Kumbukani Pinthu Pidacita Yahova Na Mwanace

NYEREZERA kuti munthu akupasa muoni wadidi kakamwe. Kodi iwe unacitanji?— Basi ene unapereka takhuta ungamala mbuduwala pinthu pidakucitira munthu unoyu? Peno unakumbuka munthu unoyu na pinthu pidakucitira iye?—

Yahova Mulungu atipasa muoni wakufunika kakamwe. Iye atumiza Mwanace pa dziko yapantsi toera kudzatifera. Usadziwa thangwi yanji Yezu akhafunika kutifera?— Pinthu pyenepi pidacita Yezu ndi pyakufunika kakamwe toera kupidziwa.

Mu Nsolo 23, tapfundza kuti Adhamu adawa pidakhonda iye kubvera ntemo wa Mulungu. Nakuti Adhamu adzakhala baba wa anthu onsene, ndi thangwi yace ife tisabalwambo na madawo. Mphapo ninji pikhafunika kuna ife?— Tikhafunika kukhala na baba unango wakusowa madawo pa dziko yapantsi. Mbani adaona iwe kuti akhali wakuthema toera kukhala babathu?— Ndi Yezu.

Yahova atuma Yezu pa dziko yapantsi toera adzakhale babathu m’mbuto mwa Adhamu. Bhibhlya isalonga kuti: “‘Munthu wakutoma, Adhamu, adzakhala munthu wa umaso.’ Adhamu wakumalisa, adzakhala munthu wauzimu wakuti asapasa umaso.” Adhamu wakutoma akhali ani?— Ndi ule adacitwa na Mulungu kubulukira ku pfumbi ya mataka. Pontho Adhamu waciwiri akhali ani?— Ndi Yezu. Bhibhlya isabvekesa mwadidi pyenepi, iyo isalonga kuti: “Munthu wakutoma [Adhamu] ndi wa pa dziko yapantsi, pontho acitwa kubulukira ku pfumbi; mbwenye munthu waciwiri [Yezu] abuluka kudzulu.”—1 Akorinto 15:45, 47; Genesi 2:7.

Mulungu abulusa umaso wa Yezu kudzulu mbauikha m’mimba mwa Mariya, toera Yezu akhonde kukhala na madawo a Adhamu. Ndi thangwi yace, Yezu nee akhala na madawo. (Luka 1:30-35) Pontho pidabalwa Yezu anju m’bodzi apanga akumbizi: “Lero mwabalirwa Mpulumusi.” (Luka 2:11) Toera Yezu akhale Mpulumusi wathu, ninji pikhafuna kucitika kuna iye pakutoma?— Iye akhafunika kukula mbakhala ninga Adhamu. Natenepa Yezu mbadakhala ‘Adhamu waciwiri.’

Yezu Mpulumusi wathu anadzakhalambo, ‘Babathu Wakwenda na Kwenda.’ Ninga munacemerwa iye m’Bhibhlya. (Izaiya 9:6, 7) Nakuti Yezu ndi waungwiro, iye anakwanisa kukhala babathu m’mbuto mwa Adhamu, wakuti adzakhala wakusowa ungwiro pidadawa iye. Natenepa tinakwanisa kusankhula ‘Adhamu waciwiri’ toera akhale babathu. Mwandimomwene Yezu ndi Mwana wa Yahova Mulungu.

Toera kupangiza kuti Yezu ndi Mpulumusi wathu, tisafunika kupfundza thangwi ya iye. Usakumbuka kuti thangwi yanji tisafuna mpulumusi?— Ndi toera kutipulumusa ku madawo na kufa kudatisiyira Adhamu. Umaso waungwiro udapereka Yezu kuna ife ninga ntsembe, usacemerwa ciomboli. Yahova atipasa ciomboli toera kumalisa madawo athu.—Mateu 20:28; Aroma 5:8; 6:23.

Kodi ife tisafunika kuduwala pinthu pidaticitira Yahova na Mwanace?— Yezu apereka pitsogolero kuna atowereri ace thangwi ya cinthu cakufunika kakamwe cakuti cinatiphedza kukumbuka pinthu pidaticitira iye. Tende tione pyenepi.

Nyerezera kuti iwe uli ku Yerusalemu n’nyumba mu sala ya ndzulu. Dzuwa yadoka, pontho Yezu na apostolo ace ali pabodzi pameza. Pameza ineyi pali na mwanabira wakuotcwa, mikate na vinyu. Ceneci cikhali cakudya cakusiyana na cikhadyiwa ntsiku zonsene. Usadziwa thangwi yanji?—

Cakudya ceneci cikhaakumbusa pinthu pidacita Yahova kale kuna mbumba yace ya Izraeli, pikhali iwo mabitcu ku Ejitu. Mu ndzidzi unoyu, Yahova apanga mbumba yace: ‘Banja ibodzi na ibodzi, isafunika kupha mwanabira, pontho asafunika kukwata ciropa cace mbacikhwaza pa maaro mawiri a n’khundu mwa nsuwo wa nyumba.’ Buluka penepo alonga pontho: ‘Pitani n’nyumba, mbamudya mwanabira unoyu.’

Aizraeli acita pidapangwa iwo. Ntsiku ineyi namasiku, anju wa Mulungu apita na mu dziko ya Ejitu. Iye apha ana amuna adatoma kubalwa m’manyumba mudakhonda kukhwazwa ciropa pansuwo. Mbwenye iye nee akhalimira m’manyumba mukhadakhwazwa ciropa pansuwo. M’manyumba anewa nee mwana m’bodzi adafa. Farau mambo wa ku Ejitu agopa kakamwe thangwi ya pinthu pidacita anju unoyu wa Yahova. Na thangwi ineyi, Farau apanga Aizraeli: ‘Imwe muli akusudzuka toera kuenda. Bulukani mu Ejitu.’ Natenepa, Aizraeli akwiza pinthu pyawo pa makamelo na maburu mbaenda.

Yahova nee akhafuna kuti mbumba yace iduwale pinthu pidacita iye toera kuapulumusa. Na thangwi ineyi, iye alonga: ‘Kabodzi pa caka, imwe musafunika kukhunganya cakudya ninga ceneci cidadya imwe lero namasiku.’ Cakudya ceneci cakuti cikhali cakusiyana na cikhadya iwo ntsiku zonsene acicemera Paskwa. Thangwi namasiku anewa anju wa Mulungu nee alimira m’manyumba mudakhwazwa ciropa.—Eksodho 12:1-13, 24-27, 31.

Yezu na apostolo ace akhanyerezera pyenepi mu ndzidzi ukhadya iwo Paskwa. Mbwenye mbadzati kumalisa kudya, Yezu acita cinthu cakufunika kakamwe. Iye athamangisa Yuda, mpostolo wakuti mbadansandukira. Buluka penepo Yezu akwata nkate ubodzi mwa ire idasala, acita phembero, augwanda-gwanda, pontho apasa anyakupfundzace mbalonga: “Kwatani, dyani.” Buluka penepo iye aapanga: “Nkate uyu usaimirira manungo anga, anafuna kuperekwa thangwi ya imwe.”

Buluka penepo, Yezu akwatambo kopo ya vinyu, acita phembero inango yakupereka takhuta mbapasa onsene toera amwe, pontho alonga: ‘Mwani.’ Iye alonga pontho: ‘Vinyu iyi isaimirira ciropa canga cinafuna kudzatsanula ine mwakukhonda dembuka toera kukupulumusani ku madawo. Pitirizani kucita pyenepi ndzidzi onsene toera mundikumbukire.’—Mateu 26:26-28; 1 Akorinto 11:23-26.

Wakwanisa kuona kuti Yezu apanga anyakupfundzace kuti akhafunika kupitiriza kucita pyenepi toera ankumbukire?— Kutomera ntsiku ineyi, iwo nee mbadadyabve Paskwa. M’mbuto mwace, kabodzi pa caka iwo akhafunika kudya cakudya ceneci cakufunika kakamwe toera kukumbukira Yezu na kufa kwace. Cakudya ceneci cisacemerwa Cakudya Cancidodo ca Mbuya. Cincino cisacemerwambo Cikumbuso. Thangwi yanji?— Thangwi cikumbuso ceneci cisatiphedza toera kukumbuka pidaticitira Yezu na Pai wace, Yahova.

Nkate wa Cikumbuso usatikumbusa manungo a Yezu. Iye apereka manungo ace mwakufuna toera tikwanise kukhala na umaso wakukhonda mala. Vinyu isatikumbusanji?— Vinyu isatikumbusa kuti ciropa ca Yezu ndi cakufunika kakamwe kupiringana ciropa ca mwanabira adadyiwa pa Paskwa ku Ejitu. Usadziwa thangwi yanji?— Bhibhlya isalonga kuti thangwi ya ciropa ceneci ca Yezu, tinakwanisa kulekererwa madawo athu. Pontho madawo athu angamala nee tinabvabve kupha, kukalamba, peno kufa. Tingagumanika pa Cikumbuso tisafunika kukumbuka pyenepi.

Onsene anagumanika pa Cikumbuso asafunika kudya nkate na kumwa vinyu?— Yezu apanga ale anadya nkate na kumwa vinyu pa Cikumbuso kuti: ‘Imwe munadzacita khundu mu Umambo wanga, pontho munadzakhala m’mipando yaumambo pabodzi na ine kudzulu.’ (Luka 22:19, 20, 30) Pyenepi pisabveka kuti iwo anaenda kudzulu toera kakhala amambo pabodzi na Yezu. Natenepa basi ene ale ali na cidikhiro cakuenda katonga na Yezu kudzulu, ndiwo asafunika kudya nkate na kumwa vinyu.

Ngakhale ale akuti nee asadya nkate na kumwa vinyu asafunika agumanikembo pa Cikumbuso. Usadziwa thangwi yanji?— Thangwi Yezu apereka umaso wace kuna ife tonsene. Natenepa tingagumanika pa Cikumbuso, tisapangiza kuti tiri kupereka takhuta thangwi ya pyenepi. Pontho pa Cikumbuso ife tisakumbuka muoni wakufunika kakamwe udatipasa Mulungu.