Yezu Anakwanisa Kutitsidzikiza

PIDAKULA Yezu adziwa kuti atsidzikizwa pikhali iye mwana. Mphapo, iye acita phembero kuna Yahova mbapereka takhuta?— Yezu alonganji kuna Zuze na Mariya pidadziwa iye kuti iwo ampulumusa pidathawira iwo ku Ejitu?—

Ndimomwene kuti Yezu cincino nee ndi mwanabve, pontho nee asakhalabve pa dziko yapantsi. Mbwenye wakwanisa kudzindikira kuti anthu lero asanyerezera kuti Yezu aciri mwana, pontho aciri m’mbuto inadyeserwa pifuyo?— Pyenepi pisacitika makamaka mu ndzidzi wa Natali, mbuto zizinji tisaona mafoto anapangiza Yezu mbali mwana.

Ndimomwene kuti Yezu nee aciri pa dziko yapantsi. Mphapo iye ali m’maso?— Inde, Yahova acitisa kuti iye akhale pontho m’maso. Cincino iye ndi Mambo wamphambvu kudzulu. Mphapo asatsidzikiza tani ale anantumikira?— Pikhali iye pa dziko yapantsi, Yezu apangiza kuti iye anakwanisa kutsidzikiza ale ananfuna. Tende tione kuti iye acita tani pyenepi ntsiku inango pikhali iye mʼmwadiya na anyakupfundzace.

Dzuwa ikhadadoka, Yezu amala ntsiku yonsene mbakapfundzisa dhuzi na Bara ya Galileya. Bara ineyi ikhali ikulu ya makilometru 20 a ulaphi na makilometru 12 a ugugumi. Iye apanga anyakupfundzace: “Tendeni kuntunda unango wa bara.” Iwo akwira m’mwadiya mbatoma kuwambuka bara. Yezu akhadaneta kakamwe, na thangwi ineyi aenda nduli mwa mwadiya mbatsamisa nsolo wace pa nsago, mbatoma kugona.

Anyakupfundza nee agona thangwi yakucapa mwadiya. Pakutoma pinthu pikhali mwadidi, mbwenye mwakukhonda dikhira mphepo yatoma, iyo ikhali ya mphambvu kakamwe. Mabimbi akhathimizirika mbatoma kumenya mwadiya, pontho iwo mbutoma kudzala madzi.

Anyakupfundza akhagopa kuti mwadiya mbudalobzweka, mbwenye Yezu nee akhagopa. Iye akhagona pyace nduli mwa mwadiya. Natenepa, anyakupfundzace amulamusa mbampanga: ‘Mpfundzisi, mpfundzisi, tipulumuseni tinafa ife na mphepo.’ Yezu alamuka mbapanga mphepo na mabimbi: ‘Matamani! Pfulikani!’

Mwakukhonda dembuka mphepo na mabimbi pyathowa. Anyakupfundza a Yezu adzumatirwa kakamwe thangwi cipo akhadaona kale pyenepi. Iwo atoma kulonga: “Kodi mwandimomwene iye mbani? Iye asatonga mphepo na madzi, pontho ipyo pisambvera.”—Luka 8:22-25; Marko 4:35-41.

Kodi iwe usadziwa kuti Yezu mbani?— Usadziwa kuti mphambvu yace ikulu isabuluka kupi?— Nakuti Yezu akhali pabodzi na anyakupfundzace, iwo nee akhafunika kugopa, thangwi Yezu akhali wamphambvu kakamwe. Iye akhakwanisa kucita pinthu pyakudzumatirisa pyakuti anthu anango nee mbadakwanisa kupicita. Dikhira ndikupange pinthu pidacita iye ntsiku inango idacitika mphepo m’bara.

Papita ndzidzi pidamala kucitika mphepo m’bara. Pikhadoka dzuwa, Yezu apanga anyakupfundzace akwire m’mwadiya toera aende kuntunda unango. Mbwenye iye nee mbadaenda nawo pabodzi. Yezu aenda kuphiri toera akhale ekhene. Ineyi ikhali mbuto yadidi yakuti iye mbadakwanisa kucita phembero kuna Babace, Yahova Mulungu.

Pidamala iwo kukwira m’mwadiya, anyakupfundza a Yezu atoma kuwambuka bara. Mbwenye mwakukhonda dikhira, mphepo yamphambvu kakamwe yatoma. Dzuwa ikhadadoka, anyakupfundza a Yezu atoma kucapa, mbwenye nee akwanisa kuenda kutali thangwi mphepo ikhali yamphambvu kakamwe. Mwadiya ukhatekenyeka kakamwe thangwi ya mabimbi, natenepa iwo watoma kudzala madzi. Iwo acita pyonsene pikhakwanisa iwo toera kuwambuka, mbwenye nee akhakwanisa.

Mu ndzidzi unoyu Yezu akhali penepo basi paphiri. Iye akhala ndzidzi uzinji ekhene penepo. Na paphiri ineyi, iye akhakwanisa kuona anyakupfundzace mbakathabuka na mabimbi. Natenepa iye atcita paphiri mbaenda m’bara. Yezu akhafuna kuphedza anyakupfundzace, na thangwi ineyi atoma kufamba padzulu pa madzi mbaenda kuna iwo.

Ninji pinafuna kucitika ungayesera famba padzulu pa madzi?— Iwe unalirima. Mbwenye Yezu ndi wakusiyana na ife, iye ali na mphambvu yakupambulika. Toera kufika kuna mwadiya, Yezu akhafunika kufamba nsindzo wakulapha pang’ono. Anyakupfundza pidaona iwo Yezu mbafamba padzulu pa madzi mbaenda kuna iwo, kunja kukhatoma kuca. Iwo nee akhakhulupira pikhaona iwo. Natenepa iwo agopa kakamwe mbakhuwa, mbwenye Yezu aapanga: “Pfulikani! Ndine pano, lekani kugopa.”

Pidakwira Yezu m’mwadiya mphepo yathowa, anyakupfundzace adzumatirwa pontho. Iwo an’godamira mbalonga: “Mwandimomwene, imwe ndimwe Mwana wa Mulungu.”—Mateu 14:22-33; Juwau 6:16-21.

Nee usaona kuti iwe mbudadzumatirwambo kakamwe mbudakhalambo mu ndzidzi unoyu udacita Yezu pinthu pyenepi?— Usadziwa kuti thangwi yanji Yezu acita pirengo pyenepi?— Thangwi akhafuna anyakupfundzace, pontho akhafuna kuaphedza. Mbwenye Yezu acitambo pirengo pyenepi toera kupangiza mphambvu ikulu iri na iye, yakuti anadzaiphatisira ntsogolo angadzatonga mu Umambo wa Mulungu.

Kazinji kene lero, Yezu asaphatisirambo mphambvu yace toera kutsidzikiza atowereri ace, Sathani angayesera kuapingiza toera akhonde kulonga na anango thangwi ya Umambo wa Mulungu. Mbwenye Yezu nee asaphatisira mphambvu zace toera kutsidzikiza anyakupfundzace toera akhonde kubva kupha peno kuawangisa angabva kupha. Ngakhale apostolo ace onsene amalambo kufa. Tiyago m’bale wace Juwau aphiwa, pontho iye ene Juwau aikhwa nkaidi.—Mabasa 12:2; Apokalipse 1:9.

Lero pisacitikambo pibodzi pyene. Mwakukhonda tsalakana khala tisatumikira Yahova peno nkhabe, tonsene tisabva kupha, pontho tisafa. Mwakukhonda dembuka, mu ndzidzi unafuna kutonga Yezu mu Umambo wa Mulungu, pyonsene pinadzacinja. Mu ndzidzi unoyu, nee munthu m’bodzi anadzagopa, thangwi Yezu anadzaphatisira mphambvu zace toera kuphedza anthu onsene anambvera.—Izaiya 9:6, 7.