Thangwi Yanji Tisafunika Kufuna Yezu?

NYEREZERA kuti iwe uli m’bote, pontho iyo isatoma kulirima. Mbudafuna toera munthu akupulumuse?— Ndiye tani khala munthu aluza umaso wace toera kukupulumusa?— Ndi pyenepi pidacita Yezu Kristu. Mu Nsolo 37, ife tapfundza kuti Yezu apereka umaso wace ninga ciomboli toera kutipulumusa.

Ndimomwene kuti Yezu nee atipulumusa m’madzi. Mphapo iye atipulumusa tani? Usakumbuka?— Iye atipulumusa m’madawo na kufa kudatisiyira Adhamu. Maseze anthu anango asacita pinthu pizinji pyakuipa, mbwenye Yezu aaferambo. Kodi iwe mbudaikha umaso wako pangozwi toera kupulumusa anthu ninga anewa?—

Bhibhlya isalonga: “Mphyakunentsa kuti munthu afere munthu wakulungama; mbwenye thangwi ya munthu wadidi, panango munthu anaperekeka toera kunfera.” Pontho Bhibhlya isalonga kuti Yezu “afera anthu akudawa,” kuphatanizambo anthu akuti nee asatumikira Mulungu! Kusiyapo pyenepi iyo isalongambo: “Kristu atifera mu ndzidzi ukhali ife anyakudawa [peno mu ndzidzi ukhacita ife pinthu pyakuipa].”—Aroma 5:6-8.

Usakumbuka munthu unango wakuti akhacita pinthu pizinji pyakuipa mbadzati kukhala mpostolo?— Mpostolo unoyu alemba: “Kristu Yezu abwera pa dziko yapantsi toera kupulumusa anyakudawa. Mwa iwo, ine ndine nyakudawa kakamwe.” Mpostolo adalonga mafala anewa ndi Paulu. Iye alonga kuti akhali munthu ‘wakusowa ndzeru,’ pontho akhacita “pinthu pyakuipa.”—1 Timoti 1:15; Tito 3:3.

Mwandimomwene Mulungu apangiza ufuni ukulu kakamwe pidatuma iye Mwanace toera kudzafera anthu ninga anewa! Usaona tani ukwate Bhibhlya yako toera tileri pabodzi thangwi ya pyenepi pa Juwau kapitulu 3, vesi 16. Iyo isalonga: “Mulungu afuna kakamwe dziko yapantsi [pyenepi pisabveka anthu anakhala pa dziko] mbapereka Mwanace m’bodzi ekha, toera munthu onsene anan’khulupira akhonde kufudzwa, mbwenye agumane umaso wakukhonda mala.”

Yezu apangiza kuti asatifuna ninga munatifunira Pai wace. Panango usakumbuka kuti mu Nsolo 30 wa bukhu ino, tapfundza thangwi ya nyatwa zinango zidatamba Yezu, ntsiku idamangwa iye namasiku. Iye aendeswa kunyumba kwa Nyantsembe Wankulu Kaifa, kule kudatongwa Iye. Penepo anthu anango atoma kulonga uthambi thangwi ya iye, pontho akham’menya. Ndi mu ndzidzi unoyu udalonga Pedhru kuti nee akhadziwa Yezu. Cincino tende tinyerezere kuti tiri kweneko, pontho tiri kuona pyonsene pinacitika.

Kunja kwaca. Yezu aphupudza tenepo nee kugona. Iwo aona kuti namasiku anewa nee antonga mwadidi ninga mukhafunira iwo. Natenepa, anyantsembe agumanyikana mwakucimbiza ku Thando Ikulu Yakutongera Miseru ya Ayuda toera kuntonga pontho. Iwo ampambizira pontho kuti nee asabvera Mulungu.

Buluka penepo, anyantsembe amanga Yezu mbaenda naye kuna Pilato, ntongi Waciroma. Iwo apanga Pilato: ‘Yezu nee asabvera utongi. Iye athema kuphiwa.’ Mbwenye Pilato adzindikira kuti anyantsembe akhalonga uthambi. Na thangwi ineyi, iye aapanga: ‘Nee ndikuona cinthu cakuipa cidacita iye. Natenepa ndinansudzula.’ Anyantsembe na anthu anango pidabva iwo pyenepi, akhuwa: ‘Nkhabe! Munthu unoyu mbaphiwe!’

Mukupita kwa ndzidzi, Pilato apanga pontho mbumba kuti anasudzula Yezu. Anyantsembe pidabva iwo pyenepi apanga anthu toera akhuwe kuti: ‘Imwe mungasudzula munthu uyu, munapangiza kuti nee musabverambo utongi. Mupheni.’ Anthu anewa atoma kucita uviyaviya. Usadziwa kuti Pilato acitanji?—

Pilato acita pidam’phemba mbumba. Pakutoma iye amenyesa Yezu. Buluka penepo, ampereka kuna anyankhondo toera aphiwe. Anyankhondo anewa ambvazika nkhata ya minga mu nsolo mwace, pontho ansingirira mbagodama patsogolo pace. Iwo athukulisa Yezu muti ukulu mbabuluka mu nzinda mbaenda nawo mpaka ku mbuto inacemerwa Madudu a Misolo. Kweneko iwo akhomera manja na miyendo ya Yezu pamuti wakusikimizira. Buluka penepo, iwo alimirisa muti unoyu mbasiya Yezu penepo. Iye akhabuluka ciropa, pontho akhabva kupha kakamwe.

Mbwenye Yezu nee afa mu ndzidzi ubodzi ene udakhomerwa iye. Iye akhala m’maso ndzidzi uzinji pamuti unoyu udakhomerwa iye. Akulu a anyantsembe akhanseka, pontho anthu akhapita na penepo akhalonga: “Khala ndiwe Mwana wa Mulungu, tcita pamuti wakusikimizira!” Yezu akhadziwa kuti thangwi yanji Pai wace akhadantuma toera abwere pa dziko yapantsi. Pontho iye akhadziwa kuti akhafunika kupereka umaso wace waungwiro toera ife tikwanise kukhala na umaso wakukhonda kumala. Namaulo, cifupi na ndzidzi utatu, Yezu acemera Pai wace mwakugaluza, buluka penepo afa.—Mateu 26:36–27:50; Marko 15:1; Luka 22:39–23:46; Juwau 18:1–19:30.

Yezu akhali wakusiyana kakamwe na Adhamu! Adhamu apangiza kuti nee akhafuna Mulungu thangwi nee ambvera. Pontho nee apangiza ufuni kuna ife. Thangwi ya iye, tonsene tisabalwa na madawo. Mbwenye Yezu apangiza ufuni kuna Mulungu na kuna ife. Ndzidzi onsene, Yezu akhabvera Mulungu. Pontho iye apereka umaso wace toera kumalisa nyatwa zonsene zidatomeswa na Adhamu.

Kodi iwe usapereka takhuta thangwi ya pinthu pyonsene pyadidi pidacita Yezu?— Ungacita phembero kuna Mulungu, usapereka takhuta kuna iye thangwi ya kutumiza Mwanace?— Mpostolo Paulu akhapereka takhuta kakamwe thangwi ya pinthu pidacitirwa iye na Kristu. Paulu alemba kuti Mwana wa Mulungu ‘andifuna mbaperekeka thangwi ya ine.’ (Agalata 2:20) Yezu afera iwe na ine. Iye apereka umaso wace waungwiro toera tikwanise kukhala na umaso wakwenda na kwenda. Ineyi ndi thangwi yakufunika kakamwe inaticitisa toera tifune Yezu.

Mpostolo Paulu alembera Akristu a mu nzinda wa Korinto kuti: “Ufuni wa Kristu usatikulumiza kucita pinthu.” Mphapo ufuni unoyu usatikulumiza kucita pinthu pipi? Ndi api maonero ako?— Ona ntawiro udalonga Paulu: ‘Kristu afera anthu onsene toera iwo akhale m’maso kuti acite pinafuna Ule adaafera, tayu akhale m’maso toera kucita pinafuna iwo basi.’—2 Akorinto 5:14, 15, New Life Version.

Pali na pinthu pinanyerezera iwe kuti usafunika kupicita toera kupangiza kuti usafuna kutsandzayisa Kristu?— Njira ibodzi ndi kupanga anango pinthu pinadziwa iwe thangwi ya Kristu. Nyerezera kuti uli wekha, pai wako peno mai wako nee asadziwa pinacita iwe. Pontho nee m’bodzi anakuona. Kodi iwe unaona mu televizau peno mu interneti pinthu pinadziwa iwe pyakuti nee pisatsandzayisa Yezu?— Kumbuka kuti cincino Yezu ali m’maso, pontho asaona pyonsene pinacita ife!

Thangwi inango inaticitisa kufuna Yezu ndi yakuti tisafuna kutowezera Yahova. Yezu alonga: “Baba asandifuna.” Usadziwa thangwi yanji Yahova asafuna Yezu, pontho thangwi yanji ife tisafunikambo kunfuna?— Thangwi Yezu akhali dzololo toera kufa na kucita cifuno ca Mulungu. (Juwau 10:17) Natenepa tisafunika kubvera pinatipanga Bhibhlya kuti: ‘Towezerani Mulungu ninga anace akufunika, pontho pitirizani kupangiza ufuni sawasawa ninga mudakufunirani Kristu mbaperekeka thangwi ya imwe.’—Aefesi 5:1, 2.