kupfundza pinafuna Yahova toera upicite, pontho iye anatsandzaya ungacita pyenepi!