Mulungu Nee Aduwala Mwanace

YEZU alira pidafa xamwali wace, Lazaro. Kodi Yahova atsukwalambo ndzidzi udathabuka Yezu mpaka kufa?— Bhibhlya isalonga kuti Mulungu ‘asatsukwala’ na pinthu pyakuipa pinacitika.—Masalmo 78:40, 41; Juwau 11:35.

Yahova atsukwala kakamwe pidaona iye Mwanace wakufunika mbafa. Mbwenye Yezu akhali na cinyindiro cakuti Mulungu nee mbadan’duwala. Na thangwi ineyi, mbadzati kufa iye alonga mafala awa akumalisa: ‘Baba, ndikupereka umaso wanga m’manja mwanu.’—Luka 23:46.

Yezu akhali na cinyindiro cakuti mbadalamuswa muli akufa, pontho nee mbadakhala ndzidzi uzinji munthumbi. Pidalamuswa Yezu muli akufa, mpostolo Pedhru alonga mafala adalembwa m’Bhibhlya thangwi ya Yezu kuti: ‘Kristu nee asiyiwa munthumbi, pontho manungo ace nee abvunda.’ (Mabasa 2:31; Masalmo 16:10) Nee papita ndzidzi uzinji toera manungo a Yezu abvunde munthumbi mbatoma kununkha.

Pikhali Yezu pa dziko yapantsi, apanga anyakupfundzace kuti iye angafa nee mbadakhala ndzidzi uzinji munthumbi. Iye alonga kuti ‘mbadaphiwa, mbwenye pa ntsiku yacitatu mbadalamuswa muli akufa.’ (Luka 9:22) Natenepa anyakupfundza nee akhafunika kudzumatirwa mu ndzidzi udalamuswa Yezu muli akufa. Kodi iwo adzumatirwa?— Tende tione.

Mpfundzisi Wankulu afa pamuti wakusikimizira, Ncixanu, cifupi na ndzidzi utatu wakumaulo. Zuze wakuti akhali mamuna wakupfuma, pontho m’bodzi wa akulu-akulu a pa Thando Yakutongera Miseru, akhali nyakupfundza wa Yezu wakuti nee akhadziwika. Pidadziwa iye kuti Yezu afa, iye aenda kalonga na Pilato ntongi Waciroma. Iye aphemba toera abuluse manungo a Yezu pamuti kuti aende kaaikhe munthumbi. Buluka penepo, akwata manungo a Yezu mbaenda nawo kumasiye kaaikha munthumbi.

Zuze aikha manungo a Yezu munthumbi, pidamala iye afunga nthumbi ineyi na mwala ukulu. Pa ntsiku yacitatu, n’Dimingu, kunja mbakudzati kuca, anyakuonera akhali pansuwo wa nthumbi. Iwo akhadatumwa na akulu a anyantsembe. Usadziwa thangwi yanji?—

Anyantsembe akhadabvambo Yezu mbalonga kuti iye mbadalamuswa muli akufa. Natenepa iwo aikha anyakuonera pa nthumbi, gopa anyakupfundzace anaba manungo a Yezu mbalonga kuti Yezu alamuswa muli akufa. Mbwenye namacibese dzuwa mbidzati buluka kwacitika citeketeke cikulu kakamwe, pontho kwaoneka ceza camphambvu pacidima. Akhali anju wa Yahova! Anyankhondo anewa akhaonera nthumbi agopa kakamwe mbacimwana kutekenyeka. Anju unoyu aenda pa nthumbi mbabulusa mwala ukhadafunga nsuwo wa nthumbi. Munthumbi nee mukhali na munthu!

Mukupita kwa ndzidzi, mpostolo Pedhru alemba thangwi ya pinthu pyenepi pidacitika kuti: “Yezu unoyu, Mulungu amulamusa muli akufa.” (Mabasa 2:32) Mulungu alamusa Yezu muli akufa na manungo ninga akhali na iye mbadzati kubwera pa dziko yapantsi. Iye alamuswa muli akufa na manungo auzimu ninga a aanju. (1 Pedhru 3:18) Natenepa toera anthu akwanise kumuona, Yezu akhafunika kukhala na manungo aunyama ninga a anthu. Kodi iye acita pyenepi?— Tende tione.

Pidabuluka dzuwa, anyankhondo alamuka mbaenda. Mbwenye Mariya Madhalena na akazi anango akuti akhali anyakupfundza a Yezu aenda kunthumbi. Mu ndzidzi ukhaenda iwo, akhabvundzana okha-okha: ‘Mbani anafuna kutibulusirambo mwala pansuwo wa nthumbi?’ (Marko 16:3) Mbwenye pidafika iwo ku nthumbi agumana mwala wabuluswa. Pontho munthumbi nee mukhali na munthu! Manungo a Yezu nee akhali mwenemu! Mu ndzidzi ubodzi ene, Mariya Madhalena abuluka nakuthamanga mbaenda kapanga apostolo a Yezu.

Akazi anango akhadasala pa nthumbi. Iwo akhabvundzana okha-okha: ‘Manungo a Yezu ali kupi?’ Mu ndzidzi ubodzi ene aonekera amuna awiri akhadabvala nguwo zakuyetimira. Amuna anewa akhali aanju! Iwo abvundza akazi anewa: ‘Thangwi yanji mukusaka Yezu pano? Iye alamuswa muli akufa. Ndokoni mwakucimbiza kapanga anyakupfundzace.’ Natenepa, akazi anewa abuluka mwakucimbiza kakamwe! Mbwenye pikhaenda iwo munjira, agumanikana na mamuna m’bodzi. Usadziwa kuti mamuna unoyu akhali ani?—

Akhali Yezu, iye aonekera kuna iwo na manungo ninga athu! Iye apangambo akazi anewa: ‘Ndokoni kapange anyakupfundza anga pyenepi.’ Akazi anewa atsandzaya kakamwe. Pidagumana iwo anyakupfundza aapanga: ‘Yezu ali m’maso! Ife tamuona!’ Mariya akhadapanga kale Pedhru na Juwau kuti munthumbi nee muli na munthu. Ninga pinapangizwa pa foto, Pedhru na Juwau aenda ku nthumbi toera akhale na cinyindiro cakuti Yezu alamuswadi muli akufa peno nkhabe. Pidafika iwo kweneko, adinga mwadidi nguwo zikhadafinikizwa Yezu, mbwenye iwo akhapitiriza basi kupenula. Iwo akhafuna kukhulupira kuti Yezu ali m’maso, mbwenye nee akhali na cinyindiro.

Namaulo a ntsiku ineyi ya Dimingu, Yezu aonekera munjira kuna anyakupfundzace awiri akhaenda ku Emausi. Yezu afamba nawo pabodzi mbakacedza, mbwenye iwo nee akwanisa kun’dzindikira thangwi nee akhali na manungo mabodzi ene ninga akhali na iye pakutoma mbadzati kufa. Mbwenye iwo akwanisa kun’dzindikira mu ndzidzi udakhala iye pantsi mbacita phembero toera kudya. Anyakupfundza anewa atsandzaya kakamwe mbathamanga nsinzo wakulapha bwerera ku Yerusalemu! Panango pyenepi pyacitika mu ndzidzi ungasi pidamala Yezu kuonekera kuna Pedhru toera kumpangiza kuti iye ali m’maso.

Ntsiku ineyi namasiku, anyakupfundza akhadagumanyikana n’nyumba, mbafunga misuwo. Mwakukhonda dikhira, Yezu aonekera pakati pawo. Mu ndzidzi unoyu, iwo adzindikira kuti Mpfundzisi Wankulu alamuswa muli akufa. Mwakukhonda penula iwo atsandzaya kakamwe!—Mateu 28:1-15; Luka 24:1-49; Juwau 19:38–20:21.

Mu ntsiku 40, Yezu akhaonekera na manungo akusiyana-siyana kuna anyakupfundzace toera kuapangiza kuti iye akhali m’maso. Buluka penepo, iye abwerera kudzulu kuna Pai wace. (Mabasa 1:9-11) Mwakukhonda dembuka, anyakupfundzace atoma kupanga anthu onsene kuti Mulungu alamusa Yezu muli akufa. Iwo akhapitiriza kulonga mphangwa zenezi, maseze anyantsembe akhaamenya na kupha anango a iwo. Anyakupfundza anewa akhadziwa kuti angafa, Mulungu mbadaakumbukira ninga pidacita iye kuna Mwanace.

Anyakupfundza anewa akutoma a Yezu akhali akusiyana kakamwe na anthu azinji lero! Thangwi madziko anango, anthu azinji angakumbuka pya kulamuswa kwa Yezu muli akufa basi ene asanyerezera pya masulo na mazai akupintarwi. Mbwenye Bhibhlya nee isalonga thangwi ya pyenepi. Iyo isalonga kuti tisafunika kutumikira Mulungu.

Tingafuna kukhala ninga anyakupfundza a Yezu, tisafunika kupanga anthu kuti Mulungu acita cinthu cadidi kakamwe, pidalamusa iye Yezu muli akufa. Nee tisafunika kugopa, maseze anthu atipange kuti anatipha. Tingafa, Yahova anadzatikumbuka mbatilamusa muli akufa ninga pidacita iye kuna Yezu.

Nee ndi pyakutsandzayisa kudziwa kuti Mulungu asakumbuka atumiki ace, pontho anadzaalamusa muli akufa?— Nakuti tisadziwa pyenepi, tisafunika kudziwambo pinafuna ife kucita toera kutsandzayisa Mulungu. Usadziwa kuti ndi pyakukwanisika kucita pyenepi?— Mu nsolo unatowera tinaona kuti tinacita tani pyenepi.